عفتك وعفت قلوب ممشاك

الجزء الاول







يلست سلامة في حجرتها بروحها بعدما الكل رقد ، فتحت دفترها الأزرق تنهدت و بدت تقرا منه ، وهي من عادتها كل ليلة انها لازم تقرا هالدفتر اللي فيه كل لحظة من عمرها حزينة أو سعيدة .

" سلامة .. هي الشخصية الرئيسية في القصة ، عمرها 17 سنة .. بنت حبوبة و مرحة و دمها خفيف .. اللي يشوفها يقول عنها خقاقة .. بس اللي ما يعرفها يجهلها .. من طبعها انها كتومة وايد يعني ما تحب تخبر حد عن اللي يظايقها .. و هي الأكبر من بين خوانها و خواتها "

فتحت سلامة أول صفحة .. و ابتسمت و هي تقرا هالذكرى ::
- الحصة السابعة (( رياضيات )) ..
* المس :: يالله يا بنات كل وحدة تستعمل مخها و تفكر بالمسألة 
* سلامة :: مس .. لا يوجد مخ هع هع هع
* المس :: سلامة ممكن بلا مصخرة ..
* سلامة :: اوكيه مس من عيوني ..

سلامة في خاطرها :: آه لو ترد هالأيام الحلوة .. كيف كنتي يا سلامة و كيف صرتي .. الله يسامح اللي كان السبب . الله يسامحه بس ..

وهي تقرا .. دخل عليها اخوها * عبد الله * .. 
* عبد الله :: سلامي .. ما رقدتي للحين ؟
* سلامة :: و انت تجوفني راقدة ؟
* عبد الله :: هههه .. المهم ما علينا .. متى بترقدين ..
* سلامة :: مادري .. ليش تبا مني شي ؟
* عبد الله :: الصراحة .. هيه 
* سلامة :: آمــر
* عبد الله :: ما يأمر عليج عدو .. بس بغيت أقولج شي .. 
* سلامة :: انزين قول ..
* عبد الله :: بغيتج تقولين له امي اني ابا فلوس ..
* سلامة :: شحقه ؟؟ و انت ليش ما تقول لها ..
* عبد الله :: لأنها ما بطيع .. بعدين أبا الفلوس الحين ظروووري .. 
* سلامة :: انت قول لي حق شو تباهم و انا بقولها تعطيك .. و إلا جيه لا تحلم ..
* عبد الله :: افف منج .. انزين بقولج بس يويلج ان قلتي الها ..
* سلامة :: ان شاء الله ما بقولها ... يالله قول .. تراك ذليتني 
* عبد الله :: ما عاش من ذلج .. اتفقنا انا والربع انا نشتري دراجة .. كل واحد اييب مبلغ معين ونشتريها ..
* سلامة :: نـــعم؟؟ و ليش ان شاء الله .. يوم انه السالفة جيه لا تحلم اقول لها .. 
* عبد الله :: سلامي فديت روحج .. الله يخليج قولي الها .. تبين تحرقين ويهي جدام الربع .. أهون عليج
* سلامة :: عبود انت مينون .. لو استوى فيك شي .. انا شو بسوي ..
* عبد الله :: لا تسوين شي و بعدين انتي ....
قاطعته سلامة .. :: عبد الله فكر عدل .أخاف يستوي فيك شي و انا أكون السبب .. يكفي فقدت انسان غالي .. مابا أفقد الثاني .. و بعدين انت ما تسمع عن الحوادث اللي تستوي بسبب الدراجات ... اسمحلي عبود .. فكر واقنع ربعك .. و إذا كنت تبا الفلوس عشان هالشي .. اسمحلي .. 
* عبد الله :: يعني ما بتقولين الها تعطيني ؟
* سلامة :: لأ .. و السموحة منك
* عبد الله :: اووكي يا سلامة .. و أنا اللي ظنيت انج بتفهميني بس ما عليه .. (( و طلع من حجرتها(( 
* سلامة :: مينون هالولد .. خله برايه بيزعل و بيرضى باجر .. خلني ارقد احسن لي ..

" عبد الله .. أخو سلامة .. عمره 15 سنة .. متهور و متسرع دايما .. اللي ف راسه يسويه .. و ما يهمه اللي بيصير بعدين .. متعلق ف أخته سلامة وايد ما يخش عنها شي .. بس مرات يخور و يقعد يتظارب وياها وويا خوانه "

----------------------------------

الصبح _ الساعة 7 ..
قامت سلامة من وقت على غير العادة .. لأنها ما قدرت ترقد عدل .. وراحت لحجرة اخوها عبد الله تجوفه لو موجود و إلا لأ .. لأنها تعرف أخوها عنيد و راسه يابس و اكيد بيسوي شي ..
دقت سلامة باب الحجرة بس محد فتح الها .. بعد ما ملت من كثر ما ادق الباب .. فتحته .. و لقت اخوها عبد الله راقد ..
* سلامة :: عبود .. عبوود قوووم .. (( هو كان قايم بس كان مطنشها )) عبود يالثور أعرف انك واعي ..
* عبد الله :: خيييير شو تبين ؟؟
* سلامة :: ليش ترمسني جيه .. اوكي ما عليه هذا يزاي اني يايه اعطيك الفلوس .. (( و قامت بتطلع من الحجرة )) 
نقز عبد اله من شبريته و راح الها ..
* عبد الله :: صـــــدق ؟؟ يبتي الفلوس .. من وين ؟؟ و كم ؟ و شو قلتي له امي ؟؟
* سلامة :: و انته شو عليك .. يود 300 و بسسس ..
* عبد الله :: شو 300 بشتري حلاوة انا ,, 
* سلامة :: خلاص هاتهم .. وفرت علي ..
* عبد الله :: ما تصدق .. خلاص اوكي مشكورة
* سلامة :: العفوو .. بس يويلك ان درت امي ..
* عبد الله :: اطمني محد بيدري .. بس مشكلة لو حمود عرف .. الله يعين ..
* سلامة :: هيييه كيف راحت عن بالنا ..
* عبد الله :: خلاص مب مشكلة بعدين بنفكر .. خلاص اطلعي ابا ارقد ..
* سلامة :: يا ويهك شكلك ما رقدت طول الليل تفكر بالفلوس ..
* عبد الله :: هيه و الله صدقج ..
* سلامة :: اوكي بخليك يالله ارقد .. 
(( وطلعت سلامة من الحجرة )) .. و هي طالعة كانت رايحة المطبخ بتسويلها شي تاكله .. الا شوي يرن التلفون .. 
سلامة :: بسم الله .. منو هاللي متصل الحين .. عنبوه ما يعرفون ان العالم راقدين .. ههه و انا شو موعيني ههه ..
راحت سلامة ترفع السماعة ..
* سلامة :: ألــو ؟!
* .... :: السلام عليج ..
* سلامة :: و عليك السلام .. منو وياي ؟
* ... :: أفا .. ما عرفتيني ؟
* سلامة .. باستغراب :: لا و الله ما عرفتك اخويه .. منوو؟
* .... :: أكيد ما بتعرفيني .. مرت سنتين .. أنا ...... يا سلامة 
( طاحت السماعة من ايد سلامة .. وانصدمت يوم عرفت منو المتصل .. " مستحيل .. مستحيل يكون هو .. بس كيف .. كيف عرف الرقم .. وشو يبا مني ؟؟" .. خافت سلامة وراحت قفلت السماعة حتى من دون ما تكلمه .. و ركضت لحجرتها ..(



الجزء الثاني ...





-----------------
سلامة كانت يالسة في حجرتها و تفكر ..
سلامة :: هذا شو يبا مني ؟ شو اللي خلاه يتذكرني بعد سنتين ؟ لا يكون يبا يرد لي .. لا مستحيل ولا يحلم .. هو جرحني مرة و ما بخليه يعيدها ..

قطع تفكيرها دخول اختها * ميثة * لحجرتها ..
* ميثة :: صــباح الخير ..
* سلامة و لا جنه حد يرمسها .. :: ......... في عالم ثاني ..
* ميثة :: حوووه وين وصلتي .. أرمسج أنا ..
* سلامة توها انتبهت انه حد يرمسها :: بسم الله .. شو تبييين انتي من وين طلعتي ؟
* ميثة :: من القبر .. من وين يعني .. المهم ما علينا .. متى نشيتي ؟
* سلامة :: من الساعة 7 حليلي .. أبا أرقـــــد
* ميثة :: شو ترقدين ما شبعتي رقاد .. البارحة من الساعة 9 و انتي راقدة .. حشا دياية .. أحيد انه الحكومة ايمعون الدياي من البيوت ماشلوج وياهم خخخخخ
* سلامة :: ميثووه أحسن لج .. مب فايقتلج أنا .. تبين شي قولي ما تبين هويني شوي أبا أيلس بروحي ..
* ميثة :: خيييبة .. خلاص خلاص لا تعصبين بس بغيت أقولج انه اليوم عندنا عزيمة بيت عمي خالد .
* سلامة :: شو المناسبة .. هييل كل يوم عندهم عزيمة ..
* ميثة :: حمد ولد عمي رد من السفر البارحة و هالعزيمة مالته ..
* سلامة :: اففف . انزين يصير خير .. يالله خليني بروحي ممكن؟
* ميثة :: لأ ... (( خزتها سلامة بنظرة خلتها تغير كلامها )) أقصد هيه الحين بطلع (( وشردت برة الحجرة(( 

" ميثة .. الاخت الثانية عمرها 13 لسانها طويل ومحد يفتك من حشرتها . تحب اطفر الناس وتلعب بأعصابهم .. وأكثر وحدة مبتلشة فيها هي أمها .. والمسات في المدرسة دومهم يشتكون عليها من طولة لسانها .. و هي معروفة في الإدارة "

---------------

في بيت العم " خالد " كان الكل محتشر عشان العزيمة .. بس في وحدة كانت معصبة عشان ما عندها شي يديد تلبسه منو هي ؟

في حجرة ريم ..
* ريم :: ياربييي أنا شو بلبس اليوووم ؟ أنا اقول له امي من أسبوع وديني المول ماطيع .. ألحين العزيمة عزيمة اخويه و ما تباني ألبس شي يديد .. ياااربيي شو هالحاال ..
شوي تدخل اختها عاشة ..
* عاشة :: شو بلاج تتحرطمين جنج عيوز ..
* ريم :: عوييييش الله يخليج خبري امي توديني المووول ..
* عاشة :: الموول؟؟ شحقه ؟؟ الأسبوع اليل طاف طابه هناك .. 
* ريم :: بس ما شريت شي .. أنا ماعرف انه حمد بيي هالأسبوع و إلا كنت بشتريلي ثوب ألبسه .. حراام علييج قوليلها .. الله يخلييج
* عاشة :: عنبووه حفظوج اللي يبيعون هناك من كثر ما تسيرين المول .. بعدين اللي عندح مشيه لازم شي يديد .. عندج ثياب ماجافوها البسيها .. لازم شي يديد بقراطيسه ..
* ريم :: هيه لازم .. عزيمة اخويه هذي لازم أكشخ ..
* عاشة :: اسمحيلي انا ما بقولها روحي قولي لها انتي .. مافيه تهزأني .. 
* ريم :: مااالت و أنا اللي ظنيتج بتنقذيني بس ما عليه .. لو امي ودتني و الله ما تيين ..
* عاشة :: مابا اروح اصلا .. عندي شغل ..
* ريم :: أحسن بعد .. خلاص اطلعي 
* عاشة :: بطلع من دون ما تقولين اصلا .. (( طلعت عاشة و سكرت الباب بقو ((
* ريم :: ماالت .. كسرت الباب .. المهم ما علينا .. بروح اقردن امي عسب توديني و يااارب توافق .. (( و راحت ريم عند أمها اللي كانت مشغولة عسب تقولها انها تبا تسير المول ((

" ريم .. بنت عم سلامة .. عمرها 17 سنة .. خقاااقة و تحب تظارب ويا عيال عمها محمد 
" بو سلامة " .. همها الثياب والكشخة وهاملة دراستها ع الآخر .. كله تتظارب ويا اختها عاشة مع انها أكبر عنها بسنتين "

" عاشة .. عمرها 19 سنة .. حسااااسة زيادة عن اللزوم .. بسرعة تزعل وبالمووت ترظى .. حساسيتها الزايدة تظايق الناس وخاصة أخوها حمد .. اللي ما يحب يتعامل وياها وايد .. طيووبة وحبوبة وهي بعد هاملة دراستها بس مب كثر اختها ريم "

------------------

في بيت سلامة .. و في حجرتها بالتحديد ..
مسكت سلامة دفترها الأزرق اللي دوووم تقرا منه .. وقررت تكتب فيه اللي صار وياها الصبح .. حاولت تكتب بس ما قدرت .. تذكرت كل اللي صار قبل سنتين ..

* سلامة :: شو سويت فيني يا " راشد " .. عذبتني وياك .. اللي سويته فيني مب شويه ومستحيل أنساه .. مستحييل .. وبدت سلامة تتذكر شو استوى وياها قبل سنتين ويا راشد ..

* راشد :: سلامة بقولج شي .. بس أباج تهدين و تفهميني ..
* سلامة :: شسالفة ؟؟ صار شي ؟
* راشد :: لا ماصار شي .. بس بيصير ..
* سلامة :: بسم الله انزين قول شو السالفة ..؟
* راشد :: ربيعتج حمدة ....... قاطعته سلامة ..
* سلامة :: ربيعتي حمدة؟؟؟؟ شو بلاها؟؟؟ و انت كيف تعرفها ؟؟
* راشد :: ما بلاها شي .. و مايهم كيف عرفتها .. المهم اني ....
* سلامة :: إنك شووووو ؟؟
* راشد :: إني حبيتها ...
* سلامة انصدمت وما عرفت شو تقول :: راشد تمزح وياي انته .. أعرفها سوالفك هذي .. دومك تسوي فيني مقالب ..
* راشد :: هذا مب مقلب .. أنا أقولج الصدق .. أنا حبيت حمدة ربيعتج .. و هي بعد تحبني ..
* سلامة ماقدرت تصدق اللي تسمعه :: و أنـــا؟؟
* راشد :: انتي شو .. خلاص يا بنت الناس .. القلب عافج و حب غيرج ..
* سلامة :: راشد انت شو تقول ..
* راشد :: اللي تسمعينه .. بعدين مب انتي كنتي دوم تقولين لي " القلب وما يحب " وهذا قلبي حب غيرج .. ومن اليوم كل واحد في طريج ... يعني بالعربي .. أنا ف طريج وانتي ف طريج .. فهمتي وإلا أشرح زيادة ..
* سلامة تمت تصيح يوم سمعت كلام راشد و ماقدرت تصدق :: هذا كلامك ؟
* راشد :: هيه 
* سلامة :: صدقني يا راشد انك بتندم على كل كلمة قلتها لي .. 
* راشد :: ههههه قمنا نهدد يا سلامووه 
* سلامة :: ما عليه .. بس أحب أقولك انه " مردك لي " و قفلت السماعة ع ويهه ..

تمت سلامة تصيح يوم تذكرت هالموقف .. و قالت ف خاطرها ..
" ربيعتي خانتني ويا أعز ناسي .. خانتني ويا الشخص اللي حبيته .. ليش يا حمدة؟ انا شو سويت لج .. "

" حمدة .. كانت ربيعة سلامة روح بالروح .. و سلامة كانت دووم تخبرها عن راشد .. بس فجأة انقلبت عليها و سوت فيها اللي محد يسويه .. هو انها خلت راشد يحبها و يترك سلامة "

-----------

في بيت العم " خالد " .. كان الكل يالس ف الصالة يتغدون .. وريم يالسة عدال أمها واللي تطلبه امها تسويه .. كله عشان أمها ترضى توديها المول ..

ريم في خاطرها :: يالله هالوقت المناسب اني أطلب منها توديتي أبويه يالس هني و ما بيقول لأ .. وأبويه لو ماقال لأ امي بتوافق .. يالله يا ريم خبريها ..

* ريم :: أمي فديت روحج ..
* أم حمد :: خييير ؟؟ شو تبين ؟؟ تتفدين فيني أكيد السالفة فيها مصلحة ..
* ريم :: أفااا يا أمي .. تقولين عني جيه ..
* أم حمد :: انزين انزين قولي شو تبين ..
ريم كانت اطالع عاشة و ترمس أمها عسب تغايظها ..
* ريم :: أمي الله يخليج و يطول عمرج .. أبا أسير ....
شويه يتبطل باب الصالة و يدش شخص ..

* ...... :: ماااا علييييه تغديتوا قبلي ها ؟؟؟ 
الكل انصدم يوم جاف هالشخص اللي دخل عليهم و هم يتغدون .. و حتى ريم اللي كانت تكلم أمها ع السيرة سكتت و تموا يطالعون هالشخص ..
-------
منو تتوقعون الشخص اللي دخل عليهم ؟؟ و شو يقرب الهم 
-------
ملاحظة :: الموقف اللي استوا بين سلامة و راشد .. وحدة صار الها نفس الشي و طلبت مني أظيفه ف قصتي .. بس في أشياء أنا زدتها من عندي ..


الجزء الثالث ..







في بيت بو حمد ..
-------
تبطل باب الصالة و دش شخص .. و هالشخص كان ..
* مريم :: ما عليه تغديتوا قبلي و لا تتريون بعد ..
الكل تفاجأ يوم جاف مريم دشت .. لأنهم موول ما يجوفونها .. هي ساكنة ف راس الخيمة وريلها ماييبها عند هلها أبد ..

" مريم الاخت العودة .. متزوجة وعندها ولدين (( محمد وخليفة ..(( ريلها ريال متسلط .. يحب يتحكم فيها ومخلنها عنده جنها شغالة تربي عياله وبس .. وما يوديها بيت هلها موول .. بس مريم ما تخبر أمها عن اللي يصير وياها .. أبوها كان رافض زواجها من سالم (( ريلها )) بس هي أصرت عليه واتحدت أبوها واتزوجته .. وهي مقتنعة انه كل اللي يصير وياها لأنها اتحدت أبوها .. "

* أم حمد :: مريم بنتي وينج من زماان من شفناج .. تعالي يا بنتي .. أخبارج حبيبتي؟
* مريم :: أنا بخير يا أمي و الحمد لله .. انتي شحالج و أخبارج؟
* أم حمد :: أنا بخير دامج بخير ..

بو حمد يوم شاف بنته مريم قام وسار حجرته ولا حتى سلم عليها .. مريم يوم شافت ابوها قام حست بأنها بتصيح .. أبوها غالي عليها .. وحست بالذنب أنها اتحدته عشان واحد ما يستاهل ... بس حاولت اتخبي هالمشاعر و الأحاسيس عن الكل ..

* عاشة :: مريووم فديت روحج و الله اشتقت لج من الخااطر .. لا تلفون ولا زيارة مقاطعتنه بالقو ..
* ريم :: إلا وينهم عيالج ؟ مالهم حس ..
* مريم :: ما يبتهم وياي ..
* عاشة و ريم :: لييييييييييش؟؟
* مريم :: سالم وداهم بيت يدتهم .. و بييبهم عقب المغرب 
* ريم :: ياااا سلاااام .. نحن في السنة حسنة نشوفج و نشوف عيالج .. شحقه يوديهم هناك .. هم 24 ساعة مجابل يدتهم ..... قاطعتها امها ..
* أم حمد :: رييمووه شهالرمسة .. عيب عليج تكلمين اختج جيه .. لا تنسين انها هي بعد يدتهم و من حقها تشوف احفادها ..
* عاشة :: امي انتي بعد يدتهم و من حقج تشوفينهم .. و نحن خالاتهم و بعد من حقنا نشوفهم .. الحين تلقينهم ما بيعرفونه .. مريوم تيينا ف السنة مرة ..شو ها ؟؟ ريلها ما يحس ؟
* مريم :: اسمحولي أنا تعبانة بروح أرقد ...... (( و راحت عنهم ((
* أم حمد :: زين جيه .. البنية يايه تباكن تونسونها مب تظيقون بخلقها .. ما تستحون انتوا ..
* ريم :: أمي ما علينا الحين .. خلي سالفة مريوم لبعدين .. و أنا أبا أروح المول الحين .. اليوم عندنا عزيمة ومب أي عزيمة .. عزيمة اخويه .. يعني لازم أكشخ و ألبس ثوب يديد .. و إلا انتي شو رايج ؟
* أم حمد :: رايي انج تنجعمين و تذلفين تنظفين الميلس الحين .. روحة للمول مافي .. الاسبوع اللي طاف سرتي و خميتي المول كله .. شو تبين بعد ..
* ريم (( تسويها عمرها تصيح )) :: هيه أدريبج يا أمي .. تبين سلامووه تكون أكشخ مني .. تبين الناس يقولون بنت خالد جنها فقيرة ما عندها ثياب .. انتي ما تحبيني أعرف ....
* أم حمد :: الله يقطع شيطانج .. قومي يالله تلبسي بوديج .. بس ان أذن العصر و انتي ما خلصتي و الله ليرج من شعرج وأحطج ف السيارة ..
* ريم :: أوووووكيه أمي فديت روحج ألحين بروح أتلبس .. واللي تبينه بيصير .. (( وراحت تتلبس عسب تسير المول ((
* أم حمد :: حسبي الله عليها من بنت .. و انت عواش ما تبين شي؟
* عاشة :: لا أمي عندي شي ألبسه .. أنا بيلس ويا مريوم 
* أم حمد :: انزين يوم انج بتيلسين ف البيت خبري الخدامات ينظفون الميلس 
* عاشة :: ان شاء الله أمي ...

-------------------

و في بيت سلامة ..
كانت الساعة 1 و نص وعبد الله توه واعي من الرقاد .. وما صلى الظهر ويعرف انه بيلقى تهزيئة محترمة من أمه .. نزل الصالة شوي شوي يجوف لو حد يالس وإلا لأ .. اتأكد انه محد كان موجود .. و كان يبا يطلع من البيت .. إلا شوي ..

* ميثة :: صااادووووووه
* عبد الله كان ماسك تلفونه وبيطلع .. و يوم سمع اخته تقول جيه من الزيغة طاح عنه التلفون :: الله ياخذج يالثورة .. طيحتي قلبي .. انتي من وين طلعتي .. وين كنت أًصلا ..
* ميثة :: أنا كنت يالسة أطالعك وانت تحاول تشرد برة البيت .. بس ما عليه يا عبود و الله لخبر أمي .. تحيد هاك اليوم شسويت فيني .. برد الك اياها .. أميييييي عبود نش من الرقاد و بيظهر ألحين ..
* عبد الله :: ميثووه يالخايسة انجبي أحسن لج .. 
* ميثة :: يالخايسة بعد ها ؟؟ .... أمييي الحقي عليه ..
قبل لا عبد الله يشرد من البيت يته أمه و زخته ..
* أم عبد الله :: عبووود .. ليش قمت بعد .. سير كمل رقاد.. ترى الامام يترياك الين ما تقوم عسب يصلي وياك ..
* عبد الله :: أمي شسوي بعد .. ما رقدت إلا الساعة 7 الصبح و لو ما تصدقين اسألي سلامة ..
* أم عبد الله :: إلا سلامة و حميد وينهم مالهم حس ؟؟
* عبد الله :: سلامة أكيد ف حجرتها .. و حميد نسيتي انه ف بيت عمتي ..
* أم عبد الله :: هيه صح .. ذكرتني .. و لا تنسون إن اليوم العزيمة بيت عمكم خالد ..
* عبد الله و ميثة :: ما نسينا و لا بننسى ..
* أم عبد الله :: انزين خلاص .. ميثوه سيري اتزهبي و انت يالأخ سير صل الظهر أحسن لك ..
* ميثة و عبد الله :: إن شاء الله ....

------------

حجرة سلامة ....
بعد اللي اتذكرته سلامة .. تمت تصيح الين ما رقدت ع الدفتر مالها .. شويه قامت و جافت الساعة ..

* سلامة :: وللل الساعة 1 و أنا ما صليت .. آآآخ أحس اني تعبااانة .. افف مافيه أروح العزيمة .. و مافيه على حشرة أمي ...

قامت سلامة تغسل ويها .. صلت الظهر و نزلت الصالة تجوف أمها ... و هي نازلة سمعت التلفون يدق .. خافت وما كانت بترد .. و تتريا حد يرفع (( أخاف راشد اتصل مرة ثانية .. هذا يبا يخبلني .. يبا يسويلي مشاكل .. أنا ما برفع و لا برد .. و خل اللي يتصل يولي )) تم التلفون يدق و يدق و ملت سلامة من صوته و قررت إنها ترد .. أخيرا ..
* سلامة بطفر :: ألــــو .. خير؟؟
* حميد :: أعووذ بالله طالعة من القبر انتي .. ليش جيه ترمسين بدون نفس ..
* سلامة :: لا اله إلا الله ..
* حميد :: مبروك عليج اسلامج خخخخ ..
* سلامة :: حمود يالزفت اسكت احسن لك قول شو تبا و إلا بقفل 
* حميد :: لا تخافين ماباج انتي أبا امي ..
* سلامة :: اللي يسمع يقول انا أباك يعني .. و بعدين أمي مشغولة قول لي شو تبا منها و أنا بخبرها ..
حميد :: افففف .. انزين خلاص .. قوليلها اني اليوم عقب العزيمة برد بيت عمتي ..
* سلامة :: ليش ما عندك بيت ؟ و بعدين الناس ملوا منك ياخي هويهم خلاص ..
* حميد :: أقول .. جب جب .. خبري أمي هالشي .. و باااي
و قفل ع ويهها ..
* سلامة :: ما عليه يا حميد مردودة ..
و راحت اتخبر أمها ..

