تحذير حكومي: هذه القصة واقعيه جدا صارت وتصير وبتصير لاننا كذا,,اضافة الى ان هذه القصة طويله جدا مع انها على جزئين.,, فيرجى ممن عندهم نفس قصير او يمتلكون اشتراك انترنت محدود الساعات او ممن يتواجدون في مقهى انترنت مراعاة ذالك ولكم جزيل  الشكر. والان الى القصة.

المكان محل ايسكريم ..هاقن داز (تنكتب كذا بس تنطق هاين دز والبعض ينطقها هاجن دوز ) في البيكاديللي سيركيس في لندن اللي جنب سينما اوديون , على فكره لاول مرة اروح للندن مع شلة شباب بايعين اللي ورانا واللي قدامنا ومتسلف من كل عايلتنا علشان هالسفره على اساس واحد من الشباب اخوه يدرس هناك وفي الاجازة بينزل للرياض ففرصة المهم مو هنا القضيه  ..وبينما كنا احنا شلة الاربعه ننقى النكهات لاننا كلنا متقاطين في ثلاث ملعقات لاحد يضحك المهم وبينما كنا كذا التفت واشوف اربع بنات سعوديات يضحكون ويسولفون وواحده منهم تقول( شفتوا سهى اشترت الفستان الزهري مع انه ضيق عليها شكلها يضحك فيه ) وكملوا كركرة انا شفتهم خشبت وقلت للشباب اللي معي بس شفت جرح يمشي  عن اذنكم بروح ارمي السنارة  قالوا لي طيب والايسكريم قلت اختاروا انتم قالوا تراك معنا في القطة قلت لهم طيب يصير خير..وفعلا رحت امشي ورى البنات وربع ساعه مشي وكاننا في الرياض يلتفتون ويشوفوني بعدين  يمشون كانهم ماشافوني ..دخلوا التروكادريو ودخلته وراهم وطلعوا منه ودخلوا مطعم فرايدي وادخل وراهم وطلعوا منه واطلع وراهم ودخل محل الاشرطة الكبير اللي على الزاويه TOWER RECORD  . وطبعا كنت وراهم وهناك لفلوا بي لين دخت من قسم الراب الى قسم الكلاسيك وبعدين الاوبرا وبعدين احدث الاشرطة وهناك وقفوا وهدوا واجي اصف جنبهم واجلس اطالع في البنت اللي لابسه بنفسجي وهي ولا معبرتني وبعدين قمت احكي بصوت عالي اقول ياربيييه وين اقدر احصل جلسات محمد عبده علشان يعرفون اني سعودي مو يحسبوني بلجيكي ..المهم قاموا البنات يقهروني ويحكون مع بعض بالانجليزي يعني احنا مو سعوديات بس على مين صحيح ان كلهم بيض زي القشطة وشعورهم شقر وحمر بس ولو تبان السعوديه (بتقولون لي  وشلون اقول لكم السعوديات يلططون المكياج في الوجه بس ما ينتبهون للمنطقة اللي خلف الاذن فيبان ان لونها مختلف,مسمرة ) المهم ابي اعرفهم اني عارف انهم سعوديات فقلت ياخي الواحد مايصدق انه في لندن يفتك من السعوديات الماصلات اللي اذا شافوا واحد حلو قاموا يلاحقونه وتوني اكمل الجمله الا اسمعهم بصوت واحد ووووعععع مالت عليك من زينك يالسياحي مو يكفي انك ملاحقنا لك نص ساعه ...ساعتها ابتسمت  لهم وقلت اخير ياراعي البنفسجي حن قلبك وحكيت مابغيت حرقت اعصابي  الحمدلله انك حكيت معي مابغيت والا تبتسم لي ام بنفسجي وتقول لي وهي تؤشر باليد كش عليك  وتقول لصديقاتها يالله مشينا وانا الحقها واقول وش دعوة عاد تونا ماتعرفنا ..