ليتني عرفتك بأول العمر بدري الفصل الأول: بيت بو حنين.. شوق: ماماتي وينج!! ماماتي وحشتيني..ماماتي الوالده: ياربي من هالبنيه بتذبحني.. شو فيج شوي شوي الجيران وصلهم صوتج. شوق: خل يوصلهم..عيل نحن نسمع أسرارهم وهم لا؟؟؟ الوالده: أي أسرار.. شو تقصدين!! شوق: لالالا ولاشي سلامتج يالغاليه. الوالده: انزين خبريني الحينه شو عندج قايمه تصارخين من صباح الله خير؟؟ شوق: أبا أخبرج اني بسير مع فرح ربيعتي السوق.. علشان باجر عيد ميلاد تامي.. أبا هديه راهيه وحلوه. الوالده: انشاءالله حبيبتي، ومتى بتسيرون؟؟ شوق: بالليل على الساعه 9. الوالده: لالالا حبيبتي تبين سيري العصر، تعرفين أبوج مايحب طلعات الليل. شوق: ماماتي وهو شودراه.. بطلع وبرجع وهو بعده مارجع من الشركه. الوالده: تراج ظامنه موقفج، بتركضين حجرتج وانا الي بحصل الهزاب كله. شوق: لا أمايه فديتج مابيستوي شي أوعدج. الوالده: دلوعه وما أقدر عليج. شوق باست أمها وراحت لحجرتها، شوق تعرف انه أمها ماترد لها طلب، تحب تتدلل وتتدلع عليها، شوق هي ثاني البنات في عيلة بوحنين، حنين هي البكر عمرها 23 سنه متخرجه من الجامعه تخصص اداره واقتصاد، وتشتغل مع أبوها بالشركه، وبعدها شوق عمرها 19 سنه بالتقنيه تدرس تقنية معلومات وتموت على السوق والحواطه.. وبعدهم توأم بنات شحلاتهن العنود والهنوف.. 16 سنه بعدهم بالمدرسه.. وشياطين درجه أولى.. بوحنين كان يكره البنات ويوم تزوج ماوده اييب بنيه أبدا.. بس الله ماعطاه غير البنات.. نصحوه هله وربعه يتزوج وحده ثانيه، بس هو مارضى.. في اعتقاده انه ربه يعاقبه على كرهه للبنات.. ورضى بنصيبه بالدنيا. على الساعه 2 ونص الظهر وصل بوحنين وحنين من الشركه.. وعلى طول حنين دخلت حجرتها تبا ترتاح، وكالعاده ماتتغدا وتفضل الراحه والرقاد.. قامت حنين العصر وراحت المطبخ تدور أمها.. حنين: مساء الخير أمايه. الوالده: مساء النور والطيبه.. مابغيتي تقومين!! حنين: أمايه بدخل المكتب أكمل شوية اوراق بليز لا أحد يزعجني.. الوالده: حبيبتي ريحي بالج.. لاحقه على الشغل. حنين: أمايه.. حنين بدون شغل تموت. الوالده: بسم الله عليج من طاري الموت شو هالفال بعد.. بعيد الشر عنج. حنين ابتسمت وراحت عن أمها.. هي من صغرها انسانه جديه بصوره فظيعه.. ماعندها سوالف الطنازه والغشمره طول الوقت، هي أقرب للولد منها للبنت، ماحد يعرف يطلع أنوثتها.. يحسونها غامضه، حتى شباب العيله يهابونها، مع انه جمالها ملفت للأنظار بس مافي يوم تجرأ أحد وتقرب منها.. على الساعه 8ونص طلعت حنين حجرتها ترتاح فشافت شوق طالعه وهي متعدله ومتكشخه.. حنين: شوق على وين انشاءالله؟؟ شوق: هااا لا بس بسير السوق ويا فرح. حنين: ما أدري ليش ما أرتاح لها هالفرح. شوق: وهي بعد نفس الشعور، تحسج وغده. حنين: تبين بيزات والا عندج؟؟ شوق: تسلمين حبيبتي عندي.. يالله تشاااااااو نزلت شوق الدري وراحت لسيارتها وطافت على فرح.. وراحوا على طول الميجا مول.. وهناك قعدن يتحوطن من محل للثاني.. وخلصوا جريب الساعه عشر ونص... شوق: يالله فرووحه تأخرنا.. فرح: استني شوي هلا بيجي أحمد.(فرح سوريه). شوق: شوووو انتي ماقلتيلي انه بيي هني. فرح: طيب نسيت شو صار يعني.. ليكوا هونيك. شوق: أنابسير الطاوله الثانيه برايج انتي يلسي بروحج. وصل أحمد وانتبه انه شوق قامت من شافته.. يلس ويا فرح وهو يطالع شوق بعين ذباحه.. أحمد: حياتي منو هالحلوه؟؟ فرح: هاي شوق رفيقتي.. أنا جايه معها بسيارتها. أحمد: أيواااا.. طيب ليش قامت يوم شافتني..!! شوق: خافت حدا يشوفك معنا.. اوكي حبيبي لازم نروح هلا الوقت تأخر.. أحمد: أوكي حبي بس خذي هديتج قبل.. وعطاها كيس صغير وأنيق.. وهو قايم تم يطالع شوق شوي وعقبها راح.. فطلعوا البنات من المول وهم بالسياره فتحت فرح الهديه.. فرح: وااااااااو موبايل جديد.. شوق: خييييييبه هذا الي كنت باخذه الأسبوع الياي. فرح: أخيراااا صار معي شي قبلك.. ياترى أديش سعره؟؟ شوق: ثلاثة آلاف وثمانميه.. فرح: رح يغمى علي..عن جد هالزلمه مو معقول. شوق: الله يهنيج به. ووصلت شوق للبيت وشافت أنه أبوها بعده ماوصل.. فراحت حجرتها تبدل ثيابها، لبست بيجامتها ودخلت على أختها حنين.. حنين: هلا.. متى وصلتي..؟؟!! شوق: توني..بسألج سوؤال حنون.. حنين: ميت مره قلت لج لاتدلعيني.. قولي حنين وبس. شوق: أوكي حنين وبس.. ليش عيب الوحده تتعرف على واحد؟؟ حنين: حبيبتي مجتمعاتنا ترفض هالشي، والي بترخص نفسها لهالسوالف الشباب كلهم بيرخصونها. شوق: أوكي خلج من التعرف.. لو أنا حبيت وهو بادلني، بس لارمسنا بالتلفون ولاشي، بعد غلط؟!! حنين: دامكم ماغلطتوا فمب عيب..والحينه يالله روحي حجرتج بقوم الصبح وراي دوام. طلعت شوق وراحت حجرتها، وقعدت حنين سهرانه تفكر في كلام أختها، هي تعرف انه شوق متعلقه في جاسم ولد عمها وهو بعد يحبها، بس مايبون حد يدري، وجاسم بيكون نفسه وعقب بيتقدم لها.. ولاإراديا سألت نفسها هالسؤال: ليش شوق لقت الي يحبها وأنا لا؟؟ شو العيب الي فيني، أحس الكل يتجنبني، مع إني حلوه ودوم أكشخ و.. أوووه شو هالرمسه حنين هاي التفاهات خلج بعيد عنها، انت أعقل من انج تطيحين في هالحفره.. وحطت راسها ورقدت، والصبح قامت قبل المنبه، تسبحت وصلت الفيروقعدت تتزهب للدوام.. على الساعه 7 ونص طلعت هي وأبوها على الشركه، طبعا كل واحد بسيارته، أول ماوصلت الشركه راحت على مكتبها تعابل شغلها، ودخل عليها عبدالله ولد خالها أحمد.. عبدالله: السلام عليكم حنين. حنين: وعليكم السلام، يبت أوراق مشروع شركة البحر؟؟ عبدالله: هي نعم، خذي هاي الأوراق، بس خبريني ليش تبينهم؟ مافي شغل بينا الحينه. حنين: أدري بس أبوي طلب مني أراجعهم شوي. عبدالله وبعد تردد: حنين ممكن أقول شي؟ حنين وهي لاهيه بالأوراق: خير. عبدالله: ربيعي أحمد يدور وظيفه وأنا اقترحت عليه انه يشتغل هني.. و حنين: هو قدم أوراقه؟؟ عبدالله: هيه البارحه وقالوله اتريا. حنين: وانت شو تبا!! عبدالله: بعد شو أبا أكيد واسطتج. حنين: أوكي بكلم شؤون الموظفين. عبدالله: والله!! بهالسرعه غريييييبه!! حنين: وشو الغريب؟ عبدالله: العاده ماتوافقين على أي طلب الا بطلعة الروح.. طول عمرج عنيده ومخوفه الكل منج. حنين: والله؟؟ هاي نظرتك لي!! عبدالله: مب بس أنا الا كل الي يعرفونج من أهل والا ربع والا حتى موظفين.. يعني انت مثل قالب الثلج جامد في كل شي. حنين تمت ساكته ومنزله راسها، حس عبدالله بالذنب: حنين سامحيني بس انتي دوم تقوليلي لازم أكون صريح.. حنين: لاتاخذ في بالك، أنا حاسه بهالشي من زمان بس أول مره أسمعه من الغير.. عبدالله: لا حنين انت حلوه وتستاهلين كل... حنين: عبدالله روح شوف شغلك، وخلني بروحي. طلع عبدالله وهو حاس انه حنين بدت تتغير، حنين نفسها حست بالكره لنفسها.. شو الي خلاها توصل لهالمرحله، الكل يعاملها برسميه ويخلون بينها وبينهم حدود.. (ياربي شو الي قاعد يصير لي).. الفصل الثاني: وصل بوحنين من الشغل الساعه 10 بالليل، وقعد ينادي على زوجته.. أم حنين: خير شو فيك!! بوحنين: أخوي محمد وجاسم ولده هني، حطوا الفواله بالميلس. راحت أم حنين وخبرت حنين وشوق انه عمهم وولده هني، طبعا شوق قعدت تتكشخ وتتعدل، فدخلت عليها العنود.. العنود: عمي هني مابتيين!! شوق: ثواني وبنزل. العنود: امسحي هالمكياج حشا رايحه عرس؟ شوق: وانت شو دخلج يالملقوفه.. وتفرها بالمخده، وتركض العنود على تحت، شوي وتدخل عليها حنين، وهي لابسه بيجامتها.. شوق: ليش ماغيرتي ثيابج عمي تحت. حنين: أدري عمي وجاسم تحت، بس مالي خلق أنزل. شوق: وليش عاد.. الله يخليج تعالي وياي، أستحي أدخل بروحي. حنين: حبيبتي والله مالي مزاج. شوق: نعم نعم شو قلتي. حنين: شووو؟؟ شوق: قلتي حبيبتي!! حنين: وشو فيها؟؟ شوق: سبحان مغير الأحوال. حنين: بس بس يالله سيري تحت أنا بدخل أريح شوي. نزلت شوق تحت ودخلت وباست عمها على راسه وصدت على جاسم واستحت ونزلت راسها.. بوجاسم: شحالج شوق، ماشاءالله عليج محلوه. شوق: عيونك الحلوه عمي. بوحنين: عيل اختج وينها؟؟ شوق: ماتبا تنزل تقول تبا ترقد. بوحنين: فديتها هالبنيه والله شايله الشغل كله على راسها، الله يبارك فيها ويعوضها خير. بوجاسم: لازم بتكون مجتهده مب بنتك، انت من يوم عمرك سبع سنين وانت مجتهد وتدور رزقك. بوحنين: هههه وهي الوحيده الي طالعه علي، لكن شوق طالعه على أمها ماتحب الشغل، زين منها تقوم للمدرسه، والا الهنوف والعنود ماأدري على منو طالعين بهالشطانه!! بوجاسم: طالعين على عمتهم مريومه، تذكر شطانتها وخبالها، والله يوم كانت تطلع من البيت ماترد الا نصايف الليول، حشا مب بنيه. والشياب قعدوا يتذكرون أيام قبل فتسحبوا جاسم وشوق وطلعوا برع بالحديقه.. جاسم: تدرين شو أحلى شي ببيتكم. شوق: شوو؟؟ جاسم: كلكم بنات، وماعندكم أخو عوود يخرب علينا شوق: ههههههه حسبالي بتقول انا أحلى شي بالبيت. جاسم: فديت روحج انت مب أحلى شي بالبيت أنت أغلى شي بحياتي. شوق: يالله خلنا ندخل الجو بارد. جاسم: حاضر غناتي. بعد يومين راحت حنين الشركه وهي راكبه المصعد شافت واحد يكلم عبدالله ولد خالها.. فقالت أكيد هذا ربيعه الموظف اليديد.. ووصلت مكتبها وبدت شغلها.. على الساعه عشر ونص نزلت المستودع تحت تدور أوراق شركة أرنستون للمواد الغذائيه.. وشافت نفس الشاب الي كان ويا عبدالله الصبح، فطنشته ومشت للكمبيوتر تدور الأوراق.. حنين: ممدوح تعال شوي. ممدوح: نعم يافندم؟؟ حنين: أدور أوراق شركة أرنستون وينهم؟؟ صار لي يومين طالبتهم منك. ممدوح: موجودين يافندم.. حضرتك اديني خمس دقايق ويكونوا عندك بالمكتب. حنين: لاأبيهم الحين. يالله أشوف طلعهم بسرعه. فركض ممدوح مسكين يدور لها الأوراق، وكان الشاب واقف يطالعها وعايبتنه قوتها وشخصيتها.. انتبهت له حنين بس طنشته وتمت تمشي وتتطالع المكان ونظافته.. لأنها مهووسه بالنظافه، تموت ولاتشوف غبار في المكان.. وهي تمشي وتتطالع ورا دعمت في شي وتناثرت أوراق في كل مكان.. حنين: أوووف شو هااا : انت شو هااا ماتشوفين. حنين: انت منو علشان تكلمني بهالطريقه؟؟ : انت الي منو؟؟ مسويه نفسج شي وقاعده تتأمرين. حنين: أنا تكلمني بهالطريقه!! : وانت منو تكونين..؟؟!!! ممدوح تدخل بينهم..: سلامات يافندم هو مايقصدش حاجه. حنين: انت جب ولاكلمه.. أبا أعرف منو هذا وشو الي دخله هني وليش كان شايل الأوراق هاي.؟؟!!! ممدوح: دا دا حنين: شو دادا انت بعد نادلي أبوي وعمي راشد خلهم يشوفون له صرفه.. وأنا طالعه مكتبي. طلعت حنين مكتبها وهي معصبه ماتحب أحد يكلمها بهالطريقه.. وعقب نص ساعه دخل عليها راشد بن حمدان شريك أبوها فالشركه.. حنين: هلا عمي شو هالزياره الحلوه حياك تفضل.. راشد: هلا ببنيتي أنا ياي أعرفج على ولدي مايد، من يومين متخرج من أمريكا. ودخل وراه نفس الشخص الي تضاربت وياه قبل شوي، انصدموا الإثنين ببعض.. حنين: إنت؟!! مايد: معقووووله!! بو مايد: تقابلتوا من قبل. مايد: قبل عشر دقايق تواجعنا في المستودع، يوم طرشتني أييب لك أوراقك من ممدوح. حنين: هيه تدعمني ولاتعتذر.. مايد: انت الي ماشيه وتتطالعين على ورا. حنين: الحينه بتطلعني أنا الغالطانه؟؟ بومايد: هدوا بالكم ياعيالي، ماحصل الا كل خير، مايد خلك هني بسير بنادي عمك بوحنين وبرجع. مايد: انشاءالله أبوي. وقعدت حنين ورا مكتبها تكمل شغلها ولا اهتمت لمايد الي بياكلها بعيونه، هي صح جديه وعصبيه ورسميه زياده عن اللزوم بس مايغطي جمالها الي سحر مايد من أول نظره.. أو من أول ظرابه.. مايد: احم احم شو تشتغلين هني. حنين رفعت راسها: أنا راعية الشركه يعني كل الشغل أشتغله. مايد: تدرين بالرغم من قوة شخصيتج وعصبيتج ماتقدرين تخبين رقتج ونعومتج. انصدمت حنين بس تمت ساكته وقبل لاتستوعب الموضوع وترد عليه دخل أبوها وأبوه، وافترقت عن مايد وما التقوا طول اليوم.. الظهر يوم رجعوا البيت كانت حنين بعدها في عالم ثاني.. تحس فيها شي تحرك، مايد ظرب على وتر حساس ولامس المكان الي عمره ماحد فكر يتجرأ ويوصله.. ولأول مره بحياتها تستانس من فكرة انها بنيه تحب وتغار مثل باجي البنات.. العصر دخلت شوق على حنين غرفتها وهي معصبه من الخاطر على اخواتها.. شوق: حنين شوفيهم شو مسويات حسبالهم بسكت لهم السخيفات. حنين وهي تختار شو بتلبس: وشو الي صار. شوق: شايلين الأباجوره من حجرتي، يعرفوني أموت خوف بدون الأباجوره. حنين: سيري دوريها في حجرتهم. شوق: دورتها بس مالقيتها!! حنين: شوفي المطبخ دايما يخشون أغراضنا هناك، شوق قوليلي ألبس البدله الحمرا والا السوده. شوق: لا الحمرا وايد تعيبيني يوم تلبسينها.. بس ليش هالإهتمام باللبس اليوم.. حنين: هاااا لا ولاشي بس بسير أسبح وأبا بدله حلوه ألبسها.. شوق متى بتسيرين السوق. شوق: اليوم بالليل ليش!! حنين: أبا أسير أشتري شغلات حقي، وتعرفين اني ما أدل الأماكن ممكن أسير وياج؟؟ شوق وهي مستغربه: حنين بدر تبا تسير تتسوق فيج شي حبيبتي مريضه حاسه بشي. حنين: اوووه شواقي لاتخليني أغير رايي.. شوق: لادخيلج من زماااان خاطري أسير السوق وياج.. حنين: خلاص طلعي برع بسبح وبسير لأمي. طلعت شوق وهي تكلم نفسها من الدهشه، معقوله حنين تفكر بلبسها وأناقتها..!! سبحان مغير الأحوال. بالليل طلعت حنين وشوق بسيارة شوق اللكزس وسارن السيتي سنتر وقعدت شوق تحوطها على كبر المكان وماتم محل مادخلوه، ويوم خلصوا حبت شوق تجس نبض حنين فسألتها: مابتاخذين ميك أب؟؟ حنين: هاااا ولامره جربت أحط لالا أحس شكلي مب حلو بيطلع. شوق: تعالي بنشتري ولو ماعيبج باخذه عنج. وراحوا واشتروا ويوم طلعوا راحوا وقعدوا يرتاحون عند المطاعم.. شوق: خاطري آكل من ماكدونالد تبين شي؟؟ حنين: لاروحي انتي أنا ما أحب آكل بالليل. راحت شوق ويلست حنين تتطالع الي رايح والي راد، وشافت البنات شلل وكل وحده كاشخه وعايشين حياتهم، وتتذكر نفسها وتقول ليش أنا ماكنت أطلع وأسير وأيي ليش ظيعت سنين مراهقتي بالدراسه والشغل ويا الوالد، حتى يوم دخلت الجامعه ماكنت أهتم بلبسي أو كشختي.. ورجعت شوق ويلست تاكل وحنين بعدها تتطالع البنات، وحست شوق باختها.. شوق: بلاج بتاكلين البنات بعيونج. حنين: لا ولاشي خلصي خلينا نروح. شوق: شو نروح!! انت وياي اليوم وبستغل الفرصه بتحوط وبتأخر وبشوف باباتي شو بيقول. حنين: لاوالله.. يالله أشوف جدامي على البيت باجر عندي دوام ومب خاطري أتأخر بالرقاد. شوق: حنونتي يالله بس شوي. حنين: اوووووف منج ومن دلعج. : شو هالصدفه الحلوه.. حنين: مايد هلا انت.. انت شو تسوي هني؟؟ مايد: ياي ويا الربع عازمنهم بمناسبة تخرجي.. ماعرفتيني على الحلوه الي وياج. حنين: هاي شوق أختي.. شوق هذا مايد ولد عمي راشد شريكنا بالشركه. شوق: مرحباااا والله بصراحه أبوك روووووعه. مايد: لااااااا أوكي بقوله فيه معجبه متخبله عليك. شوق: ههههه مايحتاي بروحي قايلتله لو فكر بالزواج تراني جاهزه. مايد: هههههه عيل أخليكم على راحتكم مع السلامه. وراح مايد وقاموا البنات وروحوا البيت، وشافوا أبوهم يترياهم وهو مستانس انه حنين طلعت تتمشى وتغير جو. [b]الفصل الثالث: اليوم الجمعه.. وكالعاده العيله كلها تجتمع في البيت العود.. عيلة بوحنين وعيلة أخوه محمد وأخوه حميد الي بعد مب متزوج وطبعا أختهم مريومه وزوجها وعيالها.. بعد الغدا راحوا الشياب الميلس، والشباب طلعوا في الحديقه، والبنات قاعدات بالبلكونه يشوفون الشباب شو قاعدين يسوون.. وجدان بنت محمد: شوق متى بيسوون عندكم اليوم المفتوح بالكليه خاطري أحظر يقولون بييبون الحربيه!! شوق: ههههه لهالشغلات جاهزه، لكن يوم أقولج تعالي بنسير مكان تقوليلي لااااا. جميله بعد بنت محمد: يعني ماتعرفين أختي وغلاستها، الي تبينه مستحيل تسويه والي يضايج فيج تروح تركض تسويه.. ليلى بنت عمتهم مريم: أحسني أبا أنزل تحت، قوموا نسير للصبيان تحت. شوي وياتهم حنين: شو قاعدين تسوون؟؟ شوق: ولاشي نفكر ننزل تحت نشوف الشباب ونغلس عليهم هههه حنين: يالله عيل أحس هني ملل.. نزلوا البنات وهم على الدري وجدان تصاصر شوق وجدان: بلاها أختج اليوم هاديه وحبوبه؟!! شوق: جب سكتي ماصدقت انها تغيرت. يوم وصلوا تحت قعدوا قريب حوض السباحه والشباب في الطرف الثاني.. جاسم: شو رايكم نسير نسبح شوي. علي ولد محمد.. أخو جاسم..: والله فكره. حميد: لا والله شوفوا البنات قعدوا عند الحوض.. علي: محد يخرب هالدنيا غير البنات. حميد: قصدك محد يحليها غيرهن..شوفوني يوم بأدبهم لكم.. وراح حميد صوب البنات وأول ماشافوه قعدت وجدان تغني.. (هلا بالي لفانا ياهلابه.. عدد دقات قلبي في غيابه فدييييييييييييييييييييت عمي أنا والله مايسوونك يا الغالي يالمزيووووووون) هلا هلا يالله حيه يالله حيه حميد: ماتيوزين من سوالفج ياوجدانوووه؟؟ جميله: حليلك ياعمي بعدك تتريا وجدان تصطلب. حميد: هي والله بعدني عندي أمل. شوق: عمي عمي أبا منك خدمه صغيروووونه. حميد: عيوني لج غناتي انت.. شوق: تسلم عيونك.. أنا شايفتلك عروس غااااااااويه دخيلك ياعمي تاخذها، والله انها ماتعوض. حميد: هههه والله عرض مغري بس أنتو تدرون إني حالف ما أتزوج إلا يوم بتتزوج حنين. وجدان: عيل انطر يا.. لين إييك الربيع والحشيمه لك ياعمي. حنين من سمعت هاي الرمسه شلت عمرها ومشت، فلحقها عمها حميد.. شوق: انتي شو فيج على أختي؟؟ وجدان: طول عمرنا نطنز عليها، اشمعنى اليوم زعلت، لايكون استوت عندها مشاعر. حميد لحق حنين ولقاها وصلت للدري تبا تدخل البيت، مسكها من إيدها وسحبها.. حميد: حنين أكلمج أنا.. حنين: عمي شو فيك ترا عادي، أنا كل يوم أسمع هالطنازه، ليش انت ماتدري إني معقدة العيله. حميد: حبيبي شو هالكلام والله هالعيله الي تتكلمين عنها ماتسوى بدونج. حنين تمت ساكته، شوي وياهم عبدالله أخو وجدان وقعد وياهم شوي فخبره حميد بالي صار.. عبدالله: بذمتج تزعلين من ياهل، وجدان لايغرج طولها والله عقلها عقل ياهل، أمس تصيح نصايف الليل والسبب شو نست تدهن ويها بكريم المساء. حميد: ههههههههههه حنين: هههههههه الحمدلله اني مب تافه جيه.. حميد: فديت الضحكه أنا. عبدالله: يالله عمي حميد قوم بنسير نسبح الشباب عفدوا في الحوض.. يالله السباق بدا. حميد مسك حنين من ايدها وسحبها وياه.. ويوم وصلوا شافوا الأولاد يستعرضون مهاراتهم في السباحه والبنات يضحكون عليهم، الا جاسم الي واقف يطالعهم ومتردد.. راح حميد صوبه.. حميد: يالله مابتسبح.. جاسم: هااا لالا بتفرج بس.. والله فشله جدام البنات.. حميد: شواقي واقفه سير استعرض لايخطف فوادها واحد من هالسباحين.. جاسم من سمع هالكلام راح وطب في الماي وراهم، وارتبشوا البنات من الخاطر.. وعلى العصر كل واحد راح لبيته، ودخلت حنين حجرتها تبا تغير ثيابها، بس راحت صوب علبة الماكياج الي شرتها لها شوق وفتحتها وبدت تحطي على ويها.. وفجأة دخلت عليها شوق.. شوق: هااااااااااا اللللللللللللللللللللله حلوه حنين: جب جب لو خبرتي حد بزوالج تسمعيني. شوق: شو رايج باجر أحط لج شوي قبل الدوم. حنين: والله!! لالالالالا أحسها فشيله جدام الكل. شوق: لا حبيبتي بحط لج جحال وآي شدو خفيف.. ولمعه بسيطه على الشفايف.. يعني ميك أب عملي. حنين: ما أدري أحس... شوق: لاتحسين ولا شي تعالي بنسوي بروفا. وقعدت شوق تسوي بروفاتها على حنين، الي صج حاسه بتغير كبير بداخلها.. الفصل الرابع: دخلت حنين الشركه وراحت مكتبها وهي حاسه بعيون الكل تلاحقها، وصلت المكتب وقعدت ورا مكتبها وفجأة يدخل عليها عبدالله، الي تفاجأ يوم شافها متعدله، ابتسم لها وعطاها الأوراق.. عبدالله: الوالد يقولج ممكن تخلصين له الأوراق. حنين: أوكي.. يالله اخلص عطني تعليقك. عبدالله: أي تعليق؟!! حنين: أونك يعني، على شكلي بعد شووو.. انت تعرف إنك دونا الكل يهمني رايك.. عبدالله: بصراحه غااااااااويه. حنين ابتسمت ونزلت راسها تكمل شغلها، وعبدالله يتأملها وهو يسأل نفسه عن سبب التغير الي صابها، شوي ويدخل عليهم مايد.. وطاح قلب حنين.. مايد: السلام عليكم.. عبدالله: وعليكم السلام هلا والله.. مايد: سألت عنك قالولي هني فييتك أذكرك بالوعد. مايد كان يكلم عبدالله وعيونه بتاكل حنين.. رفعت حنين راسها فقابلتها ابتسامة مايد، ولا إراديا ابتسمت له، عاد مايد تشقق من الوناسه.. مايد: أقول عبدالله وين مطبخكم ما أدله خاطري في شي بااااارد أحس الجو حااااار. عبدالله: أوكي تعال بدلك.. مايد: لالا أنا تعبت من المشي انت روح وييب لي عصير.. عبدالله: انشاءالله عمي، خلك هني ولاتتحرك. طلع عبدالله ورجع مايد يطالع حنين، وحنين بتموت من نظراته.. حنين: لو ماتبي تقعد هني روح الإستراحه بس نظراتك هاي ماتعيبني. مايد: آسف بس والله مب قادر أشيل عيوني عنج. حنين: اقعد وخل عينك بالقاع. مايد: ههههههه شكلي بداوم هني عندكم. حنين: ليش انت ماتشتغل هني؟؟ مايد: لا والله بعدني مااشتغلت الوالد يبيني هني بس أنا خاطري أشتغل بروحي. حنين: حلو الواحد يبتدي حياته بلإستقلال، ماقلتلي شو كنت تدرس برع..؟!! قعد مايد يحكيلها عن دراسته، شوي ووصل عبدالله.. قعدوا ربع ساعه زياده عند حنين وطلعوا كل واحد لشغله.. رجعت حنين الظهر من الدوام وشافت سارا بنت خالها عيسى يالسه ويا شوق، سارا توفت أمها وهي صغيره وتزوج أبوها وحده ثانيه وياب منها ولدين وبنت، وحرمة أبوها وايد قاسيه عليها بس سارا ماينخاف عليها عن عشر رياييل.. حنين: هلا والله بسارونه شحالج غناتي. سارا: هلا حنون والله مشتااااااااقه لكم وااااايد. شوق: آخ منج الجذب مبين بعيونج، لو مشتاقه كنتي سألتي عنا بس الي ماخذ عقلج يتهنابه.. سارا: فديت الي ماخذ عقلي هههههه حنين: ههههه قويه وماينخاف عليج، الا قوليلي شحال الظبعه مرة أبوج..؟؟ سارا: فقتها وفقت طاريها، أمس يايبة لي واحد تبا تزوجني وتقول لأبوي خلنا نزوجها ونستر عليها، ليش انشاءالله شايفتني في حظن ريال وتبين تسترين علي!! شوق: يالسبااااله شو هاي الرمسه والله لو تسمعج أمي كانت بتقصبج. سارا: وينها عمتي فديتها بسير المطبخ أشوفها.. وركضت سارا للمطبخ تشوف عمتها وصعدت حنين غرفتها تغير ثيابها، هي مب متعوده تتغدا بس نزلت تتغدا وياهم لأن سارا هني، وهي وايد تحبها لأنهم في نفس العمر وفاهمات بعض. بعد الغدا دخلوا البنات المطبخ يسوون كيكه، وسارا ماشاءالله عليها تحب الطبخ ويلست تعلم حنين كيف تسوي كيكه الي اندمجت وحفظت الطريقه.. سارا: لايكون حنون عشقانه وبدت تتغير..!! شوق: جب لاتسمعج، بس والله معاج حق وااااايد متغيره.. سارا: عمرها ماحطت ميك أب، وماشاءالله عليها وايد محلوه وصايره فرفووووشه. شوق: يارب دوم اتم على عالحاله.. وقعدوا البنات يظحكون ويسولفون.. وقرروا يروحون المغرب السينما وبعدها يتعشون بمطعم، بس حنين ترددت مب متعوده عى هالأجواء، بس سارا مارحمتها قعدت تزن على راسها إلين أقنعتها وقامن البنات يتعدلن وسارا طبعا حطت ميك أب هادي وحلو حق حنين الي ماشاءالله عليها اشحلاتها طلعت..ووصلن السينما واختارت لهم سارا فيلم رعب، ودخلن ويلسن في وسط القاعه، وبدا الفيلم الي كان كله رعب وأكشن.. والبنات مندمجات فالفيلم ولاحسن بالشباب الي بياكلوهن بعيونهم.. وعقب ساعتين خلص الفيلم.. طلعوا بناتنا ويلسوا يسولفون ويضحكون على حنين الي ميته من الخوف.. جنين: حرااااام عليكم عمري ماحظرت فيلم رعب.. سارا: شفتي شكلها يوم القاتل يركض ورا البطله ماسكتني جنه بيطلع من الشاشه وبيهجم عليها هههه شوق: ههههههههه حنين: مايضحك زين. شوق: حنين قومي ناخذ لج شي بارد يبرد على قلبج. حنين: هيه والله أحس قلب بيوقف.. ههههه ومشوا البنات ووراهم الشباب بتعليقاتهم.. وكان من بينهم أحمد ربيع فرح ربيعة شوق.. الي من شاف شوق وهو متخبل عليها.. أحمد: يالله يا فيصل لو ميلسني يم هالقمر ووقت الخرعه تطيح علي آآآآآآآآخ ياقلبي.. فيصل: انشاءالله باخذ رقمها وبحجز لك موعد وياها.. أحمد: لالا أبيها الحين.. غناتي ممكن نتعرف.. الله يخليج حني علي لو بكلمه.. قامت شوق واتصلت على فرح وخلت التلفون مفتوح علشان تسمعهم فرح وصدت على أحمد.. شوق: بقولك انت ماتستحي على ويهك تلاحق بنات الناس.. أحمد: فديت بنات الناس أنا، أحسن من الزلمات الي يموتن على الدرهم.. شوق: استح على ويهك وثمن كلامك زلمات واالا مواطنات كلهن بنات وأعراض وشرف احشم روحك. سارا: شوتبين فيه خليه ينقع، بيرمس لين يشبع وبيروح.. حنين: خلونا نطلع من هني.. بس الشباب تموا وراهم، والبنات ترددن يروحون السياره، يخافون انهم يتبعونهم، وفجأه طلع مايد في ويه حنين الي استانست يوم شافته.. مايد: مكثر الصدف الحلوه الي جمعتنا.. شوق: لا والله قول الله طرشك لنا في الوقت المناسب.. مايد: خير انشاءلله شو صاير... حنين: شباب لاحقينا من طلعنا من السينما، ومب قادرين نتفجج منهم.. مايد: هاذولا الثلاثه الي هناك.. سارا: هيه هم فقتهم وفقت شيفهم والله شكلهم عيال هنود خخخخخخ مايد: هههههه والله صح كلامج.. سارا تهمس لشوق: أقولج شواقي منو هالمزيون الي بينقذنا شوق: سكتي لايسمعج هذا ولد شريك بابا بالشغل. سارا: شكلي بسير أشتغل وياكم هههه شوق: ههههههه الله ياخذ ابليسج. مايد كان يسمعهم بس سوا روحه يكلم حنين.. الي كانت تسولف وياه عادي.. حنين: شكلهم خلاص راحوا تسلم مايد. مايد: وأنا شو سويت الا وقفت وياكم وهم شكلهم خافوا مني، لهالدرجه شكلي يخوف.. سارا: قول غاروا منك وقالوا في حظرة هالزين كله منو الي بيعبرهم. مايد: ههههههههه تسلمين عالمدح.. حنين حست بشعور اسمه الغيره، لأنها لاحظت انه مايد عيبته سوالف سارا وقعد يسولف وياها وطنشها.. وصلهم مايد للسياره وقبل لايروح قال حق حنين انه باجر بيي الشركه ويباها تخلص له شغله، وتركهم وراح.. وخلا حنين ظايعه بمشاعرها اليديده.. ياترى شو الي قاعد يصيبها معقوله بدت تتعلق بمايد.. معقوله بتعيش الي يسمونه الحب.. الفصل الخامس.. مايد يلس في حجرته وفي باله طيف حنين وده يشوفها بس كيف؟!! واتصل بعبدالله.. مايد: السلام عليكم.. شحالهم الشيووووخ عبدالله: وعليكم السلام هلا والله بطويل العمر.. وينك ووين أرضك من سماك.. مايد: موجود بس أدور الي يسأل عني.. عبدالله: ههههههه حلوه هاي.. مايد: أقول مابتظهر مكان خاطري أطلع وياك. عبدالله: والله اليوم بنتيمع في بيت عمتي أم حنين كلنا الشباب والبنات والشياب بعد.. مايد: خير شو عندهم.. عبدالله: ولا شي بس عموه خاطرها بلمة الحبايب وعزمت العيله عندها على العشا.. مايد: أيواااااااا عيل أنا بعد وياكم .. عبدالله: ماشاءالله عليك ويهك لوح.. تعرف البيت؟؟ مايد: لا والله ما أعرفه بس بييك بيتك وبنروح يميع. عبدالله: خلاص تم.. وفي بيت بوحنين تيمعوا الشباب في الميلس والبنات في الصاله وحنين تأخرت مانزلت بسرعه، والكل يسأل عنها، بس أول مانزلت الكل فجواا حلوجهم.. كانت لابسه تنوره عنابيه رووووعه وقميص أبيض جذاااااب وشيلتها عنابيه ومحطيه مكياج حلو وهالمره كان ثجيل شوي.. بصراحه كان شكلها روووووعه.. شوق: قولوا ماشاءالله بتاكلنها بعيونكن.. وجدان: أنا بعلم والا بحلم .. واااااااااااااااو ليلى: الله يحفظج ياحنين، شكلج خباااااااال.. سارا: لا اله الا الله.. خمسه وخميسه في عيون العدو.. عين الحسود فيها عود.. حنين: ههههههه بس سكتن والله استحيت. أم حنين: الله يحفظج يابنيتي.. تعشوا الجماعه ويلسوا يكملون سوالفهم شوي.. سارا: يالله خلونا نسير برع شوي نجحل عيونا بشوفة شباب عيلتنا.. العنود+الهنوف: الشباب والا حبيب القلب.. سارا: آآآآآخ ياقلبي.. الكل قعد يضحك على حركات سارا يعرفونها تتغشمر بس حرمة أبوها عايشه لازم تنكد عليها.. عايشه: وابوي عليج مسودة الويه شو هالصياعه!! سارا: صايع من قالها.. لمي لسانج لا أطلع سواد ويهج يالدبه.. أم حنين: سويييره عيب يالله شو هالرمسه بعد؟؟ سارا: أنا عيب؟؟ وهي شوفيها شو مسويه فيني.. أم حنين: مهما كان هاي في مقام أمج الله يرحمها. سارا: ليتني أنا الي مت بدال أمي.. وشلت سارا عمرها وطلعت برع وهي حاسه بقهر كبييييييييير بداخلها.. ولحقتها حنين الي هي أقرب وحده لها.. حنين: هدي بالج حبيبتي انتي متعوده على سواياها حرمة أبوج وهي مب أول مره تغلط عليج.. سارا: حنون والله بس تعبت الكل يقولي انت مأدبتنها انت قويه وهي مب قادره عليج.. شوفي هذا.. وكشفت عن ايدها وكانت مبينه انها محروقه.. حنين: شووو هاااااا سارا: حرقتني البارح بالصيخ يوم تأخرت وياكم في السينما، تبين أكشف لج عن ظهري تشوفين الظرب، والا ريولي الي متقطعات من الربط.. حنين: سارا كيف قدرت عليج.. سارا: كسرت قفل حجرتي ومن أدخل أرقد تستغل الفرصه وتسوي سواياها.. حنين: وأبوج شو يسوي؟؟ سارا: أبوي كبر ومافيه شده على المشاكل، صدقيني بذبحها في يوم وبرتاح.. حنين: صح ذبحيها وادخلي السجن، خسري ربج وآخرتج.. سارا: هههه آآآآآآآآخ يالقهر.. حنين: توكلي على الله.. يالله يالله ياسارا بريل يفكج من هالعذاب كله قولي آمين.. سارا: آآآآآآآآمين.. وفي هاللحظه طلع لهم مايد الي سمع كل كلمه قالوها، كان طالع من المطبخ وشافهم بس هم ما انتبهوله.. فظحكت سارا.. سارا: يالله يمكن ربج استجاب لدعائج.. حنين حست بغصه بحلجها يالله معقوله الله يكتب لهم النصيب، ليش جيه يصير فيني.. مايد: السموووووحه أزعجتكم..( ومابين لهم انه سمع شي من رمستهم) سارا: لاخلصنا.. مايد: ليش قاعدين بروحكن.. سارا: طلعنا نغير جو الحينه البنات بيظهرن.. مايد: حنين شحالج؟ حنين: ربي يعافيك شحالك انت!! مايد: تسلمين غنا.. احم تسلمين الشيخه.. سارا ابتسمت ابتسامه خبيثه وحنين استحت ونزلت راسها، مايد حس بالإحراج فاستأذن وراح.. سارا: حاااااااسه بالموقف.. حنين: أي موقف؟؟ سارا: هههههه تخشين على منو؟؟ حبي انت خلاص انفظحتي.. وبين الحب بعيونكم.. حنين: سارا بلا خرابيط أنا أكبر من هالأشياء.. سارا: كابري مثل ماتبين اذا انتي قدرتي تخبي بس هو عيونه فظحته.. حست حنين بفرحه داخلها ماتدري مصدرها بس احساسها انها بتكون سعيده في الأيام اليايه طغى على أي شعور ثاني.. شوي وطلعن البنات وقعدوا يسولفون، وطلعوا الشباب بعد ويلسوا قريب من البنات.. العنود: شو رايكم نتحداكم يالشباب.. حميد: الله يعينا عنودووو تتحدانا.. العنود: عمي حميد انت اسمعني.. شو رايك نسوي فريقين كل فريق يغني أغنيه والحرف الي بينتهي به المقطع يبدون به الفريق الثاني.. عبدالله: والله فكره حلوه خلونا نسمع المواهب الصوتيه.. حميد: بس بشرط الي بيقول المقطع لازم يغنيه.. مب بس يقول الكلمات.. وأحسن صوت له بطاقة تلفون هديه من عندي..ههههه العهنوف: خلاص ببدأ أنا..وينك حبيبي ماوحشناك طولت ماشافتك عيني.. طولت يالغالي بفرقاك وأتعبتني وانت ظنيني.. حرف الياء.. جاسم: يامرحبا يا ناعم الصوت والعود.. أحيا بصوتك يوم هاتف ياني.. والسموووحه مب حافظ يالله حرف الياء مره ثانيه.. العنود: قول السموحه على الصوت وعععع يخرع.. سارا: هههه أنا بقول ياغايب ليه ماتسأل أحبابك الي يحبونك مايناموا الليل لعيونك أنا بفكر فيك.. عبدالله: والله صعب ماشي أغاني بلييييز غيرو الحرف.. سارا: أوكي حرف السين.. مايد: سود العيون تخلني وتشلني الألباب من الألباب هاذي وصايف خلي متجلي قلبي بهواهم ذااااب.. حرف الباااااء( وطبعا العين على حنين).. سارا: وااااااااااو صوتك حلووووو مايد: تسلمين الشيخه.. ليلى: بودعك يالضنا أنا وبخليك عسا عيونك ماتشوف النكاده أنا لي الله وانت الله يخليك تسرح وتمرح وتشوف السعاااااده حرف الهاء.. شوق: هلا بالي لفانا ياهلابه.. عدد دقات قلبي في غيابه.. بعد حرف الهاء.. حميد: هذا وأنا الغالي بقلبك وشوف وش صار.. أجل لاقلبك كرهني و يسوي.. سارا: الحينه دورنا نغير الحرف غيروووووه.. عبدالله: يالله حرف الألف.. حنين:انت عارف اني أحبك وشايف فرحتي لما أشوفك.. بس متردد وخايف وانت عارف.. من عيوني وضحكتي وهمس الشفايف انت عارف.. حرف الفاء.. حميد: واااااااااو شو هالصوت خلاص انتهت المسابقه وأعلن حنين ومايد هم الفايزين وباجر انشاءالله الكردت عندكم.. مايد: أنا تلفوني خط.. يعني عندك حلين يا تدفع فاتورة تلفوني أو تعطي الكردت حق حنين.. حنين: ههههه أنا بعد تلفوني خط.. يالله عمي ادفع فواتير تلفوناتنا.. حميد: أفاااا يعني الحينه أنا الي تدبست بالموضوع.. وضحكوااا كلهم واستانسوا واااايد بالسوالف.. وعلى الساعه عشر ونص كل واحد راح لبيته.. وفي اثنينه بدوا يتأكدون من مشاعرهم الداخليه.. مايد بات اللليل يفكر بصوت حنين ورقتها وجمالها اليوم.. وحنين تفكر اذا هي ممكن تحب وتنحب مثل باجي البنات.. الفصل السادس.. بوحنين قرر أنه يزور شريكه بومايد في البيت لأنه مريض وصار له يومين مايا الشركه.. حنين: أبوي أنا بروح وياك.. بوحنين: والله؟!! حنين: هيه خاطري أتطمن على عمي.. بوحنين: خلاص حبيبتي المغرب بسير له وباخذج وياي.. حنين: أوكي بسير حجرتي أخلص شغلي.. وسارت حنين لغرفتها بس مب علشان تخلص شغلها علشان تشوف شو بتلبس وشو تحط.. ودخلت عليها شوق.. شوق: احم احم بلاه القمر مستانس اليوم.. حنين: انا؟؟ ولا شي بس بختار الي بلبسه يوم بطلع ويا أبوي.. شوق: الله يامايد والله وقدرت تغير أختي.. حنين: أي مايد وأي خرابيط.. انت الظاهر خرفتي.. شوق: حبيبتي بقولج شي، انت عايشه الحب لأول مره عسب جيه مب قادره تخفينه.. الي بداخلج فاظحتنه عيونج.. صدقيني غناتي أنا وايد مستانسه لج.. حنين: شوق يعني تبين تفهميني انه الي بداخلي حب.. شوق: وليش انت شاكه بهالشي..؟؟!! حنين: ما أدري بس وايد أرتاح لسوالفه، وكل ما أشوفه قلبي يدق معلايه.. شوق: ههههههههه الله على الحب.. أنا قلبي بدا يرقص معلايه يوم اعترفلي جاسم بحبه.. وانت بدون هالإعتراف ترقصين الله يعينج.. حنين: يالله عاد خل عنج وسيري غرفتج خليني أخلص شغلي.. المغرب لبست حنين وتكشخت.. ولبست عبايتها اليديده ونزلت لأبوها.. أم حنين: اصبري بقرا عليج عن الحسد.. حنين: أي حسد أمايه، أنا بسير بيت بو مايد مب عند الحريم.. أم حنين: انتي ماشفتيهم هذاك اليوم يوم كلوج بنات عمج وخوالج بعيونهم.. بوحنين: يالله حبيبتي خلينا نروح بسرعه.. وطلعوا بسيارة بوحنين، وهم في الأساس ماكانوا مخبرينهم إنهم بيون يزورونهم.. دقوا الجرس وطلعت لهم الخدامه.. دخل بوحنين الميلس وحنين سارت داخل عند أم مايد.. وأول مادخلت الصاله شافت أم مايد يالسه على الأرض ومايد راقد على ريلها.. تمت واقفه تتطالعه وصج تخبلت عليه.. حنين: احم احم السلام عليكم.. نقز مايد من مكانه أول ماسمع صوتها، ووقف يعدل نفسه.. كان لابس بنطلون وقميص وهي أول مره تشوفه جيه.. مايد: هلا وغلا مرحبااااااا السااااااااع أم مايد: مايد منو هاي.. مايد: أمي هاي حنين بنت بوحنين.. أم مايد: هلا والله بنيتي حياج تفضلي.. تو مانور البيت.. دخلت حنين وهي مستحيه، ومايد مستانس من الخاطر.. حنين: السموحه دخلت عليكم جيه، بس الخدامه طلعت لنا ودخلتني هني.. أم مايد: لافديتج حياج البيت بيتج.. حنين: يايه أنا وأبوي نسلم على عمي.. مايد: عمي برع..؟!! حنين هيه في الميلس.. مايد: خلاص أنا ببدل وبسير له.. طلع مايد وقعدت حنين عند أم مايد، ويلسوا يسولفون وماشاءالله عليها أم مايد حبوبه واجتماعيه، وتحب تتعرف على الغير.. أذن أذان العشا وقاموا بيروحون بس أم مايد حلفت على حنين تتعشا وياهم.. حنين: تسلمين خالوه خليها غير مره.. أم مايد: والله ماتطلعين الا وانتي متعشيه وياي، ميود الحينه بيسير يتعشى ويا ربعه وبومايد مايتعشى والبنات بيت عمتهم بنكون بروحنا لاتحاتين.. دخل عليهم مايد: لا والله، اذا حنين بتتعشى ويانا أنا مب ظاهر اليوم بتعشا هني.. أم مايد: هيه اليوم ذكرتني لكن كل يوم مرتغد مع ربعك.. حنين: ههههههههه مايد: زين جيه ظحكتي البنيه علي، يالله أنا بسير أصلي وبرد بلقى العشا جاهز أوكي أم مايد.. حنين: عيل خبر أبوي إني بتم هني، وبرجع يوم بخلص.. راح مايد وهو مستانس انه حنين بتتعشا وياه.. ويوم رجع لقا صدمه تترياه.. دخل مايد الصاله وهو مبتسم بس أول ماطاحت عينه على البنيه الي يالسه حذال أمه حس الدنيا تدور به من كل صوب.. شاف شما بنت عمه والي يكرها من الخااااااطر.. مايد: السلام عليكم.. شما: وعليكم السلام.. مفاااااجأة صح؟؟ مايد: متى وصلتي..؟!! شما: اليوم الظهر.. وطبعا انتو أول ناس أشرفهم بطلتي.. أم حنين: هلا وغلا ببنت الغاليه.. مايد حس بظيج بصدره، وحنين انتبهت له بس مب قادره تسأله شو فيه.. وتعشت وياهم وانصدمت يوم مايد بدل ثيابه وطلع يتعشا برع وهو الي متخبل يبا ياكل وياهم.. دخلت شما تغسل إيدها وتتكشخ زياده.. وانتهزت حنين الفرصه وسألت أم مايد.. حنين: خالوه ليش مايد تظايج وطلع.. أم ايد: من حقه يطلع.. شما هاي مخطوبه حقه من صغرهم، وهو يكره شوفتها.. بس أبوه مصر على رايه.. الله يعينك ياولدي.. حنين حست بغصه بحلجها بس شو بإيدها الوحيد الي انفتح قلبها له طلع خاطب وبتنحرم منه.. بعد ساعه رجعت حنين للبيت وكلها حزن وخيبة أمل.. باليوم الثاني راحت الشركه وسألت عبدالله عن مايد، بس قالها إنه ماشافه.. ووصته يخبره إنها تبيه أول مايشوفه.. وعلى الساعه 11 ونص دخل مايد مكتب حنين.. مايد: يقولون تسإلين عني.. حنين: لاتصدق كل الي ينقال لك.. مايد: لا والله!! خلاص بطلع.. حنين: ولاتصدق كلام البنات.. مايد: ههههههه أول أعرف مره انه دمج خفيف.. حنين: هههه لا عادي بس أباك بموضوع خاص.. مايد: آمري الشيخه.. حنين: مايآمر عليك عدو.. شو سالفة شما؟؟ مايد:......... حنين: آسفه أدري الموضوع شخصي وأنا... مايد: أفففففف شما هي مأساة حياتي ليتني أقدر أتخلص منها للأبد.. حنين: وليش كل هذا؟؟ مايد: من صغري وأنا أكره غرورها، كانت دايما تتخقق على الكل انها بنت فلان وأمها فلانه.. كل ولد أو بنت يتعرض لها ياويله من عذابها.. حنين: بس هي كانت طفله، والحينه كبرت و... مايد: ماتغيرت.. بالعكس زادت من تكبرها وغرورها..والمشكله انها تسميني خطيبها وتتلزق فيني طول الوقت.. ويوم كنا بالثانويه عمي وصى أبوي قبل لايتوفى يدير باله عليها وينفذ لها الي تباه وهي الوحيده لاعندها اخوان ولا اخوات.. حنين: كمل وبعدين.. مايد: أبوي اهتم فيها ويوم نجحت بالثانويه العامه سألها أبوي عن أمنيتها فقالت له أكون زوجه لمايد.. حنين: شوووو!! مايد: هههه استغربتي صح؟؟ بالنسبه لها عادي لأنها فري زياده عن اللزوم.. ومن هذاك اليوم والكل يقول نحن لبعض.. وأنا كنت ساكت وصابر بس.. حنين: بس شوو؟؟ مايد: من شفتج وأنا متغيره حياتي، انت ياحنين انت هي الي أدورها انت الي أبيها.. سافرت وكملت دراستي برع علشان أشرد من اني أتزوج شما، بس يوم رجعت كنت ناوي أتمم الزواج وأريح نفسي على الأقل أرضي أبوي.. بس يوم شفتج غيرت رايي وقررت اني أرضي نفسي قبل الغير.. حنين: بس شما وأبوك..و..... مايد: عطيني اشاره وحده بس انج تبيني ووالله لاشما ولاميت وحده غيرها بتاخذني منج.. حنين ابتسمت ونزلت راسها، فابتسم مايد وطلع من الباب بس قبل لايطلع صد صوبها وابتسم لها وفي عيونه قرت وعد إنه مافي أحد يفرق بين قلوبهم.. -------------------------------------------------------------------------------- الفصل السابع.. قررت حنين إنها تسير تزور سارافي بيتها، وتقعد وياها شوي.. بس أمها ماخلتها لأنه يدتها بتيي اليوم ولازم الكل يكون موجود.. أم حنين: وتعرفين يدتج لو حتى البشكارة مب موجوده والله لاتشيل الدنيا.. حنين: هههههه عاد كله ولازعل يدوه، خلاص بأجل الروحه لباجر.. أم حنين: فديتج يدوه بتقعد يومين وبعدين إنتي نسيتي إنه باجر يوم ميلاد شوق وتدريبها أختج، تلاقينها عزمت الكليه كلها.. حنين: خلاص عيل بتصل لسارونه وبخليها تيي تساعدنا بالتحضيرات.. وسارت حنين لغرفتها وخبرت سارا إنه مابتروح عندهم، وطبعا سارا مستحيل تطوف على نفسها الربشه الي بتصير في بيت حنين، فلبست عباتها وسارت لهم، وقبل لاتدخل البيت شافت سياره مرسيدس موقفه عند الباب فمشت لين الباب بس سمعت حد يرمسها.. (يالله ياسارا عطينا ويه).. فيوم صدت عليه شافت عبدالله الي نزل من السياره وراح عندها وهي كانت متغشيه.. سارا: يالله عليك كيف عرفتني؟؟ عبدالله: قلبي دليلي.. سارا: ههههههه ماشاءالله سياره يديده.. مبروك، بس أذكرك حافي منتف من وين لك البيزات.. عبدالله: أفااااااا الحينه آنا حبيبج تقولين حقي جيه..!! سارا: جب جب لاحد يسمعك.. أسولف وياك بلاك زعلت ؟؟ عبدالله: لاغناتي تدرين بي مستحيل أزعل على روحي.. سارا: يالله أنا بدخل.. بتدخل والا طالع من عندهم؟؟ عبدالله: لاوالله طالع كنت أخبر عمي بسالفه والحينه بروح.. وعطته ظهرها ويات تبا تدخل بس فجأة عبدالله مسكها من كتفها وسحبها لورا.. سارا: آآآآآآآآآي شوي شوي.. عبدالله: شو فيج أنا مسكتج برقه.. سارا: لا خلاص بسير أوكي.. عبدالله: أكيد حرمة أبوج ظربتج صح؟؟ سارا: خلاص يلدي تعود الظرب.. لاتشغل بالك.. ودخلت داخل وعبدالله حاس بالقهر ليش انه واقف عاجز ولاقاعد يسوي شي ينقذ به الإنسانه الي يحبها، حتى إنه نسى يعطيها الهديه الي يايبها حقها وقرر الحينه يكلم هله ويخطبها... وسار لأبوه الميلس وشافه يالس بروحه.. قعد وياه يسولف.. والوالد تقول ماصدق أحد يقعد وياه وايد يسولف.. عبدالله: أبوي اسكت شوي خلني أرمس.. بو عبدالله: ها يابوك ارمس شو عندك..؟!! عبدالله: أبوي بصراحه أبا تزوج.. بوعبدالله: والله؟؟ والله زين تسوي وفي حد في بالك والا تبي الوالده تدور لك.. عبدالله: لاعندي، بخاطري سارا بنت عمي عيسى.. بوعبدالله: ماشاءالله والله يازين ما اخترت، بنت أخوي أحسن البنات.. عبدالله: أبوي اليوم تخطبها.. بوعبدالله: شو عندك مستعيل؟؟ اثقل شوي.. عبدالله: أبوي مب سالفة ثقل، بس سارا خاطري فيها من زمان، واليوم حنين بنت عمتي خبرتني كيف حرمة أبوها تظربها، وبصراحه أبا أطلعها من بيتهم بسرعه.. بوعبدالله: عزة الله أخوي مافلح يوم خذ هالعقربه، خلاص يابوي اليوم بكلم أبوها.. وانت سير خبر أمك خلها تفرح شوي.. طلع عبدالله وهو طاير من الوناسه، أخيرا حلم حياته بيتحقق، وسار وخبر أمه وطار على حجرته يتصل حق سارا.. عبدالله: هلا غناتي.. سارا: إنت ماتمل مني، قبل نص ساعه شايفني.. عبدالله: شفت سواده مب ويهج، المهم حبي عندي لج خبر يمكن بيفرحج.. سارا: حرمة أبوي ماتت..؟!! عبدلله: هههههههههه لا بس قريبا بترتاحين منها.. سارا: لايكون الي في بالي..؟؟ عبدالله: هيه نعم الي في بالج، اليوم كلمت أبوي وقالي الحينه بيرمس أبوج.. هاااا شورايج..؟؟ سارا: طوط طوط طوط عبدالله: أفاااااااا من الحينه بويهي تسكرين، ماعليه يفداج حرقة الفيس.. وبالليل سارا قالت إنها موافقه على الخطوبه، وسووا حفله عائليه بسيطه، وسارا مرتبشه وفرحااانه من الخاطر.. نرجع لمايد.. اليوم مايد رايح الشركه لأبوه.. منها يعطيه أوراقه الي نساهم بالبيت وبالمره يمر على حنين صار له أسبوع ماشافها.. قبل لايدخل مكتب حنين سمعها محتشره على أحد وياها، فانتظر الين ماطلع الموظف ودق الباب ودخل، وشاف حنين ويها أحمر من الخاطر، سار صوبها وهو مستغرب شو الي مضايج فيها.. مايد: شو فيج حنين..؟؟ حنين: الغبي ضيع علي صفقه.. مايد: هدي بالج شو إلي صار..؟؟ حنين: يكون انت الحينه بتفهم الي بقوله لك.. مايد وهو مستغرب: وانت شو فيج معصبه جيه خذي نفس وارتاحي شوي.. حنين: مب متفيجة لك انت الثاني، هالغبي نسى يسجل العقد ويا شركة البترول وخسرنا ملايين وانت تقولي خذي نفس..!! مايد: الخساره خسارة الروح.. حنين: هذا أول مشروع استلمه بروحي، بدون مساندة أبوي وراح علي..وانت يالس تتفلسف علي هني.. وقامت تتطالع من الدريشه وعاطتنه ظهرها، ودموعها على خدها، مايد حس إنه انجرح منها، فقام يبا يطلع بس سمعها تنادي.. حنين: مايد آسفه بس أنا مشغوله شوي.. مايد حس من صوتها إنها تصيح، معقوله حنين القويه تصيح بهالسهوله.. فراح ووقف وراها على طول.. مايد: حنين ممكن تشوفيني..؟؟ حنين هزت راسها لا.. مايد على طول سحبها من كتفها وطاحت عينه في عينها.. مايد: ليش تظغطين على نفسج.. ليش تحملين نفسج طاقه أكبر من الي تتحملينها.. نزلت حنين عينها للأرض ورجعت على ورا خطوه.. مايد: حنين مب غلطتج إنه أبوج تمنى الولد وماياه، ومب ذنبج تتحملين غلطة غيرج، أنا حاس فيج.. وأدري بمعاناتج.. بس عطيني فرصه.. حنين: لا مايد: شو لا؟!! حنين مشت لحد الباب: حياتي وأنا أعرف كيف أتصرف فيها.. وما أريدك تتدخل، أنا انولدت وأنا أعرف مصلحتي عدل، رجاءا لاتتدخل.. وطلعت من الغرفه وخلت مايد بحيرته.. ليش حنين تتصرف بهالطريقه.. شو الي مخبتنه عني.. شو ياحنين شووو!! الفصل الثامن.. مر أسبوع على المواجهة الأخيره بين مايد وحنين، وحنين تحاول إنها تتجنبه وهو يحاول يقرب منها.. من ناحيه ثانيه سارا وعبدالله حددوا الملجه بعد أسبوعين والعرس بالصيف.. مايد ربيع عبدالله من أيام الدراسه بس صداقتهم زادت في الفتره الأخيره يوم بدا مايد يتقرب من حنين، وعبدالله يشجعه لأنه يبي الخير لحنين، وفي يوم مايد خبر عبدالله بالي صار، فوعده عبدالله إنه يساعده في موضوعه، وراح بالليل بيت حنين، ويلس وياها بالحديقه.. عبدالله: حنين صارحيني ليش جيه تسوين بالريال، ليش كل مايقرب منج تبتعدين، ليش رافضتنه مع إنج في البدايه تقبلتيه...؟؟ حنين: عبدالله ليش مب راضي تفهمني.. ليش تعاندني!! عبدالله: انت تدرين اني أكثر واحد يفهمج والوحيد الي يفداج بروحه.. بس ارمسي أنا تراني خبير بعيون سارا بس عيونج كل الغموض فيها.. حنين: أوكي برمس بس اسمعني عدل.. عبدالله: انشاءالله. حنين: من وعيت على هاي الدنيا وأنا أبا أعوض أبوي من حرمان الولد الي تمناه، كنت أسير وياه كل مكان أساعده أحاول أفهم طبيعة شغله، ويوم خلصت الثانويه تخصصت ادارة أعمال بس عسب أعاونه، وتخرجت وصرت نعم الموظفه عنده.. عبدالله: كل الي قلتيه أعرفه من زمان وياما قلتيلي عنه، بس شو اليديد؟؟ حنين: اليديد هو مايد، وكيف قدر يغير احساسي بالدنيا، والله إني بديت أحب الحياه أكثر، كل شي فيه يجذبني.. صوته شكله كلامه أسلوبه.. والله ياعبدالله إني.. إني.. عبدالله: قوليها لاتترددين.. حنين: أحبه والله أحبه بس.. عبدالله: شو بس.. حنين: خايفه من باجر، من نتيجة هالحب.. مايد خاطب شما بنت عمه، ويمكن يتزوجون في أقرب فرصه، ليش أعذب قلبي بحب أنا من الحينه شايفه نهايته، قلت أنسحب من حياته من الحينه وأخليه ياخذ شما، وماله داعي أسويله مشاكل ويا أهله.. عبدالله: بس هو يبيج إنتي.. حرام حنين مايد يحبج.. حنين: أدري والله أدري بس بعد حرام يضارب أبوه بسبتي أنا.. عبدالله: خلاص حنين أنا بخبره بالي قلتيه حقي وبشوف رايه وبرد عليج.. طلع عبدالله عن حنين ويلست حنين تفكر بالحديقه، وياتها شوق وقعدت وياها.. شوق: شوفيج حنون..؟!! حنين: آآآه لا ولاشي خلينا ندخل داخل.. شوق: بقولج شي حنين. حنين: قولي.. شوق: جاسم بيخطبني من أبوي. حنين استانست وحظنت أختها: والله تستاهلين حبيبتي.. أخيرا برتاح منج.. شوق: يعني إنتي مب زعلانه.. حنين: وليش أزعل؟؟ آآآه لأنج بتعرسين قبلي، لافديتج عادي أنا بعدني مطوله.. شوق حظنت أختها ودخلوا يميع داخل.. باليوم الثاني في الشركه.. حنين نزلت المستودع تحت تدور أوراق مهمه.. بس مالقت الي تبيه وقعدت تدور ممدوح.. وشافت مايد واقف يطالعها من بين رفوف الملفات.. اقترب منها وهي قلبها يدق بقوو.. وصل عندها ويفصل بينهم أقل من نص متر.. مايد: صباح الخير.. حنين: صباح النور.. شحالك مايد.. مايد: أتنشد عن أحوالج يالي أخباري ماتهمج.. حنين: حرام عليك أنا.. مايد: حنين عبدالله خبرني بالي صار، وأنا هني عسب أقولج إنتي غلطانه، الحب الي بينا بيستمر، بيظل بقلوبنا، أنا وعدتج وأنا ريال وعند كلمتي.. حنين: وأبوك وشما والزواج و... مايد يقاطعها: أبوي أنا وحيده ومستحيل يرفض لي كلمه حتى لو علشان شما، وشما خليها تشرب من ماي البحر، أنا مب متزوج غير حبيبتي حنين. حنين: مايد اسكت شو هالرمسه.. مايد: وليش اسكت البارح عبدالله قالي إنج قلتيله إنج تحبيني وأنا اليوم أقولج إني أموت عليج.. وبتشوفين شو بسوي اليوم.. حنين: شو بتسوي.. مايد: بكلم أبوي وبخبره عن قلبي الي صار له أكثر من شهر غايب، وبخبره يروح يدوره في بيتكم يمكن يلقاه ضايع هناك.. حنين بصوت واطي: مب ضايع إلا مستانس عندي.. ومشت بسرعه وراحت فوق لمكتبها، وخلت مايد والإبتسامه شاقه ويهه.. وطلع عبدالله من بين الرفوف وهو مبتسم.. مايد: يالهرم إنت للحين هني.. عبدالله: اتطمن على بنت عمتي.. والله إنها تستاهل كل خير.. مايد: والله إني بسعدها بعمري كله.. ومضى اليوم وحنين على أمل إنها تحقق حلمها.. بس ماتدري الدنيا شو مخبيه لها.. ولا تعرف القدر شو راسم لها بمستقبلها.. الفصل التاسع: اليوم يوم ميلاد حنين بس هي كالعاده مطنشه الموضوع، بس أهلها مجهزين لها حفله صغيره، وعازمين بنات العيله وشبابها، حنين رجعت من الدوام لظهر ودخلت ترقد، ومن التعب ماقامت من الرقاد إلا المغرب، وسارت الصاله تدور أهلها بس البيت كله فاضي، ومشت للمطبخ وشافت الخدامه.. حنين: وين ماما؟؟ الخدامه: كله داخل ميلس. حنين: في حد داخل ميلس. الخدامه: لا بس ماما بابا شوق عنود هنوف. راحت حنين الميلس.. ولقت الليتات مبنده.. ويوم يات تطلع سمعت صراخ من داخل.. واشتغلت الليتات فجأة.. الجميع: كل سنه وحنون بخييييييييير.. حنين من الخوف رجعت خطوتين على ورا بس يوم استوعبت الموضوع دخلت الميلس وسلموا عليها أهلها.. وحنين بداخها وايد مستانسه.. حنين: ماله داعي كل هذا.. شوق: لا والله كم حنون عندنا. أم حنين: فديت بنتي كبرت وصارت عروس. أبو حنين: لالا بنيتي بعدها صغيره حتى لو كبرت بتظل بعيوني صغيره.. حنين حست باحساس حلو بداخلها، تحس نفسها المدلعه بالبيت.. شوق: يالله سيري تلبسي عازمين العيله هني. حنين: وليش كل هذا؟؟ شوق: وانتي شو يخصج.. سيري تعدلي ونحن بنجهز البيت للحفله. راحت حنين حجرتها وطلعت بدله يديده بعدها مب لابستها، لونها بنفسجي فاتح.. واختارت شيله أطرافها بنفسجيه، وسبحت وبدلت ثيابها، وياتها شوق تحط لها الميك أب.. وعلى الساعه 9 ونص الكل كان موجود بالبيت، ونزلت عليهم حنين مثل الملاك، والكل متخبل عليها.. وراحوا تعشوا مع بعض وكالعاده طلعوا الشباب والبنات الحديقه يسولفون، عبدالله مشا ويا حنين بعيد عنهم.. وطلع لها من مخباته هديه وعطاها حقها.. حنين: ماله داعي عبدالله والله شوفتك بالدنيا.. عبدالله: أدري بس والله تستاهلين كل خير.. فتحتها حنين ولقت فيها ساعه رقيقه شكلها وايد حلو، شوي وطلع من جيبه الثاني هديه صغيره مغلفه.. عبدالله: احم احم وهاي من القلب.. حنين: مايد!! عبدالله: هي مايد ويقولج السموحه كان خاطره يحظر بس أخته الصغيره اليوم بتيي من السفر.. حنين فتحت الهديه وشافت فيها سلسله ذهب ونص قلب صغير عليه حرف m فتوقعت إنه نص القلب الثاني عند مايد وعليه حرفها h.. استانست على الهديه ولبستها على طول.. قعدوا البنات مع بعض والشباب عند الحوض يسولفون.. سارا وعبدالله تسحبوا بعيد عن الكل ويلسوا يتمشون.. عبدالله: حبيبي ليش اليوم زعلانه. سارا: لامب زعلانه عادي.. عبدالله: سارونه الي كل ما اجتمعنا حشرتنا بنكتها وسوالفها اليوم هاديه ومو على بعضها.. سارا: ولاشي بس حاسه بشوية تعب.. عبدالله: خير حياتي شو يعورج!! سارا: هااا لا بس شوية مغص بالمعده.. عبدالله أبا أروح البيت.. عبدالله: أوكي بخبر اخوانج وبوديكم أنا.. سارا وعبدالله استأذنوا وراحوا على الساعه عشر ونص، والباقين روحوا على الساعه 11 وربع، وسارت حنين حجرتها ومسكت العلبه الي كانت فيها هدية مايد وانتبهت انه فيها ورقه.. فتحتها وقرت فيها..>>هذا قلبي هديته لج بيوم ميلادج.. وأخذت قلبج يونس صدري الولهان.. وانشاءالله في عيدج الياي نكون في بيت واحد.. كل عام وحبي بخير..<< حنين تمت حاظنه الورقه ونزلت دموعها على خدها، فسخت السلسله وقعدت تتأملها شوي.. معقوله يامايد بعد سنه من الحينه بنجتمع في بيت واحد.. يالله يارب تجمعنا على خير.. **__**__**__**__** عبدالله من فتره ملاحظ تغير سارا عليه.. مب بس عليه هو إلا على الكل، يحسها دوم مهمومه وتحاتي شي هو مايدري عنه، ففكر إنه أحسن طريقه هو إنه يكلمها عن موضوع الملجه.. فاتصل بها.. عبدالله: مساء الخير ياوردة حياتي.. سارا: هلا عبيد شحالك.. عبدالله: تدريبي ما أحب اسم عبيد ليش تناديني به.. سارا: وشو فيه هالإسم؟؟ والله انك مكبر الموضوع.. عبدالله: أوكي كيفج، حبيبي تجهزتي حق الملجه.. سارا: ومنو قالك إني أبا أملج.. عبدالله: شوووو!! أعتقد إنا حددنا الملجه من زمان والحينه خلاص مب باجي شي، أنا سويت فحص الزواج و... سارا: عبدالله، أنا أبا أفسخ الخطوبه.. *_*_*_*_*_* وصلت حنين الشركه وبدت في الشغل على طول.. دخل عليها عبدالله وهو معتفس، بس حنين ما انتبهت له لأنها مشغوله بالأوراق.. عبدالله: حنين ممكن تسمعيني شوي.. حنين: عبدالله مب وقته الوفد الصيني الحينه بيوصل وبعدني مب مجهزة كل الأوراق.. عبدالله: حنين والله محتاج لج.. حنين رفعت راسها وشافت حزن الدنيا كله بعينه.. حنين: شو فيك شو مستوي!! عبدالله: سارا تبي تفسخ الخطوبه.. حنين: شووو!! ليش شو الي صار؟؟ عبدالله: تسإليني أنا؟؟ أنا بروحي مب عارف شو السبب.. صارلها فتره متغيره، من بعد الحب والشوق الكبير، الحينه حتى الكلمه الحلوه ماعدت أسمعها منها.. والله إني تولهت على ظحكتها.. حنين: صح.. هي صار لها فتره متغيره، وصارلها أسبوع مطنشتني.. عبدالله: حنين الله يخليج تعرفين شو السالفه، والله حاس إني بموت من الضيج.. حنين: انت هدي أعصابك وأنا بشوفها لك.. ودخلت عليهم السكرتيره تخبر حنين عن وصول الوفد، فراحت حنين وخلت عبدالله بهمه، بس بالها معاه ومع سارا الي حالها منقلب فوق تحت.. نروح لمايد.. الحبيب لقاله شغل بشركه لها علاقات مع شركة بوحنين ولقاها حجه عسب ينط لهم بالشركه كل شوي.... ومسك كل الصفقات الي تخص شركة بوحنين..(شوف مكر الشباب).. واتصل بأبوه عسب ياخذله موعد مع حنين يقابلها وينهي المعاملات معاها.. وصل الشركه على الساعه عشر ونص، وسار مكتب حنين بس مالقاها، فنزل المستودع وشافها طالعه منه وبإيدها أوراق وملفات.. مايد: توقعتج هني، تكفخين ممدوح المسكين. حنين: ليش شو قالولك عني المرعبه؟!! مايد: في نظر ممدوح على الأقل.. حنين: قول والله انت بس.. مايد: ههه أسولف وياج الغاليه.. حنين: مايد ماله داعي كلمة الغاليه.. مايد: احلفي انها ماهزت قلبج هز.. حنين عطته نظره من نظراتها القويه، ومشت عنه وطبعا هو تبعها( شو يبا عقب هاي النظره مسكين خايف).. وصلوا المكتب فشافت عبدالله يترياها وسلم على مايد وكان مبين عليه الحزن.. مايد: عسى ماشر ياخوي شو فيك؟؟ حنين: القلب تعبان.. عبدالله: حنين شو صار وياج.. حنين وهي مرتبكه: ولاشي، أحسها خايفه من الإرتباط الحينه، هذا الشي عادي كل وحده تمر فيه في فترة الخطوبه، وانشاءالله أزمه وبتعدي.. عبدالله: بس أنا.. حنين: عبدالله.. أنا الحينه مشغوله بخلص شغلي وبتفاهم وياك.. طلع عبدالله من المكتب وطبعا مايد اشتغل فضوله.. مايد: حنين.. شو صاير..!! حنين: ملقووووف.. مايد: ههههه الله يخليج خبريني، والله انه عبدالله أعز من الأخ، شو عنده شايل هم الدنيا؟!! حنين حكت لمايد السالفه، وبعدها يلسوا يخلصون شغلهم.. بعدها بيومين عبدالله خلاص وصل حده، فما لقى طريقه غير انه يروح لسارا البيت ويتفاهم وياها هي وأهلها، بس يوم وصل هناك لقته الخدامه وخبرته بالخبر الي صعقه من الخاطر.. الخدامه: سارا وكله بيت سافر.. عبدالله: سافروا؟؟ وين راحوا؟؟ الخدامه: مايعرف أنا.. عبدالله: متى سافروا؟؟ الخدامه: قبل إثنين يوم.. راح عبدالله عنها وهو دايخ صار له يومين يدق عليها وتلفونها مغلق والحينه طلعت مسافره!! شو السالفه شو مستوي من وراي.. وسار حق ملاذه الأخير حنين، دخل البيت وطلب يشوفها.. حنين: شو فيك عبدالله!! عبدالله: سارا سافرت من يومين وأنا ماعندي خبر.. حنين: هي أدري.. عبدالله: وليش ماخبرتيني.. حنين: هي الي حلفتني ما أخبرك، وتقولك.. تقولك.. عبدالله: شو تقول؟؟ تكلمي قولي.. حنين: تقولك خلاص إنساها.. هي ماتحبك.. عبدالله يلس على الكرسي من الصدمه، ومسك راسه بإيد والإيد الثانيه غطابها ويهه.. عبدالله: جذاااابه سارا تموت فيني.. فجأة قام من مكانه ومسك حنين من ايدها، خبريني شو صار شو الي مخبينه عني؟؟ حنين: عبدالله شو فيك البنيه ماتبيك.. عبدالله: بذبحج ياحنون والله بذبحج لو ماقلتيلي شو الي صاير، سارا تموت فيني تحبني كثر حبي لها وزياده، ومو بكل سهوله ينتهي هالحب كله.. حنين: عبدالله بخبرك بالسالفه بس هدي بالك.. يلس عبدالله وراحت حنين تييبله ماي.. يوم رجعت شافته يمسح دموعه، بس سوت نفسها ماشافت دموعه.. عطته الماي ويلست مجابلتنه.. حنين: من أسبوعين راحت تسوي فحوصات الزواج.. وطلع عندها.. عبدالله: شو؟؟ حنين: عبدالله هدي بالك.. عبدالله بعصبيه: قلت لج ارمسي بسرعه.. حنين بخوف من ردة فعله: قلبها مريض.. عبدالله: عمرها ماشكت من قلبها.. وحتى ولو أكيد في علاج أكيد في دوا.. حنين: بلى كانت تتعب منه ب دوم مطنشه.. عبدالله: بس هي بتتعالج وترجع..صح؟؟ حنين: عبدالله هي راحت تتعالج برع وهي متأكده إنها ماراح تشفى.. وتبيك تعيش حياتك وتنساها.. عبدالله: انتي مينونه؟؟ مخرفه؟؟ سارا بترجع لي أدري إنها بترجع لي.. هاي حبيبتي وقطعه من قلبي.. كيف تودرني وتروح.. حنين: عبدالله اذكر الله.. عبدالله: أنا اليوم بسافر لها وأوعدج إنها بترجع معاي وايدي بإيدها، أتحداج ياحنين وأتحدى كلام الدكاتره كلهم أقول إنه سارا بتشفى وبترجع معاي.. وطلع عبدالله من بيت حنين على طول على مكتب الطيران يحجز له على أول طياره، وترك حنين غرقانه بدموعها وحزنها على فراق أعز ربيعاتها.. وعلى حالة عبدالله الصعيبه.. الفصل العاشر.. بيت مايد.. مايد يدور في المطبخ يدور على الكيكه الي مسويتها مها أخته، بس هي خشتها عنه لأنها تعرفه لو بدا ياكل قبل اخوانه بيخلصها عنهم.. مايد: مها حرام عليج وين الكيكه.. والله خاطري فيها.. بس باكل شوي.. مها: لالالالا انتظر الباجين، كلها نص ساعه والكل بيوصل تعرف أبوي يحب كيكتي.. مايد: خيييييبه نص ساعه والله خاطري فيها.. مها: بعطيك بس بشرط.. مايد: عيوني لج، بس عطيني.. مها: تخبرني عن الحب اليديد.. مايد: أي حب؟؟ حليلني ودرت هالسوالف البطاليه.. مها: عيل ماشي كيكه.. مايد: خلاص خلاص بخبرج.. بس عطيني قطعه صغيره وبخبرج، وبعد القصه باكل الباجي.. سارت مها تييب له قطعه، وخبرها بكل السالفه، مها أخت مايد الصغيره عمرها19 سنه، خلصت مدرسه بس لادخلت جامعه ولاكليه، لأنها مريضه وراحت تتعالج برع، والحمدلله الله شفاها وردت البلاد.. وهي أقرب وحده لمايد.. مايد: والله اني ميت عليها من الخاطر.. مها: ياريت تصير من نصيبك.. مايد: كيف وأبوي راكب راسه، وهالخسفه شما مب راضيه تودرني.. خبريني شو أسوي.. مها: في مره جربت تصارح شما بشعورك صوبها.. مايد: هههه مره وحده وتدرين شو ردت علي.. يوم بنتزوج بخليك تغير رايك تجاهي.. والله بغرقك بحبي والله.. سيري عني سخيفه وحده.. مها: ما أدري هاي كيف تربيتها.. تدري إني شفتها بألمانيا يوم كنت أتعالج.. رايحه مع قوم خالتها، أقولك عادي فري شعرها الي برع أكثر عن الي داخل.. استغفر الله مابرمس عنها لاأبتلي أنا بعد.. مايد: يعني ترضين علي آخذ وحده شرات هاي، على قولتج فري ومب حاشمه حد.. مها: هاذا أبوي الله يهديه، متحجج بوصية عمي.. بس والله هو أساسا يدري إنها ماتناسبك.. مايد: أقول مها شو رايج أوديج تشوفين حنين..؟!! مها: والله ياريت، بس متى؟؟ مايد: باجر الصبح تسيرين بسيارتج، بعرفج عليها.. وأنا برد دوامي وإنت تردين البيت.. مها: أوكي صار، بس أول ماتقوم الصبح وعيني أنا بعد تدريبي رقادي ثجيل صاير.. شوي وتدخل عليهم شما.. شما: السلام عليكم.. مها: وعليكم السلام... مايد: طرينا القطو.. احم أنا بترخص بسير مواعد ربعي.. شما: لا والله اقعد شوي معاي ولهانه عليك.. مايد: بقولج انتي من وين يايه..؟؟ شما: من السوق.. مايد: وهالصبغ الي على ويهج.. وشعرج الي ناقز على فوق.. رايحين وياج السوق.. شما: هههه دمك خفيف.. أكيد عيل بسير بدون شعر والا تبيني ما أحط ميك أب ويطلع شكلي مريضه.. مايد بصوت ولاطي: انت مرض بدون شي.. مها: روح انت يامايد وانا بجابل شما.. طلع مايد وهو حاس بقرف منها.. وفي الصوب الثاني حنين تحاول تدق على عبدالله وتتطمن عليه بس هو طول الوقت غالق تلفونه.. فقالت أكيد هو بالطياره الحينه.. وسارت المطبخ وخبرت أمها بالي صار.. أم حنين: وااا قلبي على بنت أخوي والله ماتهنت بشبابها.. وهالمسكين عبدالله الله يعينه.. حنين: أمايه والله بموت لو استوى بسارا شي.. كيف بعيش بدونها.. أم حنين: الله يشفيها يابنيتي.. ادعيلها حبيبتي مالنا غير الدعاء لها.. طلعت حنين ودموعها على خدها، سارت حجرتها واتصلت بسارا.. بس سارا ماردت عليها.. عقت التلفون ويلست تقرا قرآن.. **__**__**__**__** في ألمانيا.. عبدالله وصل المستشفى وسأل عن غرفة سارا، ويوم وصل هناك.. شاف عمه وعيال عمه يالسين برع، فراح عندهم وسلم على عمه.. بوسارا: شو يايبنك ياولدي ياعبدالله.. عبدالله: عمي ليش خبيتوا علي هالشي.. انت تدري انه سارا حياتي.. كيف تودونها تتعالج وانا آخر من يعلم.. بوسارا: هاي رغبتها ياولدي، هي الي قالت لاتخبروا عبدالله.. عبدالله: عمي الله يخليك أبا أشوفها.. بوسارا: ............. عبدالله يلس على الأرض يبوس إيد عمه: عمي والله بشوفها لو من بعيد.. في هاللحظه طلعت عايشه زوجة أبوسارا.. عايشه: بنتك تخبلت تقولي أشم ريحة عبدالله.. سير شوف بنت..... وانصدمت يوم شافت عبدالله.. وعبدالله استانس ورجع يترجى عمه.. بوسارا: خلاص ادخل لها ياولدي.. عبدالله ركض على غرفتها وفتح الباب شوي شوي.. وطاحت عينه على سارا وحط يده على قلبه..سارا كانت صاده الصوب الثاني بس أول مادخل عبدالله عليها شهقت وقالت بصوت واطي عبدالله.. ويوم صدت صوب الباب شافته واقف يطالعها وايده على قلبه.. سارا: شو الي يايبنك..؟؟ عبدالله: قلبج الي ساكن بظلوعي.. سارا: قلبي خلاص مامنه فايده، بيودع الدنيا.. عبدالله اقترب منها وبلس حذالها على السرير.. قعد يتأملها ودموعه على خده.. سارا: هههه ليش تصيح.. عبدالله: أحبج ياسارا.. و.. سارا تقاطعه: بس أنا ما أحبك.. انت كنت تتوهم الحب وأنا بعد بس يوم ارتبطنا حسيت بغباءنا، الي كان بينا مشاعر مراهقه.. ونحن خلاص كبرنا.. عبدالله: لا، انت تحبيني بس كافي لاتكابري على نفسج، لاتسوين هاي الحركات عسب ماتعذبيني.. والله كلامج هذا مثل السكاكين بقلبي.. سارا: وليش تتعلق بوحده مريضه الي بقالها بالدنيا أيام قليله.. عبدالله: الأعمار بايد الله.. سارا: خلاص مالي أمل.. قلبي مريض.. عبدالل: يفداج قلبي يالغاليه.. والله لوتطلبين الروح ترخص لج.. سارا: عبدالله اطلع من هني.. عبدالله: سارا أنا.. سارا بدت تزاعج بصوت عالي: أقولك اطلع.. انت ماتفهم أكرهك أكرهك.. دخل أبوها وإخوانها، أبو سارا سحبه من ايده وطلعه برع وسارا طاحت على ورا ويلست تصيح وتكلم نفسها.. آسفه ياعبدالله بس لازم تكرهني لازم تنساني علشان ماتتعذب يوم بتفارق روحي هالدنيا.. سامحني يالغالي سامحني.. الفصل الحادي عشر.. الأوضاع متوتره في كل البيوت.. حنين تحاتي سارا وطول الوقت تفكر شو ممكن يصير لها، مايد ومها يحاولون إنهم يغيرون راي أبوهم.. وعبدالله ماخذ إجازه مفتوحه ويالس مع سارا الي رافضه تقابله، بس هو راضي على الأقل يكون بقربها.. في بيت بوحنين.. حنين تقنع أبوها إنها تروح ألمانيا تبا تكون مع سارا، بس هو مب مقتنع.. بوحنين: منو الي بيجابل الشغل، عمج راشد صعب عليه يخلص الأشغال بروحه.. حنين: كله أسبوع ورادين.. مابيخرب شي.. بوحنين: خليني أفكر.. طلعت حنين حجرتها واتصلت على سارا.. سارا: ألوو.. حنين: فديت هالصوت أنا.. سارا: هلا حنون شحالج وحشتيني.. حنين: أفا عليج يايتنج هاليومين.. سارا: والله..؟؟ وافق أبوج؟؟ حنين: تقريبا بس أكيد بيوافق، أبوي طيب ويعرفني شكثر متعلقه فيج.. شخبار عبدالله؟؟ سارا: آآآآآه اسكتي ياحنين مب راضي يودرني، سويت كل الي أقدر عليه عسب يرد البلاد وينساني بس هو قاعد يتمسك بزياده.. حنين: حبكم بدا من أول يوم بحياتكم من اليوم الي انولدتوا فيه.. انتوا مثل التوأم الي إنولدوا بيوم واحد وظلوا مترابطين طول العمر، مب بسهوله بينساج.. سارا: بس لاتقطعيلي فوادي أكثر.. حنين: خلاص حبيبتي إنتي ارتاحي وبكلمج بعدين.. سارا: أوكي الغاليه باي.. حنين: باي.. نروح شوي لمايد.. مها سوت الكيكه الي يحبها أبوها وودتها الميلس حقه، كان قاعد بروحه مجابل التلفزيون.. دخلت مها وحطت الكيكه وقطعت له قطعه كبيره.. بومايد: تعرفين إن عندي السكري وفوق هذا يايبتي أحلى كيكه بالدنيا.. مها: مب مشكله قطعه صغيره مب ضارتنك.. بومايد أخذ الكيكه ويلس ياكلها واستغلت مها الفرصه وفتحت موضوع مايد.. مها: مسكين مايد ماقعدت وياه من وصلت من السفر، مشغول بالشغل.. بومايد: الله يعينه ويوفقه.. مها: بابا.. مايد يشتغل ويتعب ويحاول يرضيك بكل طريقه يقدر عليها.. بس من حقه إنه يتحقق حلمه مثل ماهو يحاول إنه يحقق احلامنا.. بومايد: شو تقصدين.. مها: أقصد شما بنت عمي، والله إنه الموت أهون له من إنه ياخذها.. بومايد: مب لهالدرجه أخوج يبالغ، شو فيها شما شيخة البنات كلهم.. مها: بابا لاتكابر على نفسك.. إنت تعرف شما عدل، وعارف اشكثر هي فري ومتحرره، ومايد مايعيبه هالنوع من البنات.. بومايد: بتصطلب يوم بياخذها.. مها: أبوي تعرف إنها من ضمن شروط العرس إنه مايد مايتدخل في لبسها أو سلوكها، الي يجمعهم البيت وبس.. بومايد: شو تقصدين مها؟؟ شو هالرمسه.. مها: وحده من ربيعاتها وصلت لي رمستها.. كل الي تبيه شما إنها تزيد بيزاتها، وزواجها من أخوي هو الي بيوصلها لحلمها.. بومايد: شو هالخرابيط بعد.. مها: أبوي حرام عليك والله مايد يتعذب.. وانت مب حاس فيه، كل الي يهمك إنك ترضي السنيورا شما، بس الي ماتعرفه يابوي إنه مايد حلف إنك لو أجبرته يتزوج شما بيترك البيت وبيطلع.. لا مب بس البيت الا بيهاجر من البلاد بعد.. بومايد: يعني يبا يسوي مثل أخوه الي تركنا وراح.. مها: وتتذكر منو كان السبب في إنه سلطان يترك البيت.. إنت يابوي إنت..!! بومايد تذكر ولده سلطان الي هاجر من خمس سنين ولا يعرفون عنه أي شي.. وبدا يمسح على عيونه قبل لا تنزل دموعه.. مها حست إنها قست على أوبوها فقامت ولوت عليه.. مها: سامحني يابوي.. بس والله مب مستعده نعيش المأساة مره ثانيه.. مايد لو راح تروح روح البيت معاه.. أبوي حرام عليك تحرمنا من إخواني والسبب مايسوى.. السبب بنت عمي التافهة.. بومايد: خلاص يامها، خبري أخوج يسوي الي يبيه، وأنا راضي بس يتم معانا.. مها باست أبوها وركضت على التلفون تبشر مايد.. مايد: ألووو مها: مرحبااااااااا الغااااااالي.. مايد: حبيبي بكلمج بعدين مشغوووو.... مها: أبوي مايباك تاخذ شما.. مايد: شووووووو؟!! مها: هههه وقف قلبك وإلا بعدك؟؟ مايد: انتي شو قاعده تقولين..؟؟!! مها: تعال البيت وبخبرك كل السالفه.. سكر مايد وهو مب مصدق، وحاس إنه يبا يطير،حس بإحساس الطير الي فتحوا عنه القفص ويبا يطير فوق.. فوق..... **__**__**__** ألمانيا.. سارا طلبت تشوف عبدالله.. وهي حاسه إنها خلاص بتودع الدنيا.. دخل عليها وهو مستانس إنه بيشوفها صار له أسبوع يترجاهم يدخلونه عليها.. دخل وكان مبين عليها التعب.. عيونها حمر وويها ضعيف وكانت تتنفس بصعوبه.. قعد عبدالله على السرير وقعد يتأملها.. سارا: لا تتطالعني شكلي مرعب.. عبدالله: في عيوني كل بنات الدنيا مايسوونج.. سارا: عبدالله أنا خلاص بموت.. عبدالله مسك إيدها: بتعيشين ياقلبي وبنربي عيالنا وعيال عيالنا بعد.. سارا: أبا أقولك.. لو الله أخذ روحي.. عبدالله: سارا لاتقو... سارا: خلني أكمل.. لو الله أخذ رحي أباك تعيش حياتك، وتتزوج وتسمي أكبر بناتك سارا وتقرا قرآن على قبري كل جمعه.. هاي وصيتي لك يالغالي.. عبدالله نزلت دموعه، وباس ايدها وحطها على قلبه.. سارا: سامحني لأني قسيت عليك.. بس أنا.. أناأحبك.. وبظل أحبك.. وبموت وأنا أحبك.. عبدالله نزل راسه وحط يده على ويهه وبدا يصيح بصوت مسموع.. وفجأة انتبه لهمس طالع من سارا سمعها تتشهد.. رفع راسها وشاف راسها طايح على جنبها اليمين ومغمضه عيونها.. وعلى ويها ابتسامتها الي دايما على ويها.. **__**__**__** اليوم بتوصل جثة سارا للبلاد، والكل بحالة حزن وضيج.. محد مصدق الخبر.. سارا المرحه الحبوبه الي من تجتمع وياهم تذبحهم من الضحك.. خلاص راحت وراحت ضحكتها معاها.. حنين من سمعت الخبر وهي طايحه على فراشها لاتاكل ولاتتكلم.. الي راحت مب بس اختها والا بنت خالها.. الي راحت روحها الي تمشي وياها على الأرض.. راحت حنين بيت سارا تحظر عزاها.. وكانت خلاص بتموت من كثر الصياح.. قعدت بين البنات والحريم وكلها حزن وضيج.. قامت ودخلت غرفة سارا.. يلست على سريرها ومسكت الصوره الي مصورينها أيام المدرسه.. وتمت حاظنتنها وتصيح.. ويدخل عليها عبدالله الي ماشافته من بدا العزا.. عبدالله: راحت سارا.. وخلتني أنا وياج بروحنا.. حنين تمت منزله راسها وتصيح.. يلس عبدالله على الأرض وسحب الصوره من ايد حنين.. حنين: ترحم عليها ياعبدالله.. سارا راحت بس روحها للحين تحوم بينا.. عبدالله: وعدتج أرجع أنا وياها.. بس ماقدرت أوفي بوعدي.. حنين شلت عمرها وطلعت من الغرفه.. مب قادره تتحمل تشوف عبدالله بهالحاله.. سارت ويلست بين البنات.. وكانت عدالها بنيه حلوه شكلها غريب عن العيله.. وكانت تصيح من الخاطر.. حنين: تعرفين المرحومه.. البنيه: ياليتني عرفتها.. ياليتني تعرفت عليها قبل لاتروح.. وبدت البنيه تصيح.. حنين استغربت اذا ماتعرفها ليش تصيحها.. حنين: انت منو؟؟ وليش تصيحين اذا ماتعرفينها؟!! البنيه: انا أقرب لها.. بس عمري ماتقربت من العيله.. والله اني ندمانه.. حنين: أنا حنين بنت عمة سارا.. انت منو..؟؟ البنيه: انت حنين؟؟- ومسكت ايد حنين- والله كان خاطري أتعرف عليج من كثر ماأبوي يرمسني عنج وعن كل العيله.. حنين: انت منو؟؟ البنيه: أنا حمده بنت خالج محمد.. حنين انصدمت: معقوله انتي بنت خالي..؟!! حنين لوت على حمده ويلست تصيح هي وياها.. ومامرت عشر دقايق الا والكل عرفوا عن حمده وقعدوا يسلمون عليها وهي تعزيهم.. الفصل الثاني عشر.. بيت حنين.. حنين مصره انها تعرف شو سالفة خالها محمد الي مايعرفون عنه أي شي غير اسمه.. حتى عياله مايعرفونهم.. أم حنين: ياحنين قومي عني خليني بحالي.. حنين: لا مب مخليتج الين ما أعرف السالفه كلها.. شوق: انا بعد أبا أعرف ليش خالي وعياله عايشين بعيد عنا، وليش العيله كلها متقاربه ماعدا خالي وعياله.. أم حنين: أوووف منكم خلاص بخبركم.. من سنين طويله.. خالكم محمد تزوج من وحده من أهلنا بس هي كانت شريه وتحب المشاكل.. وبالذات وياي أنا لأني أقرب وحده لخالكم محمد.. شوق: وليش كل هالحقد.. أم حنين: محد يدري يابنيتي.. وليومج هذا ودي أعرف سر الكره الكبير الي بداخلها تجاهي.. حنين: أوكي يالله كملي.. أم حنين: كانت دايما تولع المشاكل في البيت، أمي الله يرحمها ماسلمت من لسانها الطويل.. واخواتي يحاولون يخففون من المشاكل بس بدون فايده.. كنت بعدني صغيره ومب متزوجه، ويوم صار عمري 24 سنه، تقدم لي أبوكم.. وكنت موافقه عليه والكل راضي بس.. شوق: لاتقولين حرظت خالي عليج.. أم حنين: لأنه أبوكم من منطقه بعيده شوي قعدت تقوله إنا كانت من بينا علاقه.. وبييبلكم الفضيحه.. و.. و.. وسكتت أم حنين وهي تتذكر هاذيج الأيام.. وحست بروحها رجعت لعمر العشرين.. _________________________ محمد: قلت لج ماشي زواج من الي اسمه بدر هذا.. هيفا: وشو الي يمنع؟؟ حرام عليك يامحمد الريال مافيه عيب.. محمد: أنا قلت لا يعني لا.. أم محمد: انزين عطنا سبب؟؟ مب بس ترفض بدون وجه حق.. محمد: بدون سبب لا وبس.. هيفا: تبين سبب انا بقولج السبب.. لأن حرمه المصون محرظتنه علي، لأنها تكره لي الخير وتبيني أعنس وأخدمها هي وعيالها.. محمد: لاتييبين طاريها على لسانج.. هيفا: الله ياخذها ونفتك منها.. انت مستوي مثل الخاتم بصبعها..صاير الخادم المطيع لها.. محمد رفع ايده وصفعها صفعه قويه على خدها.. وطاحت على حافة الطاوله الزجاج.. وجرحت راسها ونقلوها على المستشفى.. شوق: وبعدين ماما شو صار..؟!! أم حنين: قدمت بلاغ للشرطه وكتبوه تعهد إنه مايتعرض لي.. وتزوجت بدر غصبن عليه.. فأخذ حرمته وعياله وراحوا بوظبي.. ومن هاذاك اليوم والقطيعه من بينا.. لاهو يبا يعرف أخبارنا ونحن ماسعينا ورا أخباره.. حنين: الله يسامحها حرمة خالي.. أم حنين: الله لايسامحها انشاءالله حرمتني من عيال أخوي.. ومن حنان أخوي.. حرمتنا من لمة العيله.. والله كل ما اجتمعت العيله تذكرت محمد وقلبي يعورني عليه وعلى أيامنا الأوليه.. حنين: امايه وشو ذنب حمده وأحمد..؟؟ أم حنين: مالهم ذنب.. ولاحتى أخوي له ذنب.. شوق: يعني لو ياتنا حمده تزورنا بترحبين فيها؟؟ أم حنين: وبحطها على راسي بعد.. تدرون خاطري أشوف أحمد، خاطري أحظنه وألعب وياه والله تولهت عليه.. حنين: بكلم حمده وبخليها تيي عندنا.. أم حنين: عندج رقمها؟؟ حنين:هي عندي، عطتني يوم كنا بالعزا.. أم حنين: خلاص شوفيها متى تقدر تزورنا.. راحت حنين حجرتها ترتاح.. ومسكت السلسله الي عطاها مايد حقها بيوم ميلادها.. يالله اشكثر تولهت عليك يامايد.. أيام العزا وظروف رجوع خالي لحياتنا خلتني ألتهي عنك.. ياربي شو أخبارك وشو مسوي بدنياك؟!! وهي سارحه بعالمها.. رن فجأة تلفونها وكان الرقم غريب فترددت تشيله وإلا لأ.. وقررت تشوف منو الي داق لها.. حنين: ألوو.. ؟؟ : مرحبا الغاليه.. حنين: مرحبتين.. منو معاي؟؟ : معاج الولهانه.. حنين: لا والله..!! : ممكن نتعرف..؟!! حنين: يالله عاد منو إنتي؟؟ : هههههه معاج مها أخت مايد.. حنين استحت: هلا مها السموحه ماعرفتج.. مها: لا عادي.. انتي اسمحيلي ماييتكم العزا.. عظم الله أجركم.. حنين: أجرنا وأجرج.. مسموحه الغاليه.. مها: أقول مايد يسلم عليم.. حنين: هااااه الله يسلمه.. قوليلي من وين يبتي رقمي؟ مها: مايد سارقنه من موبايل عبدالله.. لوقت الضروره يعني.. حنين: أيوااااا الله يعين عبدالله حالته تقطع القلب.. مها: الله يصبره انشاءالله.. المهم غناة الروح.. آآآآخ شو فيك ميووود.. انزين انزين غناتك بروحك.. حنين: ههههههههه مها: اضحكي اضحكي الضرب مب حقج حقي أنا.. حنين: ههههههههههه مها: خلاص الغاليه بخليج الحينه.. حنين: أوكي حبيبتي.. الله يحفظج.. مها: مع السلامه.. حنين: مع السلامه.. أقول مها.. مها: هاااا قولي.. حنين: سلمي على أخوج.. مها: يبلغ.. يالله باي.. حنين: باي.. وبندت حنين التلفون ولأول مره من أسبوع تبتسم، وحست انها مستانسه شوي.. **__**__**__** مر شهر ونص على وفاة سارا، وبدت الأجواء ترجع طبيعيه في العيله، ماعدا إثنين.. حنين وعبدالله.. حنين تضغط على عبدالله بإنه يحاول يتأقلم مع الواقع.. بس في نفس الوقت هي مب قادره تتعود على فكرة فراق سارا لحياتها.. اليوم حمده بتزور بيت عمتها لأول مره بحياتها.. كان الكل مستانس وينتظرونها.. أم حنين: حنين.. بنت خالج مع منو بتيي؟ هم في بوظبي ساكنين.. حنين: ما أدري أمايه، هي خبرتني إنها اليوم العصر بتوصل.. أم حنين: يمكن مع أحمد أخوها..فديته واحشني وايد. شوق: لا أمايه حمده قالت أحمد يشتغل طيار وطول الوقت مسافر.. أم حنين دمعت عينها: من صغره وأنا أقولهم بصير طيار، بس أمه تقول لا بيصير دكتور.. فديت ولد أخوي الغالي.. العنود: ماما ماعندهم بنات صغار..؟!! أم حنين: الله أعلم الي نعرفهم حمده وأحمد.. حنين: قالت لي حمده عندهم بعد مريم وعلي.. شوق: يالله وينها تأخرت.. شوي وسمعوا صوت سياره وقفت.. وقفوا البنات عند الدريشه يطالعون منو الي ياي.. شافوا حمده نازله من السياره وواحد طويل معاها... لبسوا البنات شيلهم وطلعوا عند الباب يستقبلونهم.. حمده من شافتهم استانست وحظنتهم.. وكلهم عيونهم على الي ورا حنين.. كان شاب حلو ووسيم.. دخل وسلم عليهم وهم يبون يعرفون منو هذا!! أم حنين وقفت عند باب الصاله تتطالع الريال وقلبها يدق بالقو.. حمده ركضت لعمتها وباستها.. أم حنين وعينها على الريال: هلا حبيبتي تأخرتي من متى نترياج.. حمده: آسفه عموه بس أحمد ضيع الدرب.. أم حنين: هذا أحمد؟؟ ومشت للباب تبا تشوف الغالي الي انحرمت منه سنين طويله.. أحمد بدا يتقرب من عمته.. بس هي سبقته وحظنته وتمت تصيح.. أم حنين: أحمد.. حبيبي والله تولهت عليك.. حرام الي صار فيني طول هالسنين وبعدني عنك.. أحمد تم ماسك عمته بقوه: والله ياعموه مانسيتج طول الوقت أذكرج مع إني كنت صغير بس والله أذكرج يوم كنتي تلاعبيني.. دخلوا كلهم داخل وهيفا مب راضيه تودر أحمد.. حاسه إنها لقت الولد الي فقدته سنين طويله.. أحمد: تدرين عموه أذكرج يوم كنتي تلعبين وياي بغرفتج.. يوم تشيليني فوق وتنزليني على السرير.. أم حنين: كنت صغير وايد تقريبا سنه ونص عمرك كيف للحينه تذكر هالمواقف.. أحمد: أحيانا كنت أشوف صورتج عند أبوي فترجع لذاكرتي هالذكريات.. أم حنين: للحين أبوك محتفظ بالصور.. حمده لا.. أمي حرقتهم وحرقت قلب أبوي وأحمد.. أنا كنت صغيره ومب عارفه شي.. ولاعندي ذكريات عن يدتي والبيت العود.. أم حنين: للحينه قاسيه ياموزه!! الله يسامحج.. شوق: وخالي محمد شخباره.. أحمد: أبوي... أبوي وايد مريض ومن قلتله عن المرحومه سارا تعب زياده ووديناه المستشفى.. أم حنين: الله يشفيه.. حمده: عمووه إنتي مسامحه أبوي.. وإلا زعلانه عليه.. أم حنين: الي سواه فيني مب شويه.. والله للحينه حاسه بالظرب الي ظربني إياه من زمان.. للحينه حاسه بالغصه من موزوه يوم كانت تتبلا علي وهو واقف بصفها.. أحمد: الي راح راح ونحن أولاد اليوم.. أم حنين: العنود والهنوف وين سارن.. خلاص إنتوا يلسوا مع بعض وأنا بسير بحط لكم الفواله.. سارت أم حنين ويلسوا يسولفون عن الشغل والدراسه.. أحمد: حنين بعدج تدرسين؟؟ حنين: لا مخلصه جامعه اداره واقتصاد وأشتغل بشركة أبوي.. شوق: وأنا أدرس بالتقنيه نظم معلومات وانشاءالله بعد بشتغل مع بابا بالشركه.. حنين: عز الله فلحنا.. حمده: ههههه أنا بعد أدرس بالتقنيه نظم معلومات.. أحمد: الحمدلله أنا وحنين مخلصين دراسه ومرتاحين.. شوق: أحمد كم عمرك.. دخلت عليهم أم حنين: بيكون عمره 27 سنه.. أحمد: ماشاءالله عليج عموه متذكره عمري.. أم حنين: ولا عمري بنساك يالغالي.. حمده: عموه ليش أحسج تحبين أحمد أكثر عني؟؟ أم حنين: لافديتج بس انتي يوم صغيره كله لاصقه بأمج حتى على الارض ماتخليج تقعدين.. وأحمد فديته طول الوقت يراكض وياي.. دخل عليهم بوحنين.. وسلم على أحمد وحمده.. ويلسوا يسولفون لليل ورجعوا بعدها البيت.. وأم حنين تصيح من راحوا لين دخلت غرفتها ترقد.. الفصل الثالث عشر.. حنين في الشركه تخلص شغلها.. وسمعت حد يدق الباب وعرفت من الدقه أنه مايد وصل.. حنين: تفضل.. مايد: صباح الخير.. حنين: صباح النور.. شخبارك يالقاطع.. مايد: هههه مب قاطع بس الي عنده أخت مثل مها يقدر يطلع والا ياخذ راحته.. شوي وتدخل وراه أخته مها الي من شافتها حنين تيبست في مكانها.. مها: خل عنك أصلا انت بدون ماتعيش.. مايد: أقدم لج أختي المزعجه مها.. مها: شحالج حنين.. حنين: الحمدلله.. مايد: حنين بلاه لونج استوى أصفر.. حنين: هااا ولا شي.. مها راحت عندها ومسكت ايدها: بلاج حنين مثل الي لدغته عقرب.. حنين وشوي لاتصيح: تشبهين المرحومه وايد.. مها: والله؟؟ مايد: أنا قعدت مع المرحومه بس مالاحظت الشبه.. حنين: شبه فظيع بالعيون والخشم والشفايف.. مها حظنت حنين وقعدت تهديها.. ومايد فضل إنه يطلع عنهم.. وبعد نص ساعه طلعت مها وروحت للبيت.. في الطرف الثاني من البلاد وبالذات في أبوظبي.. بيت محمد.. موزه من عرفت بالي سووه عيالها وهي قالبه الدنيا.. موزه: أبا أعرف كيف تعصون أوامري؟؟ كيف تتجرؤون وتسيرون دبي بدون شوري.. أحمد: عمتي وحشتني ورحت أزورها.. موزه: عمتك طل بعينك.. لو سمعتك تقول عمتي مره ثانيه ذبحتك سمعتني وإلا لا.. أحمد عصب وسار حجرته.. وتمت حمده تصيح.. حمده: ليش ماما ليش تبين تحرمينا من عموه..أنا.. موزه: جب ولا كلمه.. الي صار اليوم ما أبيه يتكرر فهمتي وإلا شووو؟؟ حمده ركضت حجرتها وهي تصيح.. ودخل محمد على حرمته وهي مثل مثل الثور الهايج.. محمد: بسم الله شو فيج العيال فيهم شي.. موزه: هي فيهم شي تدري عيالك شو مسوين؟؟ محمد: شو مسوين بعد..؟!! موزه: رايحين دبي يزورون هالعله أختك.. محمد وقف قلبه: هيفا؟؟ موزه: الله ياخذها وياخذ طاريها.. بسير حجرتي أحسن لي.. طلعت الساحره موزوه وقام محمد وراح حجرة أحمد.. أحمد: هلا أبوي.. الله يهداك ليش قمت من السرير.. محمد: أحمد صج إنت رحت تزور عمتك..؟؟ أحمد: هي أبوي رحت أشوف أهلي الي حرمتوني منهم كل هالسنين.. محمد وعيونه تدمع: وشخبارها وشو أخبار بدر زوجها؟؟ وكم ولد عندها..؟؟ أحمد: الحمدلله كلهم بخير.. عندها أربع بنات وماعندها أولاد.. محمد قعد ساكت وحاس بنار تشعل بقلبه.. ليش كل هذا صار؟؟ ليش القطيعه بين الإخوان طول هالسنين..؟؟ حرام والله حرام.. أحمد: أبوي عمتي تحبك ومسامحتنك على كل الي سويته فيها.. محمد: طول عمرها قلبها كبير.. أحمد: أبوي روح ارتاح انت تعبان.. محمد: أحمد أبيك توديني أزور عمتك آخر هالأسبوع.. أحمد فرح وحس إنه وايد أشياء بتتصلح.. وبالذات إنه حس بحب بدا يكبر بقلبه تجاه حنين.. **__**__**__** بيت بومايد.. بومايد قام من الرقاد وحاس بضيج بصدره.. وشكله مهموم وزعلان.. أم مايد: خير يالغالي شو فيك اليوم؟؟ بومايد: حاس بقلبي بيطلع من مكانه.. مها: بسم الله عليك أبوي شوفيك..؟؟ بومايد رجع راسه على ورا وغمض عيونه وهو يهمس: نادولي مايد.. ابا أروح المستشفى.. ركضت مها وهي تصيح تنادي مايد.. مايد على طول سحب مفاتيح السياره وهو بملابس النوم وركض يشيل أبوه للمستشفى.. في المستشفى سووله تخطيط قلب وأشعه.. والظاهر إنه الظغط ارتفع وايد عنده.. مايد: الله يهداك يابوي في شو يالس تفكر ورفع ضغطك لهالدرجه.. بومايد: أفكر بالحلم الي شفته.. مايد: أي حلم؟؟ بومايد: شفت أخوي المرحوم بالحلم.. يذكرني ببنته، ويحلفني إني ما أزعلها.. وأنا حاس إني خلاص أيامي قليله بالدنيا.. وأخاف أموت ووصية أخوي برقبتي.. مايد حس بضيج بصدره: الي تبيه بيصير يابوي.. بومايد: بتاخذ شما؟؟ مايد وكل قهر الدنيا بقلبه: باخذها يابوي بس انت ارتاح.. بومايد ارتاح وغمض عيونه.. وخلا مايد بضيجته، خلاه مع همه الي شكله مب راضي يروح عنه.. **__**__**__** الفصل الرابع عشر.. ((كيف عيني تنام بعد وداعك يالغلا.. كيف تهنا حياتي والي رحل قلبي الملهوف.. انت الأولى وقلبي من بعادج تعب.. كيف ألقى الونيس في بعادج..)) دخلت حنين على عبدالله وهو يكتب هالكلمات.. هو ما انتبه لها بس حس إنه في حد دخل الغرفه.. بس كالعاده ومن وفاة سارا يطنش أي حد يدخل حجرته لين يملون ويطلعون بروحهم.. بس حنين مصره إنها تكلمه اليوم، لأنه قاعد يذبح نفسه بالي يسويه.. مرت أربع شهور على وفاتها ومن يومها وهو حابس عمره.. حنين قعدت تتأمل ويهه، عيونه منفخات من السهر ولونه أصفر شاحب ومبين عليه إنه مب حالق لحيته من فتره طويله.. والله قلبها عورها عليه.. حنين: عبدالله شحالك..؟!! عبدالله: ........ حنين: حتى أنا مب راضي ترد علي؟؟ عيل وين الي يقول مب مزعل حنون لو شو مايصير..!! عبدالله: ........... حنين: يعني أنا مب غاليه عليك..؟؟ عبدالله: الي راحت أغلى شي بحياتي.. ومن بعدها الدنيا ماتسوى.. حنين: معاك حق.. أنا بعد حاسه بالدنيا ماتسوى بدونها، بس هذا أمر الله.. وسبحانه يمكن له حكمه بهذا الشي.. عبدالله: أي حكمه في إني أنحرم من الشي الي بغيته طول عمري.. والله اني بحياتي مادعيت ربي إلا إنها تكون لي.. حنين وبدت تصيح: عبدالله، يمكن الله كتب انها لو عاشت وخذتك مابتتهنون أو ممكن تصير لكم مشاكل.. ويمكن بموتها تتغير حياتك وتعيش مع غيرها..و.. عبدالله: غيرها..؟؟ لالالا مستحيل غير سارا تدخل قلبي.. واذا انحرمت منها بالدنيا أكيد رب العالمين بيجمعني بها بلآخره.. حنين: وهذا الي أبا أوصله لك.. انحرمت منها بالدنيا لحكمه بإيد رب العالمين.. وأكيد بتجتمع وياها بالآخره.. عبدالله قام من مكانه وسار وأخذ صندوق سارا.. عبدالله: عطتني هالصندوق قبل سفرها بأسبوع ووصتني ما أفتحه الا اذا هي ماتت.. وللحين مب قادر أفتح.. حنين ممكن تفتحينه إنت..؟؟ حنين خذت الصندوق وفتحته ويلست على الأرض وعبدالله واقف بعيد يطالعها.. حنين بدت تصيح وتطلع الي بداخله.. صور مع أوراق ومذكرات صغيره.. حنين: هذي صوري أنا وهي وإنت يوم كنا يهال.. عبدالله اقترب منها وأخذ الصور وحظنها.. وحنين طلعت باجي الصور والمذكرات.. حنين: هاي مذكراتها بس ماكانت ترضى اني أقراهم طول الوقت تقولي اذا في أحد بيقرا من بعدي فهو عبدالله.. عبدالله مسك الأوراق والمذكرات وتم حاظننهم.. عبدالله: مب قادر ياحنين.. مب قادر أتحمل حبها الي إنحرمت منه.. ليتني كرهتها يوم قالت لي أكرهك بالمستشفى.. ليتني رجعت البلاد وأنا أكرها ولا عشت هاللحظات على فراقها.. حنين قامت من مكانها: بس هي راحت وكلنا نحبها، وأعتقد لو كانت بينا ماكانت بترضى تشوفك وإنت تذبح روحك.. طلعت حنين من الغرفه وودرت عبدالله ضايع بين ذكرياته.. حبه الأول خلاص راح.. بس الحياة بعدها مستمره.. وإذا انحرم من شي واحد فالدنيا فاتحه إيدها بأشياء وايد تعوضه عن الي راح.. **__**__**__** اليوم ملجة مايد على شما.. بس مايد حلف لايسوي حفله ولاهم يحزنون.. شما عصبت بس سكتها عمها وقالها إنه بيسويلها عرس لاصار ولا إستوى.. قبل لايملج مايد على شما اتصل بحنين.. حنين: ألو..؟؟ مايد: السلام عليكم.. حنين: وعليكم السلام.. مايد؟؟ مايد: عرفتيني بسرعه.. حنين: صوتك مميز.. بس ليش أحسك متضايج.؟؟ وليش داق علي شو مستوي.. مايد: حنين.. اليوم ب..بملج على شما.. بس والله مو بإيدي.. انا.. حنين: وليش داق تقول لي يعني أنا ناقصه هم على همي.. مايد: حنين إنت تدرين اني أحبج والي بيصير مو بايدي كله علشان الوالد والله ياحنين.. حنين: بس خلاص كافي.. مب كفايه سارا وراحت الحينه حتى إنت بتروح.. ليتني مت قبلج ياسارا.. مايد: لاتدعين على نفسج والله أنا الي أستاهل الموت.. حنين الله يخليج تسامحيني.. والله بموت لو تزوجت اليوم وانتي زعلانه علي.. حنين: عمري ماراح أسامحك يامايد على الي سويته فيني.. الله لايهنيك يوم إنك ذبحتني بحبك.. تذكر وعدك لي بإنك تواجه الكل علشاني.. بس الظاهر إني كنت أخدع نفسي يوم صدقتك.. سكرت حنين التلفون وقعدت تصيح وتدعي على نفسها بالموت.. ____ ____ ____ ____ ____ ____ ____ ____ بعد ساعتين من مكالمة حنين ومايد نزلت حنين الصاله تقعد مع شوق، بس شوق كانت لاهية بالتلفون تكلم خطيبها.. بس من شافت حالة أختها بندت عن جاسم ويلست مع حنين.. الي خبرتها عن ملجة مايد.. شوق: خليه يولي، انت تستاهلين شيخ شيخه.. حنين: .......... شوق: حنون لاتزعلين، الله بيعوضج بداله.. حنين: المشكله مب فيني أنا المشكله في قلبي، والله ياشوق حاسه بسكاكين تقطع فوادي.. شوق: بسم الله عليج انشالله فالعدو.. شوي ويدخل عليهم حميد عمهم، وكعادته قعد يسحب شعر شوق.. شوق: آآآآآآآخ عمي حرام عليك إلا شعري.. حميد: بنتفه علشان جسوم مايلقى شعر يلعب به.. شوق: آآآي.. أولا اسمه جاسم، ثانيا هو يبيني حتى لو قرعه.. حميد: ههههه والله قاصه على عمرج.. شوق: هه هه هه حميد: بلاها دلوعتي ماده بوز؟ لايكون أم كشه مزعلتج.. شوق: أم كشه فعينك.. عمي احترمني شوي.. حميد: هههه لا جد بلاها حنون ضايجه.. حنين: ولا شي عمي بس حاسه بتعب.. حميد: أوديج المستشفى؟؟ حنين: لا مب لهالدرجه برتاح شوي وبكون أوكي.. حميد: على راحتج غناتي، عيل وين حرمة أخوي؟؟ شوق: بعد وين أكيد بالمطبخ.. حميد راح المطبخ يشوف أم حنين، وشوق قعدت تطرش مسج حق جاسم، قامت حنين تبا تروح حجرتها بس رن موبايلها فشافت عليه رقم مها ومسكت على قلبها.. شوق: شو فيج منو الي داق لايكون.. حنين: لا هاي مها أخته.. شوق: ردي شوفيها، غريبه داقه هالوقت واليوم ملجة أخوها.. حنين شالت التلفون: ألو..؟؟ مها: حنين الحقي علينا.. حنين: مها شو فيج ليش تصيحين؟؟ مايد في شي.. مها: مايد سوا حادث وحالته خطيره.. **__**__**__** لا يازمن.. وش باقي أكثر ماخذيت.. لا يازمن.. مايوم في عمري وفيت.. **__**__**__** الزمن.. الساعه 11 ونص بالليل.. المكان.. استراحة المستشفى.. الحاله.. مايد بين الحياة والموت.. دخلت حنين وشوق وعمهم حميد المستشفى.. شافوا أم مايد يالسه على الأرض تصيح ومها واقفه حذال أمها ومغطيه ويها.. أبو مايد يالس على كرسي يقرا قرآن ويدعي لولده.. (شما).. مالها أي وجود.. مها من شافت حنين ركضت صوبها وحظنتها.. وحنين يلست تهديها وهي بروحها تدور منو الي يهديها.. حنين خذت مها ويلسوا بعيد شوي.. حنين: مها حبيبتي إذكري الله.. مايد بيقوم بالسلامه.. مها: خايفه يروح مني مالي غيره يفهمني.. حنين: انشاءالله بيرجع لنا.. بس شو الي صار اليوم ملجته ليش طلع عن زوجته..؟؟ مها: راحوا المحكمه وملج عليها، بس يوم رجع كان حاس بضيج بصدره، فقام وودرها وطلع بالسياره، وبعدها بنص ساعه قالولنا بالمستشفى مسوي حادث.. حنين: كله مني أنا السبب أنا الي دعيت عليه يوم قالي إنه بيملج اليوم.. مها: لا ياحنين كله منها هالشما، هي الي ذبحت أخوي تدريبه مايبيها بس جبرت أبوي يقنعه ولا سوت لمشاعره اعتبار.. حنين خانتها دموعها ويلست تصيح مع مها، وفجأة طلع لهم الدكتور والكل يركض صوبه.. الدكتور.. هدوا أعصابكم الولد بعده بالعمليه وتعبان، بس محتاجين دم وفصيلته نادره ومب موجوده هني، ولازم نلحق عليه لأنه دمه قاعد يتصفى.. أم مايد: خذوا دمي خذو روحي بس ولدي يعيش.. مها: أنا فصيلتي تختلف عنه.. حنين: أنا نفس فصيلة دم مايد.. الدكتور: تفضلي معاي نختبره بسرعه.. راحت حنين مع الدكتور وبعد ماتأكد من تطابق الفصيلتين وخلو دمها من الأمراض دخلها غرفة العمليات.. نامت على السرير الي حذال مايد.. وكانت تفصل بينهم ستاره.. بس حست بنفسها لاصقه فيه وتعطيه من دمها.. حاولت تتطالعه بس ماقدرت.. وبدون لاتحس قعدت تدعيله بصوت عالي.. شوي والممرضه تشيل شوي من الستار تبا تركب الجهاز لمايد.. وفي هاللحظه طاحت عين حنين على مايد ومسكت نفسها لاتصرخ.. كان ويهه كله دم ومتشوه ومب مبين منه شي..والسرير والأرض وجسمه كله دم.. الدكتور: خلج مرتاحه لاتتحركين.. حنين: خذ دمي كله بس الله يخليك حاول تساعده.. الدكتور: كله بإيد الرحمن.. بعد نص ساعه طلعت حنين وهي ميته من الصياح، ركض عليها حميد ومسكها وقعدها في الإستراحه.. شوق: حنين شفتيه..؟؟ مها: طمنيني على أخوي شفتيه، حسيتي إنه بخير وإلا لأ..؟؟ حنين وهي تصيح: ما أدري ما أدري ويهه كان كله دم ومب مبينه ملامحه.. وقعدوا كلهم يدعون له.. ويوم صارت الساعه 2 ونص، طلع لهم الدكتور.. وويه معتفس.. أبو مايد: الله يخليك طمني على ولدي.. الدكتور: هدي أعصابك يابوي..نحن سوينا الي علينا والباقي على رب العالمين.. أم مايد: شو يعني؟؟ ولدي بيعيش وإلا لأ؟؟ الدكتور: الأعمار بإيد الله.. كل الي قدرنا عليه سويناه وننتظر تمر 24 ساعه على حالته.. مها: نقدر نشوفه؟؟ الدكتور: بندخله العنايه الحينه، وبنمنع عنه الزياره، بس تقدرون تشوفونه من الزجاج الي بيفصلكم عنه.. شوي وطلعوا الممرضين وهم يسحبون سرير مايد.. كان ويهه مغطاي بالشاش الأبيض والجبس على إيده اليمين وريوله اليسار.. ومبين عليه إنه تعبان.. ويوم مروا فيه حذال حنين سمعت صوته يتسامح منها.. ويلست تصيح وتلوم نفسها على آخر كلمات طلعت منها حقه.. ويمكن عمره ماراح يسمع غير هالكلمات.. الفصل الخامس عشر.. محمد: من متى تعلين صوتج علي؟؟ هيفا: من يوم ما بديت تسمع كلام زوجتك الي مسويتك مثل الخاتم بصبعها.. محمد: احترمي نفسج أنا ريال.. هيفا: أي مريله والي يعافيك، موزوه تقولك يمين تسير وراها، تقولك جهنم تلحقها ولا على بالك لإنها بتحرقك.. محمد: جهنم الي تحرقج وتفكني منج.. هيفا: مشكور ياخوي ياولد أمي وأبوي، يوم بتقابل أبوي في الآخره، قوله أنا اهتميت بصغيرونتك عدل، حطيتها فوق راسي.. شتمتها في الداخله والطالعه.. خليت حرمتي تتحكم فيني وأدبت أختي بالعصا.. محمد مسك هيفا من ايدها ودخلها غرفتها.. محمد: من اليوم مالج طلعه من البيت إلا للقبر.. هيفا وهي تخوز ايده بالقو عنها: قبر يلم هالعقربه الي ماخذنها.. الله ياخذها انشاءالله.. محمد: لاتدعين عليها أنا قاعد أكلمج.. هيفا: انت أخوي وماتهون علي أدعي عليك.. بس هي بالحراق الي يحرقها.. انتبهت أم حنين من ذكرياتها على صوت زوجها يناديها.. أم حنين: انشاءالله بوحنين الحينه بييب لك الكندوره.. بوحنين أخذ الكندوره وهو يطالع حرمته الي قاعده تمسح دموعها، صار لها فتره متغيره وحزينه، من يوم ماطلع أخوها في حياتها مره ثانيه وهي معتفسه.. بوحنين: الغاليه شو فيج، شو الي مكدر خاطرج..؟؟ أم حنين: سلامتك بس حاسه إني أبا أشوف أخوي وفي نفس الوقت ما أبا أشوفه.. بو حنين: مب قادره تسامحينه..؟؟ أم حنين: ........... بو حنين: الي الله كاتبه بيصير، وانت قلبج كبير.. طلع بوحنين وراح المستشفى يزور مايد لي صار له أسبوعين طايح بالمستشفى.. وبعد يومين بيودونه علاج في ألمانيا.. حنين راحت ورا أبوها المستشفى، من يوم حادث مايد وهي يوميا عندهم بالمستشفى بس ماطلبت تشوفه، خافت يحسون عليها.. يوم وصلت المستشفى سلمت على أم مايد وراحت مع مها يقعدون بالإستراحه.. مها: مب في خاطرج تشوفين مايد..؟؟ حنين: في خاطري بس..!! مها: أنا بقولج يوم بيسيرون يصلون وأمي بتدخل تصلي في الإستراحه بدخلج عنده.. حنين: أخافه مايرضى يشوفني.. مها: البارحه سألني عنج، فقلت إنج يوميا تيين هني.. وقال لو شافج مب محتاج للسفر بيطيب على طول.. حنين: فديييييي.... مها: كمليها لاتستحين.. حنين احمر ويها وصدت الصوب الثاني، ولمحت عبدالله داخل المستشفى.. حنين: هذا عبدالله.. وقامت تناديه وراحت وراها مها.. عبدالله انتبه لحنين وراح يبا يسلم عليها وانتبه لمها فوقف مكانه ونزل راسه بالأرض.. حنين: عبدالله؟؟ شو تسوي هني..!! عبدالله: سمعت مايد مريض فييت أسلم عليم.. حنين: ماتقصر والله، بس زين الي طلعت من البيت.. عبدالله: إنت تدرين اشكثر مايد غالي علي.. عبدالله قعد يطالع مها بطرف عينه، يحسه يعرفها بس هي عاطيته نص ويها ومب واظحه ملامحها.. حنين حست عليه.. حنين: عبدالله هاي مها أخت مايد.. مها اطالعت عبدالله وابتسمت له فتيبس في مكانه.. حنين حست إنه شبها بالمرحومه وحبت تعدل الجو.. حنين: عبدالله هاذيج غرفة مايد سير له.. عبدالله راح لمايد وهو مب عارف شو الي صار له.. مها: مسكين أكيد ذكرته بالمرحومه..حنين هو كم عمره؟؟ حنين: أكبر عني بسنتين يعني 25 سنه.. مها حست إنها تبا تعرف عنه كل شي، ماتدري ليش!! يمكن كسر خاطرها، أو إنها بدت تميل له.. المهم يوم أذن الاذان راحوا الرياييل يصلون ودخلت أم مايد الاستراحه تصلي.. فمشوا البنات لغرفة مايد، بس قبل لايوصلون شافوا في ويهم شما، الي متعدله ومتكشخه تقول رايحه عرس مب جنها يايه تزور ريلها المريض بالمستشفى.. مها: شما!! هلا والله.. شما: شحالكم بنات.. سوري بدخل على مايد أسلم عليه لأني باجر بسافر لندن مع قوم خالتي.. راحت شما لغرفة مايد، وقعدوا حنين مها يطالعون بعضهم.. حنين: هاي مب جنه ريلها الي طايح بالمستشفى.. مها: تصدقين من سوا الحادث مازاراته ولامره، واليوم يايه تقوله إنها بتسافر.. هاي شو ماتشبع من السفر، طول الوقت برع البلاد.. حنين: الله يستر عليها.. ثواني وطلعت لهم شما وكان مبين عليها إنها لايعه جبدها من شي.. شما: مها شو ها.. ليش مايد جيه متشوه.. بسم الله والله شكله يخوف.. مها: هي انت أخوي بخير ومافيه شي..باجر بيسافر وبيرد لنا أحسن عن قبل.. شما: أوكي يوم بيرد خبريني، لأني مب متحمله أشوفه وهو بهالحاله.. حنين: هذا ريلج يعني لازم توقفين وياه مب تودرينه وتسافرين عنه، هو محتاج لج الحين أكثر عن أي وقت ثاني.. شما اطالعتها باحتقار: انت منو علشان تنصحيني، وبعدين أنا لازم أسافر أففف الدنيا هني حر وأنا أخاف على بشرتي.. ودرتهم شما وراحت.. وحنين ومها بيموتون من القهر، ثواني ووصلوا الرياييل من المسيد، فراحت حنين البيت مع أبوها وهي حاسه بالقهر ليش ما انكتب لها تشوف مايد.. حنين وصلت أبوها عند ربيعه بيسهر وياه ورجعت البيت، ويوم وصلت شافت سيارة أحمد ولد خالها وكان توه نازل من السياره.. حنين: هلا أحمد زين تذكرتنا يالقاطع.. أحمد: هلا بنت عمتي والله مب قاطع بس والله انشغلت شوي.. حنين: معذور كابتن أحمد، عيل وين حمده مب وياك؟؟ أحمد: لا مايت وياي، بس أنا يايب أبوي.. ونزل محمد من السياره وقعد يطالع حنين.. حنين تمت واقفه تبا تسوعب الموضوع، معقوله هذا خالها محمد.. ركضت له حنين وحظنته وباسته.. أحمد: أبوي هذي حنين بنت عمتي أكبر بناتها.. محمد: معقوله أختي عندها هالقمر، ويني عنكم من زمان.. حنين: خلاص نحن تعرفنا على بعض ومستحيل نخليك بعيد عن حياتنا.. دخلتهم حنين البيت وركضت فوق تدور أمها شافت في طريجها شوق وخبرتها عن خالها.. حنين شافت أمها وسحبتها من إيدها ونزلت فيها تحت.. أم حنين: شوي شوي علي شو تتحريني بعدني شباب.. ها شعندج شو صاي.... وقطعت رمستها يوم شافت شوق حاظنه ريال وتبوسه وأحمد واقف يطالعهم.. فعرفت على طول إنه أخوها.. مشاعر تظاربت بداخلها.. تركض تحظنه ويتسامحون من بعض وإلا ترجع غرفتها وماله داعي تشوفه.. أحمد حس بحيرتها فتقدم منها وباسها على راسها.. أحمد: عموه هذا أبوي الله يخليج تسامحينه وخلونا نرد عيله وحده.. محمد مب قادر يوقف قعد على الكرسي ويلس يصيح مثل الياهل.. أم حنين راحت له بسرعه وباست راسه فسحبها من إيدها وحظنها.. محمد: سامحيني ياأختي والله إني ندمان عدد شعر راسي بس شو أسوي الدنيا غداره ولعبت فيني.. أم حنين: مسامحتنك ياخوي، وطول عمري أتمنى أشوفك بس حسبي الله على الي كان السبب.. حنين وهي تمسح دموعها: خلاص أمايه خالي دخل حياتنا ومستحيل نخليه يتركنا مره ثانيه.. وقعد محمد وأخته يسولفون ويعوضون الأيام الي راحت من عمرهم بعاد عن بعض، ودخل عليهم بوحنين الي من شاف محمد ابتسم وراح يسلم عليه، محمد حس بالذنب معقوله هالريال الطيب هو ريل أختي وأنا الي كنت رافض زواجهم، الله يسامحج ياأم أحمد شو سويتي فيني.. **__**__**__** مر شهر ونص على الأحداث الي طافت، مايد بعده يتعالج برع، وحنين مصبره نفسها بتلفونات مها الي تطمنها عليه، وعبدالله بدا يتألقم مع الوضع اليديد ودايما صورة مها في باله، أحمد وحمده بدوا يزورون عمتهم من تحت لتحت بدون علم الوالده، شوق ملجت وبتتزوج بعد شهرين.. في يوم كانت العيله كلها متيمعه في بيت أم حنين، سوالف وضحك وأكل طبعا، طلعوا البنات والشباب برع يسولفون( ياحبهم حق الحديقه والسوالف).. حنين ارتاحت يوم شافت عبدالله يضحك وياهم، الحمدلله بدا يعيش حياته.. وشوق ساحبنها ريلها ويتمشون بعيد عنهم.. أما عمهم حميد كعادته مسك تلفونه ويلس يسولف بعيد عنهم.. العنود والهنوف حسوا على عمهم يكلم وحده فتسحبوا شوي شوي من وراه وقعدوا يسمعونه.. حميد: فديت روحج والله، تدرين بخاطري تكونين وياي الحينه الكل هني مرتبشين والله بترتاحين مع أهلي.. الهنوف: أكيد بترتاح كفايه بتاخذك انت... العنود: ههههههههه صدناك عمي والله بنفظحك بالبيت كله.. ويركضون يخبرون الشله بالي سمعوه، وحميد يركض وراهم يبا يوقف المصيبه الي بيسونها له.. حميد: والله بعطيكم الي تبونه بس لاتقولون لأي حد.. وقفوا ويلسوا يطالعون بعض.. وابتسموا الإبتسامه الشيطانيه المشهورين فيها.. العنود: أوكي اسمع طلباتنا.. حميد: يالله قولوا.. الله يستر بس.. الهنوف: كل يوم تودينا مكان، يعني باجر السيتي والي بعده الميجا مول والي بعده صحارى.. يعني حواطه مابين دبي والشارجه.. حميد: أوكي راضي.. العنود: شو تتحرانا خلصنا، اصبر هذا أول الخير.. وبعد كل يوم تييب لنا أكل من كنتاكي والبيتزا، وتودينا الألعاب والسوق كل مابغينا نطلع.. حميد: حاظر.. الهنوف: وفساتين عرس شوق على حسابك.. حميد: من عيوني.. العنود: وال.. حميد: بس خلاص ميزانيتي بتروح بسبتكن.. العنود: لا والله أوكي برايك، بس بكلمه وحده منا... حميد: لالالا بس خلاص بسوي الي تبونه.. الهنوف: بس خلاص هاي طلباتنا للحين، بس لو تذكرنا شي بعيد أكيد بنخبرك.. العنود: هي صح وفي شي بعد، يعني لو خطر على بالنا أنا وأختي الحلوه شي ولو في نص الليل تقم تييبه لنا.. حميد: انشاءالله وهالأسبوع بطوله أنا برقد هني عندكم وبصير تحت أمركم.. رجع حميد للشله وهو معتفس من السر الي انكشف.. بس العنود والهنوف مستانسات على الضحيه الي طاحت بإيدهم.. وهم يالسين رن موبايل حنين فشافت رقم مها وكان حذالها عبدالله.. حنين: هلا والله مها، شحالج، وأخبار مايد انشاءالله أحسن الحينه..؟؟ عبدالله سمع اسم مها وحس باحساس غريب داخله، ياربي هالبنيه من شفتها وأنا ما أدري شو فيني، معقوله أكون... لالا أكيد لأنها تشبه المرحومه.. انتبه عبدالله على صوت حنين وهي مستانسه.. عبدالله: شوفيج مستانسه.. حنين: باجر بترجع مها.. عبدالله: مها!! ومايد بيرجع بعد.. حنين: الحمدلله خلص العلاج وبيرد معاهم.. عبدالله: وأنا أقول هالوناسه كلها مب لمها.. حنين عطته نظره وصدت صوب القمر.. يالله يارب ترجعه لي بالسلامه، مب مهم يكون لمنو المهم إنه يعيش.. يارب حقق لي أمنيتي.. الفصل السادس عشر.. مايد وصل البلاد من أسبوع وحنين متحرقصه في خاطرها تشوفه ولو بس لمحه من بعيد.. ومحد حاسس فيها غير مها وهي الثانيه في خاطرها تساعدهم بس شو بإيدها تسوي.. عبدالله قرر يزور مايد في بيته ويتحمد له بالسلامه.. وقف سيارته برع بيت مايد وشاف الباب مفتوح فتقدم يبا يدق جرس الباب يوم لمحت عينه مها واقفه بالحديقة تسقي ورودها.. كان شعرها أسود سواد الليل.. يوصل لآخر ظهرها وكانت محطيه شيلتها على كتفها.. كان يبا يسلم يتحمحم يسوي أي شي بس وقف متصنم في مكانه يطالعها لأكثر من دقيقه.. وانتبه لنفسه إنه الي يسويه غلط وهاي بنت ناس وأخت ربيعه وعيب يراقبها بدون علمها.. فرجع على ورا ودق الجرس.. مها على طول لبست شيلتها ومشت تبا تدخل داخل بس شافت عبدالله واقف عند الباب ومنزل راسه.. فغيرت طريجها وسارت للباب.. مها: هلا والله.. حياك تفضل.. عبدالله: السلام عليكم.. مها: وعليكم السلام.. حياك تفضل مايد بحجرته بوديك له.. عبدالله: آسف إني ييت جيه بدون موعد.. يمكن هو مشغول أو... مها: أفا عليك البيت بيتك، تفضل ومايد حليله يالس في حجرته ملان أكيد بيستانس بشوفتك.. عبدالله: الله يخليج.. مشت مها ووراها عبدالله دخلت الغرفه الي مجهزينها لمايد لأنه مايقدر يركب الدري.. مها: ميودي.. منو تتوقع زايرنك اليوم؟؟ مايد: يالله لو الي في بالي.. مها: ههههههههه دخل وراها عبدالله: تعبان حالك يالنسيب.. مايد: عبدالله!! هلا والله.. ويخاشمه.. عبدالله: حمدلله على سلامتك.. نورت البلاد بردتكم.. مايد: ربي يسلمك ويعافيك.. عبدالله: انشاءالله يبت لي وياك شي حلو.. مايد: هي أكيد يبت لك ريول مكسوره وويه مشوه.. عبدالله: أي مشوه ماشاءالله عليك غزال.. مايد: ههههه قص علي.. مها شو عندج واقفه سيري يييبي عصير فواله أي شي.. مها: هاااا هي آسفه الحينه بسير.. طلعت مها وخلتهم يسولفون.. راحت المطبخ وكل فكرها مع عبدالله.. بس ليش هو بالذات شاغل بالها، هو توه طالع من صدمة وفاة سارا مستحيل يفكر بغيرها.. تحس نفسها بدت تميل له بس الي تحلم به مستحيل.. بعد ساعه طلع عبدالله من عند مايد وهو طالع من البيت شاف مها يالسه بالحديقه سرحانه.. عبدالله: احم احم.. آسف أزعجتج.. مها: لا عادي.. شو مروح البيت..؟؟ عبدالله: هي بسير وبالليل بعد بسير عند حنين صار لي فترة ماشفتها.. مها: والله؟؟ أنا بعد بزورها اليوم بالليل.. عبدالله: عيل مب رايح.. أكيد بتكون مشغوله وياج.. مها: عادي مب مطوله وياها.. بقعد شوي وبروح وبخليك تقعد وياها.. عبدالله: خلاص نحن بنروح وبنشوف حنين منو بتطرد فينا.. مها: هههههه أكيد بتطردك أنا غاليه عليها.. عبدالله: لااااا يعني تتحديني أوكي بنسويها رهان الي بينطرد ينفذ طلب الطرف الثاني.. مها: هههههه موافقه.. يالله عيل تجهز للهزيمه.. عبدالله: بشرط.. لاتخبريها بالرهان.. مها: موافقه.. عبدالله: يالله وداعة الله.. مها: ربي يحفظك مع السلامة.. عبدالله وقف يطالعها بحزن وطلع.. هي حست إنه فجأة تغير، بس هي ماقالت شي.. يمكن سوت حركة أو قالت كلمة وذكرته بالمرحومه.. **__**__**__** حنين قاعده مع أبوها يخلصون أشغال الشركة.. ولاحسوا بالوقت إلا يوم دخلت عليهم أم حنين.. أم حنين: بسكم من الشغل قوموا تجهزوا العرب بيون وإنتوا للحينه تشتغلون.. حنين: ليش أمايه كم الساعه الحينه..؟؟ أم حنين: ست ونص المغرب.. حنين نقزت من مكانها: مها بتيي بعد شوي وللحين ماجهزت.. وركضت حجرتها تتعدل.. بوحنين: هههه لاتطيحين.. أم حنين: بسير بتصل لأخوي محمد.. بوحنين: أشوف صايره وايد تكلمينه، بديت أغار.. أم حنين: حرام عليك خلني أعوض سنين الحرمان.. بوحنين: روحي حبيبتي الله يسعدج.. الساعه ثمان وصلت مها يلست مع حنين بالصاله.. وبعد ربع ساعه وصل عبدالله.. عبدالله: السلام عليكم.. حنين: وعليكم السلام.. هلا والله وينك من زمان ماشفناك..؟؟ عبدالله: والله بالدنيا.. مها شحالج؟؟ مها: تمام الحمدلله.. عبدالله: شكلج مشغوله وانا ييت بوقت غير مناسب.. حنين: لا عادي تعال اقعد شوي.. وبعدين روح.. مها: ههههههه عبدالله: يعني طرده..!! حنين: لامب طرده، وإنتي ليش تظحكين.. مها ميوده نفسها: ولاشي تذكرت سالفه.. عبدالله: حنون لو خيروج بين اليلسه وياي واليلسه مع مها شو بتختارين.. حنين: أمممممم مايبيلها تفكير أكيد بيلسكم إنتوا الإثنين وبقعد وياكم، كل واحد فيكم أغلى من الثاني.. مها وعبدالله قعدوا يطالعون بعض شوي وبعدها انفجروا يظحكون.. حنين: شو السالفه!! ليش تظحكون؟؟ خبرها عبدالله بالسالفه..حنين: أيواااااا أوكي عيل أنا الي فزت بالرهان.. ولازم أتشرط عليكم.. مها: تامرين أمر.. عبدالله: الي تبينه اطلبيه عيوني لج.. حنين: الله طلعت غاليه عليكم.. عبدالله: هههههههه لاتقصين على نفسج وايد.. حنين: هههههه أوكي شو رايكم باجر نتعشا مع بعض باجر.. مها: وين هني والا برع..؟؟ عبدالله: برع أحلى نسير مطعم والا سيتي سنتر.. مها: أمممممم أوكي بس عبدالله ممكن خدمه.. عبدالله: ولو إنج خسرتي الرهان بس يالله طلبي.. مها: هههه مشكور.. أقول يعني لو تقدر تقنع مايد يطلع ويانا.. من رجع من السفر وهو حابس نفسه بالبيت.. والله كاسر خاطري.. عبدالله: بحاول وياه وانشاءالله يقتنع.. يالله الحين أستأذن بسير أسلم على ربيعي بيسافر باجر.. حنين: باااااااااااااي عبدالله: وداعة الله.. مها: ربي يحفظك مع السلامه.. عبدالله قعد يطالعها وحست مها بالدموع متيمعه في عينه.. مها: عبدالله شو فيك؟؟ العصر نفس الشي كنت تضحك وقبل لاتطلع دقك الحزن..!! عبدالله نزل راسه.. حنين: عبدالله خلاص روح وبدق لك باجر نتفق على الموعد.. طلع عبدالله ويلست حنين تمسح دموعها.. مها: حنين شو فيج حرام ليش تصيحين وعبدالله وايد متأثر.. أنا شو سويت.. حنين: مب كفايه وايد تشبهينها بعد حتى بكلامج تعورين قلب عبدالله.. مها: حرام شو قلت.. حنين: ربي يحفظك ماكانت تروح من على لسانها.. مها: الله ياخذني ليش أعذبه جيه.. حنين: لاتدعين على نفسج.. بالعكس عبدالله لازم يبدا ينسى وإلا بيعيش أسير الماضي طول عمره.. مها: إنزين حنون شو أسوي والله حاسه إني بديت اتعلق فيه..؟؟ حنين: حاسه فيج وأباج تستمرين وياه وتخلينه ينسى الماضي.. مها: الله كريم.. حنين: المهم مها كيف خطر ببالج تخلين عبدالله يعزم مايد.. والله إنج سالفه.. مها: هههههههه أفا عليج أفكر فيج انا بعد.. ____________ باليوم الثاني عبدالله قعد ساعه يقنع مايد.. عبدالله: ياريال قوم غير جو بسك كسل.. مايد: عبدالله حس فيني.. أنا لازم أمشي بعكاز وصعب أتحرك بحريه.. وبعدين ويهي بعده محترق كيف بجابل الناس.. وفوق كل هذا حنين.. كيف بقعد وياها بويهي هذا.. عبدالله: انت تعرف حنين اشكثر في خاطرها تشوفك.. وانت حلفت لي انك تحاول تسعدها.. ويالله ياتك الفرصه اطلع ويانا وفرح قلبها.. مايد: بس أنا.... عبدالله: لابس ولا شي اليوم الساعه تسع تجهز وانا بمر عليك.. مايد: هههههههه حكم قرقوش يعني.. عبدالله: قرقوش وإلا فرعون تسع انا عند الباب تسع ودقيقه أنا في حجرك ساحبنك من شعرك.. مايد: هههه بس أقولك أنا مب لابس كندوره بلبس بدله أسهل لي بالحركه.. وإنت بعد البس بدله سوده.. عبدالله: الله يخس ابليسك بتخلينا شرات الزلمات.. بس يالله تمون يالغالي. مايد: فديييييييييييت روحك أنا.. عبدالله: اجلب ويهك.. **__**__**__** الساعه تسع بالظبط عبدالله عند الباب.. ثواني ويطلع مايد هو ومها مايد لابس بدلة سودة وكاب أسود.. ومها كان شكلها بتموت من الظحك.. مايد: السلام عليكم.. مها: مرحبااااااا عبدالله: وعليكم السلام.. مرحبتين.. مايد تحس أشكالنا مال عصابات؟؟ مها: ههههههههه مايد: جب جب إنت أساسا غيرانه نحن أحلى عنج.. مها ركبت ورا مايد ويلست تتطالع عبدالله أول مره تشوفه ببدله بدون غتره وعقال.. والله شي شعره غاوي.. عبدالله التفت على ورا يبا يسحب عصاته فطاحت عينه في عين مها.. وحس إنها كانت قاعده تتطالعه.. مهااستحت ونزلت راسها.. وعبدالله ارتبك من نظرة عيونها.. عبدالله: احم.. مايد شوف هالعصا الغاويه بنزلها وياي، علشان نطقم انت عكاز وأنا عصا.. مايد: هههههه والله حركات.. طوف طوف أشوفك على المطعم.. عبدالله: وبنت عمتي ماتبونها.. مايد: هي بتيي ويانا.. والا بسيارتها.. عبدالله: أكيد ويانا شو تباها تسوق بهالليل بروحها.. ولمن وصلوا بيت حنين شافوها واقفه برع مع واحد وكانت تسولف وتضحك وياه.. مايد: منو هذا..؟؟ عبدلله: اوووه هذا أحمد بنزل أسلم عيه.. نزل عبدالله يسلم عليه ومايد بياكله بعيونه.. مها: هذا أحمد ولد خالها محمد الي متخاصمين وياه من سنين طويله.. مايد حس بصدره يحترق، ليش حنين تسولف وياه وفري زيادة عن اللزوم... يات حنين وركبت من الجهة الي فيها مها.. فصارت مها ورا عبدالله وحنين ورا مايد.. حنين: شحالك مايد.. مايد: بخير.. مها: شوي شوي بتاكلها.. مايد:......... حنين: بلاك مايد شو مستوي.. مايد: ولاشي يالله خلونا نروح.. وصلوا شبابنا المطعم.. ونزلوا وعبدالله يلس يساعد مايد ينزل من السياره.. حنين: هههههههههه مها: ههههههه حسيتي بالموقف؟؟ عبدالله: فظحتونا شو هالظحك.. حنين: أشكالكم حلوه، المافيا في دبي.. مها: خخخخخخ ينفع فيلم أكشن.. مايد: عبدالله ردهن البيت وتعال بنتعشا بروحنا.. حنين: لالالالالا خلاص بنسكت.. مها: هههه هي هي خلاص بنسكت.. دخلوا المطعم واختاروا زاويه بعيده عن الناس.. وطلبوا العشا ويلسوا يتعشون.. بعد العشا راحت مها (تكرمون) الحمام.. وعبدالله يدفع الفاتوره.. حنين: ممكن أعرف ليش مبوز علي وأنا الي ماصدقت إني أشوفك.. صار لي فترة ماشفتك، والا خلاص حنين صارت ماضي..؟؟ مايد: ليش كنت واقفه مع ولد خالج ووايد متشققه من الوناسه..؟؟ حنين: يعني السالفه سالفة غيره.. مايد: ليش.. مب من حقي..؟؟ حنين: آآآآآآآه وأنا الي كل يوم أحترق ولاقلت حقي ومب حقي.. مايد: ومن شو تحترقين؟ ما أعتقد إني سويت شي.. حنين: والله؟؟ وشما الي ملجت عليها وخذتك مني.. الحادث وسفرك وبعدك عني حتى صوتك ماأسمعه.. ترجع من السفر ولا أقدر حتى أشوفك.. أتخيلك طول الوقت مع شما تهتم فيك وتداريك وأنا أحترق مب قادره حتى أشوفك من بعيد.. مايد: يالله ياحنين كل هذا بخاطرج علي، سامحيني ياالغاليه بس والله كل الي قلتيه مب بإيدي.. حنين: أدري والله أدري.. بس شو أسوي النار تلعب فيني وأنا مب قادره أطفيها.. مايد عطني الحل شو أسوي.. والله اني قاعده أتعذب ولاحد حاسس فيني.. مايد: ............... حنين سكتت لأنها عارفه إنه مثلها مو بايده شي.. شوي رجعوا عبدالله ومها، وراحوا كل واحد على بيته.. وحنين ومايد في بالهم فكره وحده.. كيف الدنيا بترد تجمعهم.. وهل بينكتب لهم يعيشون مع بعض والا القدر بيلعب فيهم وبيحكم فيهم بحكمه القاسي.. الفصل السابع عشر.. (( ليتني عرفتك بأول العمر بدري.. وشبعت عيني بالنظر في محياك.. نادم على الي فات من عمري بدري.. والي قضيته دون شوفك ونجواك..)).. شوق مندمجه بالأغنيه وترتب أغراض العرس، شوق من ملجت وهي طايره بعالم ثاني، تحس نفسها انفصلت عنهم وعايشه حياتها الخاصه بعالم كله حب وسعادة.. دخلت عليها حنين وهي تغني ومستانسة.. حنين: حوووووه قصري على المسجل أبا أقعد وياج.. شوق: ههههه سامحيني ما انتبهت لج.. حنين: يالله ياشوق بتسيرين وبتخليني بروحي.. شوق: أكيد بزوركم مب قاطعتكم.. حنين: بذمتج بتشتاقين لنا..؟؟ شوق: أممممم أول شي بلتهي بريلي وحياتي اليديده، وبعدها بشتاق لكم شوي.. حنين: يالنذله، انزين جامليني لو شوي.. المهم خبريني شو باقي حق للعرس..؟؟ شوق: كل شي خلصته تقريبا، بس باقي إني أحجز الفرقة والورد.. و.. هي صح أبا أشتري جلابيات زيادة.. حنين: عنبو ماشبعتي بسج من الجلابيات.. شوق: حرام عليج أنا عروس وأستاهل أكثر.. حنين: الله يهديج ياشواقي.. شوق: وإنتي خلص فستانج وإلا بعده..؟؟ حنين: باجر بيخلص، وبسير أنا وخالي نييبه.. شوق: على طاري خالي هالسبالتين شو ماسكات عليه، أشوفه مفصلهم فساتين على حسابه.. جيمة الفستان الواحد خمسة آلاف درهم.. حنين: ههههه الله يعينه طاح بإيد إبليس.. شوق: أقولج اليوم بسير السوق أشتري شغلات للعرس، بتروحين وياي..؟؟ حنين: لالالالا أكيد هالرزة فرح بتسير وياج، واسمحيلي أنا ما أدانيها.. شوق: هههه براحتج، بس أقولج يوم العرس لا تتظاربين وياها.. حنين: روحي روحي الله يعيني عليها يوم العرس.. على المغرب طلعت شوق بسيارتها ومرت على فرح وراحوا السيتي سنتر.. فرح: شوق خلينا نفوت السينما شوي، والله أفلامهم اليوم بتعقد.. شوق: تعقد وإلا مو تعقد أنا يايه هني أتشرى لعرسي ومب فاضيه لخرابيطج.. فرح: أوكي بس إنتي فوتي لوحدك هالمحلات، أنا بدي إقعد مع أحمد شوي.. شوق: إنتي ماتوبين حرام عليج الريال يتسلى بج، وإنتي عادي عندج.. فرح: إيه وشو فيها مصرياته كتيره وأنا أستاهل.. شوق: هبله.. دخلت شوق المحل وودرتها برع، وخلصت مشترياتها ويوم طلعت دورت فرح ولقتها متيلسه ويا الحبيب، فاتصلت بها.. شوق: فروحه يالله تعالي بروح البيت.. فرح: استني شوي أحمد بيحكيلي حكاية.. شوق: أويييييييييه أوكي شو رايج أنا بسير وخليه هو يوصلج.. فرح: وإنتي ليش مستعجله خليكي شوي.. شوق: أوكي بقعد ربع ساعة زياده وبعدها بروح.. فرح: ميرسي ياحبيبتي.. شوق يلست على الطاوله الي بعيده عنهم، وتراقبهم وتشوف أحمد يضحك مع فرح وعينه عليها، شوي وطلع من مخباته هدية صغيره وعطاها حق فرح الي خذتها وحطتها بشنطتها.. وقامت عن أحمد وراحت عند شوق.. وقبل لايمشون شوق شافت جاسم ياي صوبهم وشكله معصب.. شوق: هلا والله شو يايبك هني..؟؟ جاسم: يابتني ريولي.. انت شو تسوين هني..؟؟ شوق: والله عروس وأتشرى لعرسي.. جاسم مسكها من إيدها وأخذها على جنب.. جاسم: هاي الي وياج ليش كانت قاعده ويا هذاك الريال، شوق شو يقرب لها.. ربيعها صح..؟؟ شوق: جاسم هدي اعصابك نحن بالسوق.. جاسم: طوفي أشوفج جدامي وصلي هالعله وبنتفاهم بالبيت.. راحت شوق ورا ريلها وهي خايفه تعرفه يوم يعصب لاحد يوقف بويهه.. يوم وصلت البيت دخلته الميلس عسب لاحد يسمع ظرابتهم.. جاسم: شوق اسمعيني وحده بهالأخلاق شو تبين بها.. إلا إذا إنتي بعد...!!! شوق: أنا شوووو..؟؟ جاسم صون لسانك أنا محترمه وتربية أهلي.. وعيب عليك هالرمسة.. جاسم هدا أعصابه شوي: بس ياحبيبتي الي بيشوفكم بيقول هاي شراتها مب مربايه.. شوق: أدري بس والله مو بايدي هاي ربيعتي وأنا.. جاسم: شوق اسمعيني عدل نحن عرسنا قريب ومب مسويلج مشاكل أوإني بسيطر على حياتج، بس من نعرس تخففين من علاقتج بها.. شوق: انشاالله.. مايصير إلا الي انت تبيه.. طلع جاسم عنها وراحت شوق تخبر حنين بالي صار وهي تصيح.. شوق: حنين والله حسيت نفسي صايعه جدامه مع إني مب مسويه شي.. حنين: ألف مرة قلت لج فرح هاي أكبر صايعه ومبين عليها، وإنتي بروحج تدرين بسوالفها، فصلحي موقفج جدام ريلج أحسن لج.. شوق: شو قصدج؟؟ حنين: قصدي ريلج أبدا من هالفرح ومستقبلج بإيدج، ولو ظلت هالفكره براس جاسم ممكن يظن إنج مثلها وزود بعد.. شوق: والمعنى..؟؟ حنين: تقطعين علاقتج بها، وما أعتقد إنج بتفظلين هالفرح على حبيب قلبج وريلج.. ووحده مثل هاي يوم عرفتي عن سوالفها المفروض من نفسج تودرينها. شوق: معاج حق، انا كنت دايما معترضة على علاقاتها بس.. بس عمري مافكرت أودرها.. حنين: عقلج براسج تعرفين خلاصج.. ويالله أخليج بسير أرقد وراي دوام الصبح.. طلعت حنين وخلت شوق بروحها.. الي على طول مسكت تلفونها وقطعت علاقتها بفرح، ووصلت علاقتها بريلها أكثر.. **__**__**__** في أحداث بدت تصير وتغير مجرى حياة الكل بدون لايدرون.. مها بدت تحب عبدالله بس هي حاسة إنه بعده أسير الماضي وخايفه يحبها لمجرد شبهها بالمرحومه.. مايد تعود على شما صحيح إنه ماحبها بس هي زوجته وبدا يتأقلم على وجودها بحياته.. أما حنين فتحس بإنه أحمد ولد خالها بدا يحبها وهي ترتاح له ولسوالفه بس مب لدرجة الحب.. تحسه أخوها مب أكثر من جذيه بس هو متعلق بها وايد.. باجي أسبوع على عرس شوق والكل مرتبش، طول الأسبوع دق ورقص ووناسه.. وقبل العرس بيومين سوت شوق حفلة الحنا.. وعزمت ربيعاتها وبنات العيله.. وحنين عزمت مها، ويلسوا البنات ربشة وضحك ورقص.. حنين: ياربي نسيت العصير على الطاوله بالمطبخ والله تعبت من الشغل.. مها: خليج إنتي أنا بسير أييبه.. حنين: لافديتج ارتاحي أنا بسير هاي أختي.. مها: وأختي أنا بعد ولازم أتعب لها أنا الثانيه.. راحت مها المطبخ تييب صينية العصير، وشلت صينية العصير وهي طالعة دعمت في واحد كان داخل المطبخ، وعلى طول مسك الصينية لاتطيح عنها.. مها: آآآآآآي شوي شوي.. عبدالله الحمدلله انك مسكت الصينية وإلا كانت بتستوي حفلة بالمطبخ.. عبدالله: هههه أفا عليج رجل المواقف الصعبه أنا.. مها: ههههه يالله عطني الصينية وخلني أرد للبنات.. عبدالله: تو الناس خلج وياي شوي.. مها: خل عنك هالسوالف إذا حد شافني وياك بتييب لي الكلام.. يالله أشوفك خوز من طريجي.. عبدالله ابتسم لها ووسع لها المكان علشان تطلع.. طلعت مها وراحت لحنين الي شافتها شاقة الويه بإبتسامه حلوه.. حنين: رحتي تييبين عصير وإلا تشوفين الخطيب، بلاج شاقه الويه بالضحكة.. مها: هههههه شفت عبدالله بالمطبخ.. حنين: أيوااااااااااااااااا مها: خل عنج زين، قومي عني أشوفج بسير أرقص.. واستمرت الحفلة لنص الليل والكل راح لبيته، إلا مها الي يلست مع حنين يسولفون لين دخلوا عليم أبو حنين وعبدالله حميد.. أبوحنين: إنتوا للحين سهرانات.. مها: حنون الساعه وحده ونص والله مب حاسه بالوقت.. حنين: خييييييييييبه وحده ونص.. والله الوقت معاج ماينحس فيه.. أبوحنين: يالله أبوي وصلوا البنيه لأهلها، أنا بسير أرقد.. تصبحون على خير.. عبدالله: سيارتج برع..؟؟ مها: لا أنا ماعندي سيارة، بدق للدريول.. عبدالله: شو دريول نص الليل إنتي بعد، تعالي بوصلج أنا وحميد وحنين.. مها: بس... حنين: معاه حق الدنيا الليل ونحن بنوصلج.. طلعوا كلهم يوصلون مها وعبدالله مستانس إنها بتركب سيارته.. مها: والله سيارتك حلوه ياعبدالله.. كاشخ فيها.. حنين: لازم بيكشخ بها يموت عليها وينظفها ليل نهار.. عبدالله: لعلمج بس لا أكثر هاي العزيزة الغاليه.. مها: هههه الله يهنيها بالغلا كله.. حنين: عمي بخاطري اعرف شو سالفتك ويا العنود والهنوف.. أحسهم مسويين لك شي..؟؟ حميد: خس الله إبليسهم والله إني بسير بشتغل بدوام اضافي.. عبدالله: إنزين انت ليش معذب نفسك، ارتاح وريح غيرك.. حميد: جب جب ولاكلمه.. إذا رمست بذبحك.. حنين: عمي السالفه فيها إن.. وإن كبيرة بعد.. مها: خلاص عبدالله وقف هني بمشي لداخل بروحي.. عبدالله: لاوالله أنزلج على راس الشارع وانت تمشين لداخل، بوصلج لباب البيت.. وصلها عبدالله ونزلت حنين وياها تتسامح من أهلها على التأخير ويوم دخلوا الصاله وقف قلبها، شافت مايد راقد على الكنبه وشما حذاله تأكله بإيدها.. مها: السلام عليكم.. شما هني متى وصلتي..؟؟ شما قامت تسلم على مها وحنين، وحنين حاسة إنها خلاص بتطيح من طولها.. شما: اليوم المغرب واصله، سألت عنج قالولي عند حنين، حنين شحالج..؟؟ حنين: بخير ربي يعافيج.. مايد: حنين تفضلي ليش واقفه.. حنين: ها.. لا.. عمي برع يترياني هو وعبدالله.. مايد: سلمي عليهم وحشني عبدالله من زمان مازارني، قوليله عتبان عليه.. حنين: يبلغ.. يالله مها أنا بسير.. مايد: حنين.. سامحيني.. حنين على طول طلعت وخلت شما واقفة تتطالع مايد وتبا تعرف على شو يسامحها.. حنين ركبت السياره وهي بتموت من الضيج، ومن سألها عبدالله شوفيها.. انفجرت تصيح وحميد مستغرب، بس عبدالله حس إنه مايد السبب.. وصلوا حنين البيت وراحوا لبيوتهم، عبدالله اتصل بها قبل لايوصل لبيته، كان حاس بالي في خاطر حنين ومب هاينه عليه يودرها وهي بهالضيج كله، كلمها وخبرته بالسالفه كلها.. عبدالله: حنين هاي زوجته ومن حقها تأكله وتسهر وياه.. و.. حنين: عبدالله بس كفاية، والله حرام الي يصير فيني الحينه انا طول عمري عايفه الحب والخرابيط ويوم ييت أتغير علشانه يودرني وياخذ غيري.. حرام والله حرام.. عبدالله: حنين هذا الي الله كاتبه، وانت مالج نصيب فيه، والله بيعوضج خير بداله.. حنين: خلاص عبدالله تصبح على خير.. برقد والله يعيني على الي ياي.. بندت حنين وكلها قهر على الدنيا الي حارمتها من أعز الناس.. **__**__**__** اليوم عرس شوق والكل مشغول الي بالصالون والي تجهز نفسها للحفلة بالليل، وحنين ومها راحوا الصالون مع بعض ووداهم عبدالله ورجع ياخذهم يوم خلصوا، مها ركبت ورا عبدالله وعقت الغشوة وحنين يلست حذالها وعقت الغشوة هي الثانيه.. حنين: عاد لاتتطالع ورا نحن مب متغشيات.. عبدالله: شو يعني حرام أشوفكن كاشخات...؟؟ مها: شو قصدك نحن شينات؟؟ والله حلوات بمكياج أو بدونه.. عبدالله: أكيييييييييد مايبيله كلام.. عبدالله يسوق ويسرق كم نظرة صوب مها الي استحت ورجعت تتغشى مرة ثانيه.. حنين ضحكت عليهم وعبدالله استحى من حركاته.. وصلهم عبدلله الفندق ورجع عند الشباب، حنين ومها دخلوا عند شوق في غرفتها بالفندق.. مها: ماشاءالله عليج وااااااايد حلوه.. حنين: الله الله عذاااااب الشكل.. شوي ويدخلون عليهم بنات عمهم وبنات خالتهم والعيله كلها.. وجدان: يالله يابنت عمي اشحلاااااااااااااتج.. شوق: قولي ماشاءالله لاتحسديني وأطيح عليكم.. حنين: بسم الله عليج كله ولاشواقي عاد.. وجدان: وهالهرم عبود نبيه يودينا الصالون يقول مب متفرغ لنا، عيل متفرغ حق الحسناوات.. حنين: أنا سألته لو فاضي قالي هيه عادي إخواتي راعية الصالون بروحها بتييهم البيت.. وجدان مدت بوزها وصدت الصوب الثاني.. ومها حست بالإحراج بس ليلى عالجت الموضوع.. ليلى: خل عنج البارح بالليل سألنا منو بيوديكم الصالون وقلناله إنها بروحها بتيينا البيت، بس انتي لازم تتدلعين.. وجدان: ولو.. المفروض يقعد بالبيت يمكن في أحد يحتاجه.. مها: إنزين هو وصلنا للصالون وراح لادخل ويانا وتأخر بالصالون.. شوق: يمكن وجدان تتحراه دخل يتمكيج وياكم.. حنين: هههههههه أي عقل هذا.. مها: ماشاءاالله عليه ريال مب بنيه.. وجدان: أنا غلطانه قعدت وياكم، بنزل صالة العرس أحسن لي من القعدة وياكم.. مها: بلاها زعلت..؟؟ ليلى: ماعليكم منها دلوعة، يالله شوق زهبي روحج بعد شوي بتطلعين.. شوق: خيييييييييبه قامت ريولاتي تتنافظ.. مها: ههههه الله يعينج يوم بيدخل المعرس.. شوق: لا هذا عادي فديته حياه الله.. ليلى: ههههههه الله يهنيك ياولد عمي.. بعد ربع ساعه نزلت العروس على موسيقى كلاسيك هاديه وصوت عصافير وصوت البحر، وكانت الليتات مبنده والإضاءه خفيفه، وشوق الله يحفظها ملاك يمشي على الأرض، هي تمشي والكل يصلي على النبي ويقرا عليها قرآن.. ويوم وصلت للكوشه ويلست إشتغلو البنات بالرقص والربشه، والكل كانوا مستانسين.. وعلى الساعه12 ونص قالوا المعرس بيدخل، وشوق كانت مجهزة أغنيه يدخل عليها.. يغنيها راشد الماجد وأحلام.. مرحبا ياأجمل عروس في الوجود.. مرحبا بالزين كله والجمال.. مرحبا بك ياوفا القلب ودود.. ياسنين المجد يا مجد الرجال.. قعد جاسم مع شوق وهو متشقق من الوناسه، حاس الدنيا مب شايلتنه بالوناسه، وبعد ساعه انتهت الحفله ودخلوا المعاريس غرفتهم والكل وياهم، وشوق يلست تصيح والكل مستغرب هي نفسها استغربت من نفسها.. حنين: الله وأكبر شوق صاحت.. كييييف..؟؟ جاسم: شو قصدكم حرمتي ماعندها مشاعر..؟؟ أم حنين: لا بس هي كله تتريا لحظة عرسها، والكل توقعها تضحك مو تصيح.. شوق: حرام يعني مابقعد مع اخواني بعد اليوم..؟ وجدان: إنتي مب ميته إلا بتسيرين بيت ريلج.. حنين: الله وأكبر عليج، شو ميته هاي بعد.. جاسم: اذكري الله عليها شو هالرمسة بعد.. وجدان: انتوا شو فيكم علي اليوم.. بطلع أحسن لي.. أم حنين: كلنا بنطلع بنخليكم ترتاحون.. سلموا البنات على شوق وجاسم وطلعوا عنهم، وجاسم ماسك إيد شوق يلاعبها.. جاسم: شوق..؟؟ شوق: ياروح شوق.. جاسم: فديييييييييتني كم بعيش أنا.. شوق: العمر كله يارب.. جاسم: حياتي قولي آمين.. شوق: آآآآمين.. جاسم: قولي: آآآآآآآآآآآآمين.. شوق: آآآآآآآآآآمييييييييين.. جاسم: قولي آآآآآآآآآآآآآآآآآميييييييييييييييييييين.. شوق: آآآآآآآآآآآآآآآآآآآميييييييييييييييييييين.. جاسم: نموت أنا وانت بيوم واحد.. وانتهت ليلة الحب بكل فرح وسرور، قلبين جمعهم الحب والوفا، وباقية قلوب تتريا رب العالمين يجمعهم.. الفصل الثامن عشر.. وصلت حنين للدوام وراحت مكتبها، واتصلت بعبدالله وطلبت منه إييها مكتبها بسرعه.. خمس دقايق وسمعت صوت دق على الباب.. حنين: تفضل.. عبدالله: صباح الخير. حنين: صباح النور، هلا والله.. عبدالله: شخبارج وشو أخبار معاريسنا الحلوين..؟؟ حنين: تمام اليوم الفير سافروا على ماليزيا.. عبدالله: الله يهنيهم انشاءالله.. حنين: عقبالك.. عبدالله حس بقلبه يعوره.. ونزل راسه وسرح.. حنين: عبدالله وين وصلت..؟؟ عبدالله تنهد بحرارة وتم ساكت.. قامت حنين من مكانها وراحت تيلس مجابلتنه.. حنين: عبدالله.. الله خلق الدنيا وأحداثها لحكمة من رب العالمين.. والي صار لك ممكن يصير لأي شخص ثاني، بس إنك تظل أسير الماضي طول عمرك، هذا حرام وإعتراض على حكم الله.. عبدالله: لشو تبين توصلين..؟!! حنين: انك تستمر بحياتك.. تشتغل وتضحك و..تحب.. حالك حال باجي خلق الله.. عبدالله: أحب!! ومنو الي تستاهل الحب غير سارا.. حنين: الدنيا بعدها بخير وبنات الحلال وايدات.. عبدالله: بس منو مثل الغاليه، منو بحلاتها ورقتها وقوتها و.. حنين مستحيل ألقى مثلها.. حنين: ومها..؟؟ عبدالله: ..................... حنين: مها تشبه المرحومه وايد، وحبوبه واجتماعية وشخصيتها قويه، و... عبدالله: بس فيها شي واحد ناقص.. إنها مب سارا. حنين: عبدالله لاتصعب الموضوع، مها تحبك ومتعلقة فيك، بس انت عطها فرصة.. عبدالله: تحبني..؟؟!! حنين: لاتسوي نفسك غشيم، إنت حاس بحبها.. وإنت بعد بديت تتعلق فيها بس تكابر على روحك.. كلما بديت تعترف بحبها تقوم تحط الحاجز الكبير بينكم.. عبدالله: بس ياحنين أخاف.... حنين: تخاف من شو؟؟ من إنك تظلمها!! صدقني هي مستعده إنها تتحملك الين تعيش حياتك طبيعي.. عبدالله: مب هذا الي أخاف منه، خوفي من إني أحبها وأتعلق بها و.. و أفقدها مثلما فقدت سارا.. حنين: هذا دليل على حبك الي بدا يكبر تجاه مها.. عبدالله: حنين والله إني أستانس بشوفتها وأشتاق لو مر الوقت بدون لا اشوفها، بس حب.. لالا.. حنين: أوكي عبدالله هذا مب حب مجرد إعجاب، خلك جيه وخل شعورك يتكون شوي شوي.. عبدالله: شو قصدج..؟؟ حنين: قصدي لانستعجل الحب خله بيي مع الوقت.. عبدالله شكله اقتنع بهذا الراي وابتسم لحنين، شوي وحد يدق عليهم الباب وتدخل عليهم مها، ابتسمت حنين لها وراحت تسلم عليها، وعبدالله وقف وهو يطالعها وقلبه يدق وبدا يحسسه إنه بدأ أول خطوة في طريق نسيان الماضي.. **__**__**__** في بيت مايد.. مايد حاس بضيج الدنيا كله بصدره، من فترة وهو مبتعد عن حنين وصاير يقضي كل وقته مع شما، كان يبا يعطيها فرصة تثبت له إنها تحبه وإنها بتتغير علشانه، وللأسف توقعاته كلها غلط، شما كل همها كشختها وطلعاتها.. وفي يوم طلب منها يشوفها بدون مكياج عصبت وصرخت عليه، ومن هاذاك اليوم تكسرت كل آمال مايد بإنها تغير.. اليوم عبدالله بيزور مايد، لأنه عنده سالفة يبا يقولها له.. راح مايد الميلس يترياه هناك.. دقايق ووصل عبدالله..: السلام عليكم، شحالك مايد.. مايد: وعليكم السلام.. الحمدلله ربي يعافيك.. عبدالله: عاد سامحني من فترة لامريت عليك ولا اتصلت بك.. مايد: مسوح ياخوي، والله أنا بعد قاطعنك المفروض أتصل وأسأل عليك.. عبدالله: أهم شي طلعنا نحن الإثنين غلطانين..هههه مايد: هههههه الله يخس إبليسك.. عبدالله: المهم ميود بغيتك بسالفة.. مايد: آمرني الشيخ.. عبدالله: مايامر عليك عدو، باجر بالليل بنطلع العزبة أنا والعيلة كلها ونبيك تروح ويانا.. شو قلت.. مايد: أممممممم حنين بتروح..؟؟ عبدالله: هههههه هني العوق، هي بتروح معانا.. مايد: والله فرصة من زمان مايلست معاهاوحشتني.. عبدالله: هي صح اعزم مها أختك مع إني أظن حنين عزمتها.. مايد: بشوفها لو ماعزمتها حنين بسحبها وياي.. طلع عبدالله عن مايد وركب سيارته ولمح طيف الي واقفه عند شباك حجرتها تتطالعه ابتسم لها فانخشت ورا الستاره، راح عبدالله وكله أمل تتغير حياته على إيدها.. وفي بيت حنين.. حنين وإخواتها مرتبشات يجهزون أغراضهم للسيره بالليل.. وأمها محتشرة ماتبيهم يسيرون.. حنين: أمايه بلاج حاشرتني العيلة كلها بتروح.. أم حنين: بس خاواتج شياطين وأخاف يسوون مصيبة من مصايبهم.. حنين: ههههه لا أمايه مب لهالدرجه هم صح شياطين بس فيهن شوية عقل.. أم حنين: انزين على راحتكم بس خلي بالج منهم.. حنين: انشاءالله أمايه.. على الساعه 9 بالليل الكل جاهزين للطلعه ووصلوا فجأة أحمد وحمده، حمده استانست وحبت تروح وياهم بس أحمد تردد وطبعا ربشوه الشباب وعزم يروح وياهم.. فركبت معاه في السيارة حمده وحنين العنود والهنوف، والسيارات الثانيه يسوقوهن حميد وعبدالله وعيال عمهم.. وصلوا العزبة وانتشروا في المكان يجهزون المكان للمبيت.. على الساعة 12 وصل مايد وأخته مها وابتدت الحفلة، الشباب يدقون ويغنون والبنات زهبوا العشا ويلسوا يطالعون ربشة الشباب.. بس ماطولوا سهرة لأنهم تعبانين، فدخلوا كلهم يرقدون ماعدا حنين ومايد وأحمد وعبدالله.. أحمد: والله لو تدري أمي عنا بتسويلنا حفلة.. عبدالله: الله يعينكم، أقول مايد سير ارقد أحسك تعبان.. مايد: لاتعبان ولاشياته، ادخل انت ارتاح أنا سهران للصبح هني.. حنين: أنا داخله أرقد لأني سمعت البنات بينشن الفير وأبا أقوم وياهن.. أحمد: خلاص أنا بعد بدخل أرقد.. مايد:وانا شو ايلسني هني؟؟ أجابل عبود بس، خل أروح أرقد أحسن لي.. عبدالله: خلك عيل مب مساعدنك عشان تقوم.. حنين: ههههه رحت فيها عيل.. مايد: حبيبي عبادي.. عبدالله: آآآآآآآآخ منك، خلاص كسرت خاطري بشيلك وأمري لله.. دخلوا يرقدون كلهم، بس حنين من دخلت الغرفة مايالها رقاد حاسة بأحاسيس غريبه، انها في مكان واحد ويا مايد..وشعور احمد تجاهها.. يارب توفقني للطريق الصحيح.. **__**__**__** قبل الساعه 5 الفير البنات كلهن صاحيات طلعوا برع ويلسوا يتمشون والجو كان روووووعه.. العنود: شو رايكم نسير نتسبح في المسبح..؟؟ حنين: لا والله؟؟ أخاف الشباب يقومون ساعتها بتكون صج فشيلة.. الهنوف: أصلا هم راقدين الساعه 3 ونص يعني مستحيل يقومون الحينة.. ليلى: وانتي شو دراج متى رقدوا..؟؟ العنود: أنا وياها كنا قاعدات نطالع الفيلم الهندي، وسمعنا أصواتهم يسولفون ويضحكون.. حنين: يعني مارقدتن..؟؟ العنود: لا طبعا، بنرقد بعد الريوق.. وجدان: عيل خلاص خلونا نبدل ونسير نسبح قبل لايقومون من الرقاد.. راحوا البنات يبدلون ثيابهم ويتسحبون شوي شوي لايحسون عليهم الشباب، وقعدوا يسبحون ويلعبون بالماي واستانسوا من الخاطر.. حنين: هههه الله يخس ابليسكم، يالله خلونا نطلع الشمس طلعت.. وجدان: تدرون إني تولهت على شواقي، فدييييييييتها لو كانت هني صج بنستانس.. ليلى: بس هي الحينه مستانسه أكثر عند أخوج.. حنين: هههه صح والله.. فديت أختي الله يسعدها.. مها: الله يرجعها بالسلامه.. طلعوا البنات من المسبح وراحوا يتلبسون وبقت حنين تسحب الماي من الحوض، ويوم خلصت راحت تركض لحجرتها قبل لاأحد يشوفها.. ودخلت الصاله وقبل لاتوصل حجرتها ماحست بعمرها إلا وهي تدعم فواحد.. طاحت حنين وسمعت صوت عصا تخبط بالأرض، فاستنتجت إنه مايد.. مايد بس طاحت عصاته وهو ظل واقف يطالع حنين، كانت لابسه بنطلون وقميص وشعرها الطويل مفتوح ومبلوله بالكامل.. مايد تم مبحلج فيها ومرتبك، وحنين من المفاجأة تمت طايحة على الأرض ويوم حست بموقفها المحرج قامت تركض لحجرتها، دخلت وسكرت الباب بقووو، مها كانت موجوده في الغرفه وشافتها وهي محمرة.. مها: حنين شو فيج؟؟ شو صاير لج..؟؟ حنين: مها الحقي علي.. مايد.. مايد.. مها خافت: أخوي شو فيه ش صارله..؟!! حنين: مايد شافني وأنا يايه أركض دعمت فيه وشافني جيه بالبنطلون ومب لابسة شيله.. مها: الحمدلله.. والله خفت على أخوي.. حنين: أنا وين إنتي وين.. حرام عليج مايد شافني وأنا.. وأنا.. مها: ههههههه ببدل وبسير أتطمن على قلب أخوي الله يعينه شاف غزاله الشارد.. طلعت مها وخلت حنين وهي بتموت من الموقف الي صار، بعد نص ساعه طلعت حنين الصاله وشافت البنات يزهبون الريوق فبدت تساعدهم وشافت مها تدخل عليهم وهي ميتة من الضحك.. ليلى: خير انشاءالله شو فيج تضحكين..؟؟ مها: هااا لا ولاشي بس مايد ذبحني من الضحك.. حنين استحت وعطت مها ظهرها وشالت صينية الشاي وطلعت الصاله، شافت الشباب متيمعين ومايد من شافها نزل عينه بالقاع، قام عمها حميد وأخذ الصينيه عنها.. حميد: صباح الخير حبيبتي.. بتتريوقون ويانا وإلا بروحكم.. حنين: صباح النور عمي، لا بناكل عند المسبح.. أحمد: ياسلام على الرومانسيه ريوق في الهواء الطلق.. حنين حست بمايد إنه مستحي من الموقف فطلعت عنهم وسارت المسبح تتريق مع البنات.. بعد ربع ساعة طلعوا الشباب وكانوا لابسين شورتات يبون يسبحون، وقعدوا فضحكوا عليهم البنات.. العنود: شوفوا شوفوا عمي شكله يضحك ههههه.. الهنوف: ههههههه عمي ممكن صورة.. حميد: جب جب، سيرن داخل خلونا ناخذ راحتنا.. عبدالله: شو ها..؟؟بقايا ماي متيمع في الحوض، في حد سابح الفير شو..؟؟ البنات استحن ونزلن روسهن ومايد استنتج على طول الماي الي كان مبلل حنين الفير... علي: لايكون البنات شادات حيلهن وسابحات الفير بالمسبح.. وجدان: صادوووووه.. حميد: هههههه والله إنكن مصايب، هاي أكيد أفكار العنود والهنوف.. حنين: أنا بسير أغسل الصحون وبرتب الغرف.. أحمد: بترتبين غرفنا بعد.. حنين: هي أكيد، وإلا تبيني أخليها لوث، الشباب معروفه غرفهم كيف يسممونها.. حميد: عيل الله يعينج على الي بتشوفينه.. هههه عبدالله: يالله بنات كلكن سيرن داخل ساعدوا حنين.. راحوا البنات وخلوا الشباب يسبحون براحتهم، كل بنية مسكت لها غرفة ترتبها، حنين ومها دخلوا ينظفون غرفة مايد وعبدالله، وكل وحده ترتب وسرحانه بعالم ثاني.. الفصل التاسع عشر.. الشباب والشابات بعدهم بالعزبة وأهلهم حاشرينهم يبونهم يردون، بس الي شايف الوناسه والضحك طول الوقت وين بيفكر في الرجعه للشغل والمحاضرات.. حميد قاعد يتمشى قرب المسبح وهو يرمس بالموبايل ولا انتبه لحنين الي بدت تتقرب منه.. حميد: شو سالفتج اليوم..؟؟ قلت لج اصبري علي شوي..... حرام عليج إنتي روحي ودنيتي كيف تبيني أخلي واحد غيري ياخذج.... أدري أدري بإني طولت بس أنا.. ألوو...؟؟ ألوووو..!! سكر حميد التلفون ويلس يفكر ولاهو عارف شو يسوي.. حنين: عمي..؟؟ حميد التفت لها: حنين انتي من متى هني..؟؟ حنين: يعني هاي السالفة الي ماسكينك عليها إخواتي، والي عبدالله يعرفها وإنت ماتبي أحد يعرف عنها.. إنزين عمي لو إنت تحبها ليش ماتخطبها..؟؟ حميد: حنين إنت تدرين إني أباج تعرسين وبعدين.. حنين تقاطعه: عمي اسمحلي بقطع رمستك، شو يعني تبيني اعرس أول، هاي إختي شوق خليتها تعرس وهي أصغر مني، والحينة إنت رابط مصيرك فيني.. حميد: حنين اسمعيني أنا أبيلج كل خير.. بس.. حنين: لابس ولا شي، عطني التلفون أشوفك.. اتصل حميد على رقم وعطاها.. حميد: اسمها عذاري.. حنين: السلام عليكم، شحالج عذاري... أنا حنين أكيد عمي رمسج عني وايــــــــد... هههه اكيد بالخير عمي يحبني.. أقول ممكن تحددي حقي موعد أشوفج وأتعرف على خطيبة عمي اليديدة.. حميد: حنون شو فيج إنتي.. حنين: عمي اسكت هاذي سوالف بنات.. انزين عذاري، شو رايج باجر بالليل في السيتي سنتر.. خلاص عيل بشوفج هناك الساعه 8 ونص، وداعة الله الغاليه مع السلامه.. حميد: حنون مب على كيفج تحددين و... حنين: عمي إنت ضحيت علشاني وايد والحينه أنا الي لازم أزوجك وبعدين من الي فهمته منها إنه في واحد متقدم لها.. حميد: والله بموت ياحنون لو حد خذاها مني.. حنين: بعيد الشر عنك وانشاءالله بتكون من نصيبك، ومابيعدي هالشهر إلا وهي خطيبتك.. وهم قاعدين يسولفون سمعوا أصوات ضحك الشباب فقاموا وراحوا لهم، وشافوهم مجهزين البانشيات يبون يركبون والهنوف محتشرة عليهم.. الهنوف: حرام عليك عبدالله والله خاطري أركب.. عبدالله: سيري أشوفج عند البنات يالله.. حميد: عبدالله شو فيك تزاعج على البنيه.. الهنوف: عمي الله يخليك ركبني على البانشي.. حميد: حبيبي أخاف تطيحين.. الهنوف: إنزين إركب معاي.. حميد: لاحيلة كله ولابنات أختي.. حنين: عمي من كل عقلك تباها تركب لالالالا مستحيل أخليها.. حميد: حنون أنا بكون وياها لاتحاتين شي.. الهنوف كانت لابسة بدله كويتيه فركبت ورا عمها وتمسكت فيه عدل، وأول مابدا يمشي قامت تزاعج.. الهنوف: وتنزل الى حلبة السباق طويلة العمر الهنوف.. حميد: هههههههه والله متفيجة إسكتي لا أدعم فيج.. وجدان: عبدالله أنا بعد بركب أنا لابسة بدله مثل الهنوف.. عبدالله: أوكي تعالي.. وركبت وجدان مع عبدالله، وجميلة مع أخوها علي.. وحمدة مع اخوها أحمد.. وبقت حنين ومها ومايد وليلى بنت عمة حنين.. ليلى: لو فهد أخوي هني كنت بركب انا بعد بس الله يسامحه طول حياته سفر.. حنين: وحسرة علي انا ماعندي أخو أركب وراه.. مها: عندج عمج، سيري البسي بنطلون واركبي وياه.. حنين: لا والله .. استحي.. مايد: وانتي مها ماتحسرتي على أخوج الي وجوده من عدمه.. مها: فديت أخوي أنا والله محد يسواك، بس انا الي ما أبا اركب أخاف من البانشيات.. حنين: مايد لاترمس جيه مرة ثانيه بزعل عليك.. مايد ابتسم واستانس إنها تحاتيه، شوي وياهم عبدالله.. عبدالله: حسبي الله عليج ياوجدانوووه دبة كسرتي البانشي.. وجدان: لاوالله إنت الدب مب انا.. عبدالله: ياالله مايد تعال.. مايد: هههه تتطنز حظرتك، تعرفني يالله يالله أشيل نفسي الحينه تباني أركب هالغبر.. عبدالله: تعال ياريال بساعدك.. عبدالله يلس يسحب في مايد الين ركبه، ويسوق مايد ويلف عليهم وهو مستانس، بس فجأة ماقدر يتحكم بريوله فدعم بالطوفه، الدعمه بسيطة بس سوت صوت عالي، فتراكضوا كلهم عليهم.. عبدالله وهو يسحبه من على البانشي: يعورك شي..؟؟ حاس بشي..؟؟ مايد: لالا الضربة خفيفه بس ريولي مب حاس فيها.. عبدالله: الله ياخذني أنا الي ركبتك.. مايد: لاتدعي على روحك قضاء وقدر.. حنين: خله على الأرض يرتاح شوي.. حنين مسكت ريوله وتحركها: أقولكم سيروا بعيد خلوه يتنفس شوي.. الكل ابتعد عنهم وأحمد راح إييب له ماي بارد.. مها: مايد حاس بألم أو شي..؟؟ مايد: مها لاتحاتين الضربة بسيطة، بس حسيت بريولي تشنجت وماقدرت اتحكم بالبانشي... حنين: انت ريحها شوي وبنحط عليها ماي بارد.. مايد وهو يبتسم لحنين: خايفة علي.. حنين: لو ما أخاف عليك إنت أخاف على منو.. عبدالله: إحم إحم مها خلينا نروح نخليلهم الجو.. مايد: كلك نظر.. أحمد وصل بالماي وسمع الحوار الي دار بينهم، وشاف عبدالله ومها وهم يسيرون بعيد عنهم، عطا حنين الماي وابتعد عنهم وهو حاسس بشعور غريب، الي يعرفه إنه مايد مالج على بنت عمه، والحينه يشوف نظرات الحب من بينه هو وحنين، يعني معقوله...؟؟ راح أحمد لغرفته وهو مقهور، هو بدا يحب حنين وقام يلمح لها، بس هي ماعبرته.. والحينه عرف السالفة، يعني في داخلها حب ثاني.. حط راسه على المخده وقعد يتحسف على حبه الي مات قبل لاينولد.. الفصل العشرون.. أبوظبي.. بيت بو أحمد.. الدنيا مقلوبه فوق تحت، أحمد وحمده طالعين من أمس ولاردوا، قالوا حق أمهم بيسيرون يتمشون بس للحينه مارجعوا، أم أحمد تتصل بهم ولاهم راضيين يردون عليها.. بوأحمد: يابنت الناس هدي بالج كلها يومين وبيرجعون انشاءالله.. أم أحمد: يعني إنت تعرف مكانهم..؟؟ أبو أحمد: هي أعرف مكانهم رايحين العزبة مع عيال عمتهم والعيله.. أم أحمد: وسم يسمهم إنشاءالله.. عيالك مالهم أهل غير خالاتهم وخوالهم وبس.. بو أحمد: لا عندهم اهل، عندهم إخواني وإخواتي الي حرمتيني منهم، حسبي الله عليج من حرمة.. أم أحمد: لاتدعي علي.. بو أحمد: بدعي وبلعن بعد، ومن اليوم ورايح مالج أي كلمة في هالبيت وعيالي يسوون الي يبونه وأنا باجر بسير أقعد عندهم يومين، ولو مب عايبنج بيت أهلج يترياج وورقج بتوصلج هناك.. طلع محمد عن حرمته وهو معصب، وخلاها تغلي بنيران الحقد الي تارس قلبها.. نرجع لشباب العزبة.. الكل مجهز أغراضه ويستعدون للرجوع للبيت، والكل ملاحظ إنه أحمد متغير من أمس بس مب راضي يقول شو فيه.. حمده: أحمد قولي شو فيك، حد زعلك بشي..؟ أحمد: لاولاشي بس حاس بضيج بصدري.. حمده: يمكن الإلتهابات رجعت لك..!! أحمد: لا ما أعتقد، بس أقولج بنسير بيت عمتي على طول لأن أبوي هناك.. حمده: والله؟؟ الحمدلله مالي خاطر أرد البيت وأسمع حشرة أمايه علي.. وصلوا الشباب على بيوتهم والكل مستانس ومغير نفسيته حق الشغل والبعض حق الدراسة.. أول مادخلت حنين بيتهم شافت خالها محمد يالس بالصاله مع أمها فراحت صوبه وباسته على راسه، ودخلو وراها احمد وحمده وسلموا على أبوهم.. محمد: ماشاءالله أشوفكم مستانسين.. حمده: بابا والله الجو هناك روووووعه.. ياليتك كنت ويانا.. أم حنين: الحمدلله إنكم استانستوا، يالله حنين باجر دوام سيري تجهزي وخذي حمده وياج اليوم بيرقدون عندنا.. حمده: والله..؟؟ محمد: هي حبيبتي سيري مع بنت عمتج غرفتها وأنا وأحمد بنرقد في الميلس.. أم حنين: أي ميلس ياخوي عندنا ثلاث غرف مب مستعملات الحينه بنظفهن لكم.. وغرفة شوق الله يرجعها بالسلامة بترقد فيها حمده.. أحمد: أبوي قصده لانثقل عليكم.. أم حنين: إحمدوا بزعل عليك.. أحمد لوى على عمته: فديت عمووه أنا كله ولازعلها علي.. محمد: خلاص أختي عيل أنا أبا أرتاح الحينه لأني باخذ الدوا.. أم حنين: تعال حجرة شوق لين أرتب لك حجرتك.. طلعوا كلهم وراحت حمده تشوف العنود والهنوف شو يسوون.. ويلست حنين تلعب بالتلفزيون وهي حاسه بأحمد عنده سالفة بس مب راضي يقول وتترياه يبدأ بالرمسه.. حنين: خلاص عاد تعبتني إرمس شو عندك..!! أحمد: بسم الله عليج شوفج ترمسين نفسج.. حنين: ومنو قالك أكلم نفسي، أنا أكلمك إنت، شو الي مضايج فيك خبرني وإلا تعتبرني غريبه عنك.. أحمد تنهد بقو ونزل راسه بالأرض.. حنين قعدت تتأمله شوي وبعدين قامت وقعدت مجابلتنه.. حنين: لاتتوقع إني مب حاسه بشي، ولاتحط في بالك إني قاسيه وماعندي قلب، أنا حاسه فيك بس قلبي مب ملكي الحين.. أحمد رفع راس يطالعها: ملك مايد..!! حنين استغربت: من وين يايب هالكلام.. أحمد: يوم طاح مايد وتعور كنتي خايفة عليه اكثر من أخته، ويوم يبت لكم الماي سمعت الكلام الي دار من بينكم.. حنين قامت وعطته ظهرها ولاتكلمت بكلمة وحده.. أحمد: حنين مايد انسان متزوج لاتربطين نفسج بواحد بعد فترة بيروح لغيرج وبيتركج.. حنين: أحمد الله يخليك لاتعذبني أكثر.. أحمد: ليش تتعلقين بواحد متزوج، من قلة الرياييل.. حنين: انت شو تتحراني حبيته وهو متزوج؟؟ لا طبعا انا بديت مع مايد من قبل لاأعرفك.. كنت عايشه في عالم ثاني، عالم الهدف منه إني أشتغل وأشتغل وأرضي أبوي بس.. والله لوشفتني هاذيج الأيام بتقول هاي صبي مب بنت.. قعدت حنين وهي تبتسم وتتذكر هالأيام وأحمد حس بالفرح الي ارتسم على ويها.. حنين: لين قابلت مايد.. وقدر يوصل للمكان الي عمره ماتجرأ حد ووصل له، وطلعني من العالم الي كنت حابسه نفسي فيه.. بس الحينه خلاص مايد راح وراحت أحلامي وراه.. أحمد: لو يحبج ماكان رضا ياخذها ولو حطوا السيف على رقبته.. حنين: ولو حطوا روح وحياة أبوه في إيده بعد بيرفض..؟؟ لاتقول شي وإنت مب عارف السالفة، مايد أنا عاذرته بأعذار الدنيا كلها بس شو الفايده، هو بصوب وأنا بالصوب الثاني.. أحمد ظل ساكت ولاتكلم لين دخلت عليهم العنود.. العنود: أحمد الحق خالي تعبان.. تراكضوا أهل البيت يتطمنون على خالهم، وودوده المستشفى، بس الدكتور أصر إنع ينومه لأنه ضغطه وايد مرتفع ولازمه راحه تامه.. احمد نام عنده بالمستشفى ورجعوا البنات وأم حنين للبيت بروحهم وحمده تصيح خايفة على أبوها. باليوم الثاني انتشر الخبر عن مرض أبو أحمد والكل راحوا له المستشفى يتطمنون عليه.. أبوحنين: ماشاءالله عليك يالنسيب راجع شباب الظاهر النيرس هني وحده غاويه.. بوأحمد: والله غاويه بس المرض مايخلي حد يغازل.. حنين: هههههههه خالي شاد حيلك.. تغازل بعد.. أم حنين: لا والله خالج طول عمره البنات يركضن وراه بس هو رافع خشمه عليهم.. بوأحمد: ههههههههههه عبدالله: خالي شوي شوي لاتضحك بصوت عالي لاتعذب قلب النيرس.. واحتشرت الغرفة بالضحك والغشمره وابوأحمد مستانس وبدا ضغطه يرجع طبيعي.. على المغرب الكل طلع من المستشفى وأبوحنين بيرقد مع نسيبه الليله.. باليوم الثاني الدكتور رخص محمد وطلع وراح بيت اخته الي حطته على راسها هي وبناتها، وفي يوم الكل يالس بالحديقة يسولفون ويضحكون ووصلوا عبدالله وإخواته وقعدوا وياهم. الكل مرتبش بالسوالف ولاحسوا بالجرس الي دق ولا بالحرمة الي دخلت البيت وهي متغشية، بس ام حنين انتبهت لها وعرفتها من مشيتها.. أم حنين: حيالله من يانا.. تفضلي أم أحمد.. أم أحمد عقت الغشوة وتقدمت وهي تتطالع ريلها وعيالها ووراها يمشون ولد وبنيه صغار.. حمده راحت تسلم على أمها الي واقفه مثل التمثال ولاتحركت من يوم رمست أم حنين.. أحمد: أمايه هاي عمووه وهاذولا بناتها وعيال خوالي و... أم أحمد: بس اسكت شو تتحراني ما أعرفهم.. بس انا الغلطانة الي عورني قلبي على أبوك وتحريته فيه شي وييت ركض، بس طلع غزال مافيه شي، يضحك ومستانس وانا الي أغلي.. محمد: دايما ماخذتني بشراع وميداف بدون لاتتفاهمين مثل الناس.. أم أحمد: أتفاهم على شو؟؟ انت تركت البيت من أسبوع تقريبا وعيالك قبلك ومخلني لا أحد يسأل عني ولا.... حنين: خالوه موزه، خالي كان مريض وصارله يومين بالمستشفى واليوم طلع بالسلامه.. أم أحمد من سمعة رمسة حنين ركضت على ريلها ومسكته من إيده تتطمن عليه.. أم أحمد: محمد شو فيك؟؟ أكيد الضغط رد ارتفع مره ثانيه، سامحني يالغالي سامحني كله مني أنا السبب.. موزه رغم حقدها وشرها إلاإنها تموت في ريلها ولاترضى عليه أي شي.. تقدمت منها حنين وحبت تسلم عليها.. حنين: خالوه أنا حنين ومن زمان كان خاطرنا نتعرف عليج إنت والعيال كلهم بس.. أم أحمد: بس خلاص أنا يايه أتطمن على ريلي وعيالي وآخذهم معاي مب يايه أتعرف على عيال ست الحسن والدلال.. أنا اترياكم بالسياره.. ومشت موزه للباب هي واليهال واحمد وحمده وأبوهم ودعوا الكل وراحوا وراها، والكل مستغرب من أطباع أم أحمد المتقلبه.. والكل يدعي عسى الله يهديها وترد العيله مترابطة مثل قبل.. الجزء الواحد والعشرون.. اليوم الجمعة والكل اجازة فقررت حنين تعزم بنات العيلة يستقبلون شوق الي بتيي اليوم من شهر العسل.. على المغرب اجتمعوا البنات ويلسوا يسولفون الين توصل شوق.. حنين حست بليلى بنت عمتها فيها شي متغير من فترة بس مافظت تسألها واليوم لقتها فرصة ومها مب موجوده فقالت خل تسولف وياها.. خذتها ويلسوا في الصاله الثانيه يسولفون.. ليلى: والله مشتاقه لشوق فديتها مكانها فاضي.. حنين: انشاءالله بتوصل بالسلامه، انتي شو أخو أخبارج والشغل اليديد في الأسهم..؟؟ ليلى: الحمدلله وايد مرتاحه والكل هناك طيبين ويساعدوني في كل شي.. حنين: ليالي بسألج سؤال.. شو أخبار القلب..؟؟ ليلى: ههههه انت تدرين إني كنت أميل حق عبدالله بس من دريت بحبه لسارا الله يرحمها خلاص شلته من بالي.. حنين: والحينه..؟؟ ليلى: الحينه شو..؟؟ حنين: انت الي فيج شيئين.. حب يديد أو مريضه.. ليلى: هههه لاهذا ولاذاك.. مافيني إلا العافيه.. حنين: جذابه.. قوليلي ليلوه شو صاير لج.. ليلى تنهدت ونزلت راسها للأرض.. وحنين حست إنها بتقول بس ليلى خيبت ظنها.. ليلى: حنون خليها على الله.. حنين: لا والله الحينه يوم تأكدت فيج شي تقوليلي خليها على الله، يالله أشوفج افتحي قلبج وخبريني.. ليلى: هههه دايما تغلبيني وتسحبين الرمسة مني.. بصراحه حنين عميل عندنا في الشركة حبوب وطيب والكل يستانس عليه، دايما يكلمني ويسألني عن الشغل.. في البدايه طنشت الشعور الي بداخلي بس مع الوقت وهو ماشاءالله عليه مطيح عندنا بديت أتقرب منه أكثر.. حنين: تحبينه..؟؟ ليلى: ما أدري بس وايد أستانس من أشوفه، وهو يسولف وياي ويضحك عادي بس ساعات أحسه يعاملني برسميه وفي يوم.. حنين: كملي.. ليش سكتي..!! ليلى: اوعديني السالفة اتم سر بينا.. حنين: ومن متى أنا أخبر حد بالي يصير بينا.. ليلى: في يوم اعترف لي إنه يميل لي ووايد تعيبه شخصيتي، وهو طول الوقت يفكر فيني.. حنين: يحبج..!! ليلى: هي بس.. بس هو متزوج وعنده عيال.. حنين: شووو..؟؟ وايد كبير يعني..؟؟ كم عمره..؟؟ ليلى: على نهاية الثلاثينات تقريبا.. حنين: ليلوه لاتستهبلين شو الي علقج بواحد كبر أبوج؟؟ ليلى: عسب جيه صديته وقلتله إنه صح تعيبني شخصيته بس مب لدرجة الحب والزواج والمفروض إنه يحترم الحرمة الي ماخذنها.. حنين: بس في داخلج ندمانه على هالشي صح..؟؟ ليلى: هااا.. لا أبدا أنا.. حنين: ليلاي إنت بديتي تميلين لواحد أكبر عنج لمجرد الفراغ الي بحياتج.. يعني لاأحد يسأل عليج ولا أم دايره بالها عليج.. وأبوج وأخوج من سفر لسفر، يعني الي عطاج اهتمام بديتي تنجذبين له.. ليلى: يمكن بس انا ماودي أخرب بيت غيري بس هو يعرف رقمي وأحيانا يتصل لي.. حنين: وكيف يعرف رقمج..؟؟ ليلى: مرة المدير طلب البيانات الشخصية لكل الموظفين فأنا كتبت وخليت الورقة على الطاوله وهوكان واقف فحفظ الرقم.. حنين: ليلى لاتورطين نفسج، ابتعدي عن هالعلاقه هذا متزوج ويعني حتى لوخذاج ممكن عينه تزوغ على غيرج، وأصلا انتي ماراح ترتاحين وإنتي ماخذه ريال من حرمته.. ليلى: والله أدري بس شو أسوي هو عميل ودايما يكون متواجد وأخاف أضعف في يوم أو.. حنين: خذي إجازة أسبوعين وقعدي فكري بالموضوع بكل عقل هذا مستقبلج ولازم يكون قرارج عقلاني.. ليلى: معاج حق من باجر بقدم على اجازة والله يعيني شو بيستوي.. دخلت عليهم الهنوف وهي تصارخ: شوق وصلت.. ركضوا البنات يستقبلون شوق الي تبوسها والي تحظنها والي تسحب عباتها تتطالعها شو لابسه.. وشوق تضحك ومستانسه وايد.. شوق: والله اشتقت لكم ياليتكم كنتوا وياي.. وجدان: ندري مب من خاطرج الود ودج تقعدين أكثر هناك.. جميله: عيل وينه جاسم.. أبا أسلم عليه فديت أخوي وحشني.. شوق: برع عند الشباب مسكوه يسلمون عليه.. حنين: شوق وايد محلوه العرس جيه يسوي.. ليلى: لا هذا الحب وعمايله.. قعدوا البنات يضحكون الين دخلوا عليهم جاسم والشباب وقاموا يسلمون عليهم واستمرت السهرة للساعه 12 بالليل.. أم حنين: بسكم سوالف خلوا المعاريس يرتاحون، شوق حبيبتي لو تبين ارقدوا هني عندنا.. وجدان: لاعموووه عروسنا بترقد في بيت ريلها من أولها بتحوط عن ريلها.. الهنوف: الله يعين أختي عليج.. شوق: ههههه لا أمايه بسير مع جاسم وباجر بنتغدا عندكم.. كل واحد راح على بيته وهم مستانسين.. رجعة شوق والربشه الي صارت نست حنين إنها تدق لمها.. فاتصلت بها.. حنين: انزين أنا ارتبشت بأختي ونسيتج إنتي ليش ماتسإلين عني..؟؟ مها: ههههههه فديتج والله سامحيني بس مايد تعب علينا شوي.. حنين طار قلبها: ليش شو صار فيها..؟!! مها: الظاهر طيحة العزبة أقوى من ماتصورنا.. حنين: والحينه هو وين..؟؟ وشو صار له..؟؟ مها: الحمدلله الحينه أحسن وهو في غرفته يرتاح.. حنين وهي مترددة: مها ممكن أتطمن عليه.. مها: أكيد حبيبتي الحينه بسير له.. سارت مها لغرفة مايد وعطته التلفون.. مها: يود في حد حلو عالخط يبا يتطمن عليك.. مايد: فديــــــــــت الي عالخط.. ألو.. هلا والله.. حنين: سلامات ماتشوف شر.. مايد: الشر زال من دنياي من سمعت صوتج.. حنين: كله مني أنا الي قلت لعبدالله يعزمك على العزبة ويانا لو ما.. مايد: لاتلومين نفسج غناتي والله لو اتكسر بكبري يفدا ساعه من لقاي وياج.. مها سحبت عنه التلفون: حنون ترا أخوي ماخذ مهدئ وهو تقريبا نايم عسب جيه تلاقينه يقول الي بخاطره. حنين: هههههه وأنا أقول بلاه يرمس جيه، خلاص حبيبتي بخليج الحينه وبسير أرقد.. تصبحين على خير.. سلمي عليه باجر وخبريه بالي قاله.. مها: وانت من أهل الخير حياتي، وأكيد بقوله.. مع السلامه.. حنين بندت التلفون وكلمات مايد ترن بإذنها.. يالله فديته متى الدنيا بتجمعني وياك.. **__**__**__** بيت بومايد.. مها يالسه في الصاله تاكل كيك وتشرب نسكافيه، وشافت مايد نازل من الدري وهو مبتسم فقامت تبا تساعده ينزل لأنه بعده يمشي بالعكاز.. مها: انت ليش عنيد ومب راضي تسمع كلامي الحينه شو فيها الغرفة الي تحت.. مايد: مها شوفيج صايره عيوز وايد تحنين.. مها: انزين يالشباب تبا كيكة.. مايد: كيكة مها..؟؟ مها: أكيد كيكة مها، يود قطعه.. مايد: على طاري العيز يدوه وينها صار لها فترة مازارتنا..؟؟ مها: ههههههه يدوه معصبه على أمايه وتقول يوم أسود يوم زوجتها لولدها.. مايد: خيـــــــــــبة صاح البكس عيل.. مها: ههههه وتعرف أمايه مستحيل تسكت ردت عليها بلسان اشطوله، عاد يدوه عصبت وحلفت ماتطب بيتنا أسبوع.. مايد: والله سوالف العيز الله يعينا عليهم.. خلينا في الشباب أحسن.. مها: وعلى طاري الشباب وين ست الحسن شما..؟؟ مايد: طريناهم يوم الجمعة.. مسافره باريس عساها ماترد يارب.. مها: هههههههههه مايد: وأنا يوم قلت الشباب قصدت الحلوه الي كلمتني بالتلفون البارح بالليل.. مها: ليش انت حسيت بها، حسبالي كنت مسطل.. مايد وشكله سرحان: كنت في ذيج اللحظة أتذكرها يوم دعمتها في العزبة الفير، وهي فاتحه شعرها ومبلوله.. يالله فديتني كم بعيش.. مها: هههههه تعبان حالك ياخوي.. مايد: أحبها يامها والله أحبها.. مها تمت ساكتة، وهي بعد تحب بس مب قادرة ترمس مب قادره تعبر عن الي بداخلها.. مايد: مها مها.. شوفيج سرحتي، ماتسمعين الجرس يدق، قولي للخدامه تروح.. مها: انشاءالله.. راحت مها تصرخ على الخدامه وظلت واقفة على الباب تتطالع منو هناك.. شوي وصرخت مها بصوت عالي: مايد.. مايد..!! مايد: شوفيج شو صاير لج..؟ منو عند الباب.. مها واقفه ولاعارفه كيف تتكلم.. تأشر بإيدها على الباب ومثل الي صابته صاغقة كهربا مب قادره تتحرك من مكانها.. مايد خاف عليها فقام يشوف شو صار على أخته، وأول ماوقف وراها تيبس هو الثاني بمكانه لحظة وحده وفي اللحظه الثانيه يطيح العكاز من يده ويمشي بدون إحساس للريال الي دخل البيت ويحظنه بقو وبدون لايحس بنفسه دموعه قامت تمشي على خده.. مايد: مها سلطان رجع، أخوي رجع يامها.. مها وكأنه حد عطاها كف وصحاها من صدمتها.. فركضت على أخوها وطاحت في حظنه.. سلطان: والله وكبرتي يامها أذكرج ياهل بالمدرسه.. مها: ليش خليتني أكبر بعيد عنك..؟؟ ليش خليتنا نتعذب على فراقك.. سلطان: أمي وين..؟ أبوي ... أبوي وين؟؟ أنا لازم أتسامح منه ماكان لازم أعانده وأطلع من البيت.. مايد: ابوي تعبان وايد.. سلطان: ليش شو فيه..؟؟ مها: الضغط وايد يرتفع عنده وهو الحينه بغرفته.. سلطان: شغط..!! أبوي القوي يطيح..!! مايد خذ أخوه ووداه على غرفة أبوه، الي من دخلوا على أبوهم وشاف ولده الي انحرم من شوفته خمس سنين، صرخ وماقدر يتحرك.. وسلطان ركض على أبوه يبوس ايده وراسه ويتسامح منه.. سلطان: أبوي سامحني الله يخليك تسامحني.. والله لو تذبحني ظرب وتحبسني بالغرفه ماببتعد عنك نره ثانيه.. بوسلطان: انت الي سامحني ياولدي بعدك عذبني وايد بس شو أسوي، حسبي الله على الشيطان.. يلس سلطان وأبوه يتسامحون من بعض ومايد ومها واقفين ومب قادرين يمسكون دموعهم، شافتهم الوالده من بعيد وهم يصيحون طاحت الصينيه من ايدها ويات تركض.. أم سلطان: شو فيكم راشد فيه شي..؟؟ مايد قوم بنودي أبوك المستش.. وقطعت رمستها يوم شافت سلطان طايح في حظن أبوه.. أم سلطان: سلطــــــــــــان..!! سلطان قام يبا يسلم على أمه وطاح على ايدها يبوسها وهي حاظنتنه ومب مصدقه ولدها الغالي رجع لها مرة ثايه.. مها مب قادرة تتحمل الموقف فطلعت برع تصيح، بس انصدمت يوم شافت وحده شكلها أجنبيه بس محجبة ومعاها ولد صغير يلعب بكورته وياهل ثاني محطتنه داخل عربانته.. مها سارت لها وهي مب متخيله تقول لها إنها حرمة سلطان..مها: إنت منو..؟؟ مايا: أنا حرمة سلطان اسمي مايا.. مها: أنا مها أخت سلطان تعالي داخل.. مها شلت الولد في حظنها وباسته ودخلتهم داخل.. ويوم شافهم سلطان تذكر إنه نساهم برع.. سلطان: أمايه هاي مايا حرمتي.. أم سلطان: تزوجت..!! سلطان: خمس سنين مب شويه، وهي بنت حلال وأسلمت قبل لاآخذها.. مايا سلمت على عمتها وهي خايفه من ردت فعل العيله عليها.. بس أم سلطان قلبها طيب.. أم سلطان: هذا مب سلامنا نحن ناخذ حريم عيالنا في حظنا.. وحظنتها ومايا مستانسه وايد.. أم سلطان: هي تعرف عربي..؟؟ سلطان: هيه أمايه تعرف انا معلمنها.. مها: سلطان ماعرفتنا على اليهال.. سلطان: العود اسمه راشد سميته على أبوي وعمره ثلاث سنين، والصغيره سميناها مريم على يدوه الله يرحمها.. بعدها خمس شهور عمرها.. أم سلطان مسكت اليهال ويلست تبوسهم، ودخلوا على راشد الي ماتفاجأ لأنه كان متأكد إنه ولده بيعرس برع، بس تفاجأ إنه مسمي ولده عليه وهو الي طلع زعلان على أبوه.. مها من فرحتها راحت تبشر حنين وعزمتها تيي عندهم تتعرف على أخوها وحرمته بس حنين اعتذرت لأنها اليوم بتقابل عذاري البنيه الي يبيها عمها.. **__**__**__** الجزء الثاني والعشرون.. في السيتي سنتر.. وصلت حنين السيتي بروحها ومشت تدور عذاري بس مالقتها فمسكت تلفونها تتصل فيها يوم سمعت صوت عمها من وراها.. حميد: ليش متأخرة عن موعدج..؟؟ حنين: عمي..!! إنت شو تسوي هني؟؟ الموعد بيني وبينها إنت ليش راز بويهك..؟؟ حميد: هههههه قلبي يابني هني بدون لا أحس.. حنين: خل عنك هالحركات، ويالله أشوفك سير البيت وبعدين بتصل بك.. حميد: لاوالله مستحيــــــل أودرج وياها بروحكم.. أبا أعرف النتيجه.. يالله سيري قعدي وياها وأنا بطالعكم من بعيد. حنين: أوكي وينها..؟ مب شايفتها للحين..!! حميد أشر لها على طاوله يالسة عليها وحده شكلها صغير ووايد حلوه.. راحت حنين لها وسلمت عليها.. حنين: السلام عليكم.. عذاري: وعليكم السلام..حنين؟؟ حنين: هيه حنين وإنت عذاري.. لا والله عمي ظالمنج.. عذاري: بشو ظلمني..؟؟ حنين: أحلى عن وصفه بوايد ماشاءالله عليج.. عذاري استحت: هو قاعد مجابلني الحينه ومابيخليني آخذ راحتي بالرمسه.. حنين: معذور الي يشوف هالحلاه كلها وين بيقعد بعيد عنه.. قامت حنين ويسلت في ويه عذاري وغطت على عمها.. حنين تتطالع عذاري ووايد مستانسه عليها، عذاري بنيه حلوه وايد ملامحها رقيقه وطفوليه.. حنين: عاد اسمحيلي كل ماأقولج على موعد أقوم وألغيه، تدرين رحنا العزبة ويوم رجعنا خالي تعب وطبعا كل هالسوالف عندج.. عذاري: ههههه حميد خبرني بها، وقلت له معذورة، يعني إنت علقتني سنين خلها هي بعد تعلقني يومين.. حنين: سنين..؟؟ ليش من كم سنه تعرفون بعض..!! عذاري: من أربع سنين.. حنين: أربع سنين..!! وكم عمرج الحينه..؟؟ عذاري: 21 سنه.. عرفته وعمري 17 سنه، كنت بعدني بالمدرسه يوم أول ماشفته وحبيته.. حنين: وشو الي أخر ارتباطكم؟؟ يعني عمي ماشاءالله مقتدر وعنده خير.. عذاري: كان دوم يتحجج بج إنتي، شوي ويقول والله بعده مب مكون نفسه.. وكل يوم شي.. وخلاص كم برفض علشانه، إذا على نفسي مايهموني كل رياييل الدنيا، بس أهلي بدوا يضغطون علي وأنا بنيه وتكرار الرفض بيولد الشك عندهم.. حنين: الله يسامحك ياعمي كيف تضحي علشاني.. وكانت هالغزال بتروح من إيدك.. عذاري: حنين قوليلي لو إنتي مكاني كم بتصبرين، والله حاسه روحي بموت بدونه.. حنين: بسم الله عليج.. خلاص حبيبتي نهاية هالأسبوع عمي في ميلسكم يخطبج.. عذاري: والله..؟؟ حنين: هو في شي يمنع زواجكم.. يعني العيلة التقاليد شي من جيه.. عذاري: لا أبدا أبوي طيب وبيوافق على الي أنا أبيه.. حنين: خلاص عيل بنكلم الأهل اليوم وبيتصلون في الوالد يكلمونه.. عذاري: مشكوره ياحنين وربي يوفقج وينولج الي في بالج.. سلمت حنين على عذاري وراحت لعمها وعذاري تمشي وراها.. حميد: هاا حبيبي خلصتوا..!! حنين وعذاري: هي خلاص.. حنين: ههههههه عذاري: تكلم منو فينا الحينه..؟؟ حنين: أكيد أنا دايما يقولي حبيبي.. عذاري: لاوالله أكيد أنا.. أنا حبيبته.. حنين: عمي يالله قول منو حبيبتك.. حميد استحى: عاد خل عنكم لاتحطوني في هالموقف.. يالله ياقلبي سيري لسيارتج وأنا بطلع من بعدج. عذاري راحت وهي تتطالع حميد بنظرات حب، وحميد مستانس وحاس خلاص حلمه بيتحقق.. حنين: عمي.. حووووه يالله قوم بنطلع.. طلعت حنين مع عمها، وركبت سيارتها وهوركب سيارته وسارت للبيت وهي فرحانه إنها بتجمع قلبين يحبون بعض بالحلال.. **__**_**__** بيت بو مايد..( الحينه بنسميه بوسلطان..) مايد يالس يلاعب راشد الصغير بالكوره في الحوش برع، وراشد مستانس وايد.. راشد كله إماراتي يعني ملامحه وسمارته ولون شعره على يده الي مسمينه عليه، بس الصغيره مريم شقرا وبيضا على أمها بس ماخذه ملامح أبوها.. مايد كان يالس على الكرسي المتحرك فراش الكوره بعيد ووصلت للباب راشد راح يركض ومسك الكوره وشاف وحده واقفه عند الباب.. مايد: راشد يالله عميه تعال ييب الكوره.. راشد: عميه دادا.. مايد: منو حبيبي.. شوي ودخلت حنين وشافت مايد على الكرسي، أول مرة تشوفه جيه العاده بالعكاز.. حنين: السلام عليكم.. وشلت راشد هو وكورته.. مايد: وعليكم السلام.. هلا وغلا تو مانور بيتنا.. حنين وهي تبوس راشد: منور بالحلو الي فيه.. مايد: الله أنا حلو.. حنين: لاتقص على روحك أقصد راشد.. مايد: هههه حرقتي ويهي.. حنين: مايد.. ليش قاعد على هالكرسي وايد تعبان!! مايد: لا أبدا بس قلت أبا ألعب مع راشد شوي وطبعا مستحيل أقدر أركض بروحي فاستخدمت الكرسي.. حنين: يعني مافيك شي... الحمدلله أول ماشفتك خفت يكون فيك شي.. مايد: فديت الي يخافون علي.. حنين حنين: نعم.. مايد: تحبيني..؟؟ حنين انصدمت من السؤال، هو يعرف بحبها له، بس ماتوقعت يسألها في ويها.. ومابين صدمتها وحياءها من إنها تعترف له بحبها.. طلع سلطان أخوه يدور ولده فشافهم.. سلطان: السلام عليكم.. مايد منو هاي.. مايد: وبعد ربك لازم تعرف كل حد يدخل بيتنا.. سلطان: لا والله يالله أشوفك خبرني منو هاي أنا أخوك العود.. وإلا تعودت تكون إنت الكبير.. مايد: ههههه أعرفك على حنين بنت بوحنين، شريك الوالد بالشغل.. سلطان: ماشاءالله.. هاي هي حنين دايم أسمع عن أبوج بس عمري ماشفته.. مايد: بوراشد وين مها..؟؟ سلطان: هههههه مها ههههههه مايد: بسم الله عليك ليش تضحك.. سلطان: ههههههه أختك يالسه تسوي كيكه ويدووه تنازعها تقول عنها طمه طالعه على أمها.. مايد: هههههه يدوه متى يات.. ماشفتها..!! سلطان: يات من الباب الي ورا ودخلت تسلم علي وطاحت في أختك.. حنين: هي وين بالمطبخ بسير لها.. مايد: صبري بوصلج.. حنين: لاخلك هني بدخل بروحي.. وإلا تعتبرني غريبه.. مايد: راعية البيت والله.. حنين نزلت راشد وراحت داخل ونظرات مايد تلاحقها.. سلطان: هاها وين راح البال والفكر.. مايد: آآآآآه خلني لحالي.. يالله تعال بنلعب كوره مع رويشد.. راشد: بابا وين كورتي.. سلطان: كلتها الماما.. راشد قام يصيح: لالالا ماأليييد.. مايد: شوفيه يصيح.. سلطان: هههههههه يوم حملت مايا بمرايم قلناله ماما كلت الكوره والحينه خايف تييب له واحد يديد.. مايد: ههههههه حليله، لاتخاف حبيبي انت الأصل.. سلطان: يالله خلنا نسير داخل، شكلها هالحنين وراها سالفه حلوه.. مايد مشا ورا أخوه وهو مستانس أخوه هو الوحيد الي كان يفهمه والحينه رجعله وانشاءالله رجعته تييب الخير لمايد.. دخلوا الشباب وشافوا حنين ومها يالسات على الكنبه ويدتهم على الأرض ماسكة عصاتها وتنافخ.. مايد: بلاج يدووه محرجه علينا اليوم.. ام راشد: تعال انت بعد مسود الويه، وين سارح تلعب برع بروحك عويق.. مايد: هههههه لاعويق ولاشي، فديتني محلاتني.. أم راشد: جب جب أشوفك.. تعال سلطان فديتك تعال خلني أجحل عيني بشوفتك.. راح سلطان ليدته وباس راسها وقعد حذالها.. ومايد يلس مجابل حنين.. مايد: الله يالدنيا الحينه الغلا كله راح لسلطان وأنا وين مكاني.. أم راشد: مكانك هناك عند أمك، لكن هذا الغالي نظر عيني.. دخلت عليهم مايا وهي شايله مريم، حنين قامت وسلمت عليها وشلت مريم تلاعبها.. مها: هاي حرمة سلطان شوفيها وش حلاتها.. ومريومه وايد تشبها.. أم راشد: لازم حلوه الغالي مختارنها، مب هالعله الي ماخذنها ميووود، سود الله ويهك على هالإختيار.. حرمه ماتقر في بيتها وشو خانتها.. مايد: سألي ولدج هو الي زوجني لها.. أم راشد: لاتعق اللوم على أبوك، انت لو ريال ماكنت بتاخذ وحده مرض مثل هاذي.. مايد: أولا انا ريال، ولاتدافعي عن ولدج هو الي طاح علينا وخفت يروح فيها وهو حاس بندم إنه مب منفذ وصية عمي.. أم راشد: والله لو كنت انا موجوده ذيج الساعه حشا ماتاخذها لو شو مايصير.. مايد: خلاص الي صار صار وانكسر قلبي.. أم راشد: مهوووي ويهد.. مها: هاااا يدوووه شوفيج علي..!! أم راشد: قولي نعم مب هاا شو عنز إنتي.. وبعدين اغدي حرمه لاتطلعين على أمج.. مها: يدوووه عاد عن الغلط على أمايه.. أم راشد: بس بس يالله سكتي، ونشي خذي ربيعتج وحرمة أخوج واليهال وسيروا داخل، أبا سلطان ومايد في رمسه.. مها لقتها من الله ترتاح من حنة يدتها، فسارت هي والبنات الغرفة. حنين: يدوتج هاي تحفه.. مها: والله إنها مدوختني من توصل تبدي الضرابه، ماتشوفين أمي طالعه ولاهي راضيه ترد البيت.. حنين: هههههه الله يعينج.. مها: مايا وين راشد.. مايا: بالمطبخ ياكل.. مها: فديته هالولد شحلاته بسير بييبه.. سارت مها وقعدت حنين تسولف مع مايا، وشافتها بنيه طيبه وتستاهل كل خير.. رجعت مها وهي شايله راشد.. مها: حنون حنون.. عبدالله هني.. حنين: وين شفتيه..؟؟ مها: شفته يسلم على مايد وسلطان.. أبيه يدوه هناك الله يعينه عليها.. مايا: منو عبدالله..؟؟ حنين: ولد خالي وهو بعد ربيع مايد.. إلا بسألج مها شو سالفة زعل أبوج وأخوج.. مها: سالفه تافهة بس مثل ماقال أبوي الله يلعن الشيطان.. حنين: أوكي قولي.. مها: الوالد كان يبي سلطان يشتغل وياه وسلطان مب راضي، يبا يستقل بروحه.. وفي يوم ربيع أبوي قاله إنه شاف سلطان طالع من شقة وهالشقة مشبوهة.. حنين: خيبــــــــه وبعدين.. مها: ولا شي تضارب أبوي معاه، وحلف عليه لو مااصطلب ورجع للشركة يشتغل بيتبرا منه.. سلطان خذته الكرامة والعزة وطلع من البيت.. حنين: بس هذا هو السبب..؟!! مها: تتخيلين كلمة من واحد تافه خربت علاقتنا بأخونا سنين طويله، وفي النهاية طلع اخوي مظلوم.. ولامسوي شي.. مايا: خربت علاقتكم إنتوا معاه، بس هالسالفه هي الي عرفتني عليه وخلتني أسلم وأتزوجه.. مها: مصائب قوم عند قوم فوائد.. على المغرب استأذنت حنين بتسير بيتهم وهي نازله من الدري شافت مايد طايح على يدته وهي تسحب شعره.. أم راشد: حسبي الله على أمك الي مخلتنك تربي هالشعر.. مايد: يدووه لاتتحسبين على أمي.. حنين: يالله يدوووه أنا بسير.. أم راشد: فديتج الغاليه حافظج الرحمن، سلمي على امج وأبوج.. مايد يلس يعدل شعره ويطالع حنين وهو مبتسم.. أم راشد: فقتك من ولد يوم انصبت عينك عن هالحلوه وركضت ورا الغبره.. مايد: يالله يدوووه ييتي على العوق والله.. حنين مشت بسرعه ووراها مها توصلها للباب.. راحت حنين وهي حاسه إنها ممكن في يوم ترجع لهالبيت وتعيش كوحده من أصحابه.. ومايد قاعد يفكر في خطه يستغل يدته من خلالها ويوصل للي يبيه.. والقدر بعد يفكر ويخطط.. بس منو الي بيفوز.. منو الي بينتصر بالنهايه.. الحب وإلا القدر..؟!! **__**__**__** الجزء الثالث والعشرون.. اليوم ملجة حميد والكل مرتبش ويتجهزون للحفلة، حنين واخواتها ووجدان وليلى وجميله بنات عمهم وعمتهم في نفس الصالون يتعدلن، والعروس في صالون ثاني، ويوم طلعوا من الصالون كل وحده سارت على بيتها يلبسن فساتينهم، عذاري كانت تبي تسوي حفلة بسيطة بس حميد مب راضي وكان ناوي يسوي الملجة في فندق أو صالة أعراس بس عذاري حلفت يسويها بالبيت، يعني بوفيه وأشياء بسيطه وفي العرس يسوي الي يبيه.. وصلوا البنات بيت عذاري وكل وحده أحلى عن الثانيه ويتحدون بعض منو الي بتكون أحلاهن الليله، بس يوم وصلت حنين صكت عليهم كلهم ماشاءالله عليها اشحلاتها طالعه بفستانها الفوشي وتسريحتها المرفوعه على فوق.. وجدان: بس خلاص منو الي يقدر يعترض وحنون هني، أكيد هي نجمة الحفلة. حنين: خل عنكم عذاري هي النجمة السهرة. عذاري: مشكورة حنين، وانشاءالله اليوم تنخطبين. حنين ابتسمت وطلعت عنهم، سارت المطبخ تشوف أمها وعمتها.. أم حنين: هلا حبيبتي، شو تبين..؟؟ حنين: ولا شي أمايه، ييت أشوفج بس.. أم عذاري: ماشاءالله هاي بنتج..!! أم حنين: هي هاي العوده حنين.. أم عذاري: والي تزوجت أصغر منها؟؟ أم حنين: هي أصغر، هاذيج شوق المستخفه على العرس توها دشت العشرين وركضت تعرس.. أم عذاري: ههههه الله يحفظهم لج، والله لو عندي ولد عود حرام ماياخذ غير حنين، بس يالله أكبر ولد عمره 17 سنه، شو رايج حنين تبينه..؟؟ حنين ضحكت وطلعت وفي خاطرها الحمدلله إنه صغير وإلا كنت بتوهق فيكم، حنين مابياخذها غير مايد.. ومن يابت طاري مايد تذكرت مها هاي وينها للحينه مايت..!! حنين: ألو.. مها وينج الحفلة بدت وشوي وبتطلع العروس وينج انتي..؟؟ مها: هههه شوي شوي علي، شوي وبوصل هذا سلطان مأخرنا.. حنين: منو ياي وياج..؟؟ مها: أمي ومايا.. حنين: واليهال وين..؟؟ مها: مايد مستوي بيبي سيتر اليوم.. حنين: ههههه يحليله بتعبونه.. مها: خليه يربي عيال أخوه باجر منو بيربي عياله. حنين: انتي بعد منو الي بيربيهم..