-------------------

في بيت بو حمد _ حجرة مريم ..
كانت مريم يالسة بروحها تفكر كيف انها اتحدت أبوها و خذت سالم ..
((آآه يا سالم .. تحديت أبويه وخذتك .. وشو شفت منك غير الهم والغم والإهانة .. سامحني يابوووي .. سامحني .. أنا آسفة .. مابا ف الدنيا غير رظاك .. و قالت بصوت عالي .. ودموعها ف عيونها .. 
سامحني يااا بوووي .. سامحني ..
شوي حد ياها من ورا .. و مسح دموعها و حظنها ..
-----



الجزء الرابع ..








----------
سامحني يااا بوووي .. سامحني ..
شوي حد ياها من ورا .. و مسح دموعها و حظنها ..
-----
بو حمد :: مريم بنتي .. ليش تصيحين ؟
مريم ما كانت متوقعة اني اللي بييها حجرتها ابوها :: ابويه ؟؟؟؟؟!!!
بو حمد :: هيه ابوج .. و إلا شايفة يني 
مريم :: لا حشا عليك ... 
مريم كانت ترمس و ابوها و هي مالها ويه ترفع عينها بعينه
بو حمد :: وينج عني .. ما تسألين .. أبوج حي أو ميت .. تعبان وإلا صاحي .. كم يوم صارلج بعيدة عنا .. عني و عن أمج و عن خواتج اللي أكثر شي محتاجينج .. انا أعرف بكل اللي يسويه فيج سالم .....
مريم .. قاطعت أبوها و استغربت كيف انه عرف :: ابويه و انت كيف عرفت؟
بو حمد :: مو مهم كيف عرفت .. مريم .. انا ابوج واعرف كل شي ... ويوم رفضت زواجج من سالم وأصريت انج تاخذين ولد عمج كان لصالحج ولأني أعرف مصلحتج .. بس انتي تحديتيني وخذتي هالـخايس سالم .. أعرف كيف ان سالم محول حياتج لجحيم .. مريوم تدرين ليش أنا رفضت سالم .. مع ان الكل كان يشهد له بالخير والأخلاق الزينة ؟
مريم :: ليش؟
بو حمد :: أنا وبو سالم ربع من زمــان .. وبوسالم كان بطبعه أناني ومتسلط ومتكبر.. وللأسف ولده طلع شراته .. نفس الطبع هو وأبوه .. أنا أعرفهم كلهم من أكبر واحد لين الأخير .. وأعرف كيف انه عايلتهم ما يرظون انهم ياخذون حد من برة .. عشان جيه انا خفت عليج .. وسويت عمري ماعرف سالم .. انتي الله يهديج تحديتيني .. وخذتيه .. وبالآخر جوفي شو سوا فيج ..
مريم ما استحملت كلام أبوها الأخير و بدت تصيح :: .......
بو حمد :: بس بعد كل هذا يا مريوم .. تبقين انتي بنتي اللي أحبها و أعزها و أغليها من كل قلبي .. و مستحيل أغضب عليج .. وأنا ماباج تزعلين مني و أباج تعرفين ان كل اللي صار عشان مصلحتج و بس .. و مستحيل أخلي واحد مثل سالم يحول حياتج لجحيم .. و بوقفه عند حده .. ماعاش لي يعذب بناتي و أنا حي ..
مريم :: صدق أبويه ؟؟ يعني انت الحين مب زعلان مني ؟
بو حمد :: يا خبلة في حد يزعل من بناته ؟
مريم ما صدقت الي ابوها يقوله .. وفرحت من الخاطر و لوت عليه و تمت تصيح .. بو حمد نزلت دموعه وهو يحظن بنته ..

--------------------------------------------

ف المول ..
ريم :: أمي أمي .. تعالي هالمحل ما دخلناه ..
ام حمد :: الله يقطع بليس يا ريييموووه .. ريولي تفججت .. خلاااص بنرد البيت .. لفيتي المول كله مرتين .. و بعد ما خلصتي ..
ريم :: شو فييج امي ؟؟ مسرع ما تعبتي .. و بعدين تبين سلااااموووه تكون أحسن عني .. لا تنسين انه العزيمة بتكون عودة .. ادريبج تبين سلامة تكون أحسن عني ..
ام حمد :: ريموه .. خلي عنج هالرمسة و إلا بصكج بكف جدام خلق الله .. و ها آخر محل تدخلينه شوفي لج شي .. و يالله البيت ..
ريم تتحرطم بصوت واطي :: يالله من هالأهل .. افف منهم يطفروون
ام حمد :: بسج يالعيوز و امشي جدامي ..
ريم :: انزيييييييين ..

-----------

صارت الساعة 5 و نص .. و ف بيت سلامة الكل قاعد يتزهب عشان العزيمة ..
* ميثة :: انجييييي و الصمخخخ .. ويييييينج؟؟
* أم عبد الله :: ايييه وين قاعدة انتي .. ليش تزاعجين ؟
* ميثة :: أميييي وين هذي .. أباها تكوي شيلتي ... من متى و أنا أزقرها و الحبيبة مسوتلي أكبر طاااف
* أم عبد الله :: سيري تحت و دوريها .. 
شويه و تطلع سلامة من حجرتها ..
* أم عبد الله :: ســــلامة ؟؟؟؟ بعدج ما تلبستي ؟؟
* سلامة :: أمي مالي خاطر اسير وياكم
* أم عبد الله :: سلااموه .. انتي سايرة بيت عمج مب ناس غرب عشان ما تسيرين .. شو بيقولون لو ما ييتي ويانا
* سلامة :: امي قوليلي اروح هناك شسوي؟ ايلس ويا فطوم و إلا ريموه .. كل ماسير هناك لااازم اتنااقر ويا حد .. بعدين هناك كلهم شباب .. عيال عمامي و عماتي و مادري منو .. شسوي يعني
* أم عبد الله ::: نحن ما بنام هناك .. بنيلس كم ساعة و بنرد ..
* ميثة :: أونــــة بنيلس كم ساعة .. هذا ويهي لو ما تمينا عندهم كالعادة ..
* أم عبد الله :: لا .. لا تخافين .. لو تمينا يمكن انتم بيت يدج هههههه
* سلامة و ميثة :: بــــعـــد .. أخس يعني ..
* أم عبد الله و هي تظحك على بناتها :: شو فيكن بسم الله .. يدكم هذا .. و بعدين الكل بيي هناك و بنيلس وياهم
* سلامة :: يعني بنسير بيت يدي اليوم و بنتم هناك صح ؟
* أم عبد الله :: ههههه .. هيه صح
* ميثة و سلامة كل وحدة لوت ببوزها وهن معصبات .. وسارت كل وحدة تتلبس .. عشان يسيرون العزيمة ..

------------

حمد عقب مارد من السفر .. رد البيت وارتاح شويه .. و يوم نش من الرقاد سيدة راح عنده ربعه . لأنه ما يقدر يتخلى عنهم على قولته .. أول ما نش شاف ف تلفونه 10 ميس كول وكلهم من ربعه .. تسبح و اتكشخ شخط بسيارته عند الربع ..و الحبيب كان ناسي ان عزيمته اليوم ..

في سيارة حمد ..
دق تلفون حمد و شاف الرقم غريب ..
* حمد :: منو هذا ؟؟ ماحيد حد من الربع رقمه جيه .. خله يولي ما برفع ..
و تم التلفون يدق على نفس الرقم .. مرة و مرتين و ثلاث ..
* حمد :: الله يلعنكم حرقتوا التلفون ..
و رفع حمد بعصبية ... :: ألـــــــو ؟؟؟ 
* ...... :: مرحبا .. شفيك معصب ؟؟ شوي شوي علي ..
* ...... :: السموحة .. بس منو وياي ..؟؟
-------

الجزء الخامس








------------------
* ...... :: السموحة .. بس منو وياي ..؟؟
-----
*... :: شو يا حمد مسرع ما نسيتني .. أنا سارة ..
حمد انصدم يوم عرف منو اللي اتصل فيه :: و انتي من وين يبتي الرقم ؟؟؟
* سارة :: ما يهمك من وين يبته .. المهم اني لقيته و دقيت لك ..
* حمد :: جوفي سارووه ان اتصلت مرة ثانية صدقيني ما بتشوفين خير ..
* سارة :: ههههه .. اسمع يا حمد .. تهديدك ما عاد يخوفني .. سو اللي تباه .. بس ماكون سارة لو ما خليتك تندم ع اللي سويته فيني يا حمد .. 
قبل لا اتكمل كلامها .. سكر ع ويهها الخط ..
حمد ف خاطره :: هاي شو ذكرها فيني بعد الوقت اللي مر ... و شو تبا مني .. 

))حمد اتعرف على سارة يوم كان يدرس برة .. اوهمها بانه يحبها ومافي حد غيرها.. بس حمد بطبعه كله يلعب ع البنات .. ويوم سارة صدقت جذبه .. قام وشوه سمعتها بين الكل ف الجامعة .. وخلاها ما تسوى بيزة .. بس الحين سارة ما بتخليه بترد له الحركة الي سواها فيها .. ((

-----------------------

في بيت سلامة .. 
الكل تزهب عشان السيرة .. وزهبوا شنطهم عشان بيتمون بيت يدهم .. و هم من عوايدهم انهم بعد كل عزيمة يتيمعون بيت يدهم ..

* أم عبد الله :: سلامة .. ميثة .. عبد الله .. خلصتوا و إلا بعدكم؟
* طلعت سلامة من حجرتها :: هيه انا خلصت بس مادري عن الباقي
* أم عبد الله :: و انتي شحقه لابسه اسود .. بتسيرين عزيمة مب عزا
* سلامة بصوت واطي :: العزايم و هذي بالذات بالنسبة لي عزا
* أم عبدالله :: سمعتج .. 
* سلامة :: انزين انا بتم بهالثوب مريحني ..
* ام عبد الله :: ع كيفج .. بس مالي خص لو حد قط عليج كلام ..
* سلامة :: لا تخافين عليه امي .. 

شويه يطلع عبد الله من حجرته والحبيب مستطرب ع الآاااخر .. وهو قاعد يغني ما انتبه على اخته و امه ..
* ام عبد الله :: خير ان شاء الله شفيك .. بتسير عرس .. ماشا الله واحد بيسير عرس ووحدة بتسير عزا ..

شويه تطلع ميثة من حجرتها و هي حالتها حااالة .. شعرها منكوش و بعدها ما تلبست ..
* عبد الله + سلامة :: هههههه ووحدة بتسير القبر ..
* ميثة :: جـــب .. امي كلمييييهم يطنزون علي 
* ام عبد الله :: يالله عليييج .. حليييلج انتي بريئة ما عندج لسان ادافعين عن عمرج .. و بعدين منو مسوي فيج جيه .. 
* ميثة :: يايه بعدل شعري بالاستشوار جان يتعلق .. و ثيابي بعدها الآنسة ما يابتهم
* عبد الله :: هههههههههههه .. و انا اليوم كنت بستأجر فلم رعب .. خلاص ما يحتاي ههههههه
* ميثة :: شو قصدك يالسبال ؟؟؟؟؟؟؟؟؟
* عبد الله :: قصدي واظح .. بعدين انا اخوج العود احترميني و يويلج ان قلتي سبال ..
* سلامة :: افففففففف منكم .. الحين ما بتسكتون .. امي كلميهم راسي يعورني و مافيني على حشرتهم ..
* ام عبد الله :: ميثه سيري اتلبسي .. و عبود خل اختك بحالها و يوم انك خلصت دق عند حميد و اساله لو تزهب أو لأ ..
* عبد الله :: ان شاء الله امي ..

---------------------

الكل تيمع بيت العم خالد (( بو حمد )) بس كالعادة قوم سلامة متأخرين و يو آخر شي أول ما دخلوا ما سلموا من لسان عمة سلامة (( موزة )) بس هاي مب ام حمد ..

* موزة :: خيير ان شاء الله .. انتوا دووومكم آخر ناس .. يبالكم زفة عسب تييون بسرعة .. 
* سلامة انقهرت من عمتها و قالت لها :: لا .. بس حبينا نكون مسك الختام
* موزة :: امـــحـــق .. و الظاهر نسيتوا ان عندكم عمة اسمها موزة .. لا ادقون و لا تزورون ..
* سلامة :: الظاهر انج انتي اللي نسيتي انه عندج عيال اخ اسمه محمد .. 
* موزة :: انا بقصلج لسانج .. اجوفه كل ماله يطول ..
* سلامة :: هيه ما تدرين اني اربيه .. 
* موزة :: ربيه بشي زين .. مب اتمين اتراددين الأكبر عنج و بعد منو .. عمتج .. انتي امج و ابوج ما ربوج ع الأدب ..
* سلامة هني عصبت يوم موزة غلطت على ابوها :: عمتي .. انتي يالسه تهينيني وانا سكت .. وتقطين علي وعلى خواني كلام بعد سكت .. بس تغلطين على ابويه و امي .. اكيد ما بسكت
* موزة :: هههههههههه و شو بتسوين يا عمري .. زيغتيني تدرين
دخل بو حمد فجأة وجاف اللي يستوي و سمع الكلام ..
* بو حمد :: موزوه لا تنسين انج ف بيتي .. ومحمد الله يرحمه محد اييب يطاريه الا بالخير .. تراج تعرفيني يوم اعصب ..
موزة انقهرت من كلام اخوها و ما قدرت تقول شي .. لأنه هو الأكبر و كلمته هي اللي تمشي ..
* بو حمد :: سلامة حبيبتي انتي تعرفين عمتج .. ما عليج منها
* سلامة ابتسمت وقالت له :: لا تخاف علي عمي .. طول ما انا عايشة محد بيغلط على ابويه
* بو حمد :: آآآه كل ماشوفج .. اشوف فيج صورة محمد .. الله يرحمه و يغمد روحه الجنة
* سلامة :: آمــيـــن ..

بتسألون وين كانت ام عبد الله يوم موزة قالت هالكلام .. ام عبد الله تحاول تتجنب موزة كثر ما تقدر .. لأنه لسان موزة محد يسلم منه .. و هي اكيد بتذكرها بريلها اللي توفى من 3 سنوات ..

طلعت سلامة من المكان اللي كانت فيه و هي ماشية سمعت حد يزقرها ..
*.... :: انتي سلامة صح؟؟؟
* سلامة :: هيه انا سلامة ..
* ..... :: و الله و كبرتي ماشا الله عليج .. و صرتي طبجت ابوج الله يرحمه ..
----------------------------------



الجزء السادس









---------------
*.... :: انتي سلامة صح؟؟؟
* سلامة :: هيه انا سلامة ..
* ..... :: و الله و كبرتي ماشا الله عليج .. و صرتي طبجت ابوج الله يرحمه ..
------------------

سلامة استغربت من الشخص اللي شافته .. مرت سنييين و هاي أول مرة تشوفه من بعد وفاة ابوها .. بس غريبة انه عرفها ..
* .... :: بلاج .. انا عمج خليفة نسيتيني ..

))خليفة .. اخو خالد ومحمد بس من أم ثانية .. هو أكثر واحد كان يلّعب سلامة وهي صغيرة ويدلعها .. من بعد وفاة محمد بو سلامة ما قاموا يجوفون اعمامهم وعماتهم وايد .. لأنهم يعرفون الكلام اللي بيقطونه عليهم .. يعني ما يروحون لأهل ابوهم الا ف العزايم ..
خليفة متزوج وعنده بنت وولد توأم واعمارهم 4 سنوات .. البنت اسمها عنود والولد اسمه عبيد وحرمته تكون عفرة بنت خالته ((

* سلامة :: لا مافيني شي .. بس من متى ما شفناااك .. يمكن 3 سنين .. وينك عنا ما تسأل .. وإلا من توفى أبويه محد قام يسأل عنا و لا يهتم فينا ..
* خليفة :: شوي شوي علي .. ماشا الله عليج ما تغيرتي .. لسانج مثل ما هو ..
* سلامة :: ههه .. ترى لساني هو اللي معيشني لين الحين .. 
* خليفة :: هههه الله يقطع شيطانج .. المهم .. شحالج
* سلامة :: الحمد لله .. عايشين ..
* خليفة :: إلا وينهم خوانج ؟؟ و اختج ميثة ماجوفها 
* سلامة :: حميد في بيت عمتي شيخة بيي الحين .. و عبد الله موجود و يمكن انت ما شفته و ميثة داخل عند البنات ..
* خليفة :: هيييه .. و انتي شتسوين هني .. روحي داخل ترى الرياييل بييون الحين ..
* سلامة :: ان شاء الله عمي ..
و دخلت داخل ..

----------------

في بيت سلامة كان التلفون يدق و يدق بس محد يرفع .. 
* راشد :: افففف وينها سلامة .. ليش ما ترفع .. اكيد هي بروحها ف البيت عسب جيه محد يرفع .. بس صبري علي ماهد التلفون الين ماكلمج اليوم ..
وتم يدق و يدق شويه رفعت الشغالة بس تمت ساكته ..
* راشد في قلبه :: الحمد لله رفعت ... هلا
* الخدامة :: سلام أليكم
* راشد :: بسم الله منو انتي ..
* الخدامة :: انا انجي ..
* راشد و هم متحسف :: عاشت الأسامي .. هه .. هذا بيت منو؟
* انجي :: بيت بابا موهمد .. بس بابا موهمد الهين موت .. 
و تبا تكمل القصة جان يقاطعها رشد ..
* راشد :: ايييه حووه .. خلاااص قلتي قصة حياتج .. و بعدين مافي احد ف البيت؟
* انجي :: ماما .. ابود .. ميسا .. سلامة كلو روه بيت بابا كالد .. 
* راشد :: اوكي خلاص ... باي .. و قفل ع ويهها
* راشد :: يا ربييي شو هالحظ .. ما طلعت الا الحين .. بس ما عليه يا سلامه يا انا يا انتي ..

------------

عند حمد ..
دش حمد الشقة اللي ربعه متيمعين فيها .. 
* حمد :: السلااااااام عليييكم ..
*ربعه :: هلااااا و اللله .. و عليكم السلاااام
* جاسم :: شحااالك حمد .. من زمان ما شفنااك لا تتصل و لا تسأل .. عنبوه ما صدقت متى سافرت ..
* سالم :: هيه و الله من يوم ما سافرت مادقيت النا ..
* عمر :: الحبيب خايف ع الرصيد ههههه
* حمد :: اعوووذ بالله خلوني ادخل اتنفس شوي .. هجمتوا علي ..صبروا شوي .. و بعدين مادري منو ماصدق متى يفتك من الثاني .. يوم انا مسافر محد فيكم اتصل عندي يسأل حمد عايش و إلا ميت ..
* سالم :: اقول قوموا نفره من الدريشة الحين ..
* جاسم :: يالسبال نحن ف اليوم مليون مرة نتصل حرقنا تلفونك بس انت اللي ما ترد او تلفونك مغلق ..
* حمد :: المهم ما علينا ... خلونا من العتاب الحين . و الله اشتقت الكم ..
* عمر :: غصبا عنك 
و كلهم يظحكون ........

الربع كانوا يالسين ويا بعض يسولفون و يظحكون إلا حمد كان ف عالم ثاااااني ..
* عمر :: يــتهنى .. يتهنى 
* حمد :: منو؟؟؟
* سالم :: اللي ماخذ بالك ..
* حمد :: هــه .. يتهنى قال .. الي ماخذ بالي معذبني ..
* جاسم :: يوييل حالي انا .. و منو هذا
* حمد :: تحيديون سارة ؟
* سالم + جاسم :: سارة ما غيرها ؟؟؟؟؟؟؟؟
* عمر :: و منو هذي ؟؟
* حمد :: هيه سارة .. عمر انت ما تعرفها لأنك ما كنت ويانا بس الحين بقولك منو هي
* جاسم :: و شو عندها ؟؟؟
* حمد :: دقت لي و انا ياي هني .. دقت و تهدد
* سالم :: تخسي ... تهدد قال .. هالأشكال قاموا يهددون بعد ..
* جاسم :: سالم لا تقول جيه .. انت نسيت ان الغلطة كانت غلطة حمد ..
* سالم :: حتى و لا لو .. هي محد قال لها تحبه و المشكلة كلها كانت منها ..
* جاسم :: لا و الله .. ما كانت منها و انت تعرف السالفة عدل يا سالم ..
* سالم :: هي لو ماسوت اللي سوته جان ما .....
* حمد :: سالم .. اللي يقوله جاسم صح .. الغلطة غلطتي .. و هي غلطتها انها حبت واحد مثلي.. ظيعت وقتها ف حبي .. انا السبب ف كل اللي صار الها .. ويحق الها انها تسوي اللي تباه.. حتى لو بتخبر الكل عن اللي صار .. حقها هذا و انا ماقدر اقول شي .. انا شوهت سمعتها من بين الكل وخليتها ما تسوى بيزة .. والحين أي شي ايي منها اقبله .. انا ندماااان ع اللي سويته .. هي حبتني من قلبها بس انا كنت واحد نذل وماقدرت حبها و لعبت بمشاعرها ..
* سالم :: بس يا حمد .......
* حمد :: خلاص يا سالم .. الغلطة غلطتي و اللي بتسويه فيني يحق الها ..

بعد اللي قاله حمد عمر فهم السالفة كلها .. و الكل تم ساكت ما يعرفون شو يقولون .. شوي دق تلفون حمد ... حمد كان سرحاان و حالته حاله و عقله مو معاه ..
* عمر :: حمد تلفونك يدق ارفع صمخنا ..
* حمد تو انتبه لتلفونه .. :: اووه هذا من متى يدق ..
* سالم :: من زماان بس انت رايح فيها ..
رفع حمد و طلع ابوه المتصل ...
* بو حمد :: يا مسود الويه ..
* حمد في قلبه بسم الله شو هالترحيب :: هلا ابويه ..
* بو حمد :: شو هلا انت بعد .. انت وينك ..
* حمد :: عند الشباب ..
* بو حمد :: مابرد قلبك .. اليوم تعرف شو يا فالح .. اليوم عزيمتك و الكل يا بيتنا و صاحب العزيمة وينه .. عند ربعه ..
* حمد كان ناسي سالفة العزيمة :: اووووه نسييييت اوكيه اوكيه .. ثواني و اكون ف البيت ..
* سالم :: خييير؟؟
* حمد ::: ههه لا ماشي عندنا اليوم عزيمة و انا ناسي السالفة ..
* جاسم :: الله يعينك .. باجر بتيينا مفلوع شكلك ..
* حمد :: هذا شكله اللي بيصير لو ما سرت الحين .. يالله فوادعة الله
* ربعه :: بحفظ الرحمن ..

------------------

في بيت العم خالد .. كانوا حاطين في الصالة صور عودة اللي هي صورة " محمد _بو سلامة_ + خالد _ عمها _ + سيف _ عمها _ " 

سلامة كانت واقفة عند الصورة و اطالعها .. و تذكرت اليوم اللي توفى فيه أبوها ..
كان عمرها 15 سنة .. و ف ذاك اليوم ابوها كان واعدها ان بيوديها وياه العزبة ..

* سلامة :: ابوي مب تنسى اللي قلت لي اياه .. اليوم الاربعا و أكيد بتوديني صح؟؟
* بو عبد الله :: أكيييد .. أفا عليج من متى ابوج يقول شي و لا يسويه
* سلامة :: اعرف انك صادق و امين .. بس مرات تنسى شويه خخخخ
* بو عبد الله :: ههههه .. الله يقطع سوالفج ... يالله روحي المدرسة بتتأخرين ..
* سلامة :: اووكيه .. يالله مع السلامة ..
* بو عبد الله:: الله يحفظج ..
سلامة طلعت و سكرت الباب شويه ردت و فتحته و قالت له ابوها ..
* سلامة :: ابوووويه .. نسيت اقولج شي
* بو عبدالله :: شو؟؟؟
* سلامة :: مب تنسى توديني
* بو عبد الله :: اذلفي عن ويهي يالله ..
* سلامة :: ههههههههههه اووكييه ..

من دون ما تحس سالت دموع سلامة غصبا عنها ..