وهي تقول موب لازم وهي تبتسم (هذا اللي كان معطيني امل ) وتنزل مع السلم الكهربائي وقال لك الولد خفيف دم وانزل مع الدرابزين واقابلها وجه بوجه واقول طيب ممكن اشوفك بكره نتعرف بليز بليز وبينما كنت انزل بطريقتي الا احس بيد تنحط على منطقه حساسة في جسمي والتفت الا والسكيورتي شايلني بيد واحد ويحاكيني انجليزي وانا في الانجليزي نص ونص ويقول لي واي يو ار جوينج داون لايك ذات دو يو وانت تو دامج ذا شوب قلت له نو واللهي نو أي سوير بليز بليف مي والبنات يضحكون والسيكورتي شايلني بيد واحد ورايح بي يم الاداره والبنات بيطلعون من المحل وانا اصارخ يام بنفسجي بكره عند مكدونالدز اللي في شارع ايدجار رود (شارع العرب في لندن ) الساعه 5 العصر اوكيه وهي تضحك وتقول لي لا مانيب جايه والسيكورتي ماشي بي يم الاداره ..المهم رحت الادارة وحاولت بالانجليزي ابو نص ونص اشرح لهم الوضع بس يوم ملوا ولافهموا وفتشوني ولقوني ماسرقت شي تركوني اطلع في حال سبيلي.

وفي ثاني يوم الساعه خمس الا ربع العصر كنت مرتز عند مكدونالدز حسب الموعد واثر بناتنا ثقلهم عليننا في الرياض نصبه يدارونها بالعبايات لاني اول ماوصلت لقيت البنتين اللي كانوا مع ام بنفسجي واقفات بعيد عند الزاويه يطلطلون ولما شافوني توزوا وانا سويت نفسي ماشفتهم المهم يوم صارت الساعه خمس وربع تطلع لي عمتي ولما شافتني قالت لي يوه انت هنا قلت لها لاوالله قالت لي وشو قلت موعدنا  قالت ياحليله صدق الولد قلت لها نعم ..قالت لاتبي الصدق جيت اشوف بس وش صار عليك ..قلت لها اها طيب وش رايك ندخل مكدونالدز شوي ناظرتني وقالت انا ادخل مكدونالدز تعال معي لمطعم عربي (كريستيان ذاربيجار للشاورما والكباب على الطريقة الاسلاميه )ودخلنا هناك وجلسنا على الطاولة وطلبت هي  عصير فواكة طبيعي وانا توني اساله عن الحمص بكم سعره واذا يجي معه خبز عربي ببلاش ولالا (تراني اعز الحمص)الا وتقول له بس عصير وبس ياطوني ماعليك منه.. وبدينا نحكي قالت لي وش اسمك قلت انا عبدالعزيز 21 سنة طالب في كلية الطب بجامعة الملك سعود بالرياض وانتي قالت لي انا صيته طالبة في كلية العلوم الاداريه 19 سنة نفس الجامعه ..وتوني بادي انشكح وباعطيها الرقم الا وتقول لي مثل مانت شايف ياعبدالعزيز انا بنت كبيره وما احب ان تكون لي علاقة على التليفون بلا هدف ولانهاية صحيح اني ودي تكون لي علاقة بشاب بس انها تنتهي بالزواج مو بارقام وتليفون واستحي على وجهي وارجع الرقم لجيبي على طول قبل لاتشوفه وتكمل هي حكيها وتقول لي ومثل ماهو باين انت ودك بعلاقة كذا وكذا قلت لها لا والله بالعكس امنيتي اتزوج من بنت اعرفها واعرف تفكيرها واخلاقها ولا واحدة زي الجحة يابيضا ياحمرا من اختيار الوالده .قالت طيب بتستمر علاقتنا قلت لها الى الزواج انشالله ولا فيها بعد ضحكت وقالت لي طيب ياعزووزي كيف وش بتقول لاهلك وانا وش باقول لاهلي ..