ههههههه مها: مسودة العين، الحينه بوصل وبتشوفين.. سكرت حنين ويات تبا تدخل بس شافت الشباب داخلين من باب المطبخ يدخلون أغراض فانخشت في الستور.. عبدالله: ماعليه ياعمي تعبتنا اليوم بس مردوده.. حميد:ههههه اتعبوا علشان عمكم باجر بتعب في عروسكم.. عبدالله: بعيد الشر. علي: لاوالله أنا عني قريب الشر.. لو أعرف راي الي في بالي.. حميد: انزين انت ليش ماتسألها يمكن هي تبيك وموافقه عليك.. علي: وإذا فيه أحد في حياتها، والله بموت قهر. حميد: ويمكن قلبها فاضي وانت تيلس لو ولو الين تروح منك.. جاسم: صح كلام عمي، كنت دايما أقول نفسك جيه يمكن ويمكن، بس يوم صارحت شوق تقبلتني، شوف الحينه استوت حرمتي ومستانسين وقريب انشاءالله بيوصل النونو.. عبدالله: ماشاءالله بتصير أبو.. حميد: وليش ماخبرتنا.. جاسم: بعده محد يعرف اليوم عرفنا حتى للحينه أهلها مادروا.. علي: الله يوفقكم انشاءالله، بس أنا خايف من ردة فعلها.. جاسم: انزين انت قولي منو هي..!! عبدالله: ليش انت ماتعرف..؟؟ حميد: ولا أنا أعرف.. كل الي نعرفه وحده يحبها بس خايف يقولها.. عبدالله: يعني أنا الوحيدالي أعرف.. حميد: لايكون حنين..!! ((حنين وقف قلبها..!!)) علي: لا حنين وايد أحترمها وتعيبني بس كأخت.. ((رجع قلب حنين يشتغل..)) حميد: عيل منو..!! عبدالله: أنا بقولكم، ليلى بنت عموووه مريم.. جاسم: والنعم والله.. حميد: انت ثور... علي: عمي شو فيك..؟؟ حميد: مدام البنيه من أهلك خبر وحده من خواتك أوالعيله يسإلونها، مايبيلها دق طبول.. علي: منو يعني.. وجدان لسانها متبري منها وبتطفش البنيه، جميله تستحي وما أعتقد بتفتح مثل هاي المواضيع مع أي حد.. جاسم: أوكي شو رايك أقول لشوق تسألها.. علي: هي مب وايد ويا شوق أبا وحده قريبه منها.. وفي هالحظه دق موبايل حنين، وكل واحد يطالع موبايله.. حميد: تلفون منو الي يرن.. علي: والله ما أدري يمكن حد نسيان تلفونه بالمطبخ حنين: لاهذا تلفوني.. حميد: انتي منو..؟؟ حين: عمي أنا حنين.. حميد: حنين..!! انت وين؟؟ حنين: هني في الستور انتوا دخلتوا وأنا انخشيت بس الله يهداكم ساعه وانتوا تسولفون وأنا أبا ألحق على الحفله.. راح حميد الستور وفتح الباب.. حميد: الله الله منو هالحلوه.. عبدالله: عادي نحن بعد نطالع.. حنين: جب انت جب.. حميد: وسمعتي كل السوالف.. حنين: هي طبعا سمعت وليلى أنا الي بكلمها كل أسرارها عندي، وتطمن علي قلبها نظيف ومحد فيه.. علي: يالله عيل سيري خبريها.. حميد: لاوالله اليوم ملجتي وما أبي سوالف حب غير سالفة حبي أنا وبس.. حنين: انزين ممكن تطلعون مها يايه بسير أستقبلها.. طلعوا الشباب وراحت حنين للحفله استقبلت مها وأهلها أم مايد متخبله على حنين بس لمنو ماعندها أحد تخطبها له.. حنين راحت لشوق وحظنتها.. شوق: بسم الله عليج شوفيج.. حنين: يالسباله هذا خبر تخبينه علينا.. شوق: شو دراج..؟؟ أمايه قالت لج..!! توني مخبرتنها..!! حنين: لا مب أمايه بخبرج بعدين بس ألف مبروك حبيبتي تستاهلين كل خير.. شوق: الله يبارك فيج.. وبعد نص ساعه طلعت العروس واستمرت الربشه والرقص للساعه 11 ونص وبعدها دخل حميد وهو طاير من الوناسه يطالع حرمته ومب مصدق نفسه.. حميد: والله اني مب مصدق، فديت هالويه ياربي.. عذاري: بس خلاص حميد والله استحي.. حميد مسك ايدها: عذاري أوعدج يالغاليه انج بتعيشين ملكة بحياتي بدلعج وبعززج كثر ماتبين.. عذاري: وعد..؟؟ حميد: وعد.. واستمرت الحفله لنص اللليل بعدها الكل طلع لبيوتهم وحميد قعد شوي مع عذاري وبعدين راح بيت أخوه بدر يبات وياهم.. يوم دخل الصاله لقا الهنوف والعنود بالصاله يرقصون وحنين تصفق وبدر أخوه يطبل لهم.. حميد: إذا كان رب البيت بالدف ضاربا.. فشيمة أهل البيت الرقص.. بدر: هلا والله بالمعرس.. مبروك ياخوي وقبال العرس.. حميد: الله يبارك فحياتك وعقبال كل بناتك يارب.. العنود والهنوف: آآآآآآآميــــــــــــــــن.. أبو حنين: مسودات الويه، سيروا داخل يالله بدلوا ثيابكم.. دخلوا كلهم ويلست حنين مع عمها يسولفون.. حنين: لاتسولف وياي سير حجرتك وكلم الحرمه.. حميد: فديت الحرمه أنا، والله انها ماصارت حرمتي الا بسببج انتي.. حنين: لا ياعمي هاي النهايه الي لازم تكون لكل قصة حب.. حميد: على طاري قصص الحب كلمتي ليلى.. حنين: قلت لها باجر تمر علي العصر بسولف وياها. حميد: يالله خير انشاءالله.. بسير فوق أبدل وأكلم الحب، يالله اشحلاتها كانت اليوم.. حنين: الله يهنيك ياعمي سلم عليها.. راح حميد وخلا حنين سرحانه بعالمها، متى بيي اليوم الي بيقولي فيه مايد محلاتج اليوم متى بيمسك ايدي وبيوعدني بالسعاده مثل ماسوا عمي اليوم.. حنين: هههه والله اني استخفيت خلني أسير أرقد أحسن لي.. بدلت حنين ثيابها ولبست بيجامتها بس في بداخلها أمنيه إنها تكلم مايد ماتدري ليش بس في خاطرها تكلمه وبس.. هي تعرف رقمه بس عيب تتصل هالوقت أساسا غلط تدق لواحد غريب.. شوي ويرن تلفونها وتشوف رقم مها استانست يالله على الأقل تكلم حد قريب منه.. مها: ساعه لين تردين.. حنين: هههه كنت أبدل ثيابي.. مها: أيوااا.. تدرين أمايه تخبلت عليج اليوم، ومايا تقول خنين وايد حلو اليوم.. استويتي خنين وحلو بعد.. حنين: ههههههههههههه مها: وأمي طايحه تمدح وتوصف فيج من وصلنا البيت، لا وجدام منو جدام مايد، عاد الريال ماشي متخبل عليج من الخاطر.. حنين: والله..!! مها: شو والله أقولج لاصق بأمي ويقولها شو لابسه كيف شكلها أكيد كانت أحلى وحده.. وأمي ترمس وترمس آخر شي انتبهت لعمرها وظربته على راسه وقالت له مسود العين عيب تتسأل عن بنت الناس.. بعد شو بعد ماخريتي الرمسه كلها.. حنين: ههههههه حليله.. تصدقين كنت.. مها: ليش سكتي!!قولي شو كنتي تبين..؟؟ حنين: كنت أبا أدق له خاطري أكلمه ما أدري ليش! مها: حاسه فيج، وعادي بوديله التلفون بس هو أخذ منوم ورقد حاس بريله من يومين زايد الويع عليه.. حنين: ليش شو صاير له..؟؟ مها: علمي علمج، بس هو عنده مراجعه السبت وانشاءالله خير.. حنين: خلاص حبيبتي بخليج برقد هلكانه من التعب، سلمي عليه ولاتقوليله عن الي كان بخاطري.. مها: أفــــا عليج.. تصبحين على خير يالغاليه.. وسكرت حنين وهي خايفة على مايد وفي خاطرها تدعيله الله يقومه بالسلامه.. **__**__**__** بيت حنين.. أم حنين تكلم أخوها وتخبره عن ملجة حميها حميد، وأبو حنين يطالع المباراة والبنات في الحديقة.. وحنين تنتظر ليلى تييها، ورن موبايل حنين وشافت رقم غريب ويوم شلته طلع لها علي ولد عمها.. فطلعت برع تسولف.. حنين: هلا علي شو فيك..!! علي: سوري حنين أخذت الرقم من عبدالله بس قوليلي شو صار شو قالت لج ليلى.. حنين: ههههههههه، بعدني ماكلمتها أنتظرها الحينه بتيي عندي البيت.. علي: ومتى بتخبريني.. حنين: أول ماتطلع بدق لك على طول هذا رقمك صح..!! علي: هي صح، تسلمين الغاليه، عاد أنا بسير البلكونه أراقبها متى بتوصل بيتكم.. حنين: ههههههه الله يعينك.. سكرت حنين وبعد خمس دقايق دخلت ليلى عليهم.. ليلى: السلام عليكم.. وتبوس خالها على راسه وتسلم على حرمة خالها.. حنين: يالله تعالي بنسير حجرتي.. أم حنين: خلي البنيه تتفاول وإلا تاكل لها شي.. ليلى: لا عمووه مشكوره بسير مع حنين.. حنين: أمايه خلي نانسي تييب لنا الأكل والعصيرفوق.. طلعوا البنات فوق ولقوا حميد طالع من الغرفه.. حميد: هلا والله ببنت أختي ليلوووه.. ليلى: هلا خالي المعرس انت راقد هني.. حميد: هي راقد هني، شو عندكم تراكضون.. حنين: سوالف بنات.. حميد: حنون وينهم خواتج البارح مسكت عليهم شي، بسير بذلهم به.. حنين: ههههههه أحسن بتأدبهم.. في الحديقة يسولفون.. ليلى: قولي يخططون لمصيبه، يوم دخلت سمعتهم اييبون طاري خالي حميد وحرمته.. حميد: أنا بأدبهن.. نزل حميد ودخلوا البنات الغرفه.. يلست ليلى على السرير وسحبت حنين كرسي ويلست مجابلتنها.. ليلى: الله يعين حنون يوم تجابل حد جيه يعني عندها سالفه.. حنين: ههههه صح معاج حق.. أمممممم شو أخبار الي بالدوام.. ليلى: ولا شي يوم رديت من الإجازة غيرت مكتبي وقعدت بين البنات علشان حتى لو يانا الشركة مايلقى فرصه يسولف وياي بروحنا.. حنين: حلو.. والله انج راعيتها.. عيل اسمعي السالفه اليديده.. ويلست حنين تخبرها بالي صار يوم ملجة حميد وليلى منصدمة.. ليلى:علي..!! معقوله..؟؟ عمري ماتوقعته يحبني، أنا حتى في حياتي ماحسيت بنظراته.. حنين: علي وايد يستحي، وبعدين هو ريال حشيم وطيب وتدرين حتى ماقالهم إنه يحبج بس خبر عبدالله وهو كاتم أسراره.. ليلى: والله ما أدري بصراحه فاجأتيني.. حنين: يعني لو هو فكر يتقدم لج، بتوافقين عليه.. ليلى: حنين خليني أقوم من صدمة حبه لي، وبعدين ارمسي عن الزواج.. حنين: شوفي حبيبتي هذا ولد خالج وتعرفينه وتعرفين شغله وطبايعه، ولو حابه نسأل عنه أكثر عبدالله مب مقصر وياي وبيخبرني بكل سوالفه.. ليلى:أوكي بفكر بس لو هو سألج عن رايي شو بتقولين له.. حنين: أمممممم بقوله انصدمت بس ما اعترضت.. ليلى: شو يعني..؟؟ حنين: يعني أشوف بعيونج إنج بتوافقين عليه.. ليلى: بس بدون حب وسوالف بالتلفون.. حنين: أكيـــــــد أساسا أنا مابرضاها لج.. ليلى: خلاص عيل أنا بسير والله يسهل.. راحت ليلى واتصلت حنين بعلي تبرد ناره شوي.. علي: يعني هي ماعندها اعتراض علي، بس تبي تفكر في الموضوع.. حنين: صح.. وطبعا هي ماتبي سوالف تلفون وحب وغرام.. علي: لاطبعا شو شايفيني مب حاشم نفسي، خلي الحب لبعد الخطوبه والزواج، بيكون أحلى.. حنين: انزين اجلب ويهك وراي شغل وايد.. سكرت حنين عن علي وهي تتنهد من الخاطر.. ياربي متى بيطلع الإنسان الي بيجمعني مع مايد مثل ما أنا يالسه أجمع الحبايب ولاحد راضي يجمعني بمايد.. الله كريم.. **__**__**__** حنين ومها قرروا يطلعون يتمشون شوي، وقعدوا يدورون بالسيارة من مكان للثاني.. مها: حنين يالله عاد شوفيلنا مكان نقعد فيه وإلا نتسوق.. هلكتينا صار لنا ساعه نفتر بالسياره.. حنين: انزين وين تبين تروحين قلت لج نقعد بالبيت لكنج خقاقه تبين تحوطين في المراكز.. مها: خلينا نروح السيتي بنتغدا وبنتمشا وبالمره نتسوق.. حنين: أوكي.. بس السيتي بعيد ولين نوصله بقولج موضوع محيرني.. مها: خير الغاليه شو فيج..!! حنين: مب فيني أنا فيج إنتي.. مها: لايكون عسب عبدالله، والله ماسويت شي.. حنين: هههههه دايما تدافعين قبل لاتفهمين الموضوع، انزين اسكتي خليني أرمس شوي.. مها: يالله قولي.. حنين: صار لج أكثر من سنه من رجعتي من العلاج والحمدلله استويتي أحسن، وتراكضين وتناقزين مثل السباله.. مها: ما أدري هذا سب والا مدح بس يالله كملي.. حنين: هههههههه المهم مافكرتي تكملين دراستج..؟؟ كل الي عندج ثانويه عامه.. والشغل مافكرتي فيه!! مها: أممممممممم بلى بس دايما كنت أتردد في السالفه وأقول بعدين وللحينه هالبعدين ماوصل هههههههههه.. حنين: لاتستعبطين أنا يالسه أرمس جد.. عندج هاليومين تدرسين وتخططين وين تبين تكملين دراستج، جامعه أو تقنيه.. وتختارين أحسن الخيارات وتخبرين أهلج وبنسير نسجلج.. مها: خيــــــــــــــبه كل هذا بيومين.. حنين: يومين وايد بعد، السنه الدراسيه اليديده مب باجي عنها غير أقل من شهر وانتي لازم تبدين وياهم.. مها: انشاءلله عمتي اليوم بشوف الموضوع وبخبر أهلي.. والحينه ممكن ننزل السيتي طفرتي فيني.. حنين: هههههه تستاهلين.. نزلوا البنات السيتي وقعدوا يتحوطن ويسولفن ساعتين وبعدها شلن عمارهن وردوا البيت، مها حلفت على حنين تنزل شوي تسولف معاها داخل.. ويوم دخلوا لقوا أم سلطان بالصاله مع راشد الصغير ومريم.. حنين: السلام عليكم.. شحالج خالوه.. أم سلطان قامت تسلم عليها: هلا حبيبتي شخبارج إنتي، وشو أخبار الأهل.. حنين: الحمدلله بخير يسلمون عليكم.. يلست حنين تلاعب مريم، تشيلها وتفر فوق وترد تمسكها ومريوووومه مستانسه وايد وتضحك، عاد راشد صابته غيره كيف تلاعب مريم وهو لا.. راشد يسحب عباية حنين: أنا أنا.. مها: أوييييه ولدنا يغار بعد.. حنين: فديتك تعال.. وخذته حنين تلاعبه وهو مستانس ويضحك.. مها: عيل وين مايا..؟؟ أم سلطان: توه سلطان وصل ودخلت وياه الغرفه.. مها: أهااا عيل بسير أغلس عليهم.. أم سلطان: مافيج مذهب، خلي الريال عند حرمته، باجر يوم بتعرسين ماتبين حد يغلس عليج.. مها: ياللـــــه متى بعرس.. حنين: مسودة العين.. عيب عليج.. أم سلطان: قوليلها تراها مضيعه المذهب.. مها: أسولف وياكم بلاكم كلتوني بقشوري.. أم سلطان: قومي أشوفج عن هالرمسه وسيري حطي فواله لربيعتج.. مها: بسنا من الأكل تونا أكلنا الين شبعنا.. حنين: صح خالوه بس خلاص هلكنا مانبي ناكل.. شوي ويدخل عليهم سلطان وهو يضحك ومستانس.. مها: شو عندك تتبسم ومستانس.. فرحنا وياك.. أم سلطان: انشاءالله دوم مبتسم يالغالي، وانتي يالملقوفه اسكتي شوي.. سلطان: دواج يوم سكتوج.. حشا بالعه راديو.. حنين اشحالج.. حنين: الحمدلله بخير.. سلطان: أمي بخبرج بسالفه.. أنا قررت أشتغل مع أبوي بالشركة واستخرت ووايد ارتحت.. واليوم بخبره بالسالفه.. أم سلطان: خير الي تسويه ياولدي وأبوك كبر على الشغل ولازم حد يمسك مكانه.. مها: أنا بعد بكمل دراستي هالسنه.. سلطان: أخيرا بتتحركين مابغيتي.. مها: ماما ومايد بعد المفروض يشتغل يسلي وقته بدل لاهو حابس روحه بالغرفه.. أم سلطان: ذكرتيني، مايد عنده مراجعه وطلع هو وعبدالله من الصبح ولاردوا.. تأخروا وايد.. سلطان: أنا بدق عليه.. ويلس يتصل به ولاهو راضي يرد عليه، فقامت حنين واتصلت بعبدالله.. حنين: ألو عبدالله.. شحالك. عبدالله: الحمدلله.. حنين: وينكم انتوا تأخرتوا هني يحاتونكم.. عبدلله: انتي وياهم..!! حنين: هيه في بيت مايد.. عبدالله: بقولج شي بس لاتبينين حقهم.. حنين: خير شو صاير.. عبدالله: أي خير مصيبه ياحنين مصيبه.. حنين وقف قلبها: ليش شو مستوي وياكم.. عبدالله: قلت لج لاترمسين جدامهم.. حنين: شو ما أرمس تقولي مصيبه شو صاير.. عبدالله: أوووووهووو خلاص نحن الحينه واصلين.. حنين: لاعبدالله لاتسكر.. بس عبدالله بند التلفون وتمت حنين عاصره التلفون بإيدها.. أم سلطان: خير يابنتي شو صاير وين ولدي..!! حنين: ما أعرف يقول الحينه واصلين.. سلطان: شو السالفه سمعتج تقولين مصيبه.. حنين: عبدالله قالي مصيبه بس سكت وماكمل لي شي.. شوي ويدخل عليهم مايد وقعد يطالعهم واحد ورا الثاني لين وصل لحنين قعد يطالعها فترة طويله وبعدها راح حجرته.. سلطان قام بيروح وراه.. بس عبدالله مسكه.. عبدالله: سلطان تعال شوي بخبرك بسالفه.. سلطان: شو صاير لكم مايد فيه شي.. عبدالله يلس بالصاله وحط يده على راسه ومب عارف كيف يبتدي.. حنين: عبدالله تكلم ترانا وصلنا حدنا.. عبدالله: سوا فحوصاته وقالوله.. أم سلطان: شو قالوه تكلم.. عبدالله وهو مغمض عيونه: صابته غرغرينا في ريوله ولو ماتلاحقوه بيروح منا.. حنين: غرغرينا.. لالا أم سلطان: شو هذا بعد، وكيف يتلاحقونه.. سلطان مسك أمه من ايدها ويلسها على الكنبه.. سلطان: أمي يعني لازم يبترون ريله.. أم سلطان: شوووووو..!! شو يبترون ريل ولدي هو بكيفهم وإلا بكيفهم، عيل كيف بيمشي كيف بيعيش؟ عبدالله: الدكتور قال لازم هاليومين وإلا مايدرون شو ممكن يصير له.. أم سلطان: الله يلعنه من دكتور والله مابخليه يحرمني من ولدي.. مها حظنت امها: أمي هدي بالج مايد مابيصيبه شي.. عبدالله: لازم أحد يدخل عنده يهديه مايد وايد منهار ويالس طول الطريق يطري الموت.. سلطان: انا بدخل له.. مها: لا سلطان أنا وحنين بندخل له.. عبدالله: لا مب حنين.. مابيتحمل.. حنين: عبدالله أنا لازم اوقف وياه لازم أكلمه.. سلطان: خلاص دخلوا انتوا ونحن بنترياكم هني.. عبدالله: بس لو انفعل وثارت أعصابه اطلعوا عنه لاتضغطون عليه زياده.. دخلت مها ووراها حنين وانصدموا يوم شافوا مايد يالس على الكرسي المتحرك ومحطي ريل وحده تحته.. مايد: شوفوا جيه بيكون شكلي بعد مايبترونها.. مها يلست تصيح.. وحنين راحت صوبه ويلست مجابلتنه.. حنين: مايد أنا.. مايد: حنين شوفي شكلي بيكون حلو جيه.. وإلا لو يبترونهم الثنتين أحسن.. حنين: مايد لاتقول جيه.. انت مافيك شي.. مايد: أكيد مافيني شي أنا اللهم بيقصون ريل وحده والثانيه بيخلونها احتياط، يعني سبحان الله في يوم من الأيام بمل منها بقولهم يفكوني منها.. حنين: مايد انت شو فيك.. مايد: ههههههههه بلاكم صايرين كئيبين تراه عادي كلنا بنموت في يوم محد مخلد بالدنيا.. حنين صرخت ومره وحده صفعته على خده.. مايد ظل ساكت ويطالعها وهي تصيح وبعدها نزل راسه وحط ايده على ويهه.. حنين: أدري هالشي صعب علينا كلنا مب بس انت، بس لازم تتقبل الواقع، هذا قدرك الي مكتوب عليك.. مايد: حنين أنا بدون شي حاسس نفسي إني عاجز فما بالج لو قصوا ريلي.. حنين: انت مب عاجز، انت.. انت.. مايد: أنا شوو. قوليلي أنا شو؟؟ أنا الي من عرفتج وأنا أوعدج بالحب والسعاده، أقولج بسوي وبسوي بس شو سويت لج..؟؟ تزوجت وحده غيرج وجرحتج وبعدها سويت حادث وحرقت قلبج والحينه بيبترون ريلي وبظل مقعد طول العمر.. ماتقولين لي شو فايدتي.. حنين: ليش تطري الشين وتودر الزين، مايد انت سويت أشياء وايد بالنسبه لي تعوض لا وتزيد بعد عن الي ذكرته، انت غيرت حنين وغيرت حياتها.. حنين الي ماكانت تعرف دنيا انت دخلتها لهالدنيا.. مايد: دخلتج دنيا وطلعت أنا منها.. حنين: منو قالك إنك بتطلع منها، بتطلع يوم الله بيكتب لك تطلع.. وإذا على ريل بتروح منك الدنيا بعدها فيها أشياء وايد حلوه بتعيشها.. مايد: بس كيف أعيش بدون لا أمشي.. حنين: مايد تقدر تركب ريل صناعيه وتمشي حالك حال الناس.. مايد: ريل صناعيه..!! حنين: هيه ريل صناعيه.. مايد حرام تظلم أهلك وياك أدري بتقولي انت بعد حالتك لله بقولك صح بس أهلك الي ربوك وتعبوا عليك ودهم إنك تعوض تعبهم خير، لاتستسلم للعجز، أمك برع بتموت من الصياح.. بس انت لو طلعت لها وانت تضحك لو من ورا خاطرك والله بتفرح قلبها.. مايد: بس الي بداخلي كبير كيف أضحك.. حنين: اضحك يامايد اضحك واتحدا المرض والعجز، ونحنا يوم حبيناك حبينا شخصيتك وقلبك مب ريلك من حلاتها عاد.. مايد: هههههه لاتعيبين عليها.. حنين: والله قلبي رقص من سمعت ضحكتك، مايد مب مهم كيف بتعيش ويانا ريل وحده وإلا ثنتين المهم تكون ويانا نسمعك وتسمعنا نكلمك وتفهمنا.. مايد: يالله ياحنين دخلتيني دنيا ثانيه. حنين: والله..!! مايد: والله انج حسستيني بمعنى المحبه، وإني ما أعيش لنفسي وبس، بالعكس بعيش لغيري وبحاول أسعدهم بعد.. مها قامت وحظنت راس أخوها ومسكته من ايده وطلعوا كلهم برع، شافوا الوالده تصيح وسلطان حاظننها.. مايد: حوووووه العيوز بلاج منهده صياح.. سلطان: مايد تعال شوف أمك.. مايد راح وباسها على راسها.. مايد: أمايه انا بعيش بينكم بريل والا بدون المهم أكون وياكم وأحبكم كثر ماتحبوني.. أم سلطان حظنت ولها وهي تصيح.. بس الكل بقا عنده أمل إنه كل شي ممكن يتصلح المهم تبقى الإراده بداخل الانسان لأن الواحد بدون أمل وإراده يبقى بقايا انسان.. **__**__**__** الجزء السادس والعشرون.. (( لازلت على عهدي باق، والعشق بداخلي لازال يخفق بحبك، أنت من ملكت قلبي وروحي وكل دنياي.. فكيف المفر من حبك الذي استعمر الفؤاد والروح.. ومن ذا الذي يستحق سكنى فؤادي غيرك يا سارا..)) عبدالله كان مندمج يكتب مذكراته وهو حاس بقهر في داخله، صار له فترة لاهي عن سارا.. من توفت وهو كل يوم يقعد عند قبرها ويقرا قرآن.. ويوميا يتصدق على روحها من بيزاته، بس من فترة طويلة وهو مشغول مع مها، معقولة خلاص نسى الحب والأيام الحلوة إلي قضاها بحب سارا وذكرياتهم إلي شايلينها في قلوبهم من صغرهم.. عبدالله من قهره فر كتاب مذكراته بقوة على الأرض، وحط راسه على المخدة وطلع صورة سارا من تحتها ويلس يطالعها وهو حاس بضيج بداخله.. وسمع أحد يدق على باب حجرته فخش الصورة ويلس عدل، ودخلت عليه أمه وحست إنه مضايج من شي بس من فترة وهو مستانس ونسيان الهم شو الي رجعه للحزن مرة ثانيه.. أم عبدالله: عبدالله شو فيك..؟؟ عبدالله: ولاشي بس متملل شوي.. أم عبدالله: انزين حنين برع وتبا تكلمك.. عبدالله: أوكي الحينه بطلع لها.. طلعت أم عبدالله وراحت لحنين الي كانت يالسه بالصاله تسولف مع شوق.. أم عبدالله: الحينه بيطلع لج، ما أدري أحسه مضايج.. حنين: ليش..!! أم عبدالله: انت أقرب وحده له حاولي تعرفين منه، والله ماصدقت انه طلع من حالة الحزن بعد وفاة سارا الله يرحمها.. شوق: الله يعينه حالته حاله من فترة.. حتى جاسم وايد يحاتيه.. حنين: الله كريم خالوووه بس وينه هو تأخر.. لايكون يالس يتعدل الشيخ عبدالله.. ودخل عبدالله عليهم: شيخ غصبن عليج.. حنين: ههههههه حاظر طال عمرك.. عبدالله: أمايه خذي شوق وخلينا بروحنا.. أم عبدالله: انشاءلله.. يالله شوق.. وطلعوا ويلس عبدالله مجابل حنين وهو مب قادر يخفي الحزن الي بداخله.. عبدالله: يالله قوليلي شو الي خلا حنين بدر تشرفني بزيارتها.. حنين: انت أول شي قولي شو الي مخبنه عن حنين.. عبدالله: أنا ولاشي.. حنين: مها..؟؟ عبدالله: لا.. سارا حنين: سارا..!! الله يرحمها.. شو الي يابها على بالك الحينه..؟؟ عبدالله وقف بعصبيه ومشا بعيد شوي عن حنين وعطاها ظهره وهو يحج ايده بقوة.. عبدالله: شو يعني شو الي يابها على بالي..؟؟ حنين هاي حبيبتي.. هاي روحي الي تمشي على الأرض وخلاص راحت عني.. كيف طاوعني قلبي أتعلق بغيرها بكل سهولة..؟؟ وكأنها كانت كأي وحده بهالدنيا.. وكأنها.. وكأنها.. حنين: عبدالله محد قالك تنساها بس لازم تعيش حياتك.. و.. عبدالله: و شو ياحنين.. وأعرس وأييب عيال وأسمي أكبر بناتي سارا واحقق لها أمنيتها وطلبها الأخير قبل وفاتها..؟؟ وأنا..!! أنا منو الي بيحقق لي أمنيتي..؟؟ منو الي بيجمعني بسارا..؟؟ حنين: بيجمعك بها رب العالمين في الآخرة.. عبدالله: وفي الدنيا..؟؟ حنين: مها.. مها الي بديت تحبها وتتقرب منها.. وهي تحبك وتعزك رغم تجاهلك لها.. عبدالله: وأنا بعد أحبها بس.. حنين: بس شو..؟؟ عبدالله: كلما أتقرب منها وأبتدي انسى الماضي وأعيش حياتي.. أدخل الغرف ألقاها تنتظرني.. حنين: سارا..؟؟ عبدالله: هيه سارا.. أحسها تكون في الغرفة يالسه وتتطالعني بنظرات عتاب.. وكأنها تقولي وهنت عليك تنساني بكل سهولة.. حنين: عبدالله.. انت تتوهم كل هذا، سارا بلسانها وصتك قبل وفاتها تتزوج وتعيش حياتك.. عبدالله: وصتني أتزوج مب أحب وأعشق.. حنين: وشو الفرق.. الي بتتزوجها لازم بتحبها سواء قبل الزواج أو بعده.. عبدالله انت مب غلطان.. بالعكس معاك كل الحق تحب وتعشق.. انت شيل سالفة تأنيب الضمير من داخلك والله يسهل لك دربك.. عبدالله وهو يتنهد بقو: الله يعين.. ويالله انتي خبريني الحينه شو الي يايبنج من صباح الله خير.. حنين: اليوم عملية مايد.. وأبا أسيرله المستشفى بس ابيك وياي.. ممكن..؟؟ عبدالله: خلاص بعد ساعه بنروح.. حنين: أوكي .. الحينه بسير وبنتلاقى بعد ساعه.. طلعت حنين وخلت عبدالله يفكر في كل الي صار.. معقوله الي قالته حنين.. أقدر أنسى كل شي وأبتدي أفتح صفحة يديده.. وأبتدي حياة ثانيه..؟؟ **__**__**__**__** دخلت حنين المستشفى مع عبدالله وهي متوترة كل توتر الدنيا.. بس يوم شافت مها وأمها يصيحون برع تحول التوتر لخوف قوي.. حنين: ليش تصيحون..؟؟ أم سلطان: مب هاين علي أشوف ولدي يضيع عمره جدامي وأنا واقفه ولاعارفه شو أشوي.. عبدالله: منو وياه داخل..؟؟ مها: أبوي وأخوي سلطان.. عبدالله: أنا بدخل له.. حنين: مها لاتصيحون جدامه، وانشاءلله هو بيقوم بالسلامه والله بيعوضه ألف خير عن الي راح.. أم سلطان: الله يقومه بالسلامه.. مها: حنين ادخلي عنده.. هو محتاج لج وايد.. حنين: بس كلهم داخل وأنا ما أبا أدخل وهم داخل.. مها: بندخل وبنقعد وبعد شوي بنطرهم.. أم سلطان: انتوا دخلوا أنا بيلس هني أترياكم.. حنين ومها دخلوا الغرفه ولقوا عبدالله ماسك ريل مايد ويصور وياها.. حنين: عبدالله شو تسوي..!! مايد: ولد خالج هذا أهبل.. يصورها في آخر لحظات حياتها.. عبدالله: اسكت انت لازم أتصور مع هالخايسه علشان يوم بتركب غيرها براويها اليديده وأقولها مالت عليج رحتي وياب غيرج بسرعه.. مها: ههههههههه والله انكم مصايب.. أبوي أمايه برع تدورك سير لها.. وسلطان توها مايا تتصل تسأل عليك شكله هني ماشي ارسال سير طفي شوقها.. طلعوا راشد وولده.. ويلست مها على طرف السرير.. مها: طردتهم.. والحينه خلالج الجو ياحنين.. يالله قولي شو عندج.. حنين: أممممممم عبدالله مايد عطشان سير ييب له عصير.. مها خالووه برع تزقرج الظاهر تبيج ضروري.. عبدالله: مب على كيفج.. مها: لا والله.. شو قصدج تبين تطردينا كلنا.. حنين: أفا وأنا أقدر.. بس الجو أحلى بدونكم.. مايد: هههههههههههه مها: لا والله وانت عايبنك..!! مايد: أنا ما أقدر أرد لها طلب.. عبدالله: يالله يامها نتوكل ونطلع بكرامتنا.. طلعوا وخلوا حنين ومايد بيموتون من الضحك.. مايد: هههههه والله ذبحوني من الضحك.. حنين: ههههههه مايد: فديت الضحكة.. الله لايحرمني منها.. حنين يلست على الكرسي وتعلقت عيونها بعيون مايد ثواني.. حنين: عمرك مابتنحرم منها.. والله يقومك بالسلامه وترجع لي أحسن من أول.. مايد: حنين.. أحبج حنين نزلت راسها وهي مستحيه، بس مايد مارحمها.. مايد: والله ياحنين اني أحبج وأتمنى أعيش وياج العمر كله.. حنين: مايد خلاص.. مايد: خلاص بسكت بس أبا وعد منج.. حنين: وعد بشوو..!! مايد: يوم أصحا من البنج تكونين أول وحده أشوفها، وأول كلمه أسمعها أحبك.. حنين: لا والله.. أستحي.. مايد: خل عنج يالله عاد اوعديني.. حنين: أوعدك إني بكون أول وحده تشوفها يوم تقوم.. مايد: و..؟؟ حنين: بس خلاص مافي شي ثاني.. مايد: يعني أنا ما أستاهل..؟؟ حنين: تستاهل ونص.. بس أنا واعده نفسي هالكلمه ماتطلع مني إلا لزوجي وبس.. مايد: وأنا زوجج.. حنين: خلاص عيل قوم بالسلامه وصير زوجي وبعدين بتسمعها.. مايد: أكيد بسمعها.. حنين: وبتمل منها بعد.. وفي هاللحظة دخلت الممرضه تبا تعطيه البنج.. حنين: شوي شوي عليه.. الممرضه: هههه تخافين من الإبر..؟؟ مايد: تخاف علي أنا.. الممرضه: زوجتك..؟؟ مايد: خطيبتي وحبيبتي وعمري كله.. قامت حنين تبا تطلع بس مايد مسكها من ايدها.. مايد: وعدتيني تكونين آخر من أشوفها قبل العمليه وأول وحده بعد العمليه.. حنين: أوكي خلها تعطيك الإبره أول.. الممرضه: خلاص خلصت، وبعد شوي بياخذونك على غرفة العمليات.. مايد: مشكوره.. طلعت الممرضه ورجعت حنين لمايد بس يلست على السرير.. وهي تتطالعه وشكله بدا الدوا ياخذ مفعوله.. حنين: مايد.. مايد: هاا حبيبي.. حنين: أوعدك يامايد أكون لك انت وبس.. وعمري مابتخلى عنك.. ولا بكون لغيرك.. مايد: وعد ياحنين..؟؟ حنين: وعد يا روح حنين.. غمض مايد عيونه وبدا يروح في سبات عميق من تأثير البنج.. فقامت حنين مسكت ايده وباستها.. حنين: أحبك يا مايد أحبك.. **__**__**__**__** في بيت مريووومه عمة حنين ليلى مرتبشه وشايله البيت على راسها.. اليوم أخوها فهد بيرجع من السفر، وصار لها شهرين مب شايفته.. وطبعا كالعاده محد مهتم غيرها هي.. امها تدور من بيت للثاني.. وأبوها لاهي ورا تجارته وبيزاته.. على الساعه 12 الظهر دخل فهد البيت وهو تعبان.. ليلى: هلا والله أخوي حمدلله بالسلامه.. فهد: الله يسلمج ليلووه.. عيل وين أمي وأبوي.. البيت فاضي.. ليلى: شو أسوي كالعاده محد يقعد بالبيت.. فهد: وانتي شو مسويه بالدراسه..؟؟ ليلى: أي دراسه انا تخرجت وأشتغلت.. فهد: والله..!! زين زين مبروك عيل.. ليلى: على التخرج والا الشغل..؟؟ فهد: اثنين في واحد.. ليلى: احط لك الغدا..؟؟ فهد: لا مشكوره برقد هلكان من التعب.. طلع فهد على غرفته ورجعت ليلى لضيقتها.. ليلى: ياربي شو هالعيشه الي أنا عايشتها.. محد مسويلي اعتبار ولاسالفه.. أف متى بيي الي يفكني من هالعذاب كله..!! شوي ويرن تلفون البيت وراحت تشيله.. ليلى: ألووو : السلا عليكم.. شحالج ليلى.. ليلى: الحمدلله.. منو وياي..!! : أنا علي ولد خالج ماعرفتيني.. ليلى رقص قلبها: أهلين علي سوري صوتك بالتلفون غير.. علي: ولايهمج.. أنا مريت حذال بيتكم وشفت سيارة فهد قلت يمكن رجع من السفر ودقيت على تلفونه وعطاني مغلق عاد قلت أدق على البيت وأسأل عنه.. ليلى: هيه وصل بس دخل يرقد على طول.. علي: أكيد تعبان.. عيل وين عموووه وأبوج.. ليلى: محد هني كلهم طلعوا وانا يالسه أتريا فهد ومن وصل تركني وراح يرقد.. علي: ومخلينج بروحج..؟؟ ليلى: عادي تعودت من صغري وأنا على هالحاله.. علي: انشاءلله قريب بترتاحين.. ليلى: شو قصدك..؟؟ علي: لا تستعيلين كل شي بوقته حلو.. انزين ليش ماتروحين تزورين ربعج والا أحد من بنات العيله.. انتي تسوقين صح..؟؟ ليلى: هيه أسوق.. بس ما أطلع إلا للشغل.. علي: أممممم تعالي زورينا بالبيت قعدي مع وجدانووه الهبله.. ليلى: والله ما أدري بشوف بفكر وبرد عليك.. علي: يعني بتستأذنين من أهلج؟؟ ليلى: ههههههه ضحكتني انا لو رديت نص الليل محد بيسألني وين كنتي.. علي: خلاص عيل البسي عباتج وتعالي بيتنا.. والله بتتسلين وبتغيرين جو.. ليلى: أوكي بس بتصل على جمول بشوفها اذا بيطلعون أو لا وبعدها بقرر.. علي: واتصلي خبريني اذا بتيين بخاطري أشوفج.. ليلى: أوكي.. علي: تبين أعطيج رقمي..؟؟ ليلى: لا أعرفه.. علي: الله الله تعرف رقمي.. ليلى: لاتغتر بروحك طالع عندي على الكاشف.. علي: هههههه حليلني تحريتج سارقه رقمي من موبايلات اخواتي.. ليلى: كنت بسويها بس ماشفت خواتك من زمان.. علي: وجان أستانس.. ليلى: يالله اجلب ويهك.. باااااااااي سكرت ليلى وهي مستانسه حاسه انها بترتاح مع علي.. هو يحبها ووايد متعلق بها وانشاءلله بيقدر يسعدها.. نروح المستشفى لعند مايد.. الي ظهروره من غرفة العمليات من ساعه بس بعده في البنج.. الكل راحوا على أشغالهم بعد ماتطمنوا على مايد بس بقت أم سلطان ومها وحنين.. مها: ماما سيري ارتاحي شوي.. أم سلطان: راحتي وانا مع ولدي.. حنين: ماعليه خالووه اول مايصحا انا بناديج.. سيري الغرفه الثانيه ارتاحي.. طلعت الوالده وخلت البنات مع مايد.. وبعد نص ساعه تقريبا بدا مايد يقوم من البنج.. فسارت حنين ويلست على السرير.. ومها وقفت بعيد شوي.. أول مافتح مايد عينه لقا حنين بويه ابتسم ورجع يغمض عيونه.. حنين: حمدلله على سلامتك يالغالي.. مايد بطل عيونه: الله يسلمج.. وانا كنت خايف أقوم وما ألقاج.. حنين: من متى حنين تخلف بوعودها.. مايد: صح سمعت أحبك قبل العمليه وشفتج بعدها بس يالله وأنا بعد أحبج.. حنين: انت كنت حاس فيني.. مايد: وحاس بالكلمه الي طلعت من قلبج.. حنين استحت ونزلت راسها.. مها: بس عاد بسكم حب، فديت أخوي حمدلله على سلامتك حبيبي.. وطاحت على صدر أخوها وحظنته بقوه.. مايد: الله يسلمج دلوعتي.. عيل وين أمي والباقين..؟؟ حنين: الحينه بناديها خالوه.. وطلعت حنين تناديها وقعدت هي برع تحمد الله على قومته بالسلامه.. **__**__**__**__** الجزء السابع والعشرين.. مر شهرين على عملية مايد واستوت تطورات بسيطه في هالفتره.. مايد بدا يتعود على حياته بريل وحده بس قريب بيسوي عمليه ثانيه وبيركب ريل صناعيه، علي خطب ليلى وملج عليها، حميد بيعرس بعد أسبوعين، وحنين((يبقى الحال كما هو عليه)).. اليوم حميد مواعد يودي زوجته وحنين و اخواتها السوق يتشرون للعرس، وماخلوا مكان ماراحوا ولاخلوا سوق ماتحوطن فيه.. وعلى الساعه عشر ونص بالليل رجعوا البيت.. عذاري: حميد تعال ادخل عندي شوي.. حميد: لاحبيبي بروح بوصل بنات أخوي وبسير عند الشباب مسويين لي حفلة وداع للعزوبيه.. العنود: هههههه بتسوون مثل الأجانب وبتييبون رقاصه.. حميد: يالماصخه.. حنين لاتخلينهم يشوفون أفلام وايد.. حنين: ومنو يقدر عليهم غير أبوي، اليوم بقوله عن سوالفهم.. الهنوف: يالله بالستر كلها كلمه وقالتها يسوى عليها، الا سيري خبري الأمم المتحده بعد.. حميد: الله يعيني على لسانها اليوم.. عذوووره انزلي بيتكم وبكلمج يوم بخلص من السهره.. عذاري: أوكي.. يالله تصبحون على خير.. نزلت عذاري ووصل حميد بنات اخوه لبيتهم وراح عند الشباب.. حنين أول ما دخلت البيت عقت الشيله ولا انتبهت لواحد يالس بالصاله.. مشت تبا تركب الدري يوم سمعت العنود تدخل وتسلم على أحد بالصاله.. رجعت حنين على ورا وشافت أحمد ولد خالها محمد متيلس بالصاله.. فحطت شيلتها على راسها وراحت له.. حنين: السلام عليكم.. شحالك أحمد.. أحمد: وعليكم السلام أنا بخير الله يسلمج.. العنود: وانتي ماشفتيه يوم دخلتي..! حنين: لا ماشفته.. وينه الهنوف..؟؟ العنود: هاا ما أدري.. حنين طلعت برع بس ماشافتها ورجعت داخل.. حنين: عنودووو وينها أختج كانت ورانا.. أحمد: يمكن يلست بالحديقه.. حنين: سيري ناديها حقي بسرعه.. العنود: انزين شوفيج عليها.. حنين: بتروحين وإلا أروح انا.. العنود: خلاص خلاص بسير بشوفها.. أحمد: ليش معصبه عليهم..؟؟ حنين: حركاتهم مستويه وايد سخيفه وانا الي بأدبهم، وانت من متى هني ومنو ياي وياك.. أحمد: ياي أنا وحمده بس هيه راحت عند شوق فوق واتأخروا علي.. حنين: بسير بشوفهم وبناديهم يقعدون ويانا.. عيل أمي هني وإلا رقدت.. أحمد: من ييت ماشفت غير شوق والخدامه.. طلعت حنين فوق وسلمت على حمده وسحبتهم لتحت، شوق في الشهر السادس وبدا بطنها يكبر.. حمده: شواقي قوليلي شوفيج ولد والا بنيه.. شوق: هذا سر بس انا الي أعرف حتى ريلي ماقلتله.. أحمد: وليش ماخبرتيه.. شوق: بس جيه أبيها مفاجأة للكل.. حنين: حاسده هالبنيه بخاطري أعرف.. والله خاطرنا بولد بسنا من البنات.. شوق: هيه والله على الأقل مايطلعون ميانين على خالاتهم.. حنين من يابت شوق طاري التوأم نقزت وطلعت برع تدورهم.. شافتهم واقفات عند الباب يتصاصرن.. حنين: داخل يالله.. جدامي تحركن.. دخلوا وهم ساكتات سلموا على حمده وركضوا حجرتهم.. وشوق مستغربه شو فيهم.. حنين: تافهات.. شوق عيل وينه جاسم.. شوق: اليوم مسويين حفله لعمي حميد والكل مجتمعين.. وجاسم قالي اليوم ارقدي بيت أهلج لأنهم بتأخرون وايد.. وأنا أخاف أتم بروحي بدونه.. حمده: عندج بنات عمج وتخافين.. شوق: انا مسويين لي ملحق برع وأخاف أرقد فيه بروحي.. حمده: إلا قولي ماتقدرين على فراق الحب.. شوق: ههههههههه يالشيطانه.. أحمد: سوالف البنات ممله.. هم وين بيسوون الحفله بسير لهم احسن.. شوق: بتلاقيهم مجتمعين عالممزر إذا ماغيروا مكانهم.. أحمد طلع عنهم وراح للشباب.. ويلسوا البنات يسولفون بروحهم.. شوق: حنين شو اخبار مايد الحين.. حنين: الحمدلله بخير بعد أسبوع بيروح ألمانيا يركب ريل صناعيه.. حمده: مايد أخو مها ربيعتج صح..؟؟ حنين: صح.. شوق: خبريني شو مسويات خواتج اليوم بعد.. حنين: حسبي الله على عدوهم.. حميد يقول لعذاري إنه الشباب مسويين له حفله وداع العزوبيه تقوم هالهبله عنودو تقوله وبتسوون مثل الاجانب بتييبون رقاصه.. شوق: خيـــــبه.. هالسخيفة من وين متعلمه هالسوالف..!! حنين: لا وجدام عذاري شو بتقول عنا البنيه.. حمده: بعدهم مراهقات ويحبون يعرفون كل شي.. شوق: بس مب بهالوقاحه، بصراحه يبالهم حد يشد عليهم والكل يقول يهال ومدلعينهم بزياده.. حنين: محد بيأدبهم غير أبوي.. حمده: حنين لاتكبرين الموضوع.. حنين: لو سكتنا بيتمادون أكثر.. رن تلفون شوق وكان جاسم.. شوق: أقولك أحمد ولد خالي طلع يدوركم كلمه وشوفه وينه.. حمده: بسير بشرب ماي.. شوق: وأنا بسير بيت الراحه.. حنين: هاي حالتها من توصل عندنا داخله طالعه من الحمام.. شوق: هههههههه ماعليه بقت لي ثلاث شهور.. حنين: الله يقومج بالسلامه.. وكملوا البنات سوالفهم.. **__**__**__**__** باجر عرس حميد والكل لاهي بترتيبات العرس ومحد فاضي حتى يحج راسه.. والكل مجتمع في بيت أبو حنين لأنه حميد ساكن في شقه بروحه فالعرس مسويينه في بيت أخوه، وحميد متخبل يبا يكلم عذاري وبنات اخوانه مانعينه.. وجدان: عمي اثقل شوي، خلها هي الي تتخبل مب انت.. حنين: صح كلام وجدان المفروض انت الي تسويلك راس مب تخليها تركب على راسك من الحين.. حميد: شوفوا عاد كلامكم هذا مامنه فايده ولايدخل راسي لو ابا اكلمها بكلمها غصبن عليكم.. شوق: انت قول انه هي مب راضيه ترد عليك.. ليلى: حرام عليكم خلوه يستانس بعده معرس يديد.. وجدان: هااا ليلوووه أشوفج واقفه وياه.. عاد انتي مابنخليج تكلمين علاوي قبل العرس بشهر.. ليلى: خيـــــــبه.. وليش كل هذا..!! وجدان: عشان الشوق يولد الحب القوي.. العنود: عمي بتسكنون عندنا بعد العرس..؟؟ حميد: لاطبعا بنسكن بشقتي بروحنا بدون عواذل.. حنين: الله ياعمي نحنا الحينه صرنا عواذل!!.. الله يسامحك بس.. حميد: اقولكم انا بسير بقعد مع بدر اخوي ابرك لي من سوالف البنات.. طلع حميد ويلسوا البنات يسولفون عن عرس باجر وفساتينهم وخرابيط البنات.. حنين اتصلت بحمده تسألها ليش مايت للحين.. حنين: حمده شو فيج تصيحين شو صاير..؟؟ حمده: حنين ابوي تعبان وايد ودخلناه المستشفى وحطوه بالعنايه.. حنين: خالي شو فيه شو صار له..!! حمده: ما أدري يقولون ضغطه وايد مرتفع.. ركضت حنين لأمها تخبرها بالسالفه الي شلت عمرها وركضت لزوجها بدر تباه يوديها بوظبي.. بو حنين: ياحرمه ذكري الله وين تسيرين الحين، خلينا نتطمن عليه بالتلفون وباجر يصير خير.. أم حنين: باجر..؟؟ انت ماتسمع أخوي بالعنايه وانا هني ولا أدري عنه شي.. قوم ودني والا والله بسير بتاكسي بروحي.. بوحنين: انتي تخبلتي اصبري لباجر بروحنا معتفسين وباجر عرس حميد... حميد: بدر خلني انا بوديها وبنطمن عليه وبرد بسرعه.. بوحنين: يابوي عرسك باجر وين بتروح بوظبي بهالليل.. حميد: أي ليل ياخوي توه الساعه مايت تسع ونص.. حنين: هاي حمده تتصل خلوني اشوفها شو صار مع خالي.. طلعت حنين تكلم بنت خالها ووقفت أمها وراها تسمع شو بتقول.. حنين: الحمدلله.. يالله.. الله ستر.. خلاص حبيبتي طمنينا لو صار شي يديد.. أم حنين: هااا شو استوى.. حنين: الحمدلله طلعوه من العنايه بيرتاح ساعتين وبعدها بيرد البيت.. أم حنين طاحت على الأرض: الحمدلله الحمدلله.. بدر: شو قالت لج..!! حنين: تقول السكر ارتفع لأنه رقد بدون لاياكل شي، والضغط بعد لأنه نسى حبوبه.. أم حنين: ووينها موزووه عنه لاهيه..!! حميد: أم حنين خلي الحرمه برايها والمهم سلامة اخوج.. أم حنين قامت وسارت غرفتها ترتاح ونزلت حنين تطمن البنات.. الهنوف: أشوى ماصار شي والا بينقلب العرس عزا.. حنين: حسبي الله عليج من بنيه ذلفي حجرتج لا اقوم لج بالنعال الحين. ركضت الهنوف ووراها العنود وهم يتحرطمن على اختهم الي صارت قاسيه عليهم.. شوق: حنين الصراخ مامنه فايده وهاذولا مراهقات يعني بعدهم مايعرفون مصلحتهم.. كل شي بالطيب والتفاهم بيتصلح.. حنين: والله مالي خلق حقهم ميت مشكله وسالفه على راسي.. جميله: تدرون انا الي بتفاهم وياهم.. انا دارسه علم نفس واعرف كيف اتعامل مع المراهقات.. ليلى: خلاص عيل بنوليج عليهم والله يثبتج بعقلج.. حنين: هههههههههه هيه والله الله يثبت لج عقلج على بلاويهم هالثنتين.. **__**__**__**__** اليوم عرس حميد والبنات طبعا مطيحات في الصالونات.. حنين وشوق وجميله في صالون واحد والعنود والهنوف وليلى ووجدان بصالون ثاني.. على العصر عبدالله راح يبا اييب اخته جميله والشله الي وياها.. وفهد أخو ليلى راح إييبها من الصالون.. عبدالله اتصل بجميله وقالها انه برع فطلعوا له البنات متغشيات وركبوا.. عبدالله يالله اكشفوا خلوني اشوف منو أحلى وحده فيكم.. حنين: مايبيله كلام اكيد كلنا احلى من كلنا.. عبدالله: ههههههههههه حلوه هاي.. جميله: عبادي قولي حلو مكياجي.. عبدالله: انتي بدون شي قمر كيف لو حطيتي هالصباغ على ويهج بتطلعين سندريلا.. جميله: تدرون احب يوم أسوي شي أسأله عن رايه دايما يمدح بكلام حلو مب جاسم بالعافيه لو مدحنا.. شوق: جاسم يمدحني انا وبس انتوا مايخصكم.. عبدالله: هيه مسكين اخوي مطيح بين الرياييل ويتذكر أيام عرسه.. شوق: هههه الحمدلله بعدنا معاريس لا وبشهر العسل بعد.. عبدالله: هاذي الي بتخبل فيني وبسير بخطب بسرعه.. حنين: غيره يعني..!! جميله: عبدالله يالله متى بتخطب والله تولهنا على عرس يكون في بيتنا.. عبدالله: الله كريم.. حنين..!! حنين: هلا..!! عبدالله: مها مابتحظر العرس..؟؟ حنين: لا والله تقول مشغوله بتجهيزات السفر، لأنهم بعد أسبوعين بيسافرون.. عبدالله: وهيه بتسافر وياهم..؟؟ حنين: لا لأنها بدت الدراسه بالكليه، بيروح وياه اخوه سلطان وامه.. وصلهم عبدالله لبيوتهم وراح للشباب.. وفهد وصل وجدان والتوأم على بيوتهم وراح على البيت وهو في الطريج سأل ليلى.. فهد: ليلووه بسألج هاي وجدانوه الصغيره الي كنت اضارب وياها يوم كنا يهال..!! ليلى: هي بعينها.. وأبشرك بعدنها شيطانه.. فهد: بس ماشاءلله كبرت واحلوت.. ليلى: هااا فهوودي لايكون ناوي عليها.. فهد: لاوين الزواج آخر شي ممكن أفكر فيه.. بس استغربت كيف هاذيج الياهل الي دوم نافشه كشتها اتحولت لهالملاك الجميل.. ليلى: فهد خلاص وصلنا البيت بسير أتجهز للحفله بدال خرابيطك هاي.. نزلت ليلى وخلت فهد مع أفكاره.. على الساعه تسع ونص كانوا كلهم بالفندق ومرتبشين بالرقص والترحيب بالضيوف.. الحفله كانت وااايد حلوه والي محلتنها عذاري برقتها وحلاوتها وطبعا حميد متخبل.. على الساعه 2 بالليل الكل راح يوصل المعاريس لغرفتهم بالفندق وحميد ماسوالهم سالفه طردهم بسرعه عسب يقعد مع زوجته.. عذاري: حرام عليك ليش جيه تطردهم.. حميد: أهلي وأعرفهم لزقه مب طالعين إلا بطرده.. عذاري: ههههههه شوف عاد ما أرضى عليهم صاروا هلي أنا بعد.. حميد: يالله ياصبر السنين اخيرا تحقق الحلم.. عذاري: أربع سنين وثمان شهور وخمسة عشر يوم.. حميد: فديييت الي يحسبون.. عذاري: حميد.. حميد: ياروح وقلب وعيون حميد.. عذاري: توعدني تعوضني عن كل سنين الحرمان.. حميد: اوعدج بكل قطرة دم بجسمي إني أكون وفي وأعيشج بحب وسعاده الين الله ياخذ أمانته.. وخلصت ليله ثانيه من ليالي الحب.. الي بتبتدي بعدها أيام أحلى واسعد بحياة قلوب العاشقين.. **__**__**__**__** الفصل الثامن والعشرين.. في شركة بوحنين.. حنين مشغولة من اسبوعين بصفقات يديده للشركه ولاهيه تماما عن كل شي حوليها، مها تحاول تكلمها بس دايما حنين تتحجج بالشغل، ومها حدها معصبه يعني هيه كفايه عليها اهلها الي مسافرين برع، تقوم حنين وتنشغل عنها والله مب حاله.. مها قررت تروح الشركة وتفاجأ حنين، واول ماوصلت لقت عبدالله مع واحد واقفين يسولفون في الاستقبال ابتسمت لعبدلله بس ما انتبه لها فأشرت بإيدها له ويوم شافها ودر ربيعه وراح لها.. عبدالله: هلا وغلا وانا أقول ليش الشركة منوره اليوم..!! مها: هلا فيك.. يايه أسأل عن حنين صار لي أسبوعين ماشفتها وهيه دايم مشغوله عني.. عبدالله: بصراحه توقيتج مب مناسب، حنين عندها اجتماع مع شركة سياحيه وبعدها اجتماع ثاني مع شركة البترول اليديده الي بدينا معاهم شراكه يديده، يعني مستحيل تشوفينها قبل ساعتين.. مها: انزين أقدر أقعد وانتظرها لأني حالفه ما اطلع بدون لا أِشوفها.. عبدالله: حياج في مكتبي ترتاحين وتشربين شاي وقهوه.. مها: لا ابي عصير.. عبدالله: تتشرط بعد.. مها: من حقي.. عبدالله وصلها مكتبه وطلع عنها، مها عيبها المكتب مرتب وانيق والمكتب كان على زاويه بس في شباك كبير مطل على حديقة الشركه بصراحه المنظر يجنن.. بس مها حست المكتب ينقصه لمسه أنثويه فقررت تسوي شي بهالوقت الي بتكون فيه فاضيه.. دخل عليها عبدلله ووراه الفراش شايل لها العصير.. عبدالله: مها سامحيني مابقدر أقعد وياج لأني مشغول وحنين بتذبحني لو تأخرت.. مها: لا عادي عبدالله، انت روح وأنا بنتظركم هني.. عبدالله: انا قلت لحنين انج هني وقالت لي أول ما بتفضى بتقابلج.. مها: خلاص انت روح ولاتشغل بالك فيني.. راح عبدالله ومها قامت على طول من مكانها وبدت شغلها، فاتصلت بمحل الورد وطلبت باقات ورود طبيعيه وأشجار للزينه وعطلتهم العنوان والمكتب الي لازم يوصلون له الورد، وبعدها طلبت من الفراش اييب لها عاملين اثنين يساعدونها فقامت ونقلت المكتب من مكانه وحطته بويه الدريشه يعني ستوى المنظر الحلو ورا المكتب، وغيرت أماكن الكنبات الموجوده بالغرفه ورتبتهم على مزاجها.. ويوم خلصت دفعت للعمال وخلتهم يروحون، وبعد نص ساعه وصلت باقات الورد والشجر..وحطت شجره بجنب الباب والثانيه بجنب المكتبه الي استوت على يسار المكتب.. وحطت باقة ورد على مكتب عبدالله وباقه ثانيه على الطاوله الي بوسط الكنبات.. وحطت ورده حمرا بدرج مكتبه وورده ثانيه على المكتب فوق الملفات.. واستوى المكان أحلى بوايد ويفتح النفس للشغل، بعد ماخلصت مها شغلها يلست على الكنبه ترتاح، وبعد نص ساعه دخل عليها عبدالله.. عبدالله: سوري مها تأخر.... وقطع كلامه يوم شاف إنه المكتب تغير 180 درجه.. ورجع طلع شوي ورد دخل.. عبدالله: لا مب غلطان هذا مكتبي..واطالع صوب مها.. انتي الي سويتي كل هذا..؟؟ مها: أول شي قولي عيبك والا لا..؟؟ عبدالله: بصراحه.. رووووعه.. بس كيف سويتي كل هذا بروحج.. ومن وين يبتي الورد..!! مها: المكتب حلو وموقعه أحلى بس ناقصته لمسه أنثويه، فطلبت الورد والشجر من محل الورود، وطلبت من العمال يساعدوني والحينه صار المكتب يليق بك اكثر.. عبدالله: والله مب عارف شو أقولج.. فاجأتيني الصراحه.. مها: وانشاءلله تكون مفاجأة حلوه..؟؟ عبدالله: وأحلى مفاجأة بعد.. مها: أوكي وين حنين..؟؟ عبدالله: قالت لي أقولج تنتظرينها هني هيه بتخلص التقرير الي بايدها وبعدها بتيي حقج.. يلست مها تتعبث بالورد الي على الطاوله وعبدالله يلس ورا مكتبه يكمل شغله ويلعب بيده بالورده الي على الطاوله.. شوي ودخلت عليهم حنين.. حنين: آآآسفه حبيبتي تأخرت عليج.. مها: آسفه على الأسبوعين الي قطعتيني بهم، وإلا الساعتين الي يلستهم هني بروحي.. حنين: على كل شي.. وباست مها.. مها: مشكلتي طيبه واسامح بسرعه.. حنين: عبدالله متى غيرت ديكورات مكتبك..؟؟ عبدالله: من ساعتين.. حنين: قبل ساعتين كنت عندي كيف غيرته..!! مها: انا الي كنت فاضيه ويلست ألعب وأغير كل شي.. حنين: خلاص نحنا عندنا الحينه جوله على المصانع ولمن أرد أشوف مكتبي مغير بعد.. مها: لا والله بتشغليني عندج شوو..؟؟ عبدلله: ههههههههه لا أنا بس الي تغير حقي الديزاين.. حنين بسج من الغيرة.. مها: هههههههه حقوق الطبع محفوظه.. حنين: هههههههههه عبدالله: ومتى تبتدي الجوله..؟؟ والله ذبحتينا اليوم.. مها: يعني بتتركوني وبتروحون..!! خلاص بروح البيت أحسن لي.. عبدالله: حرام والله.. زرتينا بيوم غير مناسب.. حنين: خلاص حبيبتي شو رايج اليوم نتعشى برع.. مها: أكييييد موافقه.. عبدالله: وأنا بعد موافق.. مها: ومنو عزمك..؟؟ عبدالله: حرام عليج أنا تعبان طول اليوم بالدوام خلوني أستانس شوي.. حنين: لا ماشي بناخذ بعد حرمة سلطان أخوها يعني مالك أمل تيي ويانا.. عبدالله زعل وراح ورا مكتبه يطلع أوراقه.. مها: حنين أحسه زعل.. حنين: ماعليج منه دلع ولد خالي اعرفه عدل.. يالله تعالي مكتبي بعطيج أوراق حق عمي راشد فيها تقارير الشركه خل يطلع عليهم.. طلعت حنين بس مها ظلت واقفه تطالع عبدالله.. مها: عبدالله سوري بس تدري مانقدر نوديك ويانا بدون أخوي مايد.. مب حلوه بحقنا.. عبدالله: خلاص عيل راضيني بهديه.. مها: شو قصدك..؟؟ عبدالله: ابا شي يكون ذكرى منج ولو شي بسيط.. مها ابتسمت وطلعت من المكتب وراحت لحنين، وفي بالها.. شو الهديه الي ممكن أييبها له.. لازم تكون شي حلو ويدل على محبتي له.. **__**__**__**__** في بيت حنين.. بو حنين كان يالس يسولف مع حرمته بصوت واطي وحنين تطالع التلفزيون والتوام يفرون بعض بالمخدات.. أم حنين: العنود الهنوف سيروا حجرتكم عندنا موضوع مهم.. طلعوا البنات وحنين تتطالع امها وأبوها وهيه مستغربه اشكالهم تقول شي وراهم.. حنين: أبوي شو صاير.. شوفيكم..؟؟ بوحنين: حنين في واحد متقدم لج.. حنين وقف قلبها وتمت ساكته.. بوحنين: تذكرين محمد المزروعي الي من ست شهور عقدنا صفقه وياهم.. حنين: هيه أذكره.. بوحنين: ولده العود سعيد متخرج من الجامعه وامس ماخذ الدكتوراه من بريطانيا.. ويشتغل مع أبوه وعنده بعد تجارته الخاصه.. أم حنين: ماشاءلله عيله معروفه والولد ماعليه كلام والكل يتمنى يناسبهم.. حنين: بس أنا.. بوحنين: لاتعطينا رايج الحين.. اليوم هم بيتعشون عندنا وبتشوفين الريال.. حنين: اليوم..؟؟ بس انا اليوم بطلع مع مها.. أم حنين: اتصلي واعتذري منها.. احنا واعدنا الناس وعيب نغير موعدنا.. حنين: انشاءلله.. بوحنين: حبيبتي انتي كبرتي وكلها كم شهر وبتدخلين الخمسه وعشرين، وأختج الي أصغر عنج تزوجت وبخاطرنا نفرح فيج.. حنين: يصير خير يابوي.. طلعت حنين وهي مهمومه كيف تتزوج غير مايد، كيف ترضى تقابل واحد ثاني.. ومايد شو تقوله كيف بيوصل له الخبر.. ياربي شو هالمصيبه..!! **__**__**__** على الساعه سبع ونص وصلوا قوم محمد المزروعي.. الأب والأم والمعرس سعيد وأخوه يوسف واخواته الثلاث ميعاد وفجر وغصون.. أم حنين استقبلتهم ودخلت الحريم ميلس الحريم وأبوحنين مع الرياييل في ميلس الرياييل.. حنين وشوق بالغرفه يتجهزون بس حنين حدها مرتبكه ولا ودها تنزل لهم.. شوق: حنين طولي بالج يمكن مالج نصيب فيه.. حنين: تخيلي كل شي صار اوكي، شو يعني بنخطب له.. لالا مستحيل.. شوق: الراي الول والأخير حقج يعني لو قلتي لا أبوي مستحيل يغصبج على شي.. دخلوا عليهم العنود والهنود وهم يضحكون.. العنود: حنين المعرس وايد حلوو واخواته شكلهم خقاقات وشايفات نفسهم.. حنين: انتوا دخلتوا عندهم.. الهنوف: لا ماما مب راضيه ندخل.. بس بصراحه شفناهم من ورا الباب.. العنود: وأمي تقولج يالله تعالي لاتتأخرين وايد.. بعد عشر دقايق نزلت حنين وهي لابسه جلابيه ورديه روووعه ومحطيه مكياج هادي، اول مادخلت على الحريم حست بقلبها بيطلع من مكانه، سلمت على أم سعيد واخواته ويلست حذال امها، وشوق وراها سلمت عليهم ويلست مع البنات.. أم سعيد: ماشاءلله هاي عروسنا..!! أم حنين: ايه هاي بنتي العوده حنين، والثانيه شوق الأصغر.. أم سعيد: وليش مزوجين الصغيره قبل العوده..؟؟ أم حنين: شو نسوي بعد نصيبها، شوق متخبله على العرس أول مادشت العشرين تزوجت.. شوق: ماما.. ام حنين: ههههههههههه ميعاد: حنين انت تشتغلين بشركة أبوج.. حنين: هيه اشتغل مع الوالد.. غصون: انا بعد خريجة اداره أعمال بس أبوي مب راضي يخليني أشتغل وياه.. شوق: أحسن لج قعدي بالبيت وتعززي.. أم حنين: خل انتي تموتين بيلسة البيت.. أم سعيد: بأي شهر ماشاءلله شوق..؟؟ شوق: موعدي هالأيام انشاءلله.. أم سعيد: الله يسهل عليج ويقومج بالسلامه.. شوي ويدخل عليهم ابوحنين.. بوحنين: أم حنين تعالي شوي.. راحت ام حنين ورجعت بعد شوي وهي تضحك.. أم حنين: شكله ولدكم مستعيل يبا يشوف العروس لأنه بيطلع ضروري.. فجر: صح هو قال إنه مشغول اليوم بس نحنا سحبناه غصب.. ميعاد: لو راده عليهم كان خطب وملج بدون لايشوف العروس من كثر أشغاله.. أم سعيد: لاترمسين عن اخوج جيه، يالله عيل بنسير الميلس.. قاموا الجماعه يبون يروحون ميلس الرياييل بس فجأة شوق صرخت وطاحت على الكرسي.. أم حنين: بسم الله عليج حبيبتي شو فيج..؟؟ شوق: ماما بطني يعورني حاسه بألم فظيع.. حنين: لايكون بتولدين.. شوق: ااااااه ما أدري اتصلوا بجاسم أبا أروح المستشفى.. ركضت حنين تتصل بجاسم الي وصل بسرعه وخذوها للمستشفى.. وهم طالعين كانوا قوم أبو سعيد طالعين بعد.. وحنين ركبت سيارتها مع أمها بيلحقون شوق للمستشفى.. فجر وقفت جنب اخوها تسولف وياه.. سعيد: هاي هي حنين الي ركبت المرسيدس السوده..!! فجر: هيه هي بعينها، شو رايك فيها حلوه صح..؟؟ سعيد: حلوه وبس.. هاي هي الي أدورها.. ميعاد: يعني نقول مبروك..!! سعيد ابتسم وركب سيارته مع اخواته وراحوا للبيت وفي باله طيف حنين ويحلم بها تكون زوجته بيوم من الأيام.. وفي المستشفى الكل كان مرتبك وجاسم حده متوتر وخايف على شوق.. حنين: جاسم هدي أعصابك انشاءلله خير.. أم جاسم: الله يقومها بالسلامه.. جاسم: هاي شوق تعرفون شو يعني شوق.. وعمتي وينها ليش ماتطلع تطمنا عليها صار لها أكثر من ساعتين في الولاده ولابين شي.. حنين: اصبر ياجاسم هاذي ولاده يعني ممكن تطول أكثر.. جاسم: الله يستر الله يستر.. وبعد نص ساعه طلعت الدكتوره وطمنتهم على شوق..: مبروك يابت بنت.. جاسم: وشوق شو اخبارها..؟؟ الدكتوره: الحمدلله كله تمام بعد شوي بنطلعها غرفتها.. جاسم: الحمدلله الحمدلله.. حنين: مبروك ياجاسم.. أم جاسم: مبروك ياولدي وحمدلله على سلامة شوق.. جاسم: الله يبارك فيكم.. وبعد ساعه تقريبا الكل كان يالس بغرفة شوق يهنونها بالسلامه.. حنين: فديتها محلاتها تشبه خالتها العوده.. جاسم: وانتي وين شفتيها..؟؟ حنين: سرت لها هناك عند الممرضات، فديتها ملاك وراقد.. شوق: جاسم.. جاسم: هلا حبيبي شو تبين.. شوق: ابا أشوفها.. ييبها حقي.. جاسم: انا بسير بشوفها وبقولهم اييبونها حقج.. حنين: الظاهر شوق طالعه على أمايه بتصف لنا البنات.. أم جاسم: شو فيهم البنات محلاتهم.. شوق: المهم يات وارتحت، يالله أحس روحي بتطلع.. أم جاسم: هذي الولاده والا حسبالكم بالسهل الروح تطلع للدنيا.. شوق: انا من الي شفته يالسه أتسامح من أمي، وقصدي اني حسيت بمعاناتها، وهي تتحراني أتسامح لأنه بيصيبني شي.. أم حنين: بسم الله عليج من كل شر.. حنين: هههههههه المهم سلامتج.. شوي ويدخل جاسم ووراه الممرضه شايله البيبي وعطتها لشوق الي خذتها ويلست تبوسها وتصيح.. حنين: انزين ليش تصيحين..؟؟ شوق: ما أدري بروحها دموعي تطيح.. جاسم: لأنج صرتي ام واحساس يديد عليج.. حنين: وشو بتسمونها..!! جاسم: الي تختاره امها.. شوق: حنين قالت الإسم الي ابيه حقها.. حنين: شو قلت..!! شوق: ملاك.. حنين: الله.. وبتكون أحلى ملاك بالدنيا.. وامتلا الجو بحب وفرحه والكل نسى الهم والغم، بس حنين للحينه بداخلها هم المعرس الي مب عارفه كيف تتخلص منه.. **__**__**__**__** الجزء التاسع والعشرون.. في بيت بوحنين.. حنين بالمطبخ معتفسه ويا الفواله، من ولدت شوق والناس داخلين طالعين يسلمون عليها.. هذا غير ربعها بالكليه وكله على راس حنين وأمها.. حنين: أمايه انا بسير بشوف شوق إذا تبا شي.. أم حنين: خلاص سيري وانا بقعد هني أكمل.. راحت حنين لغرفة شوق ولقتها راقده على السرير وبنتها صاحيه وتلعب حذالها.. شالتها حنين ونزلت الصاله ويلست تلاعبها.. شوي وتسمع صوت جرس الباب فلبست شيلتها وكملت لعب مع ملاك، ثواني ويدخل عليها جاسم وعبدالله أخوه.. جاسم: فديت بنوتي حبيبتي.. حنين: الناس تسلم بالأول.. جاسم: الي يشوف هالملاك الحلو وين بيتذكر سلام.. عطيني إياها ألاعبها.. حنين: خذها اشوفك.. عبدالله شحالك..؟؟ عبدالله: الحمدلله بخير، انتي شحالج على السهر وهالحشره الصغيره.. حنين: معذبه امها وامي طول الليل.. وانا يوم اتعب أدخل ارقد في غرفتي.. جاسم: عيل وينها شواقي..!! حنين: شواقي راقده بغرفتها.. جاسم: بسير لها.. يودي ملاك.. حنين: خذها وياك.. جاسم: لا بتخرب علينا.. عبدالله: من الحينه ماتبيها تخرب عليك.. جاسم: لا اسولف عليكم، بس اكيد شوق تعبانه فبنخليها ترتاح شوي بعيد عنها.. حنين: بعيد عنها وقريب منك.. راح جاسم وهو يضحك، وعبدالله قعد يلاعب ملاك.. حنين: انزين حاول تشيلها.. جرب مره وحده.. عبدالله: لالالالا دخيلج ما اعرف أشيل يهال، والله لايذبحوني لو طاحت مني.. حنين: ههههههههه عبدالله: متى بتردين الشركه؟؟ صار لج اسبوع غايبه وأبوج حليله كبر على الشغل.. حنين: باجر انشاءلله بداوم، المهم قولي قضية المواد الغذائيه شو صار عليها..!! عبدالله: ماقلت لج.. كسبناها، وبيدفعون غرامه 700,000 حنين: بس..!! نحنا الي خسرناه من تعاملنا وياهم تعدا المليون.. عبدالله: حنين لاتحسبينها جيه، شوفي لو دفعولنا هالتعويض، وبعدها بكلمهم على البضايع الغير قانونيه الي وردوها لنا وإنهم لازم يعوضونا عنها أكيد بيدفعون زياده.. يعني كفايه عليهم فضيحه وحده... حنين: يعني بتهددهم.. عبدالله: لا هذا لايعتبر تهديد، هذا حفظ لكرامتهم بالسوق، وبعدين هاي مصطلحات قانونيه انا ادرى بها منج.. حنين: أوكي عيل، المهم الي خسرنا بيرد لنا.. عبدالله: وزياده بعد.. الحينه بغيتج بموضوع.. حنين: خير انشاءلله.. عبدالله: لامب هني.. باجر بالمكتب وقت الغدا انت بترجعين البيت..؟؟ حنين: صار لي أسبوع مب مداومه يعني لو رديت البيت نص الليل بقول الحمدلله.. عبدالله: خلاص عيل باجر في البريك بشوفج.. والحينه بطلع بسير للربع.. حنين: الله وياك.. طلع عبدالله وحنين راحت فوق تودي ملاك لأمها.. ونزلت بعدها لأمها بالمطبخ.. حنين: امايه ماخلصتي.. ام حنين: بلى خلصت، الحينه بروح بسبح وبرقد حاسه بتعب.. حنين: ترى جاسم عند شوق بغرفتها.. أم حنين: خلاص انا بسلم عليه وبسير أرقد.. حنين كملت شغل أمها بالمطبخ وراحت الصاله تبا تتطالع التلفزيون بس سمعت صوت جرس الباب فنادت الخدامه تشوف منو.. شوي وتدخل عليها مها وهي شايله باقه ورد كبيره والخدامه وراها شايله أغراض وايد.. حنين: انتي ماتعرفين تزورينا وإيدج فاضيه..!! مها: فديتني كريمه وانتوا تستاهلون.. حنين: تعالي حياج تفضلي.. مها: عبدالله كان هني..!! حنين: خيييييبه شو دراح.. حشى ساحره.. مها: هههههههه حنين: هيه كان هني ويالس على هالكرسي الي انت عليه بعد.. قولي يالساحره شو دراج..؟؟ مها: شميت ريحة عطره.. حنين: أوووف منج مكاره.. مها: ايه صح قبل لا أنسى مايد وأمايه يسلمون عليج، والأسبوع الياي بيوصلون.. حنين: والله.. زين الحمدلله، ومايد شو اخباره..؟؟ مها: يقولي بدا يتعود على الريل اليديده.. بس صوته فيه حزن غريب.. حنين: ليش..؟؟ مها: علمي علمج.. المهم قوليلي ملاك وينها..؟؟ حنين: فوق عند امها، بس جاسم وياهم يوم بيطلع بنروح لها.. بعد نص ساعه طلع جاسم وراحوا البنات لشوق.. ومها عفست ملاك من اللعب.. شوق: شوي شوي عليها بعدها صغيره.. مها: خليها تتعود على العنف من الحين.. حنين: هههههههه الله يعين عيالج.. شوق: حنين وين ماما..!! حنين: راحت ترقد.. شوق: فديتها تعبت معاي، ومع هالدلوعه الي مايحلالها اللعب الا نص الليل.. وبعد ساعه مها راحت لبيتهم.. وحنين دخلت تريح ومسكت تلفونها واتصلت بمايد.. مايد: الووو..!! حنين: السلام عليكم.. مايد: وعليكم السلام.. هلا والله الحين ردت لي الروح.. حنين: حمدلله على سلامتك.. مايد: الله يسلمج.. وينج انتي..؟؟ توقعتج دايم تدقين تسإلين علي.. حنين: أسأل مها عنك كل يوم.. مايد: ادري، بس انا ماغيرت رقمي لأني توقعتج تدقين عليه.. حنين: السمووحه بس والله فشله اني أدق لك.. مايد: اول ما أرد البلاد انشاءلله بصلح كل الأخطاء الي سويتها بحقج.. وما بيصير فشله لو اتصلتي حقي.. حنين: انت رد بالسلامه لنا، ومابيصير الا كل خير.. مايد: انشاءلله.. حنين: يالله بخليك ترتاح الحينه، مع السلامه.. مايد: بحفظ الله الغاليه.. بندت حنين وكلها أمل يتحقق الحلم المستحيل.. وفي الطرف الثاني مايد مصر على إنهاء السخافه الي هو فيها.. ويعيش مع حنين أحلى سنين العمر.. **__**__**__**__** حنين من صباح الله خير بالشركه تخلص الشغل الي متوقف من أسبوع، وحدها مشغوله ولاحست بالوقت الا يوم دش عليها عبدالله.. عبدالله: هاا بنت عمتي بتتغدين هني والا أوديج مطعم.. حنين: ليش كم الساعه الحين..؟؟ عبدالله: الساعه 2 وربع.. حنين: أووووف والله تحريتها بعدها الساعه 12.. عبدالله: يالله قومي بنطلع نتغدا برع.. حنين: لا عبدالله ييب لنا اكل من الكافتيريا.. مافيني أطلع حاسه بتعب، وبعدين لازم أخلص الشغل بسرعه.. طلع عبدالله وراح وياب لهم وجبتين من كافتيريا الشركه.. ورجع ويلسوا ياكلون.. وحنين تاكل بسرعه عسب ترد تخلص شغلها.. عبدالله: شوي شوي لاتموتين علي.. حنين: هههه والله أبا اخلص الشغل ماودي أرد البيت متاخر اليوم.. وحشتني ملاك.. عبدالله: أمممممم يعني ماسألتيني شنو موضوعي!! حنين: تعال نسيت السالفه.. يالله قولي.. عبدالله: انا.. انا.. قررت.. احم..... حنين: عبدالله بلاك كأنك بمقابلة عمل، ارمس شو تبا اجازة والا شغل زياده.. عبدالله: أبا أتزوج.. حنين: والله..!! ما أعرف أزغرط والا حشرت الدنيا.. عبدالله: قالت أزغرط قالت.. عاشت بنت عمتي المصريه.. حنين: ههههههههه فديتك والله انت تستاهل كل خير.. وعندك عروس والا تبيني أدورها لك.. عبدالله: تستعبطين حظرتج..!! حنين: اوووه نسيت القلب عشقان ورايح فيها.. عبدالله: بس.. أبا أنا الي أخطبها.. يعني أبا أقول لها الخبر بنفسي.. حنين: مب مشكله بعزمها على العشا اليوم.. لاباجر لأني برد متاخر اليوم.. وانت تعال واجلطها بالخبر.. عبدالله: شو قصدج يعني الخبر هذا يجلط.. حنين: ههههههه يالله الحينه فارج ونادي الفراش يشيل هالوساخه.. وانت روح ييب لي الوراق الي طلبتهم منك الصبح.. طلع عبدالله وخلا حنين طايره من الوناسه وودها تبشر مها بس مب قادره لأنه عبدالله بنفسه يبا يخبرها.. على الساعه ثمان ونص بالليل حنين وصلت البيت ولقت سيار غريبه عند الباب فدخلت وهي شايله مفلات واوراق.. وانصدمت يوم شافت أم سعيد وبناتها.. وياتها ضيجه بصدرها.. أم حنين: تعالي حبيبتي سلمي على الضيوف.. دخلت حنين وسلمت ويلست من بينهم وهي حدها مضايجه.. فجر: ليش متأخره بالشغل، الساعه ثمان الحينه..؟؟ حنين: لأني من اسبوع مب مداومه والشغل كله متراكم علي.. أم سعيد: الله يعينج يالغاليه.. حنين: أمايه وين شوق..!! أم حنين: سارت لبيت ريلها شوي وبترجع.. حنين: وملاك معاها..!! أم حنين: لافوق راقده.. حنين: اوكي بسير بشوفها.. أم حنين: شوفيها وبدلي ثيابج وتعالي.. لأنه سعيد يبا يشوفج اليوم.. حنين عطت أمها نظرة عصبيه وراحت فوق، شافت ملاك وتطمنت عليها وراحت غرفتها وتسبحت ولبست جلابيه حمرا ولاحطت على ويها اي ميك أب ولبست شيلتها ونزلت.. وهي نازله من الدري شافت أبوها داخل الصاله ومعاه واحد.. كان طويل وأسمراني وملامحه حلوه.. وحنين في داخلها يلست تقول، فديتك يامايد الله يرد لي بالسلامه ولا أتورط هالورطه السوده.. أبو حنين: تعالي حبيبتي هذا سعيد.. وهاي بنتي حنين.. سعيد: شخبارج حنين.. حنين: الحمدلله بخير.. ووقف سعيد يطالعها شوي وهي منزله راسها.. سعيد: خلاص عمي انا بروح الحينه ممكن تنادي الأهل من داخل..!! بوحنين: انشاءلله.. حنين بابا روحي نادي امه واخواته.. رحت حنين الصاله وخبرتهم انه سعيد ينتظرهم برع.. أم سعيد: وشافج..!! حنين: هيه توه وانا نازله شافني.. وأبوي كان وياه، والحينه ينتظركم برع.. قامت ام سعيد وبناتها وسلموا عليهم وطلعوا.. ورجعت حنين الصاله تتطالع التلفزيون.. ويات أمها ويلست عدالها.. أم حنين: هاا حبيبتي شو رايج...؟؟ حنين سكتت ولا تنطقت بكلمه وحده، ودخل أبوها.. بوحنين: والله الريال ماعليه كلام، محترم ومؤدب وولد ناس معروفين.. حنين: أبوي أنا.. انا ما أبي أتزوجه.. أم حنين: وليش عاد.. شو الي مب عايبنج فيه..!! بوحنين: سكتي انتي.. حنين فيه شي بخاطرج قوليلي ليش مب راضيه عليه.. حنين: ما ارتحت له.. أبوحنين: يابنتي انتي شفتيه مره وحده بس لاكلمتيه ولاصار بينكم شي عسب ماترتاحين له.. حنين: أبوي خلني على راحتي.. أم حنين: شو على راحتج بعد.. ولين متى بتظلين جيه بدون عرس.. أبوحنين: قلت لج اسكتي.. حنين لو حد بحياتج قوليلي والله اني موافق عليه بس ارمسي قولي شي.. حنين: أبوي لو فيه أحد بحياتي كنت بقولكم بس مافي شي للحين.. وانا همي بالشغل وبس.. وقامت حنين وسارت حجرتها ويلست تصيح.. ياربي متى بترد لي مايد.. متى الدنيا بتضحك لي.. يارب عمري ماتمنيت ولاطلبت غير مايد.. يارب حقق لي أمنيتي.. ونامت حنين وهي تصيح وتدعي ربها إنه يجمعها مع الي تحبه على خير.. **__**__**__**__** باليوم الثاني بالليل مها راحت لحنين لأنها عازمتنها على العشا.. ويلسوا برع بالحديقة يسولفون.. مها: خسج الله الجو باااارد قومي ندخل.. حنين: أي بارد الجو رومانسي.. والحينه بتشوفين بعينج.. مها: قالت رومنسي قالت.. نشي بشوفج خل ندخل.. وهم يتضاربون ويضحكون وصل عبدالله وسلم عليهم، مها ارتبكت ويلست تعدل شيلتها.. عبدالله كان لابس كندوره سوده ووايد حلوه عليه.. عبدالله: آسف لو أزعجتكم.. بس عادي اتعشى وياكم..!! حنين: أكييييييد مها تهمس حنين: حنون الجو صار حار فجأة ورومانسي بعد.. ليش..؟؟ حنين: هههههههه عبدالله: لو مضايجه مني بطلع عادي.. مها: لالا بالعكس.. عبدالله: شو يعني بالعكس تبيني اتم يعني.. مها: عادي براحتك يعني.. حنين: أنا بسير بييب أكل زياده وصحن حق عبدالله.. راحت حنين وخلتهم مرتبكين هم الاثنين.. عبدالله يالس يحج ايده بتوتر مب عارف كيف يبدأ، ومها أخس عنه حاسه نفسها انها وايد مرتبكه.. عبدالله: مها.. كنت أبا أقولج سالفه.. مها: تفضل. عبدالله: انتي تعرفين عن حياتي كل شي تقريبا.. وتعرفين قصتي مع المرحومه وكيف اني بصعوبه قدرت أتخطى موته، ويمكن للحين السالفه تأثر فيني.. مها: هيه أعرف.. والله يعينك ويوفقك.. عبدالله: مها انا.. أنا قررت أتقدم لج شو رايج..!! مها وكأنه حد صب عليها ماي باااااارد تمت تتطالعه وهي مستغربه ولاعارفه بشو ترد عليه.. وقفت تبا تدخل داخل بس عبدالله مسكها من ايدها.. عبدالله: الله يخليج تقعدين.. ابا أقول شي بخاطري مب بس أعرض عليج الزواج.. مها يلست وهي حدها متوتره.. عبدالله: مها انا تقدمت لج لني بديت أحبج وأشوف فيج الإنسانه الي بعيش معاها باجي عمري.. بس الي أبيه منج يوم بتفكرين انج توافقين علي تحطين في بالج إني للحينه متعلق بسارا.. يعني ياليت تصبرين علي وتتحمليني.. مها اخيرا نطقت: عبدالله.. أنا بعد بديت أحبك وأتمنى إني أقدر أطلعك من الماضي ومب قصدي أنسيك سارا بالعكس، قصدي تعيش وتستانس وتدعيلها بالرحمه والمغفرة.. عبدالله: يعني موافقه..؟؟ مها ابتسمت ونزلت راسها وعبدالله وقف وهو يطالعها.. شوي وطبت عليهم حنين.. حنين: هاا وين ساير اقعد تعشى ويانا.. عبدلله: لاخلاص تمت المهمه بنجاح.. والحينه تصبحون على خير.. راح عبدالله ويلست حنين حذال مها الي خبرتها بالي صار وهي تصيح.. حنين: هههههه انزين ليش تصيحين.. مها: ما أدري.. عمري ماتخيلتني أوصل للي أبيه.. حنين: الحمدلله والله يسعدكم يارب.. مها: ويسعدج انتي ومايد بعد.. **_**__**__**__** الجزء الثلاثين.. بعد أسبوع من رفض حنين للمعرس وخطبة عبدالله ومها الغير رسميه وصل مايد البلاد.. وصل وكله أمل انه يغير حياته الي انفرضت عليه فرض.. ومن وصل وسلم على هله وربعه.. على طول راح ليدته الي بتطلعه من هالسالفه.. أم راشد: هلا هلا بنظر عيني.. حمدلله على سلامتك يالغالي.. مايد: الله الله استويت غالي عليج.. أم راشد: فديتك دايما غالي.. بس لو مب هالذيبه الي ماخذنها.. مايد: وانا ياينج عسب تفكيني منها.. أم راشد: الله يبشرك بالخير ياميووود.. وشو تباني أسويلك.. مايد: يدوووه تعرفين الي جبرني عليها الوالد.. وهو مريض ولاودي أزعله أو اتعبه زياده.. وهالشما انا ما أطيقها وبس خلاص ودي بالفكاك منها.. أم راشد: خلاص خل أبوك علي أنا.. مايد: بس يدووه الله يخليج تخلصين الموضوع بدون لايصيب أبوي شي.. أم راشد: بسم الله على ولدي، خلاص انت ارقد وآمن.. أشوف ريولك اليديده كيف صايره.. مايد قعد يسولف مع يدته شوي وبعدين طلع وراح البحر، يحب لي ضاقت به الدنيا يفر همه للبحر، يلس مايد قريب النص ساعه يشكي للبحر ويتوسل لرب العالمين يفرج همه وكربته.. ورن موبايله ولقى عبدالله المتصل به.. مايد: مرحبااا الشيووخ.. عبدالله: السلام عليكم.. فديت الي نوروا الامارات برجعتهم والله.. مايد: فدييييييتك تسلم يالغالي.. عبدالله: انت وين الحين..؟؟ مايد: على البحر.. أشكي همي.. عبدالله: عيل انا بعد بيي أشكي همي.. مايد: خلاص بنتظرك.. كلها عشر دقايق ووصل عبدالله وحضن مايد وسلم عليه بحراره.. مايد: يالله كل هذا شوق حقي.. فديتني طلعت غالي عليك.. عبدالله: والله يامايد في بعدك حسيت نفسي وحيد في البلاد.. مايد: يالله عيل تعال اخطبني عسب مانتفارق أبد.. عبدالله: هههههههههههه الله يخس ابليسك ماتيوز من سوالفك.. الله يعينها بنت عمتي عليك.. مايد: والله لها وحشه..