ردت سلامة البيت و هي مستاااانسة لأنها بتسير العزبة ويا ابوها .. دخلت البيت و فرت شنطتها و عباتها ع الكرسي وراحت تركض عند ابوها .. طلعت الدري و جافت البيت هدووووء محد فيه ..
* سلامة :: بسم الله .. وينهم هل البيت .. أمي.. ابوي .. حمييد؟؟ وينكم؟؟ طع محد يرد حميد و عبود يردون قبلي ليش محد فيه ..
شوي وهي ماشية ادورهم دخلت الصالة العودة .. ويليتها ما دخلت ,, شافت اخوها حميد قاعد ع الكرسي ما يتكلم مع حد وشكله يكسر الخاطر .. و لا يكلم حد وميثة قاعدة عند الدريشة و تصييح دموعها مغرقتها .. 
* سلامة :: ايييه انتووووا .. وينكم من الصبح ازقركم ليش محد يرد عليه ؟؟
بس محد جاوبها ...
* سلامة راحت عند حميد اخوها :: حمييييد شفييك صااخ تراني اكلمك انا (وشافت انه حميد ما منه فايدة وراحت عند ميثة) ميثة ليش تصيحين ؟؟ شووو صار؟؟ وينها امي ووينه عبود ؟؟ و ابويه مارد من الدوام ؟؟
ميثة من سمعت كلمة ابويه ماقدرت تستحمل اكثر قعدت ع الأرض و تمت تصيح ..
* سلامة خافت :: ميييثوووه قوليلي شو صار ؟؟ ابويه وينه؟؟ صار فيه شي؟؟؟
شويه تييها خالتها شيخة و تحظنها ..
* شيخة :: سلامة حبيبتي .. ابوج توفى بحادث اليوم ..
* سلامة ماصدقت اللي تسمعه .. و توقعت انهم يقصون عليها .. :: هههههه خالتي نكتج بايخة قولي غيرها ..
* شيخة :: سلامة غناتي .. انا مانكت ليش بنكت بهالشي .. هذا الصدق ... كان راد من الدوام و ادعمته شاحنة ..
* سلامة ::: لااااا مستحيييل ... لاااا ابويه بيي .. ابويه قال انه بيوديني وياه العزبة .. وينه .. بروح اتصل به .. هديني انتوا تقصون علي ادري ..
* شيخة :: سلامة هدي .. و افهمي اللي نقولج اياه .. 
و حاولت تيود سلامة ..
سلامة دزت خالتها بالغلط .. وراحت تبا ادق عند ابوها .. شوي يتها امها من ورا وعطتها كف ..
* ام عبد الله بعصبية :: سلامة .. اصطلبي .. ابوج مات .. تعرفين شو يعني مات .. يعني لو ادقين له من اليوم للآخر يوم ف حياتج ما بيرد عليج فهمتي ؟؟؟

هني سلامة ماستحملت يوم اتذكرت هالموقف و قعدت ع الكرسي جدام الصورة و تمت تصييح من الخاطر ,,
شوي حد يدخل الصالة ..
* ..... :: خييير ان شاء الله ؟؟؟؟ ليش تصيحين ؟؟ شو عندج ؟؟ 
--------------------------
منو هالشخص ؟؟؟؟؟؟؟
ملاحظة :: اللي باللون الغامج .. ها سلامة يوم تتذكر ..



الجزء السابع







---------------------
* ..... :: خييير ان شاء الله ؟؟؟؟ ليش تصيحين ؟؟ شو عندج ؟؟
سلامة ما كانت متوقعة ان حد بيدش الصالة .. و قامت بسرعة و مسحت دموعها لفت ورا و لقت بنت عمها ريم ..
* ريم :: شو فيج تصيحين ؟؟ (رفعت ريم راسها وشافت الصورة المعلقة ع اليدار) أهااا عرفت ليش .. اسمعي يا حلوة .. نحن مب حاطين هالصورة عسب تيين تصيحين جدامها .. 
* سلامة :: ريم انتبهي لكلامج ..
* ريم :: اقول الحلوة .. انتي ناسية بيت منو قاعدة ؟ هذا بيتنا و إلا أنا غلطانة ..
* سلامة :: مبروك عليكم بيتكم .. ممكن تخليني بروحي ..
* ريم :: نعم ياختي ؟؟ اخليج بروحج ؟؟ تحلمين يا ماما .. ممكن تفظين المكان ..
* سلامة بقهر و ماسكة دمعتها :: لا تخافين بفظيلج البيت بكبره ..
* ريم :: يكون أحسن ..
طلعت سلامة من الصالة و راحت عند امها ...
* سلامة :: أمي وينه الدريول ؟؟ برد البيت
* ام عبد الله :: شوووو؟؟ شو تردين البيت .. 
* سلامة :: امي دقي عند الدريول و إلا برد مشي ..
* ام عبد الله .. عرفت ان حد تحرش ف بنتها و ان بنتها عنيدة و اللي ف راسها و هي معصبة بتسويه ف ماحبت انها تتكلم وياها وايد و دقت عند الدريول عسب ترد البيت .. :: خلاص الحين بييج الدريول .. بس بيت يدج بتروحينه فاهمة ..
* سلامة :: ان شاء الله بس المهم اني ارد الحين ..
تمت سلامة تتريا الدريول فترة و عقب يا و ردت البيت ......

-----------------

في بيت سلامة ..
دخلت سلامة البيت و هي مقهورة من الموقف اللي استوى ف بيت عمها و مالها خاطر تكلم حد .. اول ما دشت يتها الخدامة ..

* انجي :: سلااامة انتي في بيت ..
* سلامة :: لا ف الشارع و انتي شو تشوفين ..
* انجي :: سلااامة انتي زالان = زعلان 
* سلامة شوي و تكفخها لأنها مب فايقت الها ..
* انجي :: في واهد رجال سوي تلفون ...
هني وقفت سلامة و لفت عليها :: منو؟؟؟
* انجي :: مايارف = يعرف .. هو يقول هدا بيت موهمد ..
* سلامة :: و انتي شو قلتي ان شاء الله ؟
* انجي :: انا قولي هيه ..
* سلامة :: شاطرة .... و روحت حجرتها ..

و هي ماشية سمعت التلفون يدق .. لفت و قالت :: لا يكون هذا راشد .. مابرد اخاف يكون هو ... و تم التلفون يدق و يدق ... اففففف خلاااص برفع ..

رفت سلامة السماعة و تمت ساكتة ..
* راشد :: ألو ؟؟
* سلامة :: ...........
* راشد :: هالمرة انا متأكد انج سلامة صح
* سلامة :: انت شو تبا مني ؟؟ خلاص ياخي فكني منك ..
* راشد :: سلامة انا آسف.. آسف ع كل اللي سويته فيج .. ادري اني غلطت ف حقج واايد .. و اني خليتج عشان وحدة ما تستاهل.. حمده بهدلتني وعذبتني .. انا ندمان لأني تركتج يا سلامة .. افهميني و خلي قلبج كبير .. انا محتاج لج .. 
* سلامة :: خلصت كلامك؟؟
* راشد :: انا لو اقولج عن اللي ف قلبي ما بخلص ..
* سلامة :: ما يحتاي تقول لي ف قلبك لأني اعرف شو هو ..
* راشد :: شو ؟؟؟
* سلامة :: انت بعتني وخنتني مع اعز ربيعاتي ما لقيت الا حمدة ربيعتي تخوني وياها يا راشد.. نسيت يوم قلت لي القلب عافج وحب غيرج .. نسيت كلامك .. وبالآخر تقول لي خلي قلبج كبير .. انت تخون وتباني اسامحك .. متى ما تبا تفرني ومتى ما تبا ترد لي .. لاياخي و لا تحلم اردلك ..
* راشد :: سلامة ارجوووج افهميني .. سلامة دخيلج خلينا نرد مثل قبل .. 
* سلامة :: القلب عافك وحب غيرك ..
* راشد :: شوووووو؟؟ يعني افهم من كلامج انج حبيتي واحد ثاني؟
* سلامة :: ليش مو من حقي احب واحد ثاني ؟ راشد .. اغسل ايدك من اني ارد لك ..
* راشد :: سلامة فكري عدل ..
* سلامة :: ما يحتاي افكر .. والقرار اللي اتخذته أكثر قرار مريحني .. و هالرقم انساه فاااهم ..
وسكرت ع ويهه ..

بعد الخيانة انتهت رغبتي فيك 
وان كنت تذكرنا ترنا نسيناك 
يشهد على الله لاحل طاريك 
يروق قلبي لكن اذكر سواياك

-----------------------------

في بيت بو حمد ..
في الميلس ..
الرياييل كانوا يالسين والحبيب حمد توه داش .. و أكيد ما بيسلم من تهزيئ ابوه ..
* حمد :: السلام عليكم ...
* الكل :: و عليييك السلااام و الرحمة ..
* خليفة :: شو معرسنا .. احيد العزيمة عزيمتك و إلا أنا غلطان ؟؟..
* حمد :: شسوي بعد .. مافي انسان ما ينسى ..
* بو حمد :: هذا ما يسمونه نسيت .. هذا يسمونه تناسيت ..
* حمد يكلم ابوه بصوت واطي :: ابويه ظروري تفظحني جدام الخلق خلاص بنتفاهم بعدين ..
* بو حمد :: أكيييد بنتفاهم بعدين و الليلة ما بتعدي على خير يا ولد خالد ..
* حمد ف خاطره :: اففف .. هالشيبة يخلي من الحبة قبة و من النملة فيل ..
* خليفة :: بلاك مبوز؟؟ 
* حمد :: ماشي .. تباني اكون مستانس بعد الغزل لي سمعته من ابويه جدام خلق الله 
* خليفة :: انت تعرف ابوك عدل .. و اكيد هالشي بيعصبه ..
* حمد :: انا شو عرفني .. ياخي نسيت حرام انسى .. افففف منكم بس ..
و سار عنهم .....
* خليفة :: الله يهديك يا حمد ..

دخل حمد البيت وهو معصب .. و شاف اخته عاشة واقفة جدامه .. عاد هي اكثر وحدة ينقهر منها لحساسيتها الزايدة .. عاشة كانت واقفة جدام المراية وتعدل شعرها ..
* حمد :: اقول حد قص عليج و قال انج حلوة؟
* عاشة :: شو تبا انت الحين 
*حمد :: على فكرة انا اخوج العود واحترمي شوي ..
* عاشة :: و خير يا طير و لو انك اخويه العود
* حمد :: عاشوه احسن لج لا تخليني اهفج بكف ..
* عاشة :: يالله اجوف عطني لو فيك خير ..
و انقهر حمد منها و عطاها كف قوي .. 
* عاشة وهي تصيح :: اصبر علي يا حمد ان ماخبرت ابويه .. و ركظت لحجرتها ..
* حمد :: انقلعي .. فاظيلج انا ...
طبعا بعد ما فرغ شحنة الغضب اللي فيه رد للميلس .. لأنه لو تأخر شوي ابوه بيزفه عدل ..

---------------------

في حجرة ريم .. 
كانوا ريم وفاطمة (( بنت عمتها )) يالسين ف الحجرة و هالثنتين واايد ويا بعض ..
* فاطمة :: يالله ريموه خلنا نجرب هالرقم شو رايج ؟؟ و بنشوف منو بيطلع النا ..
* ريم :: جان ما طلع لج واحد هندي أو خان هههههههههه
* فاطمة :: فال الله و لا فالج ... يالله يالله دقي ..

))فاطمة .. عمرها 17 سنة .. مختربه وهلها مو مربينها عدل .. كل اسبوع تكلم ريال .. و اللي ما يعيبها تودره .. وتحب تشارك ريم بهالسوالف وريم ما عندها مشكلة .. و أكثر شي تحبه انها تدق ارقام بالغلط وتجوف منو يطلع الها ((

* ريم :: اوكيه و استعدي للقفطة ..
* فاطمة :: بنجوف منو بيتقفط ... خخخخ
ريم دقت الرقم اللي عطتها اياه فاطمة وشويه حد رفع عليها.. ريم يوم سمعت الصوت خافت وفرت السماعة على فاطمة .. بس الريال ما كان لا هندي و لا خان


الجزء الثامن

---------------
ريم دقت الرقم اللي عطتها اياه فاطمة و شويه حد رفع عليها .. ريم يوم سمعت الصوت خافت و فرت السماعة على فاطمة .. بس الريال ما كان لا هندي و لا خان ..
-------
حطت فاطمة ايدها على السماعة عشان الطرف الثاني ما يسمع الكلام ..
* فاطمة :: اييه الخبلة شو بلااااج؟؟
* ريم :: سهييل .. هذا سهييل 
* فاطمة :: حلفي ؟؟؟؟؟؟
* ريم : و الله العظيم .. اسمعي صوته بعد 
حطت فاطمة السماعة على اذنها وقالت بصوت واطي :: ألو؟؟
* سهيل :: مرحبا .. منو داق على هالرقم؟؟
* فاطمة :: السموحة خويه مغلطين .. 
و سكرت السماعة بسرعة و ع ويهه ..
* ريم :: هاااا منو طلع ؟؟ سهيل صح ؟؟؟
* فاطمة بخوف :: هيه سهيل .. ريموو يويلنا لو عرف ان الرقم من بيتكم ولو عرف اصواتنا ..
* ريم :: كله منج يا فطووم كله منج ..
* فاطمة :: هييييه الحين طيحي كل شي علي اوكي .. و انتي سوي عمرج بريئة ما تعرفين شي ..
* ريم :: المهم الحين شو نسوي ..
* فاطمة :: بنتصرف جنه ماصار شي و قومي ننزل تحت شكلهم عماتي يو ..
* ريم :: اوكيه يالله ننزل ..

))سهيل .. ولد عمتهم عمره 20 سنة .. ويا حمد وااايد .. بس لحسن الحظ انه ماعرف رقم البيت لأنه ريم وفاطمة دقوله من تلفون حجرة ريم .. وماعرف الرقم .. هااادي وماله خص بالناس .. انطوائي لدرجة فظيعة مايحب يحتك بالناس وايد .. وأقرب واحد له هو حمد .. ((

------------------

سهيل كان يفكر باللي اتصلت و انها مب غريبة عليه ..
* سهيل ف خاطره :: سمعت هالصوت قبل بس منوووو مادري .. والرقم بعد مب غريب عليه .. 
شويه اييه حمد من ورا ... :: بوووو ... شتسوي ..
* سهيل :: الله يغربلك طيحت قلبي ..
* حمد :: سلاااامت قلبك .. شتسوي يالس برة دش داخل ..
* سهيل :: اوكي يالله خلنا ندش .. 
وسهيل كان يمسح الرقم يا حمد وسحب منه التلفون .. بس لحسن الحظ انه سهيل مسح الرقم وإلا ريم اليوم بيكون آخر يوم ف حياتها ..

-----------------------

عند حميد اخو سلامة ..
* حميد :: سعّود سعّود .. تعال ورا البيت يالله ..
* سعيد :: لييش؟ شو بتسوي؟؟
* حميد :: يالخبل نسيت شو قلت لك ف بيتكم .. وين الولاعة ؟؟ يبتها؟
* سعيد :: هيييييه اتذكرت .. هيه يبتها يود ..
* حميد :: ما بتشاركني؟؟
* سعيد :: أفا عليييك ..
سعيد وحميد كانوا في بيت العم خالد .. راحوا ورا البيت وقعدوا يدخنون .. طبعا هاي أول مرة لهم .. حميد كان عنده ربو شديد.. وطبعا ماستحمل الدخان وتم يكح ويكح لين ما اغمى عليه.. سعيد فهاللحظة خاف وماعرف شو يسوي .. سحب الزقارة وفرها بعيد .. وشل الولاعة وخباها ف مخباه.. بس اتذكر انه فيه هو وحميد ريحة الدخان وكان عنده عطر صغير طلعه واتعطر .. وبسرعة دخل الميلس ..
* سعيد :: عمييي الحق حميد اغمى عليه ..
قام الكل من الميلس وراحوا صوب حميد.. شافوا ويهه محمر من كثر ما كح.. وعبد الله يوم شاف اخوه عرف انه يته النوبة.. شلوه بسرعة وراحوا المستشفى بس من دون ما يخبرون امه.. خليفة شل حميد وحطه ف سيارته وهو يشله شم فيه ريحة غريبة.. ريحة الدخان اكيد .. بس ماعرف شو هي لأنه سعيد عطره ..

----------------

في المستشفى ..
* الدكتور :: اطمنوا الولد مافيه شي .. بس اغمى عليه بسبب نوبة الحمى اللي يته .. الولد لازم يرتاح شويه .. بس منو منكم ابوه؟؟
* خالد :: ابوه متوفي .. انا عمه .. خير فيه شي ؟؟
* الدكتور :: بغيتك بكلمة راس .. 
بعد ما راحوا بعيد عن الكل ..
* خالد :: خير دكتور الولد فيه شي؟؟
* الدكتور :: انا مب متأكد من اللي بقولك اياه .. بس اعتقد انك لو سألت الولد بيأكد لك ..
* خالد :: خيييييييير؟؟ شسالفة ؟
* الدكتور :: الولد ما اغمى عليه من النوبة و بس..
* خالد باستغراب :: عيل ؟؟
* الدكتور :: الولد كان يدخن .. و هالشي واظح من الريحة اللي فيه ..
* خالد :: شووووو؟؟ يدخن؟؟؟؟
* الدكتور :: هيه نعم .... وحاول تمنعه من هالشي لأنه يعتبر موت بطيئ .. أما بالنسبة لحالته فبيؤدي للموت بسرعة وخاصة انه عنده ربو شديد .. و اسمحلي بخليك الحين ..
سكت خالد وماعرف شو يقول .. انصدم من الكلام ... كلها يطلع منك يا حميد .. ما هقيتها منك يا ولد اخويه ... بس ما عليه مابنفعل بهدي عمري عشان اعرف منه شسالفة ..

----------------------------

في حجرة سلامة ...
* سلامة :: اففف بموووت من الملل .. راشد عكر مزاجي .. يكفي اللي صار بيت عمي .. كمل علي هذا ..
سلامة كانت تفكر و تفكر .. شويه دق التلفون بس هالمرة مب راشد ..
* سلامة ف خاطرها و الله لو كان راشد .. قسم بالله لا بلغ عليه .. :: ألو
* اليازية بصوت واطي :: السلام عليكم ..
* سلامة :: و عليكم السلااام .. منووووو اليااااازية؟؟؟؟؟
* اليازية :: هيه نعم انا اليازية .. شحالج سلامة ؟
* سلامة :: عااااش من سمع صووتج .. انا بخييير شحالج انتي ؟ اخبارج ؟ علومج؟
* اليازية :: زينه
* سلامة :: يزوي حبيبتي شو فيج؟
* اليازية بدت تصيح :: سلامة اسمحيلي ادري اني مقصرة ف حقج وايد و يمكن مر شهرين و انا مادقيت بس انا متأكدة انج انتي الوحيدة اللي تفهميني و بتحلين مشكلتي .. 
* سلامة :: يزوي خوفتيني شو صار وياج؟
* اليازية :: أبويه .....
* سلامة :: خيرررررر؟؟ عسى ما شر ؟ شو صار فيه؟
* اليازية :: هو بخير بس ؟؟
* سلامة :: يزوي قوليلي شسالفة ؟
* اليازية :: ابويه يشك فيني .. هييج المرة كنت اكلم ربيعتي دش عليه ومن الزيغة سكرت السماعة بسرعة .. هو شك تحسبني ارمس ولد.. حاولت افهمه بس ما طاع يفهم .. قام وظربني ظرب .. والحين حابسني ف حجرتي و انا اكلمج بالخش من دون ما يعرف ..
* سلامة :: و امج وينها ؟
* اليازية :: امي موجودة .. بس ها ما تقدر تقول شي .. كلمة ابويه هي اللي تمشي حتى لو كانت غلط ..
* سلامة :: حبيبتي .. ابوج سوا فيج جيه من خوفه عليج .. لو ما كان يخاف عليج جان خلاج تسوين اللي تبينه .. بس هو يحبج و يغليج .... 
قاطعتها اليازية 
* اليازية :: لا ما يحبني .. يكرهني و دومه يعاملني بقسوة مايومه قال لي تبين شي ؟ و لا فكر بتخبر عن حالي .. كله يسأل خواني و انا لأ .. لأني بنت يعني
* سلامة :: يزوي .. مافي أب ما يحب بنته .. صدقيني هو يسوي كل ها من خوفه عليج ..
* اليازية :: و انتي شو دراج؟؟؟ انتي يتيمة .. ماعندج اب عشان تقولين جيه ..
* سلامة انصدمت من اللي سمعته .. ماعرفت شو تقول .. خنقتها العبرة و تمت ساكتة بس بعدين قررت تكسر السكوت وقالت بصوت مبحوح :: الا عندي أبــ .. ابويه ف قلبي.. حي ما مات.. وعلى فكرة انا اليتيمة اعرف عن حنان الأب أكثر عن مليوون شخص عنده أب .. و سكرت التلفون ..

حست سلامة بظييق فظيع بعد كلام اليازية .. و تمنت انها ما دقت عليها ..
راحت صوب الطاولة و مسكت صورة ابوها و ابتسمت ابتسامة حزن و تحسر ::
شفت يابوي .. يقولون بنتك يتيمة و ما تعرف عن حنان الأب ..
شفت يابوي .. كيف قاموا ربيعاتي يعاملوني ..
بس لا تخاف ع بنتك .. انا بنتك القوية .. انا سلامة القوية اللي اقوى عن عشرين ريال .. هذا كلامك لي صح؟؟ ما بصيح ولا بهتز مب انت اللي كنت تقول لي مابا اشوف دموعج طول ما انا حي .. وانت حي مامت .. حي ف قلبي يابوي ...

اشتكي يا بوي من هم ظواني ..
زارني وقت المسا عقب العشية
حل بي الظيق و الحزن اعتارني
و سالت العبرات من موقي دمية




الجزء التاسع



---------------------
في بيت العم خالد ..
اتصل عبد الله عند أمه عسب يخبرها اللي استوى ف حميد ..
* عبد الله :: هلا امي شحالج؟
* ام عبد الله :: اهلين عبود بخير 
* عبد الله :: أمي ...... حميد ف المستشفى
* أم عبد الله :: شووووووو؟؟ ف المستشفى؟؟؟؟ ليييييييش؟؟
* عبد الله : لا امي اطمني مب شي خطير .. يته النوبة و اغمى عليه
* أم عبد الله :: كل ها و تقول لي مب شي خطير .. و متى صار كل هذا ؟؟ و ليش ما خبرتني؟ و إنت وينك الحين؟
* عبد الله:: شوي شوي علي امي .. انا ف المستشفى الحين ..
* ام عبد الله :: تيي الحين و تشلني .. بروح عند حميد ..
* عبد الله :: بس يا امي صدقيني ما يحتاي
* ام عبد الله :: عبود قلت لك الحين تيي ..
* عبد الله :: ان شاء الله امي الحين ياي ..
ام عبد الله لبست عباتها عسب تسير عند ولدها حميد .. شافتها ام حمد ..
* ام حمد :: شوووو ..؟؟ وين سااايرة؟؟ تو النااس
* ام عبد الله :: اسمحيييلي و الله يا ام حمد نسيت اخبرج بعد .. ولدي حميد فديت روحه توى اغمى عليه يته النوبة وودوه المستشفى 
* ام حمد :: لا حول و لا قوة إلا بالله .. خلاص بيي وياج ..
* ام عبد الله :: لا ما يحتاي صدقيني انتي عندج ظيوف بييونج .. بطمن عليه و بيي هني مرة ثانية ..
* ام حمد :: أكيييد؟
* ام عبد الله :: هيه اكيييد
شوي وصل عبد الله و طلعت امه وياه .. 

ريم وفاطمة لين الحين زايغات من اللي استوى.. وهم قاعدات يتكلمن ويا بعض .. شوي حمد يزقر ريم ..
* حمد :: ريييييم .. رييييموه و الصمخ وينج ؟
* ريم بخوف :: فطوووم هذا حمد يباني .. لا يكون عرف او سهيل خبره .. شو بسوي ..
* فاطمة :: ما عليج سوي عمرج و لا جنه صار شي .. قوليله اي شي و بيصدق
* حمد شوي يدخل عليهن.. خافن البنات من حمد لأنه فتح الباب بقو :: رييموه شفيج صمخة ما تسمعين (وهو يكلم اخته انتبه على فاطمة وهي يالسة) تعالي اباج شوي ..
* ريم :: ان شاء الله الحين بيي .. 
وهي تأشر على فاطمة تقولها ادعيلي
* حمد :: هاي مب جنها فطوم ؟؟
* ريم :: هيه هاي فطوم ..
* حمد :: و شحقه ما لبست شيلتها يوم شافتني ما تستحي و إلا لأني ولد عمها حلال ..
* ريم :: شو عرفني روح اسألها ..
* حمد :: المهم .. بغيتج تروحين تخبرين امي اني بعد العزيمة بسير ويا الربع العين .. وانا برد عقب باجر
* ريم :: خبرها انت ما عندك تلفون ؟؟ و بعدين توك راد من السفر ما شفناك
* حمد .. و يظربها ع راسها :: و انتي شو عليج ها جفتيني ؟ .. روحي خبريها وبس
* ريم :: اففف .. انزييين بخبرها .. و لا تظرب ..
* حمد ماحب بطول وياها لأنه يدري انها بتفكه من حشرتها .. :: يالله خبريها الحيين و يويلج ان نسيتي ..
* ريم :: انزيييين ..
ردت ريم عند فاطمة .. 
* ريم :: الحمد لله .. لين الحين انا عايشة ما مت ..
* فاطمة :: هيه الحمد لله .. إلا أقولج ..
* ريم :: قولي ؟؟؟
* فاطمة :: هذا اخوج حمد صح؟
* ريم :: هيه اخويه .. اونج ما تعرفين
* فاطمة :: اخوج غااااوي ..
* ريم ف قلبها :: لو تعرفين شو قال عنج بتغيرين رايج .. 
* فاطمة :: شفيج سكتي ..
* ريم :: لا ماشي .. سرحت شوي ..
* فاطمة :: سمعتي اللي قلت لج .. قلت انه اخوج غااااوي .. من زماان ما شفته 
* ريم :: ايييه حوووه .. تتغزلين بخويه .. 
* فاطمة :: اتغزل بولد عمي ..
* ريم :: مالت عليج .. و الله يزيدج خبال فوق خبالج ياااارب
* فاطمة :: انتي الخبلة محد غيرج ..