قلت لها (وانا انصب ) ياصيتتي ياحبيبتي اهلي فري فري مرة بالعكس بيرحبون بهالقرار قالت لي ماراح يقولون لك عني اني نصابه ولعبت عليك قلت لها لا وش دعوة ..قالت لي طيب المشكله وش بتقول لابوي ولاهلي كيف تعرفت علي ..انا بصراحة ياعبدالعزيز ابوي مايحب الشباب اولاد الذوات اللي يجون لندن وباريس بروحهم (خفت اقول لها هذي اول مرة اعتب برا الرياض ولاانا حدي ابها وادوخ من البرد) لانه يحس انهم مدللين ومو قد المسئوليه..ويحترم الشباب اللي يجلسون في الرياض في الصيف يشتغلون ..قلت لها عسا ماشر وش يجلسنا في الرياض في طباخ التمر الواحد يمشي وهو يشخ عرق ثانيا اخوانك يعني جالسين في الرياض قالت لي لا جايين معنا قلت اجل ابوك ليه جايبهم معكم قالت لي بس علشان امي ماتبي تترك عيالها..قلت لها عادي افهمه اني كنت اشتغل ايام الدراسة في شغله بسيطة في احد شركاتنا قالت لي ماشاء الله عندكم شركات قلت لها لا طبعا بس بنلعب على ابوك..هاه وش رايك قالت لي ياعبدالعزيز انت مو فاهمني انا  مابي احسس ابوي اني مو قد الثقة اللي معطيني اياها اني اروح واجي في لندن على كيفي وش بيقول عني اني خنته ..قلت لها وانا اضحك وش خيانته الله يهديك هو ابوك ولا رجلك قالت لي شفت انت مو ماخذ الموضوع جد قلت لها لاوالله بس قولي لابوك عادي شفته في مطعم وتعرف علي وسالني عن عنوانك ويحمد ربه ابوك وش يبي زود قالت لا انت لعاب وتو العصير جاي الا وتقوم هي وتطلع من المحل جيت باقوم وراها ويجيني راعي المحل ويقول حبيب البي ايدك على 8 باوند حئ العصير وانا مامعي الا خمسة باوند بس واحوس في جيوبي واطلع اركض ورا صيته وراعي المحل يركض وراي وانا اصارخ صيته اصبري شوي وهي تمشي وتقول وخر عني ياللعاب وانا اقول لها طيب معك 3 باوند باقي حق العصير وتوني اكمل هالكلمة اللي يمسكني راعي المحل وتشوفنا صيته وتجي وتقول للبناني راعي المحل كم حسابك ياطوني قال لها 8 باوند يامودموزيل قالت له خذ هذي 10 باوند وخل الباقي علشانك وتكمل مشي والحقها يابنت الحلال خلينا نتفاهم اول قالت نتفاهم على ايش انت شكلك لعاب قلت لها لاوالله ماني لعاب والله اني من يوم شفتك حبيتك وعششتي في قلبي صدقيني ما اكذب عليك قالت بس كلامك معي يحسسني انك مو ماخذ الموضوع جد شف ياعبدالعزيز والله لو مو اني ماخذه الموضوع جد وودي اسوي علاقات تليفونيه بس كذا ماراح القى احسن منك بس انا زي ماقلت لك ابي علاقة جاده تنتهي بالزواج .قلت لها حتى انا والله زيك كذا مافرق شي عنك .. قالت طيب قل لي كيف وش بتقول لابوي كيف تعرفت علي وكيف انا بعد تعرفت عليك .