يالله متى بخطبها والله الود ودي اليوم قبل باجر.. بس الله كريم.. عبدالله: شكلك مطول بالخطبه يالحبيب.. احم عيل انا بغيت أقولك شي.. مايد: خير ياخوي.. تفضل شو عندك..!! عبدالله: أنا لا أعرف ألف وأدور ولا أدخل بمقدمات طويله عريضة.. احم.. أنا أبا أخطب اختك مها.. مايد تم امبحلج في عبدالله ثواني يستوعب الموضوع وبعدها ابتسم له وحط يده على كتف عبدالله.. مايد: قبل لا أرد عليك بسألك سؤال.. انت بتاخذها لأنها أختي وعايبتنك والا لمجرد انها تشبه المرحومه..!! عبدالله: كل الي قلته.. يعني اول ماشدني لها شبها بالمرحومه، وبعدين شفتها كذا مره مع حنين وعيبتني شخصيتها، وأهم شي هو انها أخت الغالي فأكيد اختياري صحيح.. مايد: لو علي مابلقى لأختى أحسن منك.. بس الشور لها ولأهلي طبعا.. عبدالله: يعني انت راضي ومبارك الزواج.. مايد: مبارك وصالح وسبيت وعنتر وكل شي بيخلينا نسايب.. عبدالله من الوناسه قام وحظن مايد.. مايد: ههههههه بس خلاص.. انزين اصبر يمكن العروس ماترضى.. عبدالله: تعتقد انها بتردني..!! مايد: لا ما أعتقد.. بس انا اليوم بكلمها وبكلم الأهل والي الله كاتبه بيصير.. تفارقوا الربع وكل واحد مستانس من الي بيصير.. عبدالله بيرتبط بالي يبيها ومايد مستانس انه أخته بتاخذ اعز ربعه.. **__**__**__**__** في بيت بو سلطان.. مها: ماما وينج.. الحقي علي.. أم سلطان: بسم الله عليج شو صاير بعد..!! مها: يدوووه اتصلت وقالت الحينه بتيي، والله مالي قعده بالبيت وهي هني.. أم سلطان: لا حبيبتي مالج طلعه عيب عليج هاي يدتج، انتي اقعدي وانا الي بطلع.. مها: لا والله تضحين فيني يعني.. مايخصني انا بدق لحنين وبروح لها.. دخل عليهم مايد: شو فيكم؟؟ الي يشوفكم يقول مصيبه بتصير..!! مها: الا قول بلوه عوووده.. يدوووه الحينه بتيي.. مايد: ههههههههه الله يعينكم، انا أسمينها راضيه علي، اليوم رحت أسلم عليها وقالت لي هلا بنظر عيني.. مها: انا بعمري مابسمع منها كلمه حلوه.. أم سلطان: يوم بسمع انا بتسمعين انتي.. مايد: مها تعالي أباج بسالفه.. وراح مايد مع أخته في غرفتها ويلس على الدبدوب الكبير الي مها تموت عليه.. مها: قووووم عنه تعرفني ما احب حد يقعد عليه.. مايد: الحينه استويتي عروس وبعدج تلعبين بالألعاب والدباديب.. مها حست إنه عبدالله كلم مايد: ولو أستوي أم عيال بعدني بلعب وبظارب عيالي على ألعابهم بعد.. مايد: هههه مها بقولج موضوع وفكري فيه عدل.. عبدالله ولد خال حنين تعرفينه.. مها: هيه دوم اشوفه وياها.. مايد: اليوم خطبج مني، شو رايج..؟!! مها من كثر ما استحت قامت وعطته ظهرها ووقفت مجابله الدريشه.. مايد: ترى عبدالله ريال والنعم فيه، انسان محترم وخلوق، ولو لفينا الدنيا كلها مابنلاقي واحد يستاهلج كثره.. مها: ما ادري.. أمي وأبوي شو رايهم..!! مايد: انا قلت أخبرج وأعطيج فرصه تفكرين، والحينه بسير بخبرهم.. مها: أوكي طلع مايد وخلاها طايره من الفرحه وراحت على طول تدق لحنين وتخبرها بالي صار.. في بيت بو حنين.. حنين بندت التلفون عن مها وهي مستانسه.. شوق: بلاج مستانسه شو الي صار..!! حنين: امممم عبدالله ولد خالي خطب مها.. شوق: والله..؟؟ الحمدلله انه طلع من أزمة سارا، ومها طيبه وتستاهل كل خير.. حنين: ملاك للحين راقده؟؟ صحيها والا السهره اليوم صباحي.. شوق: خلاص تعودت انا الحينه برقد وبقوم يوم هي بتقوم.. طلعت عنهم حنين وراحت تكلم عبدالله وتبارك له مقدما.. نرجع لمايد.. يدته توها واصله بيتهم، وسلمت على الكل وسارت لولدها راشد، لقته منسدح على السرير وسرحان.. أم راشد: وين سرحان الغالي.. راشد: هلا أمي.. شحالج..!! أم راشد: بخير الله يعافيك.. يالله قولي وين كنت سرحان..؟؟ راشد: أفكر بدنيتي وشو سويت فيها.. أفكر بآخرتي وشو أعديت لها.. أم راشد: راشد.. فيك شي..!! راشد: يمه لاتظنين إني مب حاس بمايد والي بخاطره، بس انا بعد معذور وصية أخوي دين برقبتي ولاودي اقابله بالآخره وألقاه زعلان مني.. أم راشد: انت ماقصرت مع بنته، ربيتها وكبرتها الين صارت حرمه، وإذا على طلبها انها تبا مايد، انت مب ملزوم به.. وبعدين البنيه ماتصلح له.. راشد: والحينه شو تبيني اسوي الي صار صار.. أم راشد: الي صار صار بس نقدر نغيره، مايد زارني أمس ويقولي سوي المستحيل بس فكيني من شما.. والله ياراشد مب هاين علي الولد أشوفه بهالحاله وأسكت.. انزين انا شما أعرف كيف أطفرها، بس قولي لو مايد طلقها انت مابتزعل عليه.. راشد: لاحشا لابزعل ولاشي.. بس مايفظحنا ولا يفظحها.. طلعت أم راشد وراحت تدور مايد، بس لقت البيت فاضي.. أم راشد: حسبي الله عليهم وين ساروا..!! أم سلطان: هلا عموووه نحنا هني بالمطبخ.. أم راشد: ووينها بنتج مهوووي العروس.. أم سلطان: بنتي عروس..!! شو دراج..؟؟ أم راشد: أنا شايفه لها معرس غاوي.. أم سلطان: لا استريحي عموه بنتي انخطبت اليوم.. أم راشد: لا والله ومنو ولده الي خطبها.. أم سلطان: تعرفين بدر شريك راشد بالشغل..!! أم راشد: الي بنته حنين ربيعة مهوووي..!! أم سلطان: هو بعينه، ولد اخو حرمته خطبها.. ام راشد: وانتوا تعرفون الولد والا بتعرسون البنيه دفاشه..!! أم سلطان: أي دفاشه عموه الله يهداج، الولد نعرفه زين وربيع مايد الروح بالروح.. أم راشد: زين زين بالبركه.. عيل وينه مايد.. أم سلطان: بغرفته.. ازقره لج.. أم راشد: لو بغرفته الي فوق زقريه، واذا الي تحت انا بدخل له.. أم سلطان: لا فوق، بروح بزقره لج.. أم سلطان راحت تنادي ولدها ورجعت وقعدت مع عمتها، وصل مايد ويلس مع يدته.. أم راشد: انتي سيري داخل عند ريلج، ابا مايد برمسه بروحنا.. أم سلطان: انزين هذا ولدي خليني أعرف شو الي من بينكم.. أم راشد: سيري أشوفج داخل، وبعدين كل شي بيبين وبينعرف.. راحت ام سلطان وهي بتموت من الفضول، وش السالفه الي من بين مايد ويدته.. مايد: هااا يدووووه بشري.. أم راشد: زين يامايد.. مايد: يالله يدوه لاتحرقيني أكثر من جيه.. أم راشد: أبوك راضي عنك بس ماوده تجرح بنت أخوه.. مايد: والمعني..!! أم راشد: يعني لو بتطلقها بالتفاهم، وبدون فضايح لك ولها.. مايد: وهاي كيف بتصير بالله.. أم راشد: انت افتح أذونك واسمع خطتي.. ويلست ام الدواهي أقصد ام راشد تحكي لمايد عن خطتها.. ومايد بدا الأمل يكبر بداخله أكثر وأكثر.. **__**__**__**__** الجزء الحادي والثلاثون..(( الأخير)).. بعد يومين من الأحداث السابقه، صار الي محد توقعه أبداا.. أبواحمد أخو أم حنين طلق حرمته ورجع دبي يعيش عند اخته.. وعياله الكبار أحمد وحمده معاه والصغار ظلوا مع أمهم.. حنين: منو كان يتوقع خالي يطلق حرمته.. شوق: بس شو الي صار وطفره منها، كان متحملنها طول عمره ليش الحين..؟؟ حنين: هاي القشه الي قصمت ظهر البعير.. شوق: الله يعينك ياخالي، قومي خلينا نروح لحمده تلاقيها زعلانه وشايله الهم.. راحوا البنات يدورون بنت خالهم بس مالقوها، فراحوا غرفة احمد وشافوهم هم الإثنين يالسين وداقينها حزن.. حنين: أحمد.. حمده ذكروا الله، الي صار مقدر ومكتوب، والله له حكمته من كل شي.. أحمد: والله ماتوقعت بعد هالعمر يتطلقون، والله فشيله جدام الناس.. شوق: لاتيلس تقول الناس والناس، الناس مالهم شغل بحياة الغير، وأبوك يوم سوى هالشي من القهر الي بداخله.. حمده: شو قصدج يعني، أمي مب زينه.. أمايه صح عصبيه بس مع ذلك طيبه.. حنين: حمده حبيبتي نحنا ماقلنا عنها شي، بس شوفي يالغاليه الي صار صار، ولاتيلسين تقولين ليش وليش.. أحمد: حنين معاها حق، خلاص الي صار استوى ماضي ونحنا أولاد اليوم.. شوق: عيل يالله قوموا خالي تحت بروحه، بنسير نطفر به شوي.. نزلوا الشباب تحت ويلسوا مع خالهم.. حنين: خالي عيل وين أمايه..!! بوأحمد: دشت المطبخ شوي.. شوق: الله يا خالي شو الكندوره الغاويه، والله طالع فيها أبو الشباب.. أبو أحمد: وين تم لينا شباب، خلاص راحت علينا، انتوا الشباب والمستقبل الحينه.. شوق: يالله لو انت بس مب خالي.. كنت بودر جاسم وباخذك، فديت هالشيبات أنا.. أبوأحمد: خوزي عني ياشوق.. حنين: ههههه خالي الله يعينك عليها هالشوق بتطفر بك طول ماهي عندنا.. حمده: متى بتردين بيت ريلج..؟؟ شوق: بعدني أسبوعين ونص.. دخلت ام حنين: بسج يلسه هني، سيري بيت ريلج، ماشاءلله استوت صحتج زينه.. شوق: شوفوا انتوا هالأم الي تطرد بنتها من البيت.. أبوأحمد: هي ماتطردج بس بيت ريلج أحسن لج.. شوق: شوفوا عاد.. سوو الي بتسوونه بس طلعه من البيت قبل لا أطلع من الأربعين ماشي.. حنين: ههههههه على بالكم بتطردونها، هاي شوق والأجر على الله.. أحمدك ههههههه حرام خلوها مونستنا.. شوق: هذا الذوق الي يفهم.. الله يخليك لي ياولد خالي.. حمده: هالشوق عرست والا لا بعدنها ياهل.. أبوأحمد: أحمد ساعدني يابوك بروح حجرتي أرتاح شوي.. ريولي تعورني من اليلسه.. راح محمد الغرفه ويلسوا البنات يسولفون ويضحكون.. شوق: مب ناقصنا شي..!! أحس في شي نسيناه.. حمده: شووو..؟؟ حنين: مافي شي.. عادي..!! أم حنين: بسم الله عليج بلاج مخرفه اليوم.. شوق: صح.. تذكرت.. أوييييه بنتي وينها..!! ركضت شوق تشوف بنتها والكل يضحك عليها، شوق مب ويه عيال بروحها تبيلها حد يربيها.. **__**__**__**__** مايد عازم حرمته على العشا، ووداها احلى مطعم في البلاد.. وشما مستانسه كثر الدنيا وماعليها.. شما: غريبه عازمني على العشا.. شو صاير في الدنيا..!! مايد: ولاشي.. انتي زوجتي وبعد فترة قصيره بنتزوج ولازم نتفق على كل شي.. شما: أول شي نتعشى وعقبها بنتكلم.. مايد على راحتج.. وطلب مايد العشا ويلسوا يتعشون بهدوء ومايد من داخله متحرقص يبا يفتح المواضيع الي بتطفشها، وضاغط على نفسه ومتحمل سخافاتها عن المكياج والسفر والطلعات.. مايد: عسى عيبج الأكل..؟؟ شما: وااايد عيبني، تسلم حياتي.. ياليت دوم نتقابل ونتعشى ونحسن علاقتنا.. مايد: طبعا طبعا.. وأهم شي كل واحد فينا يعرف الثاني شو يبا وشو الي مايبيه.. شما: وشو الي ماتبيه.. مايد خلنا صريحين عسب نفهم بعض.. مستعده أسوي أي شي عسب ترضى علي... مايد: أوكي.. أول شي سالفة هالحفلة الي تسوينها بويهج قبل لاتطلعين ما أبيها.. شما: عيل كيف تبيني أطلع للناس..؟؟ مايد: يعني انا ماعندي مانع بشوية جحال على حمرا خفيفه.. شما: لا والله..!! وشو بعد.. مايد: وسالفة شعرج الي برع أكثر عن الي داخل مابيها، يعني تتحجبين عدل.. شما: وغيره.. مايد: وماشي سفر للخارج بدوني، وأنا ريال وأشتغل وباخذ اجازتي مره وحده بالسنه.. شما: وبعد.. مايد: أشوفج ما اعترضتي على الي قلته..!! شما: مايد حبيبي أنا من انولدت وأنا حرة نفسي، ولابعمري راح أخلي حد ثاني يتحكم فيني.. مايد: يعني حياتنا راح تكون مستحيله.. شما: وليش مستحيله..؟؟ شوف كل منا له حريته ولايتدخل بالثاني، والي بيجمعنا بيت وعيال وبس. مايد: وعيل ليش نتزوج..؟؟ شما: مجرد شكليات بس، ومب مهم أي شي ثاني.. مايد: عيل اسمعيني الي باخذها أباها تقر في البيت، أبا أحبها وتحبني، واذا انتي مالج قدره على هذا كله فاسمحيلي.. شماك شو قصدك..؟؟ مايد: ننفصل وكل واحد يحتفظ بكرامته.. شما: مايد.. مايد: شوفي فكري عدل، لو بتنفذين شروطي العرس من اليوم بنحدد موعده، بس لو ماتبين من باجر ورقتج بتوصلج مع المؤخر وفوقه أي مبلغ تبينه.. والحينه يالله قومي بوصلج البيت.. قامت شما وراحت ورا مايد وهي تفكر كيف تتخذ قرارها.. ومايد مستانس إنه بيرتاح منها، وصلها بيتها وراح يسهر مع ربعه وهو طاير من الفرح.. في بيت بوحنين.. أبو حنين وزوجته وبناته وأبو أحمد وولده وبنته مجتمعين على العشا.. بو أحمد: ياشوق بس ذبحتيني، والله مب قادر أضحك أكثر.. أم حنين: شوق اسكتي عن خالج، بسج يالله سيري فوق لبنتج.. شوق: بروح فوق لملاك، بس لمن برجع بكمل مع خالي حبيبي.. وباست خالها وطلعت عنهم، والكل يضحكون ومستانسين على سوالفها.. أبوحنين: من تزوجت وأنا فاقد الضحكه بالبيت.. العنود: أفاااا ونحنا وين رحنا يابوحنين.. بوحنين: انتوا.. الشطانه والمشاكل كل همكم، وحنين هاديه ولا يخصها بالدنيا.. أحمد: يعني شوق الكل بالكل.. أم حنين: لا.. بس كل واحد يميزه شي، يعني لو راحت حنين بنفقد الحلوه الهاديه، ولو راحوا اخوان ابليس بنفقد الشطانه.. حمده: ههههههههه عموووه اليوم بنروح انا وحنين نزور مها.. ام حنين: حنين قلتيلي عبدالله خطب مها بس للحينه محد رمس بالسالفه.. حنين: بلى خطبها، بس ما ادري متى بيسوونها رسميه.. أحمد: الحمدلله، يالله أبوي أنا بسير مع عبدالله وعلي المول ويمكن نتاخر هناك، تامرني بشي..!! أبوأحمد: لا تسلم، بس لاتتأخر في السهر.. أحمد: انشاءلله، يالله مع السلامه.. حمده: يالله حنون بسج أكل خلينا نروح لمها.. وطلعوا وخلوا الشياب بروحهم يسولفون، وحنين وحمده راحوا لبيت مها يسهرون عندها.. وأول ماوصلوا شافوا مايد بالحوش يلعب مع راشد، راشد فديته على طول ركض على حنين الي شالته ويلست تلاعبه.. مايد: حيالله من يانا، تفضلوا مها داخل.. حنين: شحالك مايد.. وشحال الريل اليديده.. مايد: تماااام تسلم عليج.. دخلوا البنات ويلسوا مع مها بالصاله شوي ويات امها ويلست وياهم.. مها: ماما وين يدوووه مالها صوت اليوم.. أم سلطان: يدتج صار لها يومين مطيحه سوالف وأسرار مع مايد، واليوم العصر راحت لبيت بنتها.. مها: أسرار.. شو عندهم..!! أم سلطان: شو دراني فيهم، يوم أسألهم يقولولي كل شي بوقته حلووو.. حنين: عيل وينها مايا..؟؟ مها: طلعت مع سلطان يتعشون برع وميمي راقده داخل.. أم سلطان: انا بسير لراشد بشوفه، مها امايه لاتنسين تحطين فواله لربيعاتج.. مها: انشاءلله ماما.. قوموا انتوا خلونا نسير فوق.. طلعوا البنات فوق ودخل مايد الصاله مع يدته.. مايد: عيل وينهم.. أكيد بغرفة مها.. أم راشد: منو هم..؟؟ مايد: هااا لا حنين ربيعتها كانت هني.. أم راشد: ميووود شو سالفتها حنين.. لايكون عينك عليها بس.. مايد: وشو فيها مب حلوه..!! أم راشد: إلا شيخة البنات، ويازين ما اخترت.. مايد: آآآآه ياقلبي.. انشاءلله تكون من نصيبي.. طلع مايد غرفته يتسبح ويوم طلع راح يبا ينزل بس سمع صوت حنين تسولف فحب يشوفها، فراح ودق باب غرفة مها.. مايد: انا مايد.. مها: تعال ادخل حياك.. دخل مايد..: السلام عليكم.. حنين+مها+حمده: وعليكم السلام.. مايد: كنت بقولكم ترا عبدالله اليوم يقولي يبا آخر هالأسبوع يسوي حفلة خطوبه شو راي عروستنا..!! مها: مااااايد مب وقته..والله استحي.. مايد: لازم اعرف رايج، كلما قلنا شي قالت أستحي حنين: خبر الوالده وهي الي بتقولها.. مايد: وشو الفرق يعني.. يالله عن هالدلع وأنا قلت له حياكم بأي وقت.. طلع مايد ومها بتموت من كثر ماهي مستحيه.. حمده: هههههه شوفوا المستحيه.. حنين: أونها مستحيه وفي قلبها تقول يالله باجر تعالوا مب آخر الأسبوع.. مها: ههههه حرام عليكم والله ويهي استوى طماطه حنين: يالله عيل نحنا بنروح، قلنا للوالده ساعه وبنرجع ومافينا نتأخر.. مها: أقولج متى عرس ليلوووه..؟؟ حنين: بعد أسبوعين، وباجر عازمين عمي حميد وزوجته بتيين..؟؟ مها: لا وين استويت من العيله، وفشله أروح.. حنين: ههههههههه عيل بنوافيج بآخر الأخبار باجر.. طلعوا البنات وفي الصاله شافوا مايد ويدته وراشد يسولفون.. سلموا عليهم وطلعوا ومايد يطالع حنين ويوعدها بالفرج.. بس هي لااطالعته ولاشي، خافت يدته تلاحظ شي.. **__**__**__** عبدالله ومها سوو حفلة خطوبه بسيطه، وعزموا الأهل وشويه من ربعهم.. والكل كان مستانس لهم، وعبدلله طول الوقت يتمنى إنه يقدر يسعد مها ولايحسسها بيوم من الأيام بأي ضيج أو قهر.. وبعد أسبوع من الخطوبه.. وفي بيت بوحنين.. حنين: شوق والله مصختيها، قلت لج ليلى ماتبي تسوي حفلة حنا.. شوق: اوكي نحنا بنسويها وهي بس بتقعد يعني لابنعزم ولا شي.. حنين: بس هي تبي ترتاح قبل العرس، وهالأسبوع بطوله عزايم وناس داخلين وطالعين.. شوق: إنزين مب عازمين اي أحد، بنات العيله بس.. حنين: وبنات العيله مب لازم تكشخ وتتعدل وتيلس تجامل هاي وتوجب هاي.. شوق: خلاص برايكم، أوووف استويتوا مملين.. بسير بيتنا أبرك لي.. أم حنين: ياشوق اقعدي ولاتصغرين عقلج.. شوق: لا أمايه بسير، تعرفين بعد العرس للحين ماخلص، والناس داشين طالعين، ولو سألوا علي بيقولون في بيت أهلها، وبتشتغل الرمسه بإني حواطه ولا أقعد بالبيت.. حنين: ههههههههه أونها تحاتي رمسة الناس.. شوق: والله لو علي مايهموني، بس جاسم ذابحني الناس والناس.. راحت شوق وخلت حنين مع أمها يسولفون.. وبعد نص ساعه دخل عليهم حميد ومعاه عذاري.. أم حنين: هلا والله.. حياكم تفضلوا.. حميد: أشوفكم بروحكم عيل وين الشله الفاسده.. حنين: شوق من شوي طلعت.. واخوان ابليس في بيت عمي تعرف عرس ومستحيل يقعدون.. عذاري: البارحه رحت عندهم ويلست شوي، بس ماشفناج هناك.. حنين: انا كنت عندهم من العصر لليل، ورجعت من وقت لأنه عندي دوام.. عذاري: وفستانج جاهز..؟؟ حنين: كله تمام، بس باجي نسير الصالون ونتعدل.. حميد: أشوفني من عرست الكل تخبل، علاوي وعبووود.. عذاري: وعقبال حنين انشاءلله.. حنين: لافديتج تو الناس علي، خليني اعيش حياتي.. أم حنين: يوم إلا هاي رمستج أسير أرتاح أحسن لي حميد: هههههه عقدتي بأمج.. حنين: عذاري أي صالون بتروحين..!! عذاري: مب رايحه صالون، خالتي تعرف تمكيج وكانت تشتغل بصالون قبل، وبخليها تحط لي، وبفتح شعري.. حميد: لازم بتفتحينه منتفتنه امس وقاهرتني.. حنين: ههههههه والله قاصه شعرج.. أشوفه افتحيه محد هني.. فتحت عذاري شعرها وكانت صابغتنه بلون أحمر وهي بييييضا فكان رووووعه عليها.. حنين: يالله شحلاته.. من حقج تفتحينه، وأنا بقعد وراج طول الحفله أقرا عليج عن الحسد.. حميد: زين.. تسوين فيني خير.. عذاري: يالله عيل حميد خلنا نروح ورانا قعده من الصبح.. طلعوا حميد وحرمته وراحت حنين غرفتها ترتاح.. باليوم الثاني كل البنات في الصالونات يتعدلن، والشباب مجتمعين في بيت المعرس يوله وربشه.. عبدالله: يالله مايد قوم أشوف راوني اليوله السنعه.. وإلا اليلسه برع البلاد نستك تراثك.. مايد: تامر أمر يالنسيب، بس صورني وانا أيول وطرش الفيديو للي بالي بالك.. عبدالله: أفا عليك اليوم بالليل بعد العرس الشريط بيكون عندها.. قام مايد ايول بين الشباب وعبدالله يصوره.. علي: أقول عبدالله، يوم بدخل عند الحرمه شو أسوي؟؟ عبدالله: هههههه تسألني أنا، اصبر بنزقر ذوي الخبره.. جاااااسم عمي حميد تعالوا تعالوا.. علي: الله يخسك لاتفشلني.. عبدالله: الحبيب يسأل يوم بيدخل عند الحرمه شو يسوي.. حميد: هههههههه الله يخسك للحين ماتعرف.. جاسم: انا بقولك، لاتستوي حيوان خلك رقيق وكلام حلوو، أول شي تعشوا و.... علي: حوووووو انتوا وين سرتوا.. انا أقصد يوم بدخل الفندق في قاعة العرس شو أسوي أول ما أشوفها.. عبدالله: هههههههههههه حميد: ههههه نحنا رحنا بعيييييد.. جاسم: لاتحاتي امك واخواتك بيمسكونك من يدك الين توصل للعروس، وفوق بيقولون لك بوسها على راسها اقعد يمها وما أدري شوو.. علي: يعني انا بس أمشي وأسمع الكلام.. عبدالله: ههههه انا يوم عرسي مب داخل، خلهم يخلصون رقصهم وخرابيطهم وتالي انا باخذ حرمتي وبنطلع الغرفة.. حميد: والله أحسن لك، انا بعد العرس ربيعات حرمتي طاحوا فيها هو أطول عنج وانتي أبيض عنه وما أدري شو.. عبدالله: يالله علي قوم خلنا نسير نوديك تتعدل للحرمه الدنيا بتظلم الحين ووراك شغل وايد.. وعلى الليل الكل كان في الفندق مرتبشين ومستانسين، وكانت ليله من أحلى الليالي الي تتجمع فيها قلوب المحبين، ليله تجمع القلوب العاشقه.. وبعد الحفله الكل راح على بيته تعبانين وودهم يرقدون ويرتاحون، طلعت حنين غرفتها ترتاح بس قبل لاتغير ملابسها رن تلفونها.. حنين: ألوو.. هلا عبدالله شو عندك..!! عبدالله: عندي امانه لازم اوصلها لج.. حنين: الحين..!! عبدالله: بحطها عند الباب طرشي اي حد ياخذها.. حنين: اوكي.. طلعت حنين وشافت في ويها العنود.. حنين: العنود سيري برع بتشوفين عبدالله محطي شي عند الباب ييبيه وتعالي.. راحت العنود ويابت الغرض وعطته لحنين، ويوم خذته حنين شافت داخل الكيس شريط فيديو، فاستغربت شو السالفه ولمنو هالشريط.. وراحت الميلس تتطالع الشريط، واول ماشغلته شافت حفلة الشباب يوم ايولون وانصدمت يوم شافت مايد، كان واقف بين الشباب بس الكاميرا مركزه عليه هو بالذات، وكان يالس إيول على أغنية سلمان حميد.. (( يمكن تمر الضلوع وبيتها بيتها.. ماغيرتها السنين وماتغيرت أنا..)) وكان يرقص ويأشر بيده على الكاميرا وعلى قلبه، حنين يلست تتطالع الشريط الين خلص، وعادته مرتين وهي مستانسه.. وعقبها سارت غرفتها وهي تدعي الله يجمعها بالي تحبه على خير.. **__**__**__**__** في شركة بوحنين.. حنين معتفسه بالشغل كالعاده، فدخل عليها عبدالله شايل أوراق زياده.. حنين: يعني تشوفني فاضيه عسب تييب لي اوراق زياده.. عبدالله: الوالد يقولج ماشي طلعه اليوم إلا التقارير اليوم كلها جاهزة.. حنين: وأنا شو لي موهقني غير حسابات نهاية كل سنه.. أقولك طرش لي أكرم مدير الحسابات.. عبدالله: اوكي بس بقولج باقي على السنه اليديده أسبوع، وأنا ناوي أملج قبل السنه اليديده بيوم، وعقبها بشهرين بتزوج شو رايج..!! حنين: والله انك متفيج، سير نادي اكرم.. عبدالله: حنين.. شو أمنيتج للسنه اليديده..!! حنين رفعت راسها واطالعته شوي وردت نزلت راسها:.من سنتين ونص وأنا امنيتي وحده ماتغيرت، ومايندرى بتتحقق او لا. عبدالله: انشاءلله تتحقق وتفرحين بحياتج.. طلع عبدالله وترك حنين وراه تفكر، ياترى بكون السنه اليايه زوجة لمايد وإلا بتمر هالسنه مثلها مثل غيرها وأنا مثل ما أنا.. بعد يومين مها زارت حنين ويلست وياها شوي وشكلها كان مرتبك ومضايج.. حنين: مها قوليلي شو صاير وياج، شي صاير بينج وبين عبدالله..؟؟ مها: عبدالله مب مقصر وياي بشي، قبل لا أطلب الشي يكون عندي.. حنين: عيل شو صاير، مايد في شي..!! مها قامت تتطالع من الدريشه وعاطيه ظهرها لحنين: حنين.. لو ماكان مايد من نصيبج بتزعلين.. حنين: مها صار شي يديد..!! مها: جاوبيني.. حنين: انا تغيرت 180 درجه علشانه، بديت أحب الدنيا علشانه، ورفضت الي يتقدمون لي علشانه.. والحينه يايه تسإلين لو بزعل لو تركني..!! مها: خلاص انا بروح البيت.. حنين: مها لاتنرفزيني قوليلي شو صاير.. مها: مايد حط شما بين خيارين، تترك الحياة الي هي فيها وتصطلب وهو مستعد يتزوجها، أو ينفصلون احسن.. حنين وايدها على قلبها: وشو اختارت..!! مها: طلبت مهله تفكر، ومادامها قالت بتفكر.. يعني.. يعني في احتمال كبير انها توافق علشانه.. حنين نزلت راسها ولاتنطقت ولابكلمه وحده.. ومها راحت وحضنت راسها.. وعقب سحبت شنطتها وطلعت.. وحنين بين الوعي واللاوعي.. كيف يعني..!! يعني احتمال مايد مايكون لي.. بعد الصبر والقهر والألم كلن بيروح لحاله.. لالا مستحيل.. **__**__**__**__** بعد هالأحداث بيومين عبدلله وحنين بالشركه يخلصون شغلهم، وعبدلله ملاحظ إنه حنين من يومين كله سرحانه وعقلها مب معاها، وحس إنها ممكن تنهار لو استمرت على هالحاله.. عبدالله: حنين شوفيج..؟؟ عقلج بدنيا ثانيه..!! حنين: ولاشي، عطني هالملف.. عبدالله: حنين في شي صاير..!! حنين: مافي شي صاير، أقولك سير ازقر أستاذ أكرم، وخلني أخلص الشغل اليوم آخر يوم.. عبدالله طلع وخلاها بهمها، وبعدها بنص ساعه رجع وكان معاه مايد الي من دخلوا على حنين تيبست في مكانها حتى السلام ماردته عليهم.. مايد: شوفيج حنين، شي مستوي..!! عبدالله: والله ما أعرف شو الي صايبنها، بس شكلها تحاتي شي.. حنين: خير مايد شو الي يايبنك عندنا.. مايد وهو مستغرب من برودها: يايب لكم اوراق شركتكم من الشركه الي اشتغل بها.. حنين: اوكي عطني.. عطاها مايد الملفات، ووقف يطالعها ويطالع عبدالله الي هو مصدوم اكثر منه، شوي ويرن موبايل مايد ويوم شاف الرقم تيبس.. مايد: ألوو.. هلا شما.. لحظه شوي، عبدالله انا بروح عندي شغل، عن إذنج حنين.. وطلع مايد وحنين قلبها بيطلع من مكانه، اكيد الحينه بترد عليه، ياربي شو بيكون مصيري.. شو بيكون موقفي لو قالي باجر عرسي.. يالله تعيني وتصبرني.. **__**__**__**__** رجعت حنين آخر النهار لبيتها وهي مب قادره تفكر غير بمايد والي ممكن يصير لها لو قالها إنه بياخذ شما.. طلعت غرفتها بدون لاتكلم أي أحد.. وفي غرفتها بدت الأفكار توديها وتييبها.. يالله شو بسوي لو خسرت مايد، يعني بكل سهوله بتزوج غيره وبعيش حياتي.. كيف وقلبي وحبي شو بسوي فيهم، لالا أكيد مايد يحبني، وأساسا شما مستحيل توافق على شروطه، ما اعتقد بترضى تغير حياتها عسب ترتبط بواحد مايحبها.. وقطع عليه حبل أفكارها موبايلها وهو يرن.. حنين: ألوو.. هلا عبدالله..!! عبدالله: حنين انا عند بيتكم وأبيج بشي ضروري.. حنين: خير انشاءلله شي صاير.. عبدالله: امممم انتي انزلي وبقول لج كل شي.. لبست حنين شيلتها ونزلت تحت وقلبها يدق بقو.. شافت عبدالله ينتظرها عند الباب.. عبدالله: في أحد داخل البيت..؟؟ حنين: إخواتي وابوي راقد.. امايه طلعت.. عبدالله: خلاص تعالي اطلعي بالحديقة بسولف وياج.. طلعت حنين ومشت ورا عبدالله الين وصل للكراسي وقعد على كرسي وكان شكله صج مهموم ويخوف.. فأشر لحنين عسب تقعد، فيلست مجابلتنه وهي حاطه يدها على قلبها.. عبدلله: حنين بقولج شي بس بلييز امسكي اعصابج وحاولي تتقبلين.. حنين: عبدالله تراني وصلت حدي، ارمس بسرعه.. عبدالله: تذكرين السلسله الي هداج إياها مايد يوم ميلادج..!! حنين: هيه أذكرها ومن عطيتها لي وأنا لابستها.. عبدالله: حنين.. مايد يبي يسترجعها لأنه.. لأنه خلاص بيتزوج شما.. عواصف.. رعوود.. برق.. أعاصير.. أمواج البحر تتلاطم.. هاي كانت مشاعر حنين، مب عارفه شو استوى فيها.. عبدالله: حنين تكلمي قولي شي.. بس حنين ساكته ولانطقت بأي كلمه.. عبدالله: حنين هو يقولج إنه آسف ولو بيده كان مستحيل يتخلى عنج بس الظروف صارت كلها ضده.. حنين فصخت السلسله وعطتها لعبدالله وقامت ودخلت داخل البيت وعبدالله يناديها بس هي ماسوت له السالفه وركبت لغرفتها وهي مب عارفه شو ممكن يصير لها او شو ممكن تسوي.. **__**__**__**__** حنين ظلت يومين وكأنها عايشه بعالم ثاني، مب راضيه ترد على أحد ولاتكلم مها، بس كانت تروح الشركه وترجع وهي ساكته، كانت تشتغل وتكد ليل مع نهار.. ورجعت تصارخ على الموظفين واستوت عصبيه بزياده.. يعني بمعنى أصح بدت ترجع لطبيعتها الي كانت قبل لاتحب مايد.. وفي نهاية الأسبوع وبالأصح في ليلة راس السنه أبوها دخل عليها الغرفه وهي طايحه على السرير واطالع السقف.. أبوحنين: حنين بنيتي ياينج في موضوع، حبيبتي والله اني بقولج السالفه ويالس أدعي انج توافقين.. حنين: تفضل أبوي.. أبوحنين: حبيبتي في واحد متقدم لج، وأتمنى توافقين، والله انهم ناس محترمين ومابنلقى أحسن منهم.. حنين:............... أبوحنين: انت لاتردين علي، هم بعد شوي بيوصلون، وأباج تطلعين وتقابلينهم ومابصير إلا كل خير.. حنين: أبوي الي تبيه بيصير، وإذا انت تشوفه مناسب أنا مب معارضه.. أبوحنين: والله.. فديتج قومي تجهزي كلها ساعه وبيوصلون الجماعه.. طلع بوحنين وخلاها تفكر، معقوله الي قلتيه ياحنين، وافقتي بدون لاتفكرين بشي!! انت حتى ماسألتي عن اسمه ولا منو هله، خلاص نسيت مايد وكل همج تنتقمين وتعرسين.. حنين يلست تمسح دموعها وقامت تسبح وتتجهز.. على الساعه ثمان ونص بالليل حنين كانت جاهزة وكاشخه، لابسه كندورة مخورة ورديه وشيله سوده بأطراف ونقوش ورديه.. ومحطيه ميك أب هادي وحلوو وطالعه غزال ماشاءلله عليها.. بس الحزن الي مالي قلبها هو الي طاغي على ويها الحلوو.. دخلت عليها امها وهي مستانسه ومن شافتها حست بالضيج الي بقلبها.. أم حنين: حبيبتي كل وحده نصيبها لبيت ريلها وانتي الله يحفظج تردين الواحد ورا الثاني، والحينه لو ماتبين الريال بكيفج، بس يابنيتي نحنا مانبي غير انج تفرحين قلوبنا بزواجج.. حنين حظنت أمها وباستها على راسها.. حنين: انشاءلله أمايه.. أم حنين: يالله تعالي الناس ينتظرونج.. نزلت أم حنين ووراها بنتها الي تحس خطوتها ثجيله وحست بتعب وكأنها تمشي من يومين، ويوم وصلت الصاله خذت نفس عميييق وفتحت الباب.. وانصدمت صدمة عمرها.. وقعدت تتطالع الي بالصاله ويه ورا الثاني.. اتفاجأت وشوي وبتطيح على ويها.. شافت أم سلطان ومها ومايا حرمة سلطان يالسين بالصاله.. وقعدت تدور وين اهل المعرس الي يايين يشوفونها..!! شو السالفه ومها ماقالت لها إنها بتيي اليوم، وصحت من صدمتها على صوت أم سلطان تناديها.. أم سلطان: هلا بنيتي تعالي فديتج.. هلا بحرمة ولدي مايد.. حنين تمشي وهي مب مستوعبه الصدمه بعدها، مب قادره تفهم شو الي ينقال لها، سلمت على أم سلطان ومها ومايا ويلست وهي كل علامات الدهشة والإستغراب على ويها.. مها: حنين بلاج وكانه حد كات عليج ماي بارد.. مايا: يمكن من الصدمه.. حنين: هااا أم حنين: شو ها حبيبتي.. بسم الله عليج شو الي صار لج..!! مها بصوت واطي: بلاج جي منصدمه ترى بنغير راينا بنقول هاي مب مصدقه عمرها بتعرس.. حنين: بس عبدالله قالي.. مايد قاله.. مها: هههههه كانت حركه من مايد عسب يسويلج مفاجأة.. وحنين بدت تستوعب الصدمه.. ودخلت عليهم شوق وبنتها وسلمت عليهم ويلست تسولف وياهم، شوي ودخل بوحنين.. بوحنين: يالله يا أم حنين حطوا العشا.. والولد وتعرفونه وشايف البنيه وشايفتنه يعني مايحتاي يشوفون بعض مره ثانيه.. طلعت ام حنين تحط العشا، وحنين تحاول تستوعب إنها خلاص من اليوم هي خطيبة مايد.. اتفقوا الرياييل على الملجه والعرس مره وحده بعد شهرين، كانوا يبونها بعد أربع أو خمس شهور بس مايد حشر الدنيا وبالعافيه رضى بالشهرين.. وعلى آخر الليل طلعت حنين غرفتها وهي متشققه من الوناسه، فمسكت تلفونها واتصلت بعبدالله.. عبدالله: هلا هلا والله خطيبة مايد.. هلا ببنت عمتي الغالية.. حنين: تعرف اول شي بسويه يوم بشوفك باجر برشك بالماي والله حلفت ياعبوود بسويها.. عبدالله: ههههههههههه بتحمله كل شي منج حلوو حنين: وليش ماقلت لي، ماكسرت خاطرك من يومين حالتي حاله..!! عبدالله: والله قلبي معورني عليج، بس قلت ماعليه يوم آخرتها حلاوة خلاص بسكت شوي.. سكرت حنين وحطت راسها بس مارقدت قعدت تتقلب طووول الليل وتفكر بالي صار اليوم.. **__**__**__**__** ومر الشهرين مثل الحلم بالنسبه لحنين، مايد ملج عليها بعد أسبوعين من الخطوبه، وكل يوم مطيح عندهم بس حنين مسوية له طاااااف، يوم يزورهم ماتظهر تسلم عليه.. واحيانا تظهر بس مب متكشخه وشكلها عادي وتيلس بين اهلها، يعني ماعندها خرابيط نقعد بروحنا وما أدري شو.. لاحقين على هالسوالف.. وهو طاير بها.. وفي أسبوع العرس سوى مايد الي مايتسوى.. لابقت فرقه ولايويله ولاحربيه إلا ويابهن، وكل يوم عزايم.. ومابقى شيخ من الشيوخ ما انعزم.. وفي بيت حنين الكل طاير من الوناسه.. حنين حبيبة الكل والكل يتمنالها الخير.. وهي من كثر الفرح مب عارفه شو تسوي.. ساعات تصيح يتحرونها على فراق أهلها.. بس لا، الدموع دموع الحلم الي تحقق.. والأمنيه والدعاء الي الله استجاب لها.. وفي يوم العرس راعية الصالون هي الي كانت بتيي لحنين الفندق، وباقي البنات على صالوناتهم.. بس حنين قبل لاتطلع على الفندق كانت شايله فستانها بايدها ونازله فيه من الدري يوم طلع بويها واحد.. منوو هو..!! المعرس مايد.. تم يطالعها وهي شايله فستانها.. حنين: يقولون فال سوء اذا شفت العروس قبل ساعات من العرس.. مايد: فال السوء يوم بشوفج لابستنه.. يالله متى بيي الليل.. متى بيتسكر علينا باب واحد.. حنين: انت شو الي يايبنك هني.. مايد: ههههههه تغيرين السالفه.. ياي آخذ أغراض وأحط اغراض.. والله انتي من الحين بتكشخين بس انا بعدني معتفس بين الجدور والفرق.. حنين: الله يعينك، يالله باي.. مايد: أشوفج بالليل..!! حنين: بفكر.. راحت حنين ومايد يضحك ومستانس، حميد وصل بنت أخوه الفندق ورجع للشباب.. وعلى الليل.. الكل بالفندق ومستانسين ويالسين بغرفة حنين بالفندق ويعلقون على بعض.. وجدان: أقولكم تراني احلى وحده فيكم.. جميله: تخسين كلنا حلوات.. ليلى: وجدان.. يالله بمعرس اليوم يفكنا من لسانج.. وجدان: آآآآآمين يارب تسمع منها.. حنين: هههههههه بقولج شي وجدان الكل يتمنى اشاره بس انتي قولي أبا أعرس.. وجدان: هيه فديتني غزال والكل يتمناني.. صح حرمة عمي.. وظربت عذاري على كتفها.. عذاري: آآآي شوي شوي على ولد عمكم.. شوق: عذاري حامل..!! عذاري: هيه.. هههههه فشله أستحي.. حنين: ههههههه مبروك حبيبتي.. أم حنين وام سلطان دخلوا عليهم.. أم سلطان: يالله حبيبتي الناس يتريونج.. حنين: لازم أطلع والله أستحي.. شوق: لا والله.. ليلى: حنين بدر الجريئه تستحي.. والله دنيا.. قامت حنين وقاموا معاها البنات، ونزلت القاعه على أغنية البنفسج.. **يابنفسج يامساء الياسمين.. في محيا من بها الدنيا تزين.. هالعروس الي خذت كل الوصوف.. ريم جيم وريم قد وريم عين.. مقبله وعيوننا برد وسلام.. لازم نصلي على سيد الأنام.. عالنبي أزكى التحيه والسلام .. رددوا وقولوا معي يالحاظرين.. ألف صلى الله على الهادي الأمين..** والكل عيونهم تناظر حنين وتحسد مايد على هالدره الي الله وهبها له، وهي ماشاءلله عليها تمشي وكلها حياء وجمال.. مكياجها الوردي محلي ويها.. وفستانها رووووعه، هي كلها على بعضها تجنن.. واستمرت الحفله رقص ودق ومن الربشه ماودهم المعرس يدخل يبون يكملون الرقص.. وحليله مايد مختبص برع ويلعن يبا يدخل القاعه.. ومادخلها إلا الساعه 12 ونص.. دخلها وكانوا مسويين حركه.. دخل المعرس وعلى يمينه أخوه سلطان وعبدالله، وعلى يساره علي وحميد وجاسم.. وطبعا كانوا مغطيينها حنين.. دخلوا وبدوا ايولون بالقاعه، والبنات متخبلات بس خساره كل الي دخلوا معرسين.. ومايد متحرقص يبا يطلع يشوف حنين بس ماخلوه وقعدوا ايولون شوي وعقبها ظهروا برع.. وركب مايد على الستيج وراح لحنين.. وقف مجابلنها وهو مب قادر يمسك نفسه من الوناسه.. حنين بكل جمالها وحلاتها واقفه جدامه، حنين كانت منزله راسها فقام هو وباسها على راسها وحط يدها على خدها ورفعه لفوق.. مايد: مبروك حبيبتي.. سبق ووعدتج بالفرح والسعاده وياي بس ماوفيت، بس اليوم والله لا أخليج بجنه مب بس سعاده وفرح.. ووقف يمها يصور ويسلم على اهله وعقبها يلس حذالها وهو متشقق من الوناسه.. على الساعه وحده ونص طلعوا المعاريس غرفتهم، والكل ودعهم وراحوا على بيوتهم.. وبقت المصور تصورهم، بس مايد ماسوالها سالفه خلاها تصور بسرعه وراغها برع.. مايد قام وفصخ البشت وفره على الكرسي وراح ويلس حذال حنين على السرير، هو يلصق بها تقوم تبتعد عنه يرد يلصق بها.. حنين: ماااااايد.. مايد: هههههههههههههه فديت الي يستحون.. أبا أقولج شي.. حنين: قول.. مايد: انا أسعد ريال بالدنيا.. حنين: طبعا أسعد ريال ماخذ حنين.. مايد: لااااااا.. احلفي انتي بس.. حنين: هههههههههههه مايد: حبيبي تدرين شو بخاطري أسوي الحين.. حنين: شو بخاطرك..!! مايد: صبري خليني أطرد ظنون وبخبرج شو الي بسويه.. **__**__**__**__** **النهايه** الاجزاء 31 جزء ni~boy~ce@nimbuzz.com http://saif.waphall.com