-----------------------------------

في المستشفى ..
دشت ام عبد الله عند ولدها حميد و هي خايفة عليه ..
* ام عبد الله :: سلااامااات فديت روحك يا ولدي سلاااامات .. ان شاء الله فيني و لا فيك
* حميد :: في العدو ..
* ام عبد الله :: يا ولدي مليون مرة قلت لك خذ البخاخ وياك وين ما تروح ما اطيعني
* حميد :: يا سلام .. اشلي وياي وين ماروح .. جني شيبة .. تبين الشباب يظحكون عليه
* ام عبد الله :: ما عليك منهم .. انت بتذبح عمرك جيه يا ولدي
* حميد :: احسن .. هاللي اباه .. أذبح عمري و افتك من هالعيشة و هالدنيا و هال,,,,
* عبد الله :: و هال,, شو بعد ؟؟ الأهل؟؟؟
* حميد :: انا مارمسك .. ارمس امي .. و انت لا تتدخل فشي ما يعنيك ..
* عبد الله :: ان شاء الله سيدي .. تامرني بشي بعد ..
* ام عبد الله :: بسكم .. انا جدامكم و تتظاربون .. اللي يشوفكم يقول اعداء مب خوان ..
* حميد :: و الله كلمي ولدج ما يدخل يوم ارمسج ..
* عبد الله ابتسم لأخوه و قاله :: ان شاء الله خويه .. و بظهر الحين عسب ما تظايق عمرك اوكيه؟؟
* حمد حس بغييض من كلام اخوه و برودته :: يكون احسن ..
* ام عبد الله :: شفيك يا ولدي على اخوك .. هو يرمسك بأدب وانت هجمت عليه بعدين هذا اخوك العود لازم تحترمه شوي .. 
* حميد :: امي .. انتي يايه تعطيني دروس ف الأدب و الآخلاق؟؟ شكرا ما يحتاي أخلاقي عالية ..
* ام عبد الله حست بظيق من كلام ولدها بس هي تعرف طبعه وما حبت تاخذ وتعطي وياه :: لا يا حميد انا يايه اطمن عليك و بس .. خفت يوم قالولي انك ف المستشفى ..
* حميد :: اوكي خلاص مشكورة ..
* ام عبد الله :: يعني شو اسميها هاي؟؟ طردة؟؟
صد حميد الصوب الثاني و مارد على امه ..
* ام عبد الله :: ع العموم انا اطمنت عليك الحين بروح وقلبي باارد .. اتحمل ع روحك حبيبي .. يالله فمان الله
طلعت ام عبد الله من عند ولدها وقلبها يعورها من اللي سمعته .. (( انا قدرت اغير كل شي ف عيالي .. الا طبع حميد .. فشلت ف تغييره .. انا ماصلح اكون ام ابدا .. وينك يا محمد انا محتاجتلك .. انت الوحيد اللي تقدر تتفاهم ويا حميد .. آآآه يا قلبي .. عانيت وياك يا حميد .. عانيت .. ((
* ام عبد الله :: عبود فديت روحك .. تم ويا اخوك شوي انزين؟
* عبد الله :: ان شاء الله امي ..
* ام عبد الله :: انا برد بيت عمك .. مب حلوة اخليهم جيه.. بس انت انتبه على اخوك و استحمله شوي اعرف ان طبعه خاايس .. بس ما عليه استحمله عشان خاطري ..
* عبد الله :: لا توصي حريص .... فمان الله 
دش عبد الله عند اخوه حميد .. و اول مادش ..
* حميد :: اوهوووو .. انت ماسرت .. ياخي خلوني بروحي ابا اقعد بروحي .. مابا حد وياي ..
* ابتسم له عبد الله و يلس ف الكرسي اللي عدال سرير حميد ..
* حميد :: لا شو رايك تقوم و تيلس ع حظني بعد ..
* عبد الله ببروود :: صدق؟؟ ايلس ف حظنك؟
* حميد :: عسب ارفسك و اطيرك من الدريشة ..
* هني ماستحمل عبد الله اللي يقوله حميد وشاف انه زودها شويه فقاله بصوت عالي شوي :: حميد ان طولت لسانك علي بقص لك اياه تفهم ..
* حميد زاغ من الكلام وخاصة انه طلع من عبد الله اخوه فسكت و ماقدر يقول شي ...

تموا الاثنين ساااكتين محد فيهم تكلم .. و كان مــلـــل عبد الله يلعب بالتلفون .. و حميد مغطي ويه ..
شويه تكلم حميد ..
* حميد بصوت واطي و حزين :: عبد الله .....
* عبد الله لف على اخوه و ابتسم له :: هلا حميد .. آمر؟
* حميد :: ما يآمر عليك عدو .. بس بغيت اسألك
* عبد الله :: شو؟؟ تفضل
* حميد حط راسه ع ريله و قال :: انا ليش ما عندي اب؟؟
* راحت البسمة من عبد الله و حس بظييق فقلبه من سأله حميد هالسؤال.. و تم ساكت
* حميد :: شو فيك سكت؟؟ ؟
* عبد الله :: قضاء و قدر يا حميد .....
* حميد :: ........
* عبد الله :: ليش هالسؤال
* حميد :: كيفي
* عبد الله :: اوكيه ..
* حميد :: تعرف منو أكثر الناس اللي أكرههم ؟
* عبد الله :: منو؟
* حميد :: اللي عندهم آباء ...
* عبد الله :: حميد .. هذا قدر الله ما ييوز تعترض .. الله ما يضرب بعصا
* حميد :: أعرف بس كل ماشوف حد ماشي ويا ابوه و فرحان اتمنى ان ماتم هالفرحة من بينهم
* عبد الله :: لا يا حميد .. لا تكون حقود جيه .. مب زيين .. انا ما انكر اني انا بعد مشتاق لبويه .. بس ولا عمري فكرت بهالشي .. و بعدين امي مب مقصرة ويانا 
* حميد :: أعرف بس ..
* عبد الله :: بس شو؟
* حميد بصوت عالي :: انا محتاج أب .. أريد أب يهتم فيني و يقول لي ولدي استوى ريال اعتمد عليه.. لا تقول لي امي ... انا اريد اب تعرف شو يعني اب .. (ونزلت دموعه على خده لأول مرة ..(
* عبد الله استغرب يوم شاف حميد وهو يصيح مسك اخوه وحظنه وهو يهديه :: حميد استهدي بالله .. و خل عنك هالكلام .. و اصبر الله فووق ..
حميد يوم عبد الله قاله هالكلام ازداد صياحه .. و ماعرف شو يقول ..

))حميد .. عمره 14 سنة .. أكبر من ميثة بسنة وحدة .. كان طيب وعلى نياته .. بس من توفى ابوه تغير طبعه للأسوأ استوى عدواني وما يحب بتكلم ويا حد لا امه ولا اخوه ولا خواته.. بس أكثر واحد يستحمله هو اخوه عبد الله لأنه يعرف طبع حميد كيف انه عنيد.. مرت يكون ف حجرته قاعد بروحه ولا إراديا يصيح بس ما يروي حد .. أما هالمرة ماقدر يستحمل و صاح جدام اخوه عبد الله ((

--------------------------

عــنـــد راشد ::
راشد كان قاعد ف حجرته و يفكر بسلامة ...
((انا شو سويت الها .. عندها حقها ماترجع لي.. انا خنتها مع أعز ربيعاتها.. بس والله أباها الحين أباااااه .. أباااااج يا سلامة محتاجلج محد يفهمني غيرج .. بس منو هالشخص لي تحبه ؟ معقولة حبت حد غيري؟؟ ههه أكيد بتحب غيري ويتهنى اللي تحبه.. بس أموووت وأعرف منو هالشخص قلبي يحرقني ابا اعرف منو ((

شوي ادش اخته و تقطع عليه تفكيره ..
* ميرة :: رشود شتسوي ؟
* راشد :: بسم الله الناس يدقون الباب قبل لا يدخلون ..
* ميرة :: سوووري خويه نسيت .. المهم شتسوي؟
* راشد :: ماشي طفرااان .. و شكلي برقد بعد شوي ..
* ميرة :: لا لاترقد ..
* راشد :: لييش؟
* ميرة :: قم نسير الكورنيش الجو خطيييييييير برة 
* راشد :: ساعة كم الحين؟
* ميرة :: الحين لساااعة .. 9 و نص .. قم خلنا نمشي شوي بعد انت شكلك مظايق 
* راشد :: اوكيه سيري اتلبسي و يالله قومي نسير .. حد بيي ويانا ؟
* ميرة :: ممم مادري .. أحمدو و شموه يلعبون ماعتقد بييون ..
* راشد :: اوكي يالله بنسير


الجزء العاشر


------------------
ف الكورنيش عند راشد و ميرة ...
كانوا الاثنين يمشون بس بدون ماحد يتكلم .. 
* ميرة :: رشود بلاك ساكت .. مو من عادتك يعني ..
* راشد :: آآآخ شقولج بس ..
* ميرة :: قول ياخوي .. كلي آذان صاغية خخخ
* راشد :: ههه متفيقة تراج ..
* ميرة :: شسوي بعد .. لازم أرطب الجو .. انت ماشا الله عليك مب مقصر ماد البوز شبرين .. 
* راشد و يظرب ميره ع ظهرها :: ويا ويهج ..
* ميرة :: ههههه .. انزين قول شو فيك ؟ لا تخاف مابقوله حد ..
* راشد :: أكييييد؟؟
* ميرة :: أكيييدييين ..
* راشد :: انزين انا بقولج كل السالفة بس و الله ان قلتي له حد و الله لتشوفين شي ماشفتيه ف حياتج ..
* ميرة :: ول .. يعني السالفة خطيرة 
* راشد :: بقولج اياها ...
وتم راشد يقولها كل السالفة .............

----------

خلصت العزيمة اللي ف بيت العم خالد .. و الكل رد بيته 
في بيت قوم فاطمة .. الكل كان راقد و الساعة كانت 1 .. بس في وحدة للحين قايمة ..
فاطمة .. الحين هذا حمد ؟؟ ماحيده كان بهالوسامة .. يوييل حاالي يخبل ..
شكلي الحين كل يومين بطب بيتهم هههه .. بس قهرنييي يوم مالف عليه .. حتى ماسوالي سالفة .. اففف يالقهر ..
و فاطمة يالسه اتفكر .. رن تيلفونها 
* فاطمة برقة زيادة عن اللزوم :: ألـــو ؟؟!!
* ..... :: يا هلا و مرحبا بهالصوت ..
* فاطمة :: اهلين و مرحبتين .. وينك يالقاطع ؟
* .... :: أنا اللي ويني ؟؟ انت اللي وينج ما تردين عليه ..
* فاطمة :: شسوي بعد .. مشغولة ..
* ... :: سو شكلج لقيتي غيري ..
* فاطمة .: جسووم عاااد شهالكلام ..
* منصور :: ايييه انا منصور مب جسوم .. و منو هذا بعد 
* فاطمة و حست انها تورطت :: هههه متأثرة بأخويه اليوم .. ما خليت حد إلا و زقرته جسوم ..
* منصور و هو مب مصدق رمستها :: أهـــا .. اخوج قلتي
* فاطمة :: هيييه اخويه شوو فييييك ..
* منصور :: لا ماشي ..
* فاطمة :: و شخبااارك بعد ..
* منصور :: و الله الحمد لله .. إلا اقولج حمدوه
* فاطمة :: منو حمدووه؟؟
* منصور كان يبا يغايظها و يرد الها نفس الحركة :: هههه متأثر باختي اليوم.. ما خليت حد إلا وزقرته حمدوه ..
* فاطمة حست انه يبا يغايظها :: اوكيه منصور انا بخليك الحين ..
* منصور :: و ليييش يعني؟ تو الناس
* فاطمة :: تعبانة و أبا أرقد ..
* منصور :: اها .. اوكيه .. ببااي
* فاطمة ف قلبها :: مالت عليه حتى سلامات ما يقول يبا الفكة ... ::: يالله باااي
وسكرت عنه .. و ردت تفكر بحمد اللي ماخذ كل تفكيرها ..

))منصور .. واحد من اللي تعرفت عليهم فاطمة .. عمره 22 .. يلعب عليها طبعا .. ويحب يغيظها .. تعرفت عليه يوم كان ف المول وقط عليها رقم وهي ماتصدق طبعا وشلت رقمه .. بس دوره بينتهي قريب لأنها بدت تمل منه ((

----------------

ف الكورنيش ...
* ميرة :: هذا كل السالفة ؟
* راشد :: هيه .. ليش مو عايبتنج ؟
* ميرة :: لا مب جيه .. بس من متى صارت ؟
* راشد :: من سنتين ..
* ميرة :: سنتين !!! و ليش ما خبرتني
* راشد :: كنتِ بعدج صغيرة .. 
* ميرة :: راشد تبا الصراحة ..
* راشد :: أكييد و إلا ليش قلت لج السالفة ..
* ميرة :: انت الغلطان ..
* راشد :: ياا سلااام ليش غلطان ؟؟
* ميرة :: انت لعبت بمشاعر البنية وخليتها تتعلق فيك وبالآخر ماحبيت إلا ربيعتها؟؟ الله يسامحك 
* راشد :: انا شو اسوي .. القلب و ما يهوى 
* ميرة :: لو انت مب قد الحب .. ليش تحب؟ ليش حبيت وعذبت البنية .. وهي اللي اعتبرتك كل شي ف حياتها وتعلقت فيك .. خاصة بعد وفاة ابوها .. غلطتها انها حبتك ؟ و إلآ غلطتها إنها وثقت فيك ..
* راشد :: ميرة .. انا قلت لج السالفة عسب تخففين عني .. مب تزيدين علي ..
* ميرة :: انتوا الرياييل من تملون من وحدة تفرونها جنها زبالة بدون ما تقدرون مشاعرها .. طبعا مب الكل .. 
* راشد :: ميرووه و اللي يسلمج .. صدعتي راسي
* ميرة :: انزين .. انت تبا ترد الها الحين ؟
* راشد :: هيه أكيد ..
* ميرة :: بقولك شي .. الانسان مهما تعلق بشخص وحبه من كل قلبه ووهبه كل حياته وروحه وأغلى شي عنده .. وهالشخص جرح مشاعره أو سوا اللي سويته .. صدقني مستحيل يغفر له لو شو ماصار .. عزة النفس أهم من طيبة القلب يا راشد.. اللي سويته فيها مب شويه .. حط مكانك ف مكانها .. بترد للي سوا فيك جذيه؟ لا تقول لي هيه ..مستحيل .. مهما كان قلبه كبير .. صح يا راشد؟
* راشد ويمسك راسه :: مادري مادري .. ماعرف شي ..
* ميرة :: انا اعرف انك تحس بتأنيب الضمير .. عشان جيه تبا ترد الها .. بس هالشي بيدك .. انك تخليها ترد لك أو لأ .. معني ماعتقد 
* راشد :: ميرة .. كلميها ........
* ميرة :: شوووو؟؟؟ لا بووويه لا ادخلني فهالسالفة ما يخصني انا ..
* راشد :: ميروه الله يخليج حسي فيني شوي .. انا بسوي اي شي بس عشان ترد لي ..
* ميرة :: انا ماقدر أساعدك فهالشي .. انت غلطت و انت تتحمل غلطتك .. و السموحة ياخوي
* راشد :: افا .. ما هقيتها منج .. انا قلت يمكن بتساعديني بس مامنج فايدة 
* ميرة :: انا ماقلت ما بساعدك .. 
* راشد :: يعني بتكلمينها ..
* ميرة :: بس مب فالهشي .. اسمحلي ..
* راشد :: اففف .. انا بحاول وياها الين ما ترد لي 
* ميرة :: اقولك شي ...
* راشد :: قولي ؟؟!!
* ميرة :: بتكون أهبل انسان لو ردت لك .. 
ومشت جدام اخوها بسرعة ..

))ميرة عمرها 17 كبر سلامة .. سنها صغير لكن عقلها كبير .. راشد كان اقرب واحد الها.. يوم تستويله مشكلة يروح ويخبرها عنها .. هي الأكبر من بين البنات .. جدية و عااقلة .. و اللي يشوفها يحبها من طيبتها((

------------

في بيت العم خالد .. كان الكل قاعد ف الصالة و يسولفون و يظحكون إلا شخص واحد كان سرحااان و ف عالم ثاني ..

بوحمد .. معقولة حميد يطلع منه كل هذا ..!! ليش يدخن ؟؟ وشو اللي يخليه يسوي هالشي اصلا ؟؟ انا لازم أعرف السالفة كلها .. لازم اعـــرفها .. اخويه سلمني عياله أمانة .. وانا لو خليتهم جيه .. يعني خنت الأمانة .. انا بروح المستشفى الحين وبستفسر عن السالفة ... و الله يعيني على حميد ..

* ام حمد :: بو حمد .. شو بلاك؟ 
* بو حمد :: ها؟؟ لا ماشي
شويه تنزل مريم و هي مستاانسة ...
* مريم :: ابويه اميي .. عيالي بييون الحين ..
* ريم :: أخييييييرا فكر ريلج اييبهم ..
* حمد :: انتي اسكتي .. محد طلب منج ترمسين ..
شويه تيي عاشة و تنظم الهم ..
* عاشة :: شو فيكم ؟؟
* حمد :: اوهووو يت هذي ..
* عاشة :: اسكت اسكت .. اصلا زين يوم اني ماخبرت ابويه شو سويت لي
* بو حمد :: شو سوالج؟
* عاشة بدت تصيح :: ابويه ولدك هذا امس عطاني كف
* بو حمد :: شووووو ؟؟ من اليوم و رايح حمد .. يويلك ان مديت ايدك على حد من خواتك طول ما انا حي .. وبعدين انا ساكت عليك من سالفة البارحة .. حرقت ويهي جدام الظيوف .. امحق ولد 
* حمد :: ابويه .. مرة ثانية لو تبا تعبر عن مشاعرك الفياظة صوبي .. خلها بيني و بينك احسن .. مب لازم الكل يسمع ..
* مريم :: و بعدييين يا جمااعة انا نازلة من فوق و مستانسة و انتوا تكدرون عليه .. 
* ام حمد :: مريوم فديت روحج متى بييون؟
* مريم :: بعد نص ساعة بيكونون هني
* حمد :: انا بترخص ..
* مريم :: ويييين
* حمد :: جهنم .. الموووت .. اي مكان بس بعيد من هالبيت ..
* بو حمد :: انتبه على كلامك
* حمد :: و انتوا طيحوا كل شي عليه .. اما اي شي يقولونه بناتك مب غلط بس انا اللي غلط.. مع السلامة انا بسير ابرك لي .. ع الأقل عندي ربع يونسوني مب اهل يكدرون مزاجي ...
و طلع من الصالة و هو معصب .. لحقته مريم عشان تحاول اتهديه ..
* مريم :: حمد .. حقك علي .. امسحها فيني .. بس لا تعصب
* حمد بقهر :: مريم انتي شفتي كيف كان يرمسني ابويه .. لو بيني وبينه بسكت مابقول شي .. بس يقول هالكلام جدام اللي يسوى واللي ما يسوى .. ويسبني ومادري شو .. انا بعد عندي بتاثر من كلامه وإلا هو يشوفني بليا قلب عادي عندي ..
* مريم :: حمد هذا ابوك ..
* حمد :: على عيني و راسي .. بس سمعي .. انا مب داش هالبيت .. الين ما الكل يعرف انه في واحد اسمه حمد لازم يحترمونه ..
* مريم :: حمد وين بتسير؟
* حمد :: اي مكان بعيد عن هالبيت .. و رقمي عندج لو بغيتي مني شي ..
* مريم :: حمد .. عشان خاطري .. لا تتهور.. ولو تبا تروح انا ماقدر امنعك بس اطلع حرتك ف السيارة انتبه ع الطريق ..
* حمد :: اصلا انا لو برد هالبيت .. مابرد إلا عشانج وبس .. انتي الوحيدة اللي تفهميني .. بعد سهيل 
* مريم ابتسمت له :: انزين ما بتشوف عيالي ..؟؟ يبون يشوفون عمهم
* حمد :: بيي باجر و بشوفهم و بطلعهم ويايه .. بس من عند الباب .. ما بشبر ف البيت
* مريم :: اووكيه ع راحتك .. بس انتبه ع الطرييق 
* حمد:: اووكيه .. مع السلامة ..
* مريم :: ربي يحفظك ..

------------

ف بيت سلامة ...
* سلامة :: هلاااا اخيرا رديتوا .. و الله ملل و انا يالسه روحي ف البيت .. بس جنكم نقصتوا؟
* ميثة :: ما درييييتيييي؟
* سلامة :: شو شو شو ؟؟؟
* ميثة :: حمييييد ف المستشفى 
* سلامة :: ليييييييييش؟؟
* ام عبد الله :: يته النوبة و اغمى عليه بيت عمج و ودوه المستشفى 
* سلامة :: سرتي له؟
* ام عبد الله :: هيه
* سلامة :: ابا اسير له
* ام عبد الله :: بنسير له بعدين انا و انتي و ميثة 
* سلامة :: اوكيه ..

----------

ف المستشفى ....
وصل بو حمد عند حميد ...
* بو حمد :: السلاااام عليكم 
* عبد الله + حميد :: و عليكم السلااام و الرحمة 
* عبد الله :: شحالك عمي
* بو حمد :: الحمد لله يسرك الحال .. شحالك انت ؟؟
* عبد الله :: بخير دامك بخير ..
* بو حمد :: ها حميد .. شحالك اليوم
* حميد يرمس بدون نفس كالعادة :: بخير
* بو حمد :: شو متى تبا تطلع .. بطلعك 
* حميد :: لا ما يحتاي مستانس هني
* بو حمد :: ع راحتك
و تموا ساكتين لفترة ..
بو حمد .. بفتح وياه السالفة الحين .. لازم أعرف شو فيه الولد .. و ليش سوا جيه
* بو حمد :: حميد بغيتك بشي ..
* عبد الله :: اووكيييه انا طالع من غير مطرود ههههه
* حميد :: تفهمها و هي طايرة .. 
* عبد الله :: هييه هههههه
-----
اكيد تعرفون الموضوع اللي بيتكلمون عنه ..



الجزء الحادي عشر
----------
بو حمد :: حميد بغيتك بشي ..
* عبد الله :: اووكيييه انا طالع من غير مطرود ههههه
* حميد :: تفهمها و هي طايرة .. 
* عبد الله :: هييه هههههه

----------

* حميد :: شو السالفة ؟؟
* بو حمد :: حميد .. انا عرفت انك اتدخن ..
* انصدم حميد من كلام عمه .. بس حاول يخبي صدمته :: .......
* بو حمد :: ليش سكت؟؟
* حميد :: شو تباني اقول 
* بو حميد :: عادي عندك اني عرفت؟
* حميد :: تبا تظربني ؟؟ يالله اظربني .. بتخبر امي خبرها عادي ما يهمني
* بو حمد :: يا ولدي ..
* حميد :: انا مب ولدك ..
* بو حمد عصب بس حاول يمسك عمره :: خلاص مب ولدي .. ولد اخوي .. اسمع انا مابظربك ولا بخبر أمك .. بس اللي اباك تعرفه انه التدخين انتحار بطيئ أو بالأصح موت بطيئ .. تبا تموت انت؟
* حميد :: هيه أبا أموت .. يعني وايد عايبتني حياتني .. بليا أب .. مريض و حالتي حاله ..
* بو حمد :: عندك رب يحفظك و يحميك ..
* حميد :: ......
* بو حمد :: بس ابا اعرف شو اللي خلاك ادخن .. انت بعدك صغير .. و حتى لو كنت أكبر عني التدخين مب يعني انك ريال يا حميد .. افهم و افتح هالطاسة اللي ف راسك ..
* حميد :: انا كييفيي دخن و إلا ما دخن كييفييي .. انتوا مالكم خص فيني 
* بو حمد :: هذا كلامك؟
* حميد :: هيه
* بو حمد .. اسمع يا حميد .. انت تماديت واايد .. و صدقني لو ماوقفت التدخين .. لأ أنا عمك و لا أعرفك 
* حميد تم يطالع عمه بنظرته الاحتقار المعتادة اللي يطالع بها كل الناس :: .....
* بو حمد :: و هالنظرة بطلها ..
طلع بو حمد من عند ولد أخوه و هو معصب و شايل ف خاطره منه ..