قلت لها بسيطة تاهت والله جابها قالت لي وشلون قلت بس شفتي ذاك العبد قالت ايه وش فيه قلت نسوي تمثليه نقول انه سرق شنطتك واني يوم شفته والحقه واطقه وارجع لك شنطتك قالت لي ياسلام ياعنتر وش بعد قلت لها بس بروح اتفق معه وتوني اكلمه الا طاخ طيخ طووخ بدا يكفخ فيني ولولا الله رحمني بهالبنت وقالت للعبد باني كنت امزح معه واني استخف دمي دايما وانا اصيح    واقول له ان كنت رجال خلك هنا والله لاجيب لك الناس حقوني وهي تسحبني وشوي وتضحك وتقول لي تدري يالشين حبيتك من جد قلت لها اخيرا والله اني انطقيت علشانك مرتين ومستعد انطق مية مرة بعد بس هاه وش قلتي قالت لي يا عبدالعزيز لازم نفكر في  حل  قلت لها وانا اصبصب دمامين وين بيتكم هنا قالت نعم قلت وش عنوانكم هنا مالك دخل بروح اكلم ابوك وابيعها انتي ماعليك قالت ياعبدالعزيز تتكلم جد قلت لها جد الجد البنت ماكذبت خبر وعطتني عنوان شقتهم وقالت لي بس امانة عليك ما تروح الا بعد الساعه 4 علشان اكون انا وامي واخواني طلعنا وما يكون في البيت الا ابوي .

وبالفعل ثاني يوم الساعه 4 ونص رحت لنفس العنوان ودقيت الجرس حق الشقة ويفتح لي واحد بسيجارته وشكله مشغول (شكيت فيه انه يلعب قمار ) قلت له مساء الخير ياعمي قال نعم انا عمك قلت له مو انت ابو الانسه صيته قال الا بس ينادوني ابو عبدالرحمن قلت له خلنا من عبدالرحمن الحين اركنه على جنب انا جايك علشان الانسه صيته (وفي ها لوقت سمعت صوت من داخل ينادون ابو عبدالرحمن هاه نوزع ولا بتجي ..قايل لكم شكلهم شلة شياب يلعبون قمار على البلوت ) المهم قال لي وش فيها صيته قلت ابد طال عمرك اعجبتني ..وجيت اخطبها منك ضحك قال يا ولدي انت شارب شي في احد يخطب بهالطريقة قلت له بصراحة لاطبعا بس اولا اثبت لك اني مو  انسان لعاب ولا ناوي اتسلى ثانيا صدق حبيت بنتك وحلفتك بربك لاتسالها كيف عرفتها تراها ماتبي تقول لك انها كبت ايسكريم على بدلتي ..قال لي وهو يضحك تنصب علي صح قلت تبي الصدق قال ايه قلت ايه حاولت اغازلها قالت لي ماني راعية مغازل كبرت في عيني ما قدرت انساها قال لي ابوها وهو يمزح معي (مو  كنها بنته ) يلعن شكلها بنيتي جرح طالعه على امها قلت أي والله الله يلعن امها  مادريت الا هو  زانطني من ياقتي قال لي صاير تمون قلت لاطال عمرك بس نتبادل الحكي ..المهم وش قلت طال عمرك قال  شف ياولدي هذا كرتي وفيه عنواني  وتليفوناتي في الرياض اذا بدت الدراسة وصرنا في الرياض خل ابوك سامع ابوك مو انت يتصل فيني ولغاية ذاك الوقت لو ادري انك مضايق بنتي ولا شايفها لو في الطياره جلدتك وارميك من الطياره سامع قلت له سامع الله يسلمك .قال لي الحين طس طيب قلت طيب طال عمرك يعني اعتمد قال اعتمد انت وخشتك بس طس عني ...وطبعا طيلة هالاسبوعين اللي باقين على الدراسه كانت  صيته ارتاحت لي وحبتني وصارت تخت لي ختات مرة في الكوينز واي ومرة في الهايد بارك ومرة في حديقة الحيوان واخر مرة كانت في صالة السينما وجلست جنبها وقمت اتميصل وحطيت يدي على كتفها قالت لي وخر يدك وجع قلت بسم الله علي ليه وجع مو كلمت ابوك الحين قالت لي بتمنني على انك كلمت ابوي  قلت بالعكس ياروحي المنة علي انه طال عمرك رضى يكلمني ...قالت لي طيب وخر يدك وكشرت قلت طيب بس خلينا نتزوج واوريك وش اسوي بك  اصبري بس.

المهم بدت الدراسه وصرنا في الرياض وخليت ابوي يدق على ابوها بعد مافهمتهم ان اخت صديقي شافتها في عرس  وانها توصفها بانها حلوة واخلاق ومؤدبه..وامي تقنعني ببنت خالتي وانا مصر على ذيك البنت (يعني صيته ) لين وافقوا واقتنعوا ودق ابوي على ابوها ورحنا لبيتهم ..بعد صلاة العشا يوم الاربعاء.   جلس ابوها وابوي يسولفون مع بعض نص ساعه عن نخيل مدري من وولد فلان يوم انه تعين في مجلس الشورى وحكي اخر ماصل المهم بعد ربع ساعه بدوا يتكلمون في الخطبه قال ابوها لابوي نبي نشتري رجال طال عمرك ساعتها انا التفت يعني ايش هونتوا ماراح تزوجني صيته ساعتها ابوي باقوى ماعنده وطا رجلي وصرخت من الالم قال ياحليله ولدي يحب المزح قال ابوها ايه عاد انا اعرفه  يمزح بسرعه .. قلت لابوي لا تراني اتكلم جد وش اللي بيزوج بنته لرجال وانا ,, وش اتفقنا عليه قال ابوي يالصتيمه انت الرجال توه ماعرفك زين .. ساعتها فهمت وضحكة ضحكة صفرا وقلت لابوها من طيبك الله يسلمك تراكم اخجلتم تواضعنا ..ساعتها قال ابوي لي اسكت انت وكمل هو الحكي مع ابوها واتفقوا على كل شي المهر والمؤخر و تفاصيل العرس مثلا عرس الرجال علينا في مقلط عمي اللي بيتهم في الملز قال لك اكشخ واحد فينا وعرس الحريم عليهم يعني اهل صيته في قاعة ليلتي  والسكن في شقة بياجرها لي ابوي لين اتخرج (شكلي مو راح يتخرج) وبياثثها لي وبنعتمد على مكافاتي الجامعيه ومكافاتها والفين ريال من ابوي والف من ابوها كل شهر (حسيت بان وضعنا زي اللاجئين بس يالله كله لعيونها يهون) ..وبالفعل حددوا موعد للزفاف وعلى ماجا ذاك الموعد الا كل شي كان جاهز الشقة وتاثثت وفرشت الله يسلم لي امي وابوي واقاربي حتى بالماريه واحد من عيال خالي الشباب سمع عن قطة الشقة حسبها لجمعة الشباب فراح جاب جهاز ديجيتال وكرت مسروق يفك كل القنوات. وجا يوم العرس الموعود. وطلعنا من مقلط عمي اللي كنا محجورين فيه كنا فيران في جحر وانصى ولد خالتي واقول له الله لايهينك ممكن مفتاح البي ام دبليو قال لي وسيارتك وش فيها قلت له يعني يرضيك امرمط بنت الناس في كراون فيكتوريا ماشية 200 الف كيلوا ومكيفها خربان ثانيا قاعة ليلتي يعني قدر ظروفي قال لي طيب متى بترجعها قلت له بكره انشالله قال طيب خذ  وفعلا خذيت المفاتيح وركبت البي ام ومن الفرحة بغيت اجحد البنيه في القصر واروح اغازل في شارع التخصصي ..