-----------------

الحين نروح لشخصين يتكلمون بالتلفون ... منو هذيل؟؟
* ..... :: انتي ما شفتي كيف ترمسني ؟؟؟ انا براويها
* ..... :: هدي أعصابج يا موزة ..
* موزة :: لا يا مهرووه .. انا مب باردة نفسج .. انا بعلمها الأدب هذي سلاموه
* مهرة :: انتي ليش تكرهينهم هالكثر .. سلامة ياهل لا تحطين عقلج بعقلها
* موزة :: انتي تعرفين عدل ليش انا مادانيهم
* مهرة :: لأ ماعرف ليش؟
* موزة :: انا معارظة هالزواج بكبره .. عنود (( أم سلامة )) مب منا .. مب من ثوبنا .. بس محمد أصر انه ياخذها .. انا هالحرمة من زمان مادانيها بس محمد لأنه يبا يغايظني خذها 
* مهرة ::: ههه موزة يالخبلة .. ليش بيغايظج ؟؟ هذا اخوج 
* موزة :: لأ .. أصلا محمد يوم عرف اني ماطيقها بعيشة الله خذها .. 
* مهرة :: كبري عقلج .. محمد مستحيل يكون سوا جيه عشان يغايظج .. محمد يحب حرمته ومابياخذها عشان يغايظ حد و بعدين من قبل ما تقولين له هالشي هو كان مصر انه ياخذها 
* موزة :: حتى و لو .. انا مااادااانييها .. و كل ماشوف عيالها اشتعل بالغييظ .. 
* مهرة بعصبية :: موزة .. انتي عصبتي و زعلتي و شلت الدنيا يوم محمد خذ عنود .. بس يوم ابويه خذ على امي ماقلتي شي ؟؟ ممكن اعرف ليش
* موزة :: لأنه أبويه و ماقدر اقول شي .. و انا متغايظة منهم
* مهرة :: أها لأنه ابوج .. اوكيه هذا بلعتها .. وهو عنده من الحرمة الثانية اثنين .. خليفة ومانع .. ليش ما تعاملين عيال خليفة مثل عيال محمد .. ليش تحقدين على عيال محمد ..
* موزة :: لأنه عيال خليفة صغار
* مهرة :: هههه .. ظحكتيني .. و حميد و ميثة مب صغار ؟؟ 
* موزة :: لأ مب صغار
* مهرة :: أقولج شي .. صح انج اختي ... بس لازم اقولج هالشي
* موزة :: قولي
* مهرة :: زين يوم ان سلامة ترد عليج يوم ترمسينها بطريقتج الخايسة .. وأكثر شي يعيبني انه ميثة وحميد ما يردون عليج .. لأنج تستاهلين هالشي .. بس صبري يا موزة .. الله فوق .. بيي على عيالج يوم و بييهم حد يعاملهم مثل ما تعاملين عيال محمد ...
و قفلت ع ويه موزة ...
* موزة :: هاي تخبلت .. افهم من كلامها انها واقفة ويا عيال محمد و حرمته .. بس ما عليه يا عيال عنود بخلي حياتكم جحيم ... 

---------------------

بيت سلامة ....
* سلامة :: امي ...
* ام عبد الله :: هلا 
* سلامة :: متى بنسير عند حميد ؟
* ام عبد الله :: ههه ليش مشتاقة لتهزيئاته؟
* سلامة :: هههه .. هيه و الله .. حليله .. انتي رحتي له صح
شويه ميثة ادش عرض ..
* ميثة :: قالت لج هيه ..
* سلامة :: جب ماكلمتج ..
* ميثة :: حتى انا ما كلمتج
* ام عبد الله :: اوهووو .. يعني اذا مب حميد و سلامة ... ميثة و سلامة 
* ميثة :: شسوي لازم آخذ دور اخويه 
* سلامة :: انزين انزين .. اسكتي الله يخليج
* ميثة :: اذا كان السكوت من فضة .. فالكلام من ذهب
* ام عبد الله :: ههههههههه
* سلامة :: دخييلج لا تقولين امثاااال 
* ميثة :: يشرفج تسمعين امثالي اصلا
* ام عبد الله :: الله يغربل عدوكن .. قومن تلبسن بنسير له حميد 
* ميثة + سلامة :: ان شاء الله

---------

عند حمد ..
حمد ... :: ابويه متى بيعرف اني كبرت الحين .. شو يباني اسويله زياده .. اففف القهر انه يهزأني جدام لصغاريه .. شو يتحسبني .. بعده يتحسبني ياهل .. انا عمري 21 مب سنتين ... 
حمد كان متغااايظ من اللي صار و انه ابوه هزأه جدام خواته لصغاريه ..
شويه يرن تلفونه ..
* حمد :: هلاااا و غلااااا سهييل ...
* سهيل :: أهلييين ؟؟ شحااااالك الغااالي
* حمد :: تماام .. شحالك انت
* سهيل :: بخير دامك بخير .. وين مكانك؟
* حمد :: ف الشارع
* سهيل :: هههه .. شتسوي تنظف؟
* حمد :: هيه تصدق
* سهيل :: يالله صدق وينك
* حمد :: انا يالس احاوط بالسيارة ماعرف وين اروح
* سهيل :: حمد .. شو صار؟؟ لا يكون اتصلت سارة؟
* حمد :: لأ .. اقولك .. تعال المارينا بنتلاقى هناك و بقولك السالفة
* سهيل :: دقايق و اكون عندك ..
* حمد :: فمان الله ..

بعد ربع ساعة تلاقوا سهيل و حمد ف المارينا ..
* حمد :: بل عليك .. وين كنت ف الصالون تتعدل .. ربع ساعة .. اونة دقايق و اكون عندك
* سهيل :: ههه الله يقطع سوالفك .. شسوي بعد و انا طالع الوالدة قالت لي وصلني بيت اختي .. وديتها وييتك
* حمد :: المهم .. اخبارك بعد
* سهيل :: و الله عايشين .. قول لي شسالفة ؟
* حمد :: ابويه من غيره
* سهيل :: هييه .. معاملته لك بعدها نفس الشي ..
* حمد :: هيه .. مادري كيف افهمه اني ريال الحين .. و الله لولا مريوم عندنا ف البيت جان مارديت له
* سهيل :: و الله؟؟؟ مريم عندكم
* حمد :: هيه .. ريلها الخايس أخيرا قرر اييبها .. 
* سهيل :: الله يعينها عليه .. و يصبرها
* حمد :: لا ما عليك .. بنهيها هالسالفة .. هو مصخها
* سهيل :: كيف بتنهيها ؟؟
* حمد :: بخليه يطلقها غصبا عنه ... 
* سهيل :: و أبوك؟؟؟
* حمد :: شو فيه؟
* سهيل :: خله يتصرف هو ..
* حمد :: يصير خير ... اقول صك هالسالفة احسن
* سهيل :: شو تشرب؟
* حمد :: ماي
* سهيل :: ويه الفقر ههههههه
* حمد :: اذا على حسابك .. ابا اللي بتطلبه
* سهيل :: و لا يهمك الكوفي شوب كله لك ...
* حمد :: الله يخليك لي ..
* سهيل :: يخليني لك و إلا يخلي مخباي لك ..
* حمد :: هههههههههههههههه .. الاثنين ...
* سهيل :: ادرييبك ...

-------------------------

وفي نفس المكان (( المارينا المول )) كانوا راشد و ربعه هناك ..
* راشد :: أقول .. انا يوعان .. خلنا نروح ناكل شي ..
* سلطان :: يالدب .. كم مرة بتاكل ..
* راشد :: جب جب .. دافع من فلوسك انت
* سلطان :: بسم الله .. شفيك عصبت ؟
* محمد يدق سلطان :: اسكت عنه .. تراه واصل حده و بيقوم يصفعك
* سلطان :: ليش يصفعني .. ماكل حلاله انا
* راشد وقف و لف ع سلطان :: سلطان شو مشكلتك؟
* سلطان :: والله انت اللي شو مشكلتك .. معصب و ماد البوز .. حتى مزح مانروم نمزح وياك
* راشد :: و الله اعصب .. امد بوزي .. ها شي راجع لي .. ما يخصك انت .. لو مو عايبك الوظع .. تقدر تروح بيتكم
* محمد :: يا جماعة هدوا أعصابكم
* راشد :: يوم بتخلي ربيعك هذا ينجب .. بهدي أعصابي
* سلطان :: راشد تراك مصختها وايد
* راشد :: سلطان انا ساكت عنك ..
* محمد :: و بعدين يا جماعة فظحتونا ..
* راشد :: انا بخليكم الحين .. و تحلمون تشوفون ويهي
* سلطان :: يكون أحسن .....


الجزء الثاني عشر
----------
هد راشد ربعه و راح عنهم .. لأنه هو أصلا كان متظايق و معصب و سلطان كمل عليه .. و هو طالع من المول .. شاف .... 

----------------

تلبسوا قوم سلامة عسب يروحون لحميد ... و في المستشفى 
* سلامة :: حمييييد .. هلااا شحااالك ..
* حميد استغرب يوم شاف خواته يو عنده :: اهلين .. شو هالسؤال الأهبل .. يعني لو كنت بخير بكون هني
* سلامة :: بسم الله .. كلتني ..
* ميثة :: يا حيييييك مترقد ف المستشفى ..
* حميد :: تعالي جربي .. يلسي يوم واحد .. بتلووع جبدج ..
* ام عبد الله راحت و قعدت على حافة شبرية حميد :: شحالك حبيبي .. ان شاء الله الحين أحسن؟
* حميد اتذكر انه طول لسانه على أمه يوم يته :: أحسن شوي .. 
* عبد الله دخل و شاف الكل موجود :: ماشا الله متى ييتوا؟
* ميثة :: قبل شوي ...
* عبد الله :: شحالج امي اخبارج..
* ام عبد الله :: الحمد لله ..
* سلامة :: و نحن ما تسألنا عن اخبارنا؟
* ميثة :: و إلا مالنا رب ..
* عبد الله :: ماشا الله ما يحتاي أسألكن .. مبين عليكن بخير ..
* ميثة :: حلجك بيعورك لو سألت ..
* عبد الله :: هيه بيعورني ..
* حميد :: لو بتظاربون اطلعوا .. راسي يعورني و مب متفيق الكم .. 
* ام عبد الله :: و بعدين وياكم .. 

و بعد فترة .. 
يوم خالات حميد عسب يزورونه .. و بعد ما الكل سار .. ام عبد الله و بناته قاموا عسب يردون البيت ..
أم عبد الله كانت آخر وحدة تطلع من حجرة ولدها ..
* حميد :: أمي ....
* أم عبد الله :: هلا ..
* حميد :: أنا ...... آسف ..
* ام عبد الله :: ليش تعتذر ؟
* حميد :: انا غلطت عليج اليوم الظهر .. صدقيني مو قصدي ..
* ام عبد الله ابتسمت و قالت له :: ما عليه حبيبي .. لا تاكل هم ..
* حميد :: يعني مب زعلانة ؟
* ام عبد الله :: عمرك شفت ام تزعل من ولدها ؟؟ 
* حميد كان منزل راسه و مستحي من اللي سواه :: .........
* ام عبد الله :: يالله فديت روحك .. كل شي و ارقد ...
* حميد :: ان شاء الله ... 

------------------

ف المول ...
راشد كان طالع و شاف ....... حمدة ..
راشد (( هذي حمدوه .. شتسوي يايه بروحها .. هذي يايه عرس وإلا مول .. طع شو مسويه ف روحها .. خلني اروح امشي وراها بشوفها شو بتسوي .. ((

و تم راشد يلحقها .. شوي شاف حمدة ادش ستاربكس .. و تيلس ويا واحد من الشباب ..

راشد (( حسبي الله عليج يا حمدوه .. حسبي الله عليج .. الله يرحم ايامج يا سلامة ... صدق اني ظيعت وقتي وياج يا حمدوه .. و ظيعت من ايدي كنز اللي هي سلامة(( 

راشد كان متظايق من الموقف اللي استوا بينه و بين سلطان .. و اظايق أكثر يوم شاف حمدة .. هي صدق ما تهمه الحين .. بس اظايق لأنه أذكر سلامة ...

و طلع من المول ... شويه دقت له ميرة ..
* ميرة :: هلااا و غلاااا .. 
* راشد :: أهلين
* ميرة :: وين تصيع ؟
* راشد :: ف الشوارع ..
* ميرة :: ههههه .. شو تسوي ..
* راشد :: ماشي و الله .. أحوط بالسيارة ماعرف وين أروح ..
* ميرة :: حد وياك؟
* راشد :: لأ 
* ميرة :: اها
* راشد :: شو تبين؟؟
* ميرة :: ههههه .. يعرف ... 
* راشد :: أكييد .. اختي و اعرفها ..
* ميرة :: رشوووود .. الله يخليييييك .. تعال طلعني .. ملل و الله ملل
* راشد :: ادرسي .. ماعندج دراسة ..
* ميرة :: لأ خلصت ..
* راشد :: سيري بيت خالتج .. كل اسبوع طابة هناك ..
* ميرة :: محد .. ساروا العين .. و إلا كنت بسير الهم ..
* راشد :: اففف .. اوكيه تلبسي و الحين بييج .. لكن ربع ساعة و بس ..
* ميرة :: شو ربع ساعة .. من المكان اللي انت فيه لبيتنا ربع ساعة ..
* راشد :: هههه انا الحين وصلت البيت 
* ميرة :: افففف .. انزييين الحين طالعة ..
* راشد :: لا تتأخرين 
* ميرة :: من عيوني ...
و سكرت عنه راحت تتلبس ... 
و هي طالعة شافتها اختها شمة لصغيرة عمرها 3 سنوات ..
* شمة :: ميرووه ؟؟ وين بتسيرين؟
* ميرة :: ما يخصج .. قومي عني رشود يتريا برة ..
* شمة :: انا بيي .. انا بيي ..
* ميرة :: وين تيين .. يويلج من رشود
* شمة :: جب جب .. بيي .. و تمت تصيييح
* ميرة :: افف .. تعالي بلبسج ...
لبستها ميرة عسب تشلها وياها ... و شمة كانت مستاااانسة ..
و طلعت برة عند اخوها ..
* راشد يطالعها من جامة السيارة .. :: طع الهبلة يابت منو وياها .. بنروح الحديقة نحن 
* بطلت ميرة الباب :: السلام عليكم ..
* راشد بعصبية :: جان يبتي أحمد وياج بعد ...
* ميرة :: شسوي .. زفتني عند الباب ..
* راشد :: يالله يالله ادخلي ..

و في السيارة الكل كان ساااكت .. و راشد كان مشغل شلة بو رحيمة * دريج الموت * ... شويه شمة تقول ..
* شمة :: ميروووه .. رشووود .. أنا يووووعااانة
* راشد :: كليني ..
* ميرة :: هههههههه
* شمة :: ابا أكل ... يووعاانة 
* راشد :: من وين أييب لج .. 
* شمة :: ما تعرف توقف في المطعم ..
* راشد ظحك على رمسة اخته :: لأ .. أعرف أوقف عند المطعم 
* ميرة :: هههه .. هيه و الله حتى انا يوعانة ..
* راشد :: يالله عيل بننزل ناكل ف ماكدونالدز ..
* شمة :: هيييييييه .. حتى انا أبا ماكدونالدز ..
* راشد :: أنا بشتريلج براتة و جبن .. ههههه و جاي
* شمة :: خليه حقك ..
* ميرة :: ههههههه .. متفيقين انتوا ..
و نزلوا يتعشون ..

--------------

ف حجرة فاطمة ...
* فاطمة :: اففففف .. ملل .. ملل .. ملل .. شسوي .. بدق عند ريموه .. يمكن تسولف عن أخوها .. آآآه يا قلبي ..
و دقت عند ريم ..
* ريم :: ألو ...
* فاطمة :: هلاااا
* ريم :: أهليييين .. شحااالج القاااطعة 
* فاطمة :: و الله بخيير .. اسمحيلي انشغلت شوي ..
* ريم :: انشغلتي؟؟؟ علينا يا فطوم
* فاطمة :: تبين الصراحة ..
* ريم :: أكيييد ..
* فاطمة ::: منصور السخيف .. بودره قريب ..
* ريم :: أفااااا .. ليييش يا خبلة .. منصور كل البنات يتمنونه ..
* فاطمة :: خلاص خذيه انتي ..
* ريم :: انزين ليش؟
* فاطمة :: صاير سخيييف .. و دمه ثقيل .. 
* ريم :: إلا انتي اللي مليتي منه .. 
* فاطمة :: هيه صح أنا مليت منه ..
* ريم :: افف منج .. ما تنعطين ويه .. جان زين لو حد يقط لي رقم ..
* فاطمة :: تبين رقمه؟
* ريم :: رقم منو؟
* فاطمة :: منصور يالخبلة ..
* ريم :: صدق؟
* فاطمة :: لو تبينه بعطيج اياه ..
* ريم :: أخاف لا يسكر ف ويهي ..
* فاطمة :: لا .. لا تخافين .. منصور ما يصدق يسمع صوت بنية ..
* ريم :: و لو سألني من وين يبتي الرقم شقوله ..
* فاطمة :: قولي له انت رقمتني ..
* ريم :: أخاف انفظح ..
* فاطمة :: لا ما عليج .. هذا رقمه خذيه .....
* ريم :: و لو هلي عرفوا ..
* فاطمة :: ما بيعرفون .. ان شا الله ..
* ريم كانت مستانسة و خايفة نفس الوقت :: اوكيه ..
* فاطمة :: و شخباركم بعد
* ريم :: نحن و إلا .....
* فاطمة :: ههههه و إلا ..
* ريم :: مب موجود ف البيت
* فاطمة :: وينه؟؟؟
* ريم :: مادري .. ظهر من العصر ..
* فاطمة :: اهاا
شويه سمعت ريم حشرة تحت و سكرت التلفون و نزلت تجوف شسالفة ... 

جافت اختها مريم يالسة ع الكرسي و تصيح و أبوها معصب ...
* بو حمد :: و الله ماكون خالد .. ان ما خليته يطلقج ولد الجلب ..
* مريم :: ابويه .. خله يطلقني .. انا ملييت .. خلاص مليييت منه ..
* ام حمد :: هدي اعصابج حبيبتي ..
ركظت ريم عند اختها عاشة و سحبتها عسب تعرف السالفة ..
* ريم :: عويش .. شو استوا؟
* عاشة :: تعرفين الجلب سالم شو مسوي ..
* ريم :: شو؟
* عاشة :: أول شي .. تعرفين ليش ياب عياله .. على غير العاده
* ريم :: لييش؟
* عاشة :: الحبيب عرسه اليوم ..
* ريم :: شووووووووووو؟؟؟؟؟؟؟؟؟
* عاشة :: هييه .. بياخذ بنت خالته .. 
* ريم :: و اختي شو فيها؟؟
* عاشة :: أونه يقول .. كيفي الشرع محلل 4 و انا بتزوج لي اباها ..
* ريم :: يخسي والله .. انا بتصل عند حمد
* عاشة :: يا هبلة .. ليش بتتصلين؟
* ريم :: بخبره عن اللي صار ..
* عاشة :: اوكيه تعال نتصل به 
دقوا عند حمد ...
* حمد :: البيت متصلين .. غريبة شو عندهم
* سهيل :: ما بترفع؟
* حمد :: لأ .. خلهم يولون
* سهيل :: ارفع يا ريال .. يمكن في شي ظروري ..
* حمد :: اوكيه .. ألو؟؟؟
* ريم :: حمد ..
* حمد :: شو تبين انتي
* ريم :: حمد .. تعال البيت بسرعة 
* حمد :: لييييش؟؟ شو استوى؟
* ريم :: مريم ...
* حمد :: شوووو فيييها مريم؟
* ريم :: تعال البيت و بتعرف شسالفة 
* حمد :: اوكيه ثواني و اكون عندكم ..
و سكر عنها ..
* سهيل :: خييير ؟؟ شسالفة ..
* حمد :: مادري .. مريم فيها شي .. ريم ما طاعت تقول لي ..
* سهيل :: الله يستر ..
* حمد :: يالله يالله قم بنسير ..
* سهيل :: لا ما عليه شكلك مستعيل .. انا برد بروحي البيت ..
* حمد :: اوكيه .. يالله وداعة الله
* سهيل :: طمني بعدين
* حمد اوكيه ..

------------------

عند سالم ..
* ام سالم :: لو طلبوا الطلاق شو بتسوي؟
* سالم :: بطلقها شو بسوي بعد ..
* ام سالم :: انا من زماان أقولك خذ زينب بنت خالتك و انت مب طايع ..
* سالم :: خلاص ألحين باخذها .. و اليوم بعد افرحي ..
* ام سالم :: أكييد بفرح ...
شويه ادش عليهم .. اخت سالم
*سارة :: حرام عليك يا سالم .. حراام عليك ..
* سالم :: شو عندج انتي
* سارة :: اللي تسويه ف مريم .. مب زين .. 
* سالم :: و الله هالشي راجع لي ..
* سارة :: اوكيه بقولك شي :: كما تدين تدان ..
* سالم :: اجلبي ويهج الله يخليج ..
* سارة :: انا بروح عنك بس اتذكر هالكلام ..

))عرفتوا منو سارة اخت سالم ؟؟؟ هي نفسها سارة اللي حمد قص عليها .. هي كانت تعرف ان حمد اخوه مريم .. بس حمد ما يعرف انها اخت سالم ....(( 

---------------------

كان حمد مسرع .. و معصب ..
حمد (( أكيد هذا سالم .. أنا اعرف ان سالم .. بس و الله يا سالم لخليك تنسى اسمك لو سويت فاختي شي والله ) (
حمد أكثر واحد متعلق ف اخته مريم .. لأنه هي أكثر وحدة تفهمه وتعزه .. وما يرظى عليها .. حتى لو أمها أو أبوها عصبوا عليها .. هو يزعل .. ومستعد يسوي اي شي عشانها ..
وصل حمد البيت .. و بطل الباب بقو و الكل كان يالس ف الصالة .....
…………..




الجزء الثالث عشر
----------------------
وصل حمد البيت .. و بطل الباب بقو و الكل كان يالس ف الصالة .....
وشاف اخته مريم تصيح ..
* ام حمد :: شو فيك ؟؟ ليش تبطل الباب جيه؟
* حمد :: شو استوى ؟؟؟
* ام حمد :: و انت كيف عرفت ؟
* حمد :: مو المهم كيف عرفت .. شو صار؟
* بو حمد كان قاعد ع الكرسي و منزل راسه ما تكلم ..
* مريم :: سالم ..... عرسه اليوم
* حمد :: شوووو؟؟؟ شو يعني عرسه اليوم
* مريم :: يعني اليوم بيتزوج .. بياخذ بنت خالته اليوم ..
* حمد :: لا و الله .. يوم انه بياخذ بنت خالته خله يطلقج
* مريم :: أخاف ما يوافقج .. 
* حمد :: عيل من بيننا المحاكم ..
* بو حمد :: و أنا مالي رمسة ..
* حمد رفع صوته :: ابويه و انت ساكت .. ما تكلمت .. تشوف بنتك فهالحالة و تسكت .. ماتشوف الجلب سالم شو سوا .....
قطع ابوه كلامه و عطاه كف :: .......
* حمد تم ساكت و انصدم من الموقف ..... :: 
* بو حمد :: اعتقد اني للحين ما مت .. انا أقدر اتصرف وإلا بتعلمني يا سيد حمد .. خلاص انا صرت ولدك وانت صرت ابويه صح ؟؟؟
* ام حمد :: مب وقته الحين .. مب وقته .. هدوا أعصابكم .. 
* حمد :: كف ها .. هالمرة أنا طالع من البيت و ما بتجوفون ويهي موولية ...
طلع حمد معصب كالعادة من البيت ...
ركب سيارته ... و كان مســــرع
و ما انتبه ع السيارة لي جدامه ........ و دعـــــــم 

-------------------------

ف المستشفى ..
كان حميد يفكر بكلام عمه ....
حميد (( أعرف ان كلام عمي صح .. و أعرف انه خايف علي .. بس انا جيه و إلا جيه ميت .. لو ما مت من التدخين بموت من المرض .. أو بموت من العيشة هذا اللي أنا عايشها .. أعرف ان هالشي يزعل أبويه .. بس شسوي .. انا ملااان .. متظايق .. ماعرف وين أروح .. ما عندي حد أشكيله اللي ف قلبي .. محد يتحمل مشاكل حد .. كل الي اباه شخص يفهمني و يسمع لي .. آآآه يابوي .. الله يرحمك .. 
هاي أول مرة لي ادخن فيها .. أقدر أقطع .. غيري ما يتخلى عن التدخين .. بس انا هاي اول مرة .. خلاص ما بدخن .. ما بدخن .. وسعيد هذا برويه .. هيه صح .. سعيد .. شخباره .. من ترقدت ماشفته و لا سمعت صوته .. بتصل به بشوف شخباره ((
و دق عند سعيد ... 
رنة .. رنتين ... ثلاث ... ما رفع سعيد ..
* حميد :: وييينه هذا ليش ما يرفع ..... بدق مرة ثانية ...
تم يحاول يدق ... و بعد 3 محاولات رفع ..
* حميد :: السلام عليكم
* سعيد بصوت وااطي :: و عليكم السلام
* حميد :: ساعة الين ما ترفع ؟؟ و بعدين ليش ترمس بصوت واطي .. ترمس بنية انت
* سعيد :: ...........
* حميد :: سعود شو بلاك ؟؟
* سعيد :: أنا آسف يا حميد ..
* حميد :: ليش تتأسف ؟
* سعيد :: أنا السبب ف حالتك هذي ..
* حميد :: يالخبل لا تقول جيه .. هاللي مكتوب ...
* سعيد :: .....
* حميد :: بعدين يا ويهك وينك .. من تردقت ما شفتك
* سعيد :: مالي ويه اراويك ويهي بعد اللي صار
* حميد :: يا ريال خل عنك هالرمسة .. يالله تعال ابا اشوفك ..
* سعيد :: انزين متى بيرخصونك؟
* حميد :: باجر ان شاء الله
* سعيد :: الحمد لله
* حميد :: يالله تعال الحيييين .. أباك
* سعيد :: دقايق و أكون عندك .... فمان الله
* حميد :: مع السلامة ...