بس استخرت الله وتعوذت من ابليس ورحت للقصر وجلست ادق البوري ساعتين لين طلعت لي ورحنا للشقة ولقيت اخوي الله يسلمه ماقصر وكان جاب العشا لي( صدق اني متعود على العزوبيه قصدي جاب العشا لنا )   وتونا داخلين  الشقه شقة الزوجية ليلة الدخله.. وبديت اعطيها من الحكي الماصل نورت الشقة بوجودك مثل مانورت حياتي كلها بمعرفتك  وهي تضحك وتبتتسم وتوني ارمي البشت (ترى رمية البشت  حركة لها مدلول عند الرجال في لغة الدخله) وتوني باجلس جنبها علشان نتعشى سوا ولا يطق الجرس .ياربي من هذاالموذي اللي جاي هالساعه ..واقول لها شكله غلطان وش رايك نجحده قالت لا بالله رح شف واروح افتح الباب والقى تركي ولد عمي وهو يبتسم لي (على فكره هو اللي اشترى لي جهاز الديجيتال والكرت المسروق) واقول له نعم قال ابد حبيت اتاكد انكم وصلتوا بالسلامة خفت لايكون شي صار لكم في الطريق قلت له مو انت المفروض انك تلحقنا قال لي الا بس الاشاره اللي عند مدخل الحي مسكتني وانت قطعتها احمد ربك ماكانت هناك دوريه ولا ودوك الحجز المهم يوم صارت خضرا وامشي ولا القاكم ضيعتكم ..قلت له طيب ياذكي يامقطع الذكا ماشفت سيارتنا عند العمارة تحت يعني بالعربي وصلنا مايبيلها شي قال لي والله انا قلت كذا بس حبيت اتاكد قلت له طيب مشكور ياخوي تسلم ..قال لي طيب وش بتسوون الحين قلت له بنتعشى وبعدين قال ايوة قلت بنلعب بلاي ستيشن قال لي وهو متحمس اجي العب معكم قلت له مافي الا يدين قال ماعليك انا اجيب اليد الثالثه قلت تركي ماقدر احد  درباك (درباك يعني دحرجك دحرجة) من الدرج قال الا ابوي بس ليه الاحراج يعني بتسمع المدام اننا عائلة عنيفة بدل ماتذبح لها قطوة.. قلت له تركي تصدق اننا ماتعشينا رد علي ولا انا والله  قلت  طيب تركي شفت الدور الاول قال لي ايه قلت فيه لبنانيات يشتغلون في محل كوافيره ساكنين بروحهم شقة رقم اربعه ..وما امداني اكمل الا شفت الرجال طار (شقة رقم اربعه واحد يمني متزوج ثنتين وعنده 13 بزر) واسكر الباب وتوني وانا راجع واسمع صوت  واحد ينطق بس سويت نفسي ماسمعت ...وارجع لزوجتي حبيبة قلبي وتوني غاط الخبزة في الحمص واناولها اللقمه قال لك باكلها بيدي ولا يرن الجرس مرة واحدة  قلت لها والله ماني فاتح ابلشنا تركي الله ياخذ عمره قالت تكفى افتح اخاف تعور ولا صار له شي رح علشاني يالله حبيبي علشاني قلت لها تراه بثر خل ناكل بس قالت لي تكفى ومادريت الا شفايها على خدودي (اشهد يازمن اول مرة انباس فيها ) وقلت يالله هذي بوسة رح شف من عند الباب واروح وافتح الباب ولا وش اشوف اشوف ثامر (اخو المدام عمره 5 سنين ) وهو يناظر فيني ويقول لي هلا عبدالعزيز كيفك قلت له بخير  وانت كيفك (حسبت المدام ناسيه شي ووصت امها ترسل اخوها به ) وش تبي يا ثامر قال لي انتم وش تسوون قلت ليه تسال ياحبيبي ولا المدام تسال مين عند الباب يا عبدالعزيز  قلت اخوك ثامر قالت ثامر حبيبي تعال ويدخل ثامر على طول لغرفة النوم برق وتحضن فيه اخته وتبوسه (مالت علي من بوسة دخت وثامر في دقيقتيين حصل 20 بوسة) واسكر الباب واروح لغرفة النوم واقول ثامر حبيبي وش تبي وش جابك قال لي ماما قامت ترقص مع خالاتي واخواتي راحوا مع البنات وبابا راح الاستراحه يلعب ورق واخواني طلعوا يغازلون وكلهم خلوني وين اروح ..قلت له رح بيتكم ونام هذا المفروض ومادريت الا ان ثامر يصيح ويقول كلكم ماتبوني اهيء اهيء اهيء  قلت له ياثامر بالعكس احنا نبيك بس احنا نلعب مع بعض قال وانا بعد بالعب معكم قلت له ياثامر ياحبيبي ماينفع تلعب معنا قال لي ليه قلت له ياحبيبي عمرك سمعت عن كبار لعبوا مع ناشئين ذولي لهم كاس وذولي لهم كاس وتوني ناطق هالجمله الا ثامر صار يصيح باعلى حسة  الا ابي العب معكم مالي دخل ابي العب.. صيته قولي له بالعب معكم مابي مابي وتغمز لي صيته تقول خله بيلعب شوي ثم يدوخ ويرقد قلت طيب ياسي ثامر بنلعب معك وحسبي الله ونعم الوكيل الا ويطلع ثامر من جيبه  التازوات حقت البوكيمون ويوزعها علينا (البلا ماعرف للبوكيمون بس شكيت في نوايا ثامر انه مخطط لهالشي) ونجلس على هالوضع ساعتين وثامر معه البيكاتشو وانا معطيني ويدل اضعفهم بعذري طلعت من اللعب بعد نص ساعه المهم بعد الساعتين ثامر حبيب قلبي داخ ويوم شفته داخ واشيله واطمر به للسواق اللي كان ينتظره تحت واقول للسواق قسما بالله لو ترجع به هنا لاجلدك واسفرك للمريخ وارقى بسرعة لشقتي والقى صيته تثاوب يعني تعبت وودي انوم بس على مين بتلعبها على مين يابنت الناس واخذ كاس عصير واجلس اسولف معها واحرك يدي بسرعه كاني ماقصدت وينكب شوية عصير على فستانها واقول يووه فستانك توصخ يؤ يؤ يؤ قالت لي وش اسوي قلت لها افصخيه بسرعه قالت بس انت قلت انا زوجك وتفصخ البنت (ياحظي ) وعلى بالها بتنتقم وتكب هي شوية عصير على ثوبي وقالت لي ثوبك توصخ وماكملت افصخ ثوبك الا انا راميه في الارض واستمرينا على ذي الحاله  (اكثر شي يتمناه الرجل ليلة الدخله امراة غبيه سريعة في ردة الفعل) المهم نمنا في ليلة من اجمل ليالي العمر (ايه ترا مو عيب لانها الان زوجتي يعني لاتتفلسفون ).