---------------------------

في بيت سلامة ... 
الكل كان يالس ف الصالة .. و عبد الله رد من المستشفى عسب يرتاح ف البيت .. رقد شويه و بعدين قام ويلس عند هله ف الصالة ...
* ميثة :: اففففففففففففف
* عبد الله :: بس بس .. طيرتيني ..
* ميثة :: جب .. ما كلمتك ...
* عبد الله :: و بعدين مليون مرة قلت لج لا تقولين جب .. تفهمين و إلا لأ
* ميثة :: و إلا لأ ..
* مسك عبد الله لمخدة و فرها عليها ...
* ميثة :: امييييي .. جوفي ولدج ...
* ام عبد الله :: ولدي هو أخوج ..
* عبد الله :: هههههااااااي .. سكتوووهااا ..
سلامة كانت سرحااانة و ف عالم ثااااني .. كانت تفكر بشخص هو ((راشد ((
* ميثة :: هيه ادري .. محد يدافع عني ...
* عبد الله :: سلاااامي ... وين وصلتي ...؟؟
بس سلامة مطنشة و ف عالم ثاني ..
سلامة ((يمكن يكون كلامه صح .. انا اعرف ان حمدة بهدلته .. و أعرف كل شي استوى .. يمكن الحين ندم ويباني ارد له من يديد و نفتح صفحة يديدة .. قلبي للحين يحبه بس .. لا لا لا .. مستحيل ارد له .. راشد باعني برخيص .. آآخ يا قلبي .. صراع بين القلب و العقل ... ماعرف شسوي .. ((
* عبد الله :: حجية ... ويييينج ؟؟
* خافت سلامة لأنها كانت سرحاانة و اخوها دقها فجأة :: بسم الله .. زيغتني
* عبد الله :: شو بلاج؟؟؟
* سلامة :: ماشي سرحت شوي 
* ميثة :: اونة شوي .. من يلستي و انتي سرحانة ... ف منوووو؟؟؟ اعترفييييي
* سلامة :: سكتوها هذي اللي يخليكم ..
* ميثة :: يا سلااام .. و ليش ان شا الله اسكت .. 
* ام عبد الله :: الحمد لله ان باقي ع المدارس اسبوعين و افتك من حشرتكم شوي ..
* عبد الله :: هييييه صــــح .. راح من بالي و الله .. الدوام قرب و انا ماسويت شي ..
* سلامة :: محد سوا شي ..
* ميثة :: خلااااص ... خلنا نظهر الحين .. نخلص حق المدارس .. 
* ام عبد الله :: اخوج حميد باجر بيظهر .. بنسير وياه كلنا ...
* ميثة :: بيكون تعبان و ما بيظهر ..
* عبد الله :: ما عليج انا بظهره غصبا عنه ...
* ميثة :: ناااااس هالسنة ثانوية عامة ..
* سلامة :: و علمي بعد ...
* عبد الله :: اوووه .. اختي خطيرة .. نبا نسبة ترفع الراس
* سلامة :: حتى انت بتكون أول ثانوي .. يعني فيه نسبة .. نبا نسبة حلوة ..
* ميثة :: احم .... احم
* عبد الله :: صحة صحة ..
* ام عبد الله و سلامة :: ههههههههههههه
* ميثة :: انا ثاني اعدادي ... و حميد 3 اعدادي 
* عبد الله :: سلامة .. 
* سلامة :: هلا ..
* عبد الله :: ريمو و فطوم وياج صح؟
* سلامة :: هيه نعم .. 
* ام عبد الله :: الله يوفقكم 

------------------

في بيت بو حمد ..
رن تلفون البيت و رفعت ام حمد ..
* .... :: السلام عليكم ..
* ام حمد :: و عليكم السلام و الرحمة 
* .... :: هذا بيت حمد خالد؟
* ام حمد :: هيه هذا بيته .. ليييش ؟؟ شو استوى
* .... :: ولدكم حمد مسوي حادث ... و هو في المستشفى الحين ..
أم حمد من سمعت هالكلام طاحت السماعة من ايدها .. و الكل لف عليها
* بو حمد :: شووو صاار؟
* ام حمد و هي تصيح :: حمد مسوي حادث .. 
* بو حمد :: شووووووو
* ام حمد تمت تصييح ... قام الكل بسرعة عسب يروحون لحمد ...

بعد ربع ساعة وصلوا المستشفى ....
* بو حمد :: دكتور نحن هل حمد هو وينه الحين ...
* الدكتور :: حمد الحين في العناية المركزة ..
* ام حمد :: لييييش ؟؟
* الدكتور :: يت ظربة قوية ع الراس .. و نحن نحاول نبذل جهدنا
* بو حمد :: ماقدر يستحمل الكلام .. و راح قعد ع الكرسي ..
* ام حمد :: ياا ويييلييي ع ولدييي ...
* مريم :: خلاص يا امي هدي اعصابج .. و ان شا الله بيقوم بالسلامة ..

بس في وحدة كانت واقفة بعيد و تحس بالذنب ..
ريم ((كله مني .. انا اتصلت عند حمد وخبرته كل شي .. كله مني .. لو مادقيت له جان ما صار اللي صار ..)) و تمت تصيح ...

بعد نص ساعة .... طلع الدكتور من عند حمد
* بو حمد :: بشر ... شو حالته؟
* الدكتور :: و الله ماعرف شقولك ..
* بو حمد :: شو صااار؟
* الدكتور :: الولد تشلل ...
* بو حمد :: لا .. لا تقول
* الدكتور :: هذا قضاء الله و قدره ...
و راح الدكتور عنه ...
تم بو حمد مصدوم من اللي سمعه .. حمد يتشلل ؟؟ لا مستحيل ... كيف بيكون الخبر على ولده يوم بيعرف اللي صار له.. حمد حيوي ما يحب القعدة .. يحب يتحوط كل مكان.. شو بيسوي لو عرف اللي صار له ... آآآه يا ولدي .. سامحني .. سامحني .. 

----------------------

عند راشد ...
راشد و ميرة و شمة كانوا ف السيارة .. بس شمة رقدت ..
* ميرة :: رشود شو بلاك ؟
* راشد كان سرحاان و ما يعرف ان اخته ترمسه ...
* ميرة :: الووووو .. وين سرحت ..
* راشد توه انتبه :: شووو ... شو صار .. روعتيني 
* ميرة :: ما صار شي .. وين سرحت؟
* راشد :: هنااك .. عندها
* ميرة :: راشد .. خلاص سلامة ما بترد لك ..
* راشد :: لا .. لا تقولين جيه ..
* ميرة :: شو اللي يخليك تتأكد
* راشد :: سلامة قلبها كبيير .. و طيبة واايد .. و أكيد بتفكر و بتتخذ قرارها و ....
* قاطعته ميرة :: و لأنه قلبها كبير و طيبة واايد مثل ما تقول .. لعبت عليها ..
* راشد :: انا ما لعبت عليها .. بس
* ميرة :: لا تبرر اللي سويته فيها يا راشد
* راشد تنهد من الخاطر و حط راسه ع السكان .. :: انزين شو بسوي الحين
* ميرة :: انساها
* راشد :: لااا .. مستحييل
* ميرة :: لا اظيع وقتك ... مستحييل ترد لك سلامة .. انساها .. شيلها من راسك ..
* راشد :: ماقدر .. ماقدر .. تعرفين شو يعني ماقدر
* ميرة :: حاول ...
* راشد :: ......... ميرة ..
* ميرة :: هلا
* راشد :: شفتها اليوم ف المول
* ميرة :: منو هي؟ سلامة؟
* راشد :: لا لا 
* ميرة :: عيل؟
* راشد :: حمدة .... كانت ويا واحد
* ميرة :: هذي اللي بعت سلامة عشانها
* راشد :: لا اتذكريني ...
* ميرة :: ....... مادري شقولك
* راشد :: أنا تعبت خلاص ..
شويه يرن تلفون راشد .. و كان ربيعه سلطان ...

-------------------------------

سهيل كان خايف على حمد .. لأنه شافه معصب وحب يتصل ويطمن عليه ... كان يالس ف الصالة ويا هله ...
سهيل اتصل ع تلفون حمد بس تلفونه مغلق .. و اتصل ع البيت محد يرفع .. خاف .. و اتصل ع تلفون بو حمد ..
* سهيل :: السلام عليكم
* بو حمد :: و عليكم السلام .. 
* سهيل :: شحالك عمي؟
* بو حمد :: بخير .. انت سهيل صح؟
* سهيل :: هيه ..
* بو حمد :: تسأل عن حمد؟
* سهيل :: هيه ... حمد استوى فيه شي؟؟
* بو حمد :: حمد سوا حادث .. و تشلل
انصدم سهيل من اللي سمعه .. و طاح التلفون من ايده .. و ماعرف شو يقول ... و الكل انتبه عليه ...
* غانم ( اخو سهيل ) :: سهيل شو فييك؟؟ شو استوى؟
* سهيل :: حمد ........



الجزء الخامس عشر
------------------------
* سلامة :: السلام عليكم
* راشد :: و علييييييج السلاااام و الرحمة .. شحاالج
* سلامة :: بخير .. و انت
* راشد :: عساج دوووم .. انا بخير دامج بخير
* سلامة :: .....
* راشد ( غريبة سلامة دقت لي .. شو تبا .. شو صار .. لا يكون بترد لي ) :: .. سلامة ..
* سلامة :: هلا
* راشد :: فكرتي باللي قلت لج اياه
* سلامة :: فكرت
* راشد :: و قررتي نرد شرات اول ؟
* سلامة بكل ثقة :: لأ
* راشد :: سلاااامة .. ليييش .. صدقيني ماصبر عنج
* سلامة :: وكيف صبرت عني السنتين لي طافت .. يوم ودرتني واخترت حمدوه بدالي
* راشد :: غلطة .. والله انها غلطة .. و ما بتكرر
* سلامة :: ههه ... غلطة ... انزين لو بنرد شرات أول .. بتحبني؟
* راشد :: أكييد...
* سلامة :: سنة ؟؟ سنتين؟؟ ثلاث ؟؟ و بعدين ... 
* راشد :: شو تقولين انتي
* سلامة :: بعد ما تحب .. بتخطبني يعني؟ هذا شي مستحيييل .. لأني ماظن بتاخذ وحدة رمستك
* راشد :: ليش تقولين جيه ..
* سلامة :: لأنه هذ الصدق .. انت مستحيل تيي وتخطبني .. ليش تبا ترد لي و تحبني ... 
* راشد :: ..... .. انتي اتصلتي عسب تقولين لي جيه
* سلامة :: هيه .. عسب تهدني بروحي .. خلاص انا تعبت منك .. جرحت قلبي .. وما بسمحلك تجرحه مرة ثانية .. (وسكرت عنه(
* راشد :: هذا كلامج يا سلامة .. تبين اتذليني .. بس صبري علي .. ما بخليج روحج .....

-------------

في المستشفى 
* عبد الله :: امي .. الحين بنسير نطلع حميد و إلا نسير عند حمد أول؟
* ام عبد الله :: لا .. اول شي بنسير له حمد 
* عبد الله :: اوكيه .. 
* ميثة :: ابا اجوف حمد كيف صار 
* عبد الله ظربها ع راسها :: يالخبلة شو تقولين انتي
* ام عبد الله :: ميثووه يا هبلة .. شو هالكلام
* ميثة :: انا مووو قصدي جيييه ..
* عبد الله : خلاص .. خلاص انجبي
* ميثة :: انزيييين 

وصلوا عند حمد .. عيال عم عبد الله وعمامه كانوا هناك .. وللأسف عمته موزة بعد كانت هناك
* ام عبد الله :: السلام عليكم ..
* الكل :: و عليكم السلام ..
* ام عبد الله :: أخباره حمد الحين ؟ ان شا الله أحسن
* ام حمد :: و الله مادري شقولج .. لين الحين ما قام من الغيبوبة .. 
* ام عبد الله :: الله يشفيه و يقومه بالسلامة .. إلا بو حمد وينه؟
* ام حمد :: و الله ياختي مادري شقولج .. الريال حالته حاله .. شايل ذنب الحادث .. 
* ام عبد الله :: لييش ؟
* ام حمد :: قالت الها السالفة ..
* ام عبد الله :: حد عرف بها؟
* ام حمد :: لا محد .. بس دخيلج ما نبا حد يعرف
* ام عبد الله :: سرج ف بير ..

* موزة :: حد قايل الكم نحن ف حديقة ؟ ماشا الله .. عبد الله و ميثة .. باقي سلامة و حميد
* ام عبد الله عرفت ان الكلام موجه الها .. بس ما حبت ترد و سوت عمرها ما سمعت شي ..
* خليفة :: بس يا موزة ...
* عبد الله :: امي .. انا باخذ ميثة .. و بسير عند حميد اوكيه
* ام عبد الله :: يكون أحسن ...
* ام حمد :: فديته حميد ما ظهروه؟
* ام عبد الله :: اليوم بيظهر
* ام حمد :: الحمد لله ع سلامته
* ام عبد الله :: الله يسلمج .. و عقبال حمد
* ام حمد :: آآآمييين .. الله يسمع منج 

راحوا ميثة و عبد الله عند حميد ..
* ميثة :: هلاااا
* حميد كان منسدح بس يوم سمع صوت اخته نقز :: بسم الله
* ميثة :: شحااالك
* حميد :: انتي من وين طلعتي ؟؟
* ميثة :: من وين بعد
* عبد الله :: هلا حميد شحالك
* حميد :: اهلين عبوود .. انا بخير و انت؟
* عبد الله :: يسرك الحال
* حميد :: إلا امي و سلامة وينهم؟
* عبد الله :: سلامة ف البيت .. بس امي عند حمد
* حميد :: هيييه
* ميثة :: عرفت لي صار حق حمد
* حميد :: هيه عرفت .. حليله .. سرت اله امس
* عبد الله :: خلوك تمشي؟
* حميد :: هيه 
* ميثة :: اليوم بتظهر صح
* حميد :: هيييه بظهر .. و برد البيييت .. ع قلبج
* ميثة :: اففف .. ادري
* عبد الله :: ما عليك .. هاي أكثر وحدة مشتاقة لك .. ههههه
* حميد :: ادري .. ههههههههههه 

-----------------

بعد اسبوع من اللي صار ... طلع حمد من المستشفى .. بس كان متشلل و حالته حاله .. ما ياكل و لا يشرب ولا يكلم حد .. كله يالس ف حجرته بروحه ما يطلع من البيت ...

دخلت عليه اخته عاشة ..
* عاشة :: حمد .. لين متى بتم جيه
* حمد :: ......
* عاشة :: انا يبتلك أكل لو تبا تاكل .. وبغيت أخبرك ان قوم خالتي بييون عندنا اليوم .. يبون يشوفونك
* حمد بعصبية :: شلي الأكل برة .. وبعدين ليش يبون يشوفوني .. عسب يتشمتون .. و إلا ع بالهم مسرحية أو فلم
* عاشة :: لا مب جيه
* حمد :: عيل 
* عاشة :: يبون يطمنون عليك
* حمد :: مافي داعي .. حتى لو يو مابا حد اييني .. فاهمة .. روحي خبريهم بهالشي 
* عاشة ما قالت شي .. طلعت و سكرت الباب وراها
* حمد :: محلاتهم و هم يايين يطالعوني جيه .. آآخ يا دنيا .. تعبت والله تعبت .. 
رد راسه لورا و تم يتذكر اللي صار .. شوي اتذكر سهيل 
حمد (( صح .. سهيل كان وياي .. وانا من طلعت من المستشفى ما دقيت له .. خلني ادق له اجوف اخباره ((

بطل حمد تلفونه لأنه من طلع من المستشفى و تلفونه مغلق ما يبا يرمس حد .. و اول ما بطله سهيل دق له
* سهيل :: يدق أخيرا
* حمد :: هلا
* سهيل :: أهلييييييييييييييييييين .. شحاااااااالك
* حمد :: آآه من حالي أنا
* سهيل :: شووو بلااااك مكتئب 
* حمد :: تباني أكون مستانس يعني و انا فهالحالة
* سهيل :: يا رياااال .. الدنيا بعدها بخيير
* حمد :: بالنسبة لك 
* سهيل :: لي و لك .. انا بييك الحين بطلعك ويايه
* حمد :: وين ان شا الله .. بنمشي ف الكورنيش 
* سهيل :: لا بننقز هناك ههههههههه
* حمد :: سهيل اسمحلي مالي خاطر
* سهيل :: مب ع كيفك .. انا عقب 10 دقايق بكون عندك
* حمد :: ........
* سهيل :: يالله فمان الله
* حمد :: مع السلامة

--------------------------

بيت سلامة ...
الكل كان يتزهب عسب المدارس بتكون بعد اسبوع 
عبد الله كان يالس ف حجرته و يفكر ....
عبد الله (( انا شو بقول الحين .. الدوام باقيله اسبوع .. انا شو بسوي .. يااا ربييي.. أقوله سلامة عن اللي صار ؟؟ لا لا مابا .. ممم .. شكلي ببتلش الحين بعد .. بس شو اسوي .. شووووو .. عرفت .. انا برقع السالفة و بقولهم اي شي ... لو سألوني عنها .. بقول اني ماعرف شي .. هذا هو أنسب الحلول ... ((
و رقد عبد الله

الجزء السادس عشر
------------------------
وصل سهيل عند حمد .. دق الباب و ريم فتحت .. بس هي ما كانت تعرف انه سهيل لبست شيلتها و سارت ..
* سهيل :: السلام عليكم ..
* ريم :: و عليكم السلام .. شحالك سهيل ..
* سهيل :: بخير يسرج حالي و انتي شحالج
* ريم :: تمام ..
* سهيل ::حمد وينه؟
* ريم :: ف حجرته .. تبا تسير له؟
* سهيل :: هيه
* ريم :: لحظة بخبره
* سهيل :: لا .. لا تخبرينه ما بيطيع اني ادخل .. 
* ريم :: اوكيه عيل .. سير عنده
و سار عنها سهيل عند حمد ..
سهيل ف خاطره :: هالصوت اعرفه و مب غريب عليه ...

-----

دش سهيل عند حمد ...
* سهيل :: بوووو
* حمد :: بسم الله .. زيغتني .. متى ييت
* سهيل :: الحين .. شحاااالك ياريااال و الله من زماان ما شفتك.. لك وحشة ..
* حمد :: بخير.. و انت شحالك
* سهيل :: بخيير دامك بخيير..
* حمد بطفر :: عساك دووم ..
* سهيل يدق حمد ع ظهره :: ياخي بعدين ويااك .. شو هالاكتئاب لي ف ويهك .. قلت لك الدنيا بعدها بخير.. والشلل مب آخر شي ف الدنيا .. انت بتقدر تمشي لو عندك إرادة .. وطول ما انت جيه حابس عمرك لا تاكل ولا تشرب ولا ترمس حد و فوق هذا ظارب بوز .. وين بتمشي مرة ثانية .. ياخي احمد ربك.. في ناس مبتلين أكثر عنك .. وقول الحمد لله على كل حال .. بدال ما انت جيه ..
* حمد :: ....... بس ...
* سهيل :: بس شو
* حمد :: احس اني متظاايق .. 
* سهيل :: من شو ؟
* حمد:: من نفسي..
* سهيل :: ليش؟
*حمد :: أنا غلطت على ابوي وايد .. وماعرف لو هو بيسامحني أو لأ .. وأكثر شي مظيق علي هو زعل ابوي مني .. مب لأني تشللت .. وأخاف إني لو اعتذرت له ما بيقبل اعتذاري 
* سهيل :: لا يا حمد .. انت ما شفت ابوك كيف كان يوم كنت ف المستشفى .. كان قاعد ع طرف الشبرية وما يرمس .. الشي الوحيد اللي كان يقوله هو :: سامحني يا حمد انا السبب .. و بس ..والحين خل عنك هالكلام يالله بنروح نتمشى شوي ..
* حمد :: و انا بهالحالة ..
* سهيل :: قم لا اظربك الحين .. 
* حمد :: هههه
* سهيل :: فديت الظحكة .. أخييرا .. اشتقنا لها و الله
* حمد :: اشتاقت لك العافية .. 
*سهيل:: ههه .. يالله قم بنسير ..
و طلعوا من البيت ..

--------------------

بيت خليفة (( عم سلامة(( 
* عبيد و هو يصيح :: ماااماااااتييييي ..
* عفرة (( ام عبيد )) :: شوو فيك حبيبي ليش تصيح ..
* عبيد و الدموع مغرقته :: عنود الخايسة ظربتني باللعبة ع راسي ..
* عفرة :: عييب يا عبيد لا تقول خايسة هذي اختك ..
* عبيد :: انزين جوفيها ظربتني ...
* عفرة :: عنود .. ليش ظربتي اخوج ..
* عنود بكل برود :: كيفي.. أحب اظربه
* عفرة :: عيب عليج تظربينه .. عورتيه ف راسه
* عنود :: هو ولد .. لازم يدافع عن عمره.. 
* عبيد :: جب .. خاايسة 
* عفرة :: بس بس .. بزقرلكم ابوكم الحين ..
شوي يدش خليفة ..
* خليفة :: خير شو صاير ..
* عبيد :: (( طبعا ما قصر قال كلل اللي صاار(( 
* خليفة :: هههه .. حسبي الله عليج من بنت .. قوية ماشا الله
* عفرة :: يويلي عليك يا خليفة .. بدال لا تهزبها ..
* خليفة :: ظرابة يهال .. خليهم برايهم .. و تعالي اباج شوي ..

خليفة كان متظايق على غير العادة ..دوم يلعب ويا عياله اما اليوم دش و هو متظاايق واايد ..
* عفرة :: خليفة حبيبي شو فيك ؟
* خليفة :: و الله يا عفرة مادري شقولج
* عفرة :: قول لي بخاطرك ..
* خليفة ::...... عفرة انتي شهر الحين
* عفرة :: الشهر الخامس .. 
* خليفة :: عفرة ما وصيج .. لو يبتي بنت سميها نورة على اسم امي .. و لو يبتي ولد سميه محمد على اسم اخويه الله يرحمه ..
عفرة زاغت يوم سمعت كلام ريلها :: ليش تقول هالكلام .. انت بتسميهم .. وانت بتكون موجود لو يبتهم .... و ...
* قاطعها خليفة و هو يقول بابتسامة :: هذي وصيتي .. لو صار لي شي ابا تكون هذي اساميهم ..
* عفرة ما استحملت و قعدت تصيح :: ....
* خليفة :: ليش تصيحين ..
* عفرة :: اسمع كلامك و ما تباني أصيح .. انت تقول كلام يخوف .. خليفة دخيلك قول غير هالكلام .. انا ماعيش بلياك ..
* خليفة ويمسح دمعتها :: عفرة حبيبتي ..هالله هالله بالعيال .. عبيد و عنود أمانة .. لا تغفلين عنهم .. خليهم ف عيونج .. ماتدرين شو يمكن يصير اليوم أو عقبه ..
* عفرة :: ..........

خليفة كان يقول لحرمته كلام يخوف .... تمت تفكر بكلام خليفة.. هو ليش يقول هالكلام .. واللي يقوله صدق؟
و نامت و دموعها ف عينها .. 

---------------------

عند ريم ..
* ريم :: يعني مصر تعرف شسمي ؟
*منصور :: هيه أكيد .. أبا أعرف اسم القمر لي يرمسني ..
* ريم بخجل :: و شو دراك اني بكون حلوة ..
* منصور ف خاطره صدقت الخبلة :: ههه .. يعني هالصوت راعيه شو بيكون إلا قمر أو غزال ..
* ريم :: ...
* منصور :: ها شو قلتي .. خبريني باسمج..
* ريم :: أنا اسمي ريم ..
* منصور :: عاشت الأسامي
* ريم :: عاشت أيامك ..
* منصور :: و الحين الغالية .. كيف بشوفج ..
* ريم :: تشوفني؟
* منصور :: هيه بعد شو .. أبا أشوفج
* ريم :: هيه بس ..
* منصور :: بس شو
* ريم :: صعبة ..
* منصور:: لأ مب صعبة .. لا تقولين لي انج ما تسيرين مولات ..
* ريم :: إلا اسير
* منصور :: خلاص بشوفج ف واحد منهم
شوي تسمع ريم صوت ابوها ..
*ريم :: اقول اقول .. ببند انا ..
* منصور :: اوكيه باي
* ريم :: باي
* منصور :: هههه .. الخبلة .. راحت فيها .. هههه .. و الله البنات مخبل ..

* بو حمد :: ريييم و الصمخ وينج
* ريم :: ها ها .. انا هني
* بوحمد :: شو هااا بعد .. الناس يقولون نعم
* ريم :: اووكيه خلاااص .. نعم .. خير .. آمر .. تدلل
* بوحمد :: وينه اخوج ..
* ريم :: حمد ظهر ويا سهيل قبل ربع ساعة
*بو حمد :: الحمد لله ظهر من البيت .. كله حابس روحه ف الحجرة .. و سهيل الله يجزيه الخير ...
* ريم :: وينهم هل البيت ..
* بو حمد :: موجودين .. سيري عند امج تباج 
*ريم :: اوكيه ..

---------------

عند سلامة ..
* سلامة :: الحمد لله .. راشد و افتكيت منه .. بس خوفي لا يسويها ويتم يتصل .. انا قلت له لو اتصل مرة ثانية ببلغ عليه .. بس لحظة .. بيفظحني .. بيقولهم اني كنت ارمسه .. شو هالورطة يا سلاموه .. تورطت انا .. اف منك يا راشد خبلتني ..

ادش عليها اختها ميثة ..
* ميثة :: احم .. احم .. بنت محمد هنا ..
* سلامة :: اعووذ بالله .. يت هذي يت
* ميثة :: كيف حالكِ يا فتاة ..
* سلامة :: ميثوه دخيلج مب متفيجة لج .. 
* ميثة :: يا إلهي ما بكِ ..؟؟
* سلامة مسكت المخدة و فرتها ع ميثة ..
* ميثة :: ويحكِ .. أتظربينني ..
* سلامة :: امييييييييييييييي ..
شوي ادش ام عبد الله
* ام عبد الله :: خير خير ..شو فيكن تصارخن
* سلامة :: امي طلعي هذي السبالة من هني ..
* ميثة :: اف منها بنتج هذي .. محد قام يحب يمزح وياها .. قلنا الها كلمتين عصبت .. كيف كانت قبل وكيف صارت .. الواحد ما يمزح احسن له .. 
وطلعت من حجرة اختها
* سلامة تمت ساكتة يوم سمعت كلام اختها .. ما توقعت انها تسمع هالكلام من ميثة ..
* ام عبد الله :: يالله يهديج يا سلامة البنت تسولف وياج .. ميثة مالها حد إلا انتي .. و جيه تسوين بها ..
* سلامة :: ......
و طلعت امها من الحجرة ... و سارت عند ميثة و شافتها يالسة بروحها ف الحوي و تلعب بالحصى لصغيرة .. سارت و يلست عدالها ..
* ام عبد الله و تمسح ع شعر ميثة :: شتسوين حبيبتي ..
* ميثة كعادتها المرحة .. ما تحب تروي حد انها زعلانة :: ماشي .. ابا اظرب القطو لي هناك .. قاهرني ... 
* ام عبد الله :: ههههه .. يالشريرة انتي .. خليه برايه لا تظربين لقطاوة ..
* ميثة :: ليش؟
* ام عبد الله :: احيد يوم كنت بعمرج او اصغر .. يمكن كان عمري10 و الله ماذكر .. انا وحامد اخويه كنا نلعب ف الحوي .. شوي نقز قطو ف البيت .. و اخويه كان شييطاان قام و ظربها بالحصى .. و من ذاك اليوم وين ما يروح تلحقه .. الين ما صار عمره 17 عقب كانت تربع ف الشارع و اندعمت .. و يليت كانت تلحقه وبس .. كانت تهاجمه بعد ..
* ميثة :: يميي .. عيل خله برايه .. خله يتحوط ف الحوي .. مافيني عليه ..

شويه يدخلون حميد و عبد الله ..
حميد + عبد الله :: السلام عليكم
* ام عبد الله + ميثة :: و عليكم السلام و الرحمة 
* عبد الله :: شو ميلسكم هني
* ميثة :: الجو حلوو .. و نغير جو بدال يلست البيت لي تملل ..
* حميد :: هيه و الله .. بس يبالنا نسكافيه و يا هالجو ..
* ميثة :: انا انا بسوي ..
عبد الله :: لاااا دخيييلج .. بايع عمري انا
* ميثة :: خلاص لا تشرب .. بسوي له حميد الغالي و امي الحبيبة
* حميد :: انا عمري 14 ابا اعيش حياتي
* ام عبد الله :: و انا ما ابا اموت ابا اربيكم 
* ميثة :: طااااااااااالع 
* الكل :: ههههههههههههههههه
* ميثة :: اوكيه ما عليه .. بشرب سلامة ...
شويه ادش سلامة ..
* سلامة :: أي شي من ميثوه حلو ..
* حميد :: يالله عااااااااااااااد ..
* ميثة :: احم .. احم 
* سلامة :: قوموا بنسير البحر .. الجو حلووو .. و يساعد
* ميثة :: هيه و الله ..
* ام عبد الله :: يالله قوموا بنسير ..

----------------------------

عند عفرة ...
* عفرة ف قلبها :: و الله اني خاايفة عليك يا خليفة .. و خايفة من الكلام اللي قلته لي ..
شوي يقطع تفكيرها صوت التلفون ..
* .... :: السلام عليكم ..
* عفرة :: و عليكم السلام
* ....::بيت خليفة صح
* عفرة زاغت :: هيه ... خير
* عمر :: انا ربيعه عمر .. خليفة مسوي حادث و هو ف المستشفى الحين ..
* طاحت السماعة من ايد عفرة ....
و بعد 10 دقايق كانت عفرة و ابوها و اخوها ف المستشفى 

مرت ساعتين و هم يتريون ..
* حسن اخو عفرة يكلم عمر :: كيف استوا الحادث .. 
* عمر :: خليفة من يومين متظايق و شي بلاه .. اليوم كنت مواعده اييني المطعم .. شوي و انا ارمسه .. سمعت صوت الحادث ... طلعت من المطعم مثل المينون .. الحادث كان بعد اشارتين من المطعم .. سرت له .. وشفته طايح شلته .. و كان يقول لي :: عفرة و العيال .. عفرة و العيال .. و اغمى عليه ...
* حسن :: ..... الله يرحمه برحمته .. الله يرحمه برحمته ..
* عفرة كانت يالسة ع الكرسي و حالتها حاله .. و تصيح ..

بعد 3 ساعات .. طلع الهم الدكتور ..
راحوا كلهم صوبه :: وين عفرة؟
* عفرة :: خير؟
* الدكتور :: اللي داخل ريلج؟
* عفرة :: هيه ..
* الدكتور :: اتفضلي معانا
* عفرة دخلت عند ريلها ... و كانت حالته حاله .. بالموت يتكلم يلست ع طرف الشبرية ..
* خليفة :: عفرة؟
* عفرة و الدموع بعينها :: هيه انا عفرة
* خليفة :: حبيبتي ليش الدموع ؟
* عفرة :: تباني اظحك يعني
* خليفة :: ابا اشوف ابتسامتج لآخر مرة
* عفرة :: لا تقول جيه .. انت بتظهر سالم .. و بتشوف البيبي اللي ف الطريج و بتسميه
* خليفة :: هالله هالله ف عمرج و اليهال .. و امسحي دموعج .. و خليني اشوف البسمة
* ابتسمت عفرة غصبا عنها :: ...
* خليفة :: هييه جي تعيبيني .. و مثل ما وصيتج .. لا تنسين الأسامي اوكيه .. وصيتي لج
* عفرة تمت تصيح :: ...........
* خليفة :: و اهتمي بعمرج .. انتي اهم وحدة عندي.. و أنا ... أحبج ..
* عفرة :: انا اموت فيك يا خليفة .. لا تروح وتخليني دخيلك .. ماعيش بلياك ..
ابتسم لها خليفة .. وتم يطالعها .. شوي تسكرت عينه ..
عفرة :: خليفة خليفة رد علي .. رد .. دخييلك لا تخليني ..
بس خليفة ......مــــات


الجزء السابع عشر
-------------------
عفرة ما صدقت ان ريلها مات .. من الصدمة اغمى عليها .. وودوها الدكاترة حجرة ثانية ..
بعد موت خليفة ..
اتصل بو عفرة عند بو حمد ..
* بو حسن :: السلام عليكم ..
* بو حمد :: و عليكم السلام و الرحمة ..
* بو حسن :: شكلك ما عرفتني .. أنا بو حسن ..
* بو حمد :: يا هلا و الله شحالك
* بو حسن و كان مبين من صوته انه مب طبيعي :: الحمد لله على كل حال
* بو حمد :: خير؟
* بو حسن :: خليفة ... توفى اليوم .. و البقية ف حياتك .
* بو حمد من الصدمة طاحت السماعة من يده . ماعرف شو يقول .. و لا يتكلم .. تم مصدوم و مش مصدق لي سمعاه .. بو حسن أكيد يمزح .. أكييد .. خليفة ما بيموت .. استغفر الله شهالكلام .. استغفر الله 
* ام حمد :: بو حمد .. شو فيك؟
بو حمد مصدوم :: ........
* ام حمد شلت السماعة :: ألو؟
* بو حسن :: اختي .. وينه بو حمد شو استوا؟
* ام حمد :: ياخوي قول لي شفيه الريال ؟
* بو حسن قالها ع اللي صار 
ام حمد و الدموع فعينها مب مصدقة لي تسمعه ....

--------

الكل عرف الخبر .. كان يوم قاسي عليهم .. قبل ثلاث سنوات توفى محمد وقبل محمد بثلاث سنوات توفى يدهم (( بو محمد و حمد ... )) وبعد 3 سنوات من وفاة محمد توفى خليفة .. عين وما صلت ع النبي ..

الكل كان حالته حاله و خاصة عفرة .. طول اليوم راقدة تقوم تتذكر خليفة و اتم تصيح و ترقد .. 

* ام حسن :: عفرة حبيبتي .. استهدي بالله .. هذا قضاء الله و قدره ... و خليفة كان يومه و الله أخذ أمانته .. لا تسوين ف روحج جيه .. مب زين .. لا لصحتج و لا لصحة اللي ف بطنج .. انتي ما كلتي من 3 ايام .. مب زين يا بنتي مب زين ..
* عفرة :: الغالي راح يا يمه .. الغالي راح .. بو عيالي ما بشوفه بعد اليوم .. (و تمت تصيح(
* ام حسن :: بس يا بنتي بس .. اصبري .. هذا اختبار من الله .. و الله إذا حب عبد اختبره ..
* عفرة :: و النعم بالله بس ..
* ام حسن :: لا بس و لا شي .. قومي توظي و صلي ركعتين .. و ادعي له بالرحمة و المغفرة .. انتي تعذبينه ف قبره بدموعج يا بنتي .. قومي الله يرضى عليج .. 
و قامت عفرة ........

------------

طبعا العزا كان ف بيت بو حمد لأنه أكبر واحد من الخوان .. و ف بيت بو حمد و تحديدا حجرة ريم ..
* فاطمة :: ريموه رمستي منصور؟
* ريم :: هيه بس مب اليوم
* فاطمة :: عيل؟
* ريم:: قبل 3 ايام
* فاطمة :: خييبة .. قبل 3 ايام يالخبلة .. بيروح عنج ليش ما ترمسينه
* ريم :: يالخبلة كيف ارمسه و نحن عندنا عزا ..
* فاطمة :: يالله عاد .. اللي يسمعج يقول انج يالسة تصيحين الحين .. و لاجنه عندنا عزا ..
* ريم :: افففف .. شتبيني اسوي الحين
* فاطمة :: دقيله 
* ريم :: اوكيه ..
و دقت الحبيبة .......
فاطمة :: لحظة. سوي عمرج تصيحين و متأثرة بوفاة عمي خليفة عسب يراظيج و يونسج .
ريم :: اوكيه ..
* ريم بصوت واطي تسوي عمرها تصيح :: ....

* منصور قبل لا يرفع .. :: يا جماعة دقت اللي قلت الكم عنها ... هههه .. اهبل عنها ما جفت ..
* عبد الله :: ارفع ارفع ههههه
* منصور :: ششش .. برفع
* ريم :: ألو
* منصور :: هلا و الله .. عاش من سمع صوتج
* ريم :: تسلم
* منصور ::: شو فيييج؟؟ تصيحين
* ريم :: عمي توفى
* منصور :: لا حول و لا قوة إلا بالله .. متى؟
* ريم :: قبل 3 ايام
* منصور :: عسب جيه ما دقيتي
* ريم : هيه
* منصور :: اهاا
وتموا يتكلمون لفترة طوييلة .. 

شوي دشت سلامة عليهم .. و بالغلط سمع ريم تقول له منصور
))صعب تجوفني يا منصور ((

دشت سلامة فجأة و ريم و فطوم من الزيغة فروا السماعة
* ريم :: يالخايسة ما علموج الاستئذان
* فاطمة :: حسبي الله عليج من بنت ما تعرفين ادقين الباب
* سلامة اطالعهم و هي مستغربة :: .....
* ريم :: اطلعي برة بسرعة
* سلامة :: اوكيه اوكيه بظهر .. بس بغيت اخبرج ان امج تباج ..
* ريم :: اوكيه ممكن تهوينا
* سلامة :: .....
و طلعت .....

----------------

بعد اسبوعين من العزا ... و ف بيت بو حسن
ودوا عفرة المستشفى ,, لأنه هاليوم بيكون موعد ولادتها .. ربت ويابت ولد .. وطبعا ع وصية خليفة .. سمته (( محمد ..(( 
* عفرة :: و الله ماعرف يا امي . اظحك و إلا أبكي .. احزن و إلا أفرح .. وفاة الغالي .. وولادة محمد .. 
* ام حسن :: حبيبتي .. خليفة لو كان هني ما بيرضى يجوف دمعة من عيونج .. 
* عفرة :: .....
* ام حسن بمزح:: و انتي بعدج ما شبعتي صياح .. ما جفت دموعج 
* عفرة :: ههه
* ام حسن :: هيه جيه الحلوين .. خلينا نشوف هالبسمة الحلوة ..

------------

عند بو حمد ..
وصلت لمريم ورقة طلاقها من سالم ..بس الغريب ان مريم ما صاحت و لا تأثرت .. لأنه سالم عطاها عيالها .. وتخلى عنهم بعد زواجه من بنت خالته .. 

ونروح عند شخص (( حمد ..(( 
حمد كان ف حجرته و يفكر بــــ ..
* حمد :: اللي استوالي عقاب من الله .. خربت سمعة لبنية .. وما طعت ابويه .. انا لي سويته ف حق عايلتي مب شويه .. وادري انه هذا عقاب .. وانا استاهل هالشي .. اسمحيلي يا سارة .. غلطت وياج.. ليتها تسامحني .. هـه.. تسامحني؟ ليش هي هبلة تسامحني .. نحن نغلط ونبا الناس يسامحونا .. واستاهل لي صار لي .. كله عقاب .. انا بتصل بها و بحاول وياها ..
اتصل حمد عند سارة ..
* حمد :: افف ما ترد .......
بعد ما تم يدق 3 مرات رفعت عليه ..
* سارة :: ألو؟
* حمد :: السلام عليج
* سارة :: و عليك السلام ..
* حمد :: انا حمد .. شحالج ؟
* سارة ::......... بخير و انت
* حمد :: بخير ...
* سارة :: غريبة ليش دقيت ؟ تم شي ف خاطرك تبا تقوله بعد ..
* حمد :: أنا آسف
* سارة :: آسف شتسوي؟ ما بترد سمعتي لي راحت ..
* حمد :: أنا آسف .. و مستعد أسوي لي تبينه .. بس تسامحيني ..
* سارة :: هـه .. ومن قال ما سامحتك .. انت مالك خص ف اللي صار .. الغلطة غلطتي اني حبيت .. وماعرفت اختار .. بس بعد كله لي سويته فيني .. انا مسامحتك يا حمد .. بس عندي طلب ..
* حمد :: آمري .. لي تبينه
* سارة :: انسى رقمي .. و لا ادق مرة ثانية .. خلني أنساك .. و بس
* حمد :: بس ...
* سارة :: لا بس و لا شي .. سو اللي قلت لك عليه .. 
* حمد : اللي تشوفينه ..
* سارة :: يالله .. الله يحفظك .. مع السلامة
* حمد :: .... مع السلامة ..

بعد ما سكرت سارة عن حمد .. يلست ع الكرسي و تمت تصيح ..
((ما قدرت اعاتبه .. ولا قدرت ألومه .. الغلطة غلطتي .. أنا ماعرفت أحب ولا اختار اللي احبه .. بس والله حبيتك من قلبي يا حمد .. حبيتك من قلبي ((

حمد ..
(شو هالقلب اللي عندها .. قلبها كــبــير .. انا للحين مب مصدق انها مسامحتني .. بعد اللي سويته فيها سارة تسامحني؟ ليش؟ كلها لأنها حبتني؟ أنا الأهبل .. راحت مني وحدة من ذهب .. والله ما كنت متوقع .. بهالبرود و هالطيبة تسامحني؟ هي جيه حسستني بالذنب أكثر .. ليش ما عاتبت ؟ ليش ما لامت ؟ ((

سارة ..
((حمد الحين بيتساءل ليش ما عاتبته .. لأني أحبك يا حمد .. وبعد كله لي سويته فيني بظل احبك .. بس كل شي انتهى .. لازم أحافظ على كرامتي شوي .. و ما ارجع له .. و الله يهنيه مع غيري ... ((

-------------

عند عبد الله .. في شي كان شاغل باله و تفكيره .. ما يقدر يرقد من كثر ما يفكر فيه .. 
عبد الله (( افف .. بلشتني يا احمد .. الله يسامحك.. الحين لو حد من هلي عرف و خاصة عمي خالد انا بروح فيها .. هالصورة وين اوديها .. ووين احطها .. المشكلة ما تنمسح عندي .. كله منك يا أحمد.. كله منك .. السالفة وراها محاكم و عرض ناس .. انا السبب كله مني .. انا عطيته تلفوني .. افففف .. ((

احمد وعبد الله ربع .. ذاك اليوم احمد كان بيسير دبي.. وطلب من عبد الله يعطيه تلفونه .. و للأسف عبد الله وثق ف ربيعه وعطاه التلفون .. احمد كان راعي مغازل وبلوتوث .. اتفق ويا ربيعه و قرووا انهم يورطون عبد الله وطرشوا له صورة بن عرب و ناس .. صوروها وهي ما تدري .. و هددوه انه لو ما سوا لي يبونه بيفظحونه ولو مسح الصورة من التلفون .. بيقدرون يطلعونها عند أي محل .. للأسف عبد الله ماعرف يختار ربيعه .. أحمد لي وثق فيه وخلاه أقرب ربعه و اللي هو وياه من الروضة .. 

عبد الله (( أنا بخبر منو ؟ سلامة .. لا ماروم .. انا يوم قلت الها ابا الدراجة ما طاعت لو قلت الها عن هالصورة شو بتسوي .. منو عندي اخبره قبل لا يفوت الفوت .. عمي خليفة هو الوحيد اللي كنت اقدر اخبره بس الحين ... الله يرحمك يا عمي .. الله يرحمك ..(( 

و تم يفكر و يفكر و شوي ..
))عرفت ... سهيل .. سهيل هو الوحيد لي اقدر اخبره .. اخوه غانم ف الشرطة .. و هو بيساعدني .. سهيل بيخلي هالشي بيني و بينه و بين غانم و مستحيل يخبر حد .. بس لازم أخبره بأسرع وقت .......(( 

------

عند راشد ..
راشد كان متظايق من اللي صار ويا سلامة .. و راح عند اخته عسب يخبرها لي استوا ..
* راشد :: ميروه مشغولة؟
* ميرة :: لا .. خير؟
* راشد :: بقولج شي ... و تم يخبرها لي استوا
* ميرة :: خلاص يا راشد .. لا اتذل روحك عندها .. خلها برايها .. خلي البنت بحالا .. خلاص انت ف طريج وهي ف طريج .. 
* راشد :: هيه بس .. انا .... أحبها .. و الله أحبها و أباها .. و لو تبا بعد انا مستعد أخطبها ..
* ميرة :: نعم؟ تخطبها .. ياخي انت عمرك 19 ...
* راشد :: يا هبلة مب الحين .. يعني بعد سنتين او 3 .. 
* ميرة :: ههههههه
* راشد :: قلت نكتة أنا؟
* ميرة :: و تباها تتريا سنتين او 3 ؟ ههههه .. خلاص انساها .. مافي أمل ..
* راشد :: بحاول .. و اسمحيلي خذت من وقتج ...
* ميرة :: أفا عليك .. كل وقتي لك ..
* راشد يبتسم له اخته :: الله يخليج لي ..
* ميرة مستغربة :: ...... غريبة شي بلاها ... هههههه

-------

نرد عند سارة ...
دشت امها عندها عسب تكلمها ..
* ام سارة :: ساروه فديتج شو بلاج تصيحين ؟
* سارة :: ماشي ..
* ام سارة :: بغيتج بموضوع ..
* سارة :: خير؟
* ام سارة :: خير ان شاء الله .. بس ولد عمج سعيد .... خطبج ..
* سارة تمت ساكتة و مب مستوعبة الكلام :: .........
* ام سارة :: السكوت علامة الرضا ؟؟؟
* سارة دمعت عينها و تمت تصيح مرة ثانية :: .......
* ام سارة :: ساروه حبيبتي .. لو ما تبين عادي .. نحن مب غاصبينج ..
* سارة ::لا يا امي مب جيه .. خليني افكر .. 
* ام سارة :: ع راحتج .. و فكري عدل .. سعيد ريال زين و محترم و ما عليه كلام ... و فوق هذا ولد عمج ..
* سارة :: .... امي خليني بروحي .. الله يخليج 
* ام سارة :: اوكيه .. بس فكري عدل ..
* سارة :: ان شا الله ......

سارة (( اليوم خلصت من حمد .. واليوم خطبني سعيد .. آآه .. كأنه يعرف اللي صار لي .. بس انا أحب حمد .. لا يا سارة .. حمد خلاص .. حمد من الماضي .. حمد قصة من الماضي وانتهت .. فكري ف حياتج الياية و مستقبلج .. و تمت تفكر لساعات طويلة ..... وبالآخر قالت :: خلاص أنا قررت .. أعرف هالقرار بندم عليه .. بس هاللي لازم يصير ((

-----------

ف حجرة سلامة ...
سلامة (( عقب باجر أول يوم دوام .. شو بيستوي ؟ كيف بيكونن البنات ؟ تغيرن ؟ و إلا مثل ما هن .. ربيعاتي اللي يقولون عنهن ربيعاتي.. اللي من بدت الاجازة و لا وحدة فيهن دقت و ما سألت .. الا وحدة هي اليازية ويليتها ما دقت .. شمة .. مريم .. خلود .. أخبارهن؟ ليش كل مادق عند وحدة فيهن ما يبن يكلمني ؟ لا لا .. يمكن مشغولات .. ما بظلمهن .. بس يعني .. محد تذكر سلامة ؟.. يا حسافة .. وين الوعود ان ما بنفترق عن بعض و نحن ربيعاتي .. وسمينا اعمارانا الرباعي المرح .. كل شي ... * ذهب مع الريح * .. كله كان كلام و بس ... لا يمد بالحقيقة بصلة .. هــه .. مسكين حالج يا سلامة .. والله انج مسكينة ..وين هذيج الأيام و وين هذيج السوالف .. الله يرحم أيام قبل .. كنا نحن العصابة ف المدرسة .. ههه .. ما بنسى كيف كنا نطفر المسات وخاصة ف الطابور .. وكل يوم نتهزأ جدام المدرسة كلها ههه .. و ما بنسى أحلام مريوم .. كل يوم كانت تقول .. انا باخذ لي واحد حليو وبس بييب بنت وولد .. و إلآ شماني كانت تقول .. انا بصير دكتورة نفسية عسب أعالج لي يتخرجون من مدرستنا ههههه .. وخلود كانت تقول :: أنا بصير بصير امرأة أعمال .. بفتح لي شركة وبشغلكن هههه .. وأنا .. آآه مني أنا .. كنت أقول :: بدش جامعة هارفورد ههه .. و بتحداكن .. وين هذيج الأحلام ووين الأماني .. كلها راحت مع الريح .. مريم آخر سنة ويانا كانت العام .. عرست وخذاها ولد خالها .. ومثل ما كانت تتمنى طلع ريلها حليو هههه .. وخلود انتقلت سارت راس الخيمة و ما عاد جفناها .. وشموه .. آآه بس .. لقت الها شلة ثانية غيرنا .. و اختربت وياهن .. كيف كنا وكيف صرنا .. كنا ما نخلي حد ف المدرسة .. لا من بنات و لا مسات و لا حتى شغالات .. و أحلى شي يوم كنا نطلع السطح من دون ما مس أسما تعرف هههه .. و كنا نفر ع البنات ورق .. ههه و الله أيام .. بس بالآخر تــشتــتنـــا(( 
و رقدت سلامة و الدموع ف عينها ....


الجزء الثامن عشر – الأخير
------------
في اليوم الثاني قرر عبد الله يروح عند سهيل و يخبره كل شي .. و يعرف ان سهيل ما بيخذله و بيتفهم الموضوع .. و بيحلونه ف أسرع وقت .. خاصة ان السالفة ما تستحمل الانتظار ..

وصل عبد الله عند ولد عمه سهيل ... دق الباب ..
* الخدامة :: ميين انته .. يريد مين ..؟؟
* عبد الله :: خبري سهيل .. قولي له عبد الله يباك ..
* الخادمة :: انت روه داكل مجلس .. = انته روح الميلس ...
* عبد الله :: اوكيه ... خبريه 
و سارت الخدامة تخبره ...
* سهيل :: عبد الله؟
* الخدامة :: هيه .. هو يقول عبد الله ..
* سهيل :: اوكيه خلاص .. بسير له الحين ..
و دش الميلس ..
* سهيل :: هلااا و الله .. شو المفاجأة الحلوة .. 
* عبد الله :: اهلين ..
* سهيل :: و الله اني فرحت يوم شفتك .. اخباارك ؟
* عبد الله :: بخير و انت
* سهيل :: انا بخيير .. لكن انت ما يبين انك بخير ..
* عبد الله :: الصراحة هيه مب بخير ..
* سهيل :: افا .. خير؟
* عبد الله :: يا سهيل .. انا ييتك انت بالذات لأني متأكد انك بتساعدني و ما بتخذلني .. و مستحيل تخبر حد عن لي بقولك اياه صح
* سهيل :: أكييد .. بس خبرني .. شغلت بالي ..
* عبد الله :: بقولك كل السالفة :: ..... و تم يخبره ..


* بو سارة :: ها شو قالت البنت ؟
* ام سارة :: قالت بتفكر ..
* بو سارة :: شتفكر بعد .. هذا ولد عمها .. و الريال ما عليه كلام ازقيرها بكلمها ..
* ام سارة :: ان شا الله
* سارة :: خير ابويه ..
* بو سارة :: شو قلتي؟ موافقة ...؟؟
* سارة و الدموع فعينها و هي منزلة راسها :: ....
* ام سارة :: شو يا بنتي قولي ..
* حركت سارة راسها بعلامة الرظا ..
* بو سارة :: عيل مبرووك عليكم .. و بنحدد وقت الملجة و العرس بعدين ..
* ام سارة حظنت بنتها :: مبروك يا حبيبتي .. مبروك عليج ..
بس سارة كانت ف عالم ثاني كانت خايفة من هالقرار .. و بالأصح خايفة انها ما تسعد سعيد .. بس هي لازم تنسى حمد .. هيه نعم لازم أنساه .. 


كثرت اتصالات ريم لمنصور .. بس هو مل منها .. و قام يكلمها من طرف خشمه ..
* ريم :: منصور ليش ترمسني جيه؟
* منصور :: أنا قلت لج بشوفج انتي ما طعتي .. باكلج أنا .. من بعيد بشوفج و بس
* ريم :: ......
* منصور :: شو قلتي؟ لا اتمين ساكتة .. هيه و إلا لأ ..
* ريم :: لو لأ؟
* منصور :: و الله في ألف غيرج يتمنوني ..
* ريم :: لأ .. لا تقول جيه ... خلاص انت حدد المكان و الوقت و انا موافقة ..
* منصور ... حس بانه انتصر :: اوكيه يا عمري .. باجر ف المارينا الساعة 8 و نص .. تكونين بروحج .. بتشوفيني عند ستاربكس .. دقيلي و بقولج انا منو ..
* ريم :: اوكيه ... انا ببند الحين .. باي
* منصور :: باي ..
منصور (( ههههاااااااااي .. بدأ العد التنازلي يا ريم .. بعد اسبوع بتكونين في عداد الموتى .. ههه ... حليلها هالبنت انقص عليها بسرعة ...(( 
دق منصور عند ربيعه ...
* منصور :: هلا عبوود
* عبد الهه :: اهليين .. بلاك مستاانس على غير العادة 
* منصور :: هييه لازم استانس .. ساعة الصفر قربت هههه ..
* عبد الله :: وافقت؟
* منصور :: هيييه .. قلت لك بخليها توافق غصبا عنها .. بس مثل ما وصيتك اوكيه ...
* عبد الهل :: لا توصي حريص .. بس متى اللقاء؟
* منصور :: باجر .. 8 و نص ف المارينا .. عند ستاربكس ...
* عبد الله :: اووكيه ...


نرد لسهيل و عبد الله :: 
* سهيل كان مصدوم من اللي سمعاه :: عبد الله .. انت كيف تثق فيه و تعطيه تلفونك .. تعرف هذي قضية عرض .. و فيها سجن .. مب أي كلام .. 
* عبد الله :: اعرف و الله اعرف عسب جيه انا ييتك ..
* سهيل :: انت الحين عطني تلفونك .. غانم بيي بعد شويه .. و بنشوف كيف ..
شوي يدش غانم الميلس ..
* غانم :: حيا الله من يانا .. انا اول ما دشيت البيت الخدامة تقول لي عبد الله ف الميلس .. عرفت انه انت .. شحاالك ..
* عبد الله :: بخير ...

يلس غانم و خبروه السالفة ..
* غانم :: لا تشيل هم .. عطني تلفونك كلها 3 ايام او اقل .. اخلصك من السالفة .. 
* عبد الله :: و ربعي ..
* سهيل :: بعده يقول ربعي .. هذيل تسميهم ربع ؟
* عبد الله :: .....
* غانم :: وربعك .. خليهم علينا نعرف نتصرف وياهم.. بس انت الحين لا تشيل هم .. و انسى الموضوع .. وع قولتهم . حط ف بطنك بطيخة .. 
* سهيل :: هههههه انت متأكد ان المثل لي تقول له صح
* غانم :: ههههه اعتقد ..
* عبد الله :: ههههه ..
* غانم :: اوكيه يا عبود .. يوم انك ييتنا لين البيت .. ماشي طلعه الين ما تتغدا اوكيه ..
* عبد الله :: اوكيه ..
* سهيل يدق عبد الله ع ظهره :: من قدك يا ريال .. بتتغدا ببلاش ..
* غانم + عبد الله :: ههههههههههههه
* غانم :: الله يعينك يا عبود .. بتنذل ذل ..
* عبد الله :: هههه .. اعرف هههه
* سهيل :: يالله عيل .. خلنا نقوم نتغدا ..
* غانم :: يالله ...

--------------

بيت سلامة ...
* ميثة :: حميييد .. افتح قناة mbc 2 يايبين فلم حلو ..
* حميد :: جب يالله .. شصغرها و تبا تجوف أفلام
* ميثة :: و الله فلم حلو .. بتستانس عليه .. فلم من ديزني ...
* حميد :: لا دزني و لا بطيخة .. ابا اجوف المباراة انا .. 
* ميثة :: من زينها المباراة يعني .. هبل و الله .. و اللي يلعبون هبلان .. يتراكظون ورا كورة .. و الله حالة ..
* حميد :: من زين الفلم مالج الحين ..
* ميثة :: و الله احلى من لمباراة ..
*حميد :: تبين تشوفين روحي داخل .. الحجرة الثانية روحي هناك ..
* ميثة :: مابا .. ابا ايلس هني ..
* حميد :: كيفج عيل .. انا بشوف المباراة هني ..
* ميثة :: امييييي .. كلمي حميد ..
* حميد :: يمييي ... زيغتني و الله .. 
* ميثة :: مب ع كيفك قوووم ...
* حميد :: قومي عن ويهي ..
* ام عبد الله :: حسبي الله عليكم .. ما تخلون الواحد يرتاح .. قلت باخذ لي غفوة .. اشتهيتوا الظرابة .. 
* حميد : و الله هذي بنتج ما عندها سالفة .. تبا تشوف فلم
* ميثة :: انا ييت قبله .. و انا لازم اشوف مب هو ..
* ام عبد الله :: هات الريموت ... (راحت و بندت التلفزيون) .. قوموا ماشي تلفزيون اليوم .. و اللي يفتح يويله ..

عقب ما راحت امهم ...
* حميد :: كله منج انزين ... افرحي .. 
* ميثة :: احسن ما بتشوف لمباراة ..
* حميد :: هههه .. حليلج .. بروح عند سعيد او ربيعي بشوف عندهم ..
* ميثة و هي مقهورة :: ماالت عليييك .. يااارب فريقك يخسر ..
* حميد :: حالتج صعبة و الله
و طلع من البيت .. 

--------------

و ف اليوم الثاني .. الساعة 8 و نص ف المول تحديدا ..
قدرت ريم تقنع امها انها بتسير بيت فطوم وبييلسن هناك ويا بعض .. والشي اللي ساعدها اكثر هو ان حمد ما كان موجود .. لو كان موجود ما بيخليها تسير .. لأنه يعرف ان فطوم عليها حركات .. 

ف المول ...
* ريم :: فطييم .. انتي بتمين ويايه؟
* فطوم :: لا يا خبلة اطمني .. انا بسير عنج .. نسيتي ان منصور يعرفني ..
* ريم :: هيه صح ...
* فطوم :: يالله سيري عند حبيب القلب ..
* ريم :: اسكتي والله اني ميته من الخوف .. اخاف اشوف حد من الاهل ..
* فاطمة :: لا ما عليج .. يالله دقيله .. قوليله اييج هني و انا بدش المحل و من تخلصين سويلي تلفون اوكيه
* ريم :: اوكيه ..

دقت عند منصور ........
* ريم :: هلا منصور انت وينك؟
* منصور :: هلا و الله هلا .. انا ف ستاربكس .. انتي وين؟
* ريم :: انا عند عند محل zara 
* منصور :: هييه عرفته .. خلاص بييج هناك ...
* ريم :: اوكيه ..

سكر عنها و دق عند عبد الله :: اييي انت ويينك يالله تعال ..
• عبد الله :: اووكيه .. انا وصلت الحين بدش .
• منصور :: تعرف وين انا
• عبد الله :: عند ستاربكس
• منصور :: لا لا غيرت .. انا عند محل اسمه زارا .. عرفته
• عبد الله :: هييه .. انا بدش من هذاك الباب اصلا .. يالله زين بعد
• منصور :: اووكيه حلوو .. يالله تعال بسرعة ..
• عبد الله :: اوكيه ..

وصل منصور عند زارا و عبد الله كان واقف بعيد عنهم .. و من الأوصاف عرف ريم ..
• منصور قرب صوبها :: هلا و الله ..
• ريم بخجل :: اهلين
• منصور :: تعرفين انج حلوة
• نزلت ريم راسها .......
• منصور :: بنتم واقفين جيه
• ريم :: ما روم اطول اخاف حد يشوفني
• منصور :: قومي بحوطج بالسيارة ..
• ريم :: لا لا .. مافي داعي ..
• منصور :: ليش عاد ..
• ريم :: انا بسير الحين مابطول
• منصور :: اوكيه الله معاج ...
• و سارت ريم ...

بس ما كانت تعرف لي استوا .. عبد الله صور كل شي .. و الله يعينها ريم ...

فطوم :: شفتيه؟
ريم :: يخبل ..
فطوم :: خبرتج ..
ريم :: ههه
فطوم :: يالله بنرد البيت الحين ..
ريم :: اوكيه ..

-------------

و ف نفس اليوم .. كان حمد ويا ربعه ..
بس ربيعه جاسم ما كان موجود .. و اتصل عند حمد ...
* حمد : هلا و الله .. وينك بو محمد .. تعال يالله ..
* جاسم :: حمد بقولك شي ..
* حمد :: خير؟؟؟
* جاسم :: اليوم عرس سارة ..
* حمد ... تم مصدوم ا عرف شو يقول :: ههه .. تمزح؟
* جاسم :: ولد عمها خذاها ..
* حمد :: لا مستحيل شو دراك ..
* جاسم :: اخو ولد عمها ربيعي .. و خبرني ..
* حمد :: خبرك شو ..
* جاسم :: ان عرس اخوه .. و انا عرفت ان ماخذ سارة ..
* حمد :: كييييف؟؟؟
* جاسم :: مب مهم كيف .. المهم ان اليوم عرسها ..
* حمد :: ................ و سكر التلفون ..

* سالم :: حمد شو بلاك؟ من اتصل ؟ الأهل فيهم شي ؟
* حمد ..... بس حمد تم ساكت و ما قال شي :: ......
* عمر :: حمد اتكلم لا اتم ساكت .. شو السالفة ..
* حمد :: سالم و عمر 
* سالم + عمر :: آمر
حمد :: حد فيكم يساعدني بسير السيارة
• سالم :: ما نقدر نخليك جيه .. يكفي لي صاربك من الزعل
• حمد :: لا .. لا تخاف .. انا مب زعلان ودني و بس
• سالم :: اللي تشوفه بس يويلك ان سرعت .. و سويت النا فلم هندي نفس ذاك اليوم
• عمر :: ايي وياك؟
• حمد :: لا .. ابا اتم روحي ..
• عمر :: اللي يريحك ...
و يلسوه ف السيارة ..

حمد ما كان مصدق لي سمعاه .. انا بسير القاعة و بتأكد .. يمكن جاسم مسوي فيني مقلب .. وصل عند القاعة و سأل .. و خبروه .. و بعدها تأكد ...

حمد (( سارة راحت خلاص .. راحت يا حمد .. ليش ما خبرتني ؟ ليش ؟ ليش كل هذا يستوي فيني .. ليييش ؟؟؟ ........
استغفر الله .. اللهم لا اعتراض .. انا خلاص انتهيت .. ماقدر ايلس ف البلاد .. بسافر .. خلاص بسافر .. ومن دون ما يحس نزلت دموع من عينه يوم شاف سيارة العروس و المعرس لي بينزفون فيها .. و مرت عليه ذكرياته .. و شو سوالها ... الله يهنيج .. الله يهنيج يا سارة ...(( 

---------------

من بعد الحوادث لي صارت .. تقريبا بعد شهرين ..

• حمد :: ابويه ...
• بو حمد :: هلا ..
• حمد :: بسافر
• بو حمد :: ويين؟؟ و لييش؟
• حمد :: بتعالج ..
• بو حمد فرح من الخاطر :: اخيييرا اقتنعت .. اخييرا .. و الله عيزنا و نحن نقنع فيك .. اخييرا 
• حمد :: بسافر في أقرب وقت ..
• بو حمد :: اللي تشوفه .. بس منو بيسافر وياك؟ أنا ؟
• حمد :: لا يابوي .. انت لو سافرت منو بييلس ويا خواتي و امي .. ما عندهم ريال ..
• بو حمد :: عيل كيف بتسافر روحك؟
• حمد :: لا مب روحي .. انا و سهيل .. و يمكن ربيعي عمر
• بو حمد :: يوم انه جيه .. خلاص عيل اقدر اطمن
• حمد :: و قولك بتنجح العملية لو سويتها
• بو حمد :: يا ريال .. هالعملية مثل الكحة و الزجام عندهم ف الغرب .. لا تشيل هم .. بعدين نحن ما بنوديك عند أي دكتور .. بنوديك عند أحسن الدكاترة ..
• حمد :: ......
• بو حمد :: ليش سكت
• حمد :: مادري بس انا خايف الصراحة
• بو حمد :: لا تخاف و لا شي .. و خل كل شي على الله ..
• حمد :: و النعم بالله ...

---------------

تذكرون سالم ؟ ريل مريم .. اللي طلق مريم وخذ بنت خالته ... ما كمل زواجه سنة .. صارت المشاكل بينه وبين حرمته .. وطلبت الطلاق .. وطلقها .. لكنه ندمان لأنه ترك مريم .. و مريم مستحيل ترد له .. والعيال مسموح يشوفهم ف الشهر مرتين او ثلاث .. 

و الحين سارة اخته .. تعيش أحسن حياة ويا سعيد ولد عمها .. ..
سعيد ريال محترم و يخاف ربه .. و حاط ساره ع راسه .. معيشها أحسن عيشة .. و اللي كل يتمناها ...

-------------

قبل سفر حمد باسبوع ... وصل له حمد بالبلوتوث الفيديو ...
فيديو اخته و منصور يوم تقابلوا ويا بعض ..
انصدم .. و ماعرف شو يسوي .. تم يعيده مرة و اثنين و 10 .. عسب يتأكد ان هذي اخته أو لأ .. طلع من حجرته و سار عند اخته .. ريم ..
بطل باب الحجرة و كانت يالسة ..
مسكها و ظربها ظرب .. ما تحلم فيه
• حمد :: يالخايسة .. سويتي كل هذا من ورانا .. تقابلين شباب من ورانا .. انا بذبحج بايديّ .. و الله ما بتشوفين النور بعد هاليوم يا ريموه ..
شوي يدشون امه و ابوه ..
• بو حمد :: حمد .. خل اختك .. انا حذرتك انك ما تمسهن ..
• حمد :: بناتك اللي حذرتني اني ما امسهن شوف شو شفنا بعد دلعك الزايد لهم .. شوف يا بويه .. سمعتنا صار ف الأرض .. ف التراب .. سمعتنا راحت خلاص .. شوف بعينك يا بويه .. هالبنت ما بتعيش اليوم ..

انصدم بو حمد يوم شاف الفيديو .. قلبه كان ظعيف .. طاح ف نفس الوقت ..

---

في المستشفى ....
• الدكتور :: للأسف .. ما قدرنا نساعده .. تعرض لصدمة شديدة .. و من بعدها سكتة .. و توفى .. عظم الله اجركم .. ادعوله بالرحمة و المغفرة .......
• ام حمد ما صدقت الخبر :: .............
• حمد حالته كانت حاله .. 
• مريم .. كانت تصييييح و تحظن امها ..
• عاشة .. ما رمست حد و تمت سااكتة 

اما ريم ..
ف حجرتها .. بعد ما انظربت ظرب .. بس حتى الظرب ما ينفع .. السمعة راحت خلاص .. 
وكلها بسبب تهورها .. و بسبب فاطمة ...

-------------

راشد .. انا بتصل عند سلامة .. و لازم القى طريقة ... و اتصل
• راشد :: لحظة يا سلامة لا تسكرين ..
• سلامة ::: راشد انا حذرتك
• سلامة :: آخر مرة اتصل .. و لو ما عيبج كلامي .. كل واحد ف طريج اوكيه
• سلامة :: شو عندك بعد.؟
• راشد :: سلامة .. انتي خايفة اني ارد لج و يكون حب و بعدين نفترق مرة ثانية صح؟
• سلامة :: ... انت تعرف ردي
• راشد :: انا مستعد اخطبج بعد سنيتن او 3 .. بس نرد لبعض اوكيه
• سلامة :: انا قلت لك لأ ..
• راشد :: لا تستعيلين فكري عدل
• سلامة :: و لو ردينا لبعض و خذتني .. حياتنا بتكون أتعس حياة .. بتشك فيني .. و بعد انت كيف بتاخذني و انا رمستك ف التلفون
• راشد :: انا اباج .. 
• سلامة :: السموحة يا راشد لي من بيننا انتهى ..
• راشد :: بس انا احبج
• سلامة :: و انا عفتك .. و عفت قلوب ممشاك ...


كانت هذي قصة راشد و سلامة .. و قصة كل شخصية في القصة .. كل واحد خذا يزاه .. و الجزاء من جنس العمل ..



و هذا اللي صار لكل الشخصيات بعد 10 سنوات ..
-----------

بعد 10 سنوات .....

عايلة بو عبد الله 
* سلامة 27 سنة :: تزوجت .. بس تدرون منو خذها ؟
سهيل ولد عمها .. و هي عايشة بخير و نعمة و سعادة .. و عندها بنت و ولد ..
سمت البنت * روضة * و الولد * راشد * ... طلعت من الثانوية بنسبة 91 و هي أعلى نسبة من كل اللي كانوا وياها ف هالمرحلة .. مثل (( ريم وفاطمة )) و اشتغلت لمدة سنتين و 3 أشهر و بعدين هونت .. عسب ترعى عيالها و تهتم فيهم 

* عبد الله 25 سنة :: بعد هذيج السالفة هد ربعه .. وتعرف على غيرهم .. شلة محترمة ومتدينة يخافون ربهم .. و الحين هو يشتغل في شركته .. واشتهر وايد بين رجال الأعمال .. بس ما يفكر بالزواج .. لأنه شغله ما يخليه ييلس ف البلاد وايد .. 

* حميد 24 سنة :: تخرج من كلية الطب .. و الحين مسافر برة و بياخذ الماجستير .. و اختصاصه الأمراض النفسية .. و أول واحد بيعالجه .. هو نفسه .. و من عقدته اللي فيه من وفاة أبوه ..

* ميثة 23 سنة :: عرسها بعد شهرين .. خذها واحد من الي يعرفهم عبد الله .. ريال متدين ومحترم .. و هي درست و تخرجت وخذت * تعليم * بدرّس مادة العلوم لي طول حياتها تكرها .. سبحان اللي يغير و لا يتغير .. 

وعندنا ::.::.::.

* أم عبد الله :: شعورها .. شعور أي أم تحس بالفرحة و الفخر من عيالها لي رفعوا راسها ..

-------------------------------------------

عايلة بو حمد ( الله يرحمه ..( 
* بو حمد :: مثل ما عرفتوا توفى .. بس كانت شخصيته قوية .. يحب الخير لعيال اخوه .. اهتم فيهم ورعاهم و ما قصر فيهم ..

* أم حمد:: من يوم ما توفى ريلها .. و هي تعبانة .. ما ترمس ويا حد ..

* مريم 35 سنة:: المثل الأعلى لكل البيت .. هي الوحيدة لي صبرت من وفاة أبوها .. و هي شالة مسؤوليتهم كلهم.. تقدم الها واحد .. لكنها رفظت .. و فضلت انها تربي عيالها ..

• حمد 32 سنة:: نجحت عمليته .. و رد يمشي .. لكن من بعد فظيحة اخته .. لي الكل عرف بها .. مارد لبلاد .. وتم برة يدرس .. وبياخذ وحدة من برة .. للأسف ما طلع ريال .. وخله عايلته اللي ما عندهم ريال بروحهم ..

• عايشة 29:: تعقدت من بعد وفاة أبوها .. ومن توفى .. ما تكلمت ولا قالت كلمة وحدة .. خلاص .. ما صارت تتكلم ..

* ريم 27 سنة:: آه منها .. بعد الفظيحة .. حبست عمرها ف الحجرة .. ساعة تظحك و ساعة تصيح .. و تم تظرب عمرها و تقول :: أنا ذبحت ابويه ..

.:.:. عايشة و ريم .. محد تقدم الهم من بعد الفظيحة .:.:.

--------------------

عايلة خليفة ( الله يرحمه ..( 
* خليفة :: توفى .. بس كان ريال بمعنى الكلمة ..

* عفرة :: أم تستحق التكريم .. ربت عيالها أحسن تربية .. و تفرغت الهم .. و رضت بقضاء الله و قدره .. 

* عنود 14 سنة :: بنت ماشا الله عليها .. أخلاق و جمال .. و فوق هذا متفوقة ف المدرسة .. خذت من طبيعة أبوها .. صح كانت شيطانة و هي صغيرة .. لكنها يوم كبرت .. عقلت وايد ..

* عبيد 14 سنة :: من الأوائل ف مدرسته .. طلع نسخة من أمه .. شيطان بس حبوب و محترم .. 

* محمد 10 سنوات :: هادي .. و ماله خص ف الناس .. انطوائي وايد .. و كله يوقف عند صورة أبوه ويكلمه ..

---------------------------

عايلة سهيل ..
* غانم 37 سنة :: ملازم ف الشرطة طبعا .. ريال محترم .. خذا وحدة من القرايب .. و عنده 3 .. ولدين وبنت .. و حرمته حامل ..

* سهيل 32:: هو بعد اشتغل ف الشرطة .. ريال له سمعه زينه .. تزوج سلامة .. و هم عايشين الحين ف الشارجة ..

-----------------------

* موزة :: عمة سلامة .. بنتها عرست .. و ابتلشت بحماة أخس عن أمها .. و تسوي فيها مثل ما كانت موزة تسوي في سلامة و خوانها .. و هذا يزاتها ..

* مهرة :: بعد فقد غالين .. صارت حالتها حاله .. صح انها كانت قوية .. لكنها ما استحملت وفاة خوانها .. وخاصة ان كلهم من بينهم 3 سنوات ..

* سعيد 24 سنة:: ولد عمة حميد .. اشتغل ويا حميد .. و عقل .. و بياخذ بنت خالته ..

* فاطمة 27 سنة :: حرموها هلها من الطلعة و من كل شي .. و بعد فترة زوجوها واحد عمره 45 سنة .. وغصبوها عليه ..

----------------




من برة العايلة ...

* راشد 29 سنة :: خسر أعظم شي عنده وهي * سلامة * .. و هو متحسف على هالشي .. لكنه بدا يشتغل ليل نهار .. عسب يشلها من عقله .. امه عزمت انه يعرس لكنه يرفض .. بس هو يستاهل هالشي ..

* ميرة 27 سنة :: تشتغل في وزارة التعليم .. و ماسكه منصب كبير .. بس ما حصل نصيب ومحد تقدم الها ..

----------------

* سالم ..:: حاول يرد لمريم .. لكنها رفضت اكيد .. و الحين بطالي .. يالس ف البيت و يدور له شغل .. بس ما حصل ..

* سارة :: تزوجت ولد عمها وعندها منه 4 .. وكلهم أولاد .. والفرق من بينهم سنة .. أكبرهم عمره 10 سنوات .. و الحين حامل .. و قالولها ان اللي ف بطنها بنت ..

* سعيد :: ريل سارة .. ما عليه كلام .. و شالنها ع كفوف الراحة ..

-----------------

ربيعات سلامة ..
تكلمنا عنهن فوق ....

بس شمة 27 سنة :: اختربت وايد .. وكل يوم طالعة مع واحد من الشباب و كلها بسبب الشلة اللي رابعتها ..

مريم :: خذت واحد حليو مثل ما تتمنى .. بس للحين ما حملت ..

خلود :: روحت راس الخيمة .. و انقطعت أخبارها ..

حمدة :: ربيعة سلامة .. الصديقة الصدوقة .. لي خانت ربيعتها .. قالوا انها اطلقت 3 مرات .. يعني كل ما تتزوج تتطلق .. 

-------------------







ربع حمد ..

عمر :: سافر ويا حمد للعلاج.. لكنه رجع والحين يشتغل ف شركة ابوه.. هو وسهيل حاولوا يقنعون حمد ان يرد .. لكن حمد رفض ..

جاسم :: بسبب تهوره و سرعته .. سوا حادث .. و ما قام يشوف ..
سالم :: شخص ع نياته .. بس بعده يدور له شغل .. و رافض ان يتزوج الين ما يلقى شغل 

.....................................................


الـــــــــــــــــــــــــــــنــــــــــــــــــــــــــهــــــــــــــــــــــأيــــــــــــــــــــــــــهـ


www.saif.waphall.com