في صباح اليوم التالي(الجمعه) يعني على الساعه 11 ونص اسمع جرس الشقة يدق قلت لها واحنا نايمين ماني فاتح قالت لي لا ياحبيبي رح افتح شوف من عند الباب قلت اكيد اخوك ثامر قالت لي لا حرام لاتظلمه رح اول شف .. وفعلا قمت وانا متاكد انه ثامر علشان كذا طلعت له بشورت (سروال سنة) وفانيله علاق وتوني فاتح الباب لاااااء و اخزياه ...لا مو ثامر ولا امها ولا امي ....شرطيين عند الباب واسكر الباب بقوة ويقول الشرطي لي لو سمحت افتح قلت له ماتشوفني بوضع غير لائق قال لي طيب ليه مالبست قبل ماتفتح خفت اقول له حسبتك ثامر يفهمون ثامر غلط و يلفقون ضدي قضية دعاره قلت له حسبتك اشتراك الجريده ..قال لي طيب المهم انت السيد عبدالعزيز اللي زوجتكك صيته قلت له أي نعم تامر على شي طال عمرك قال لي لو سمحت تلبسون كلكم انت بتجي معنا وهي بتوديها لبيت اهلها ..ساعتها خفت ان ابوي نكب عفشي وسواها ولا دفع ايجار الشقة قلت له ياحضرة الرائد(اذا تبيهم يحترمونك عل من قدرهم )وش القصة وش اللي صار  قال نفذ اللي قلت لك وفي القسم بتعرف قلت له مصمم قال اجل انا جاي امزح معك قلت طيب ابشر ورحت اصحي صيته (على فكره هي كيسة نوم نص ساعه علشان اصحيها) يوم قلت لها قومي بسرعه الشرطة عند الباب حسبت اني ابي شي ثاني قالت لي يووه ياعبدالعزيز ماتشبع ماكفاك الليل طيب اصبر شوي لما  اصحا ..وانا قلبي في رجولي من الطيحه واحلف لها والله الشرطي برا عند الباب قالت يووه امس تسميه تمساح واليوم شرطي وجع كم له من اسم قلت لها أي تمساح أي خرابيط شرطي شرطي عند الباب وعلى ماصحت واستوعبت الموضوع كانت مرت ساعه وطلعنا من الشقة واعتذرت للشرطي ووديتها لبيت اهلها ورحت مع الشرطي للقسم وانا ادعي طول الطريق ياربي عسا خير لايكون تركي مشتكي علي ولا ثامر انخطف ياربي وش السالفه ولما دخلت القسم لقيت عمي ابو صيته جالس هناك وجنبه رجال شين ومعه واحد كانه ولده اشين منه .مو ولد ابو صيته لا ولد اللي جالس جنب عمي ابو صيته.سلمت على الجميع وسالت عمي وش السالفه رد علي الضابط ياعبدالعزيز اعرفك على اللي جالس هناك جنب عمك ابو عبدالرحمن (يعني ابو صيته لان مافي عندنا احد ينتسمى باسم بنته ) هذا السيد ابراهيم آل طخطييخ ومعه ولده مدرع ال طخطييخ قلت له تشرفنا وبعدين لايكون بس عمي شاري منهم شي ولا متسلف ويبيني اكفله قال لي لالا مو كذا عمك ابو عبدالرحمن من عائلة ال طخطييخ ايضا يعني ال طخطيخ قبيلتهم  قلت طيب مبروك يعني جاريني من شقتي في صباحيتي علشان تعلموني ان زوجتي قبيلتها ال طخيطخ طيب شكرا رد علي الضابط وهو معصب قال ياعبدالعزيز بكره بتروح للقاضي قلت له خير وش سويت قال السيد ابراهيم ال طخيطخ وولده مدرع رافعين دعوة لتطليقك من زوجتك لانك خضيري الاصل وزوجتك قبيليه ..واضحك في وجة الضابط واقول له تمزح ياحضرة الضابط وش قبيلي وخضيري ياعمي بابو عبدالرحمن رد عليهم ويقول لي عمي ابو صيته للاسف ياعبدالعزيز احنا ماهتمينا بهالشي بس بقية القبيله معترضه ..قلت ياحضرة الضابط ما يصير قال لي الضابط اسمح  لي انا مابيدي شي بس حبيت ابلغك عن موعد القضيه وانك ترجع زوجتك لبيت اهلها لين يبت القاضي في هالمساله قلت ياحضرة الضابط اولا اللي رافع الدعوة مو ابو البنت واحد من قبيلتها يعني ياخال ابوي حك ظهري ثانيا قلتها بعظمة لسانك زوجتي يعني مو بنت مطلعها في استراحه قال لي يا اخ عبدالعزيز انا ما بيدي لاحل ولا ربط بس ابلغك عن موعد القصيه بكره وتوقع على استلامك للتبليغ وثانيا ترد زوجتك لبيت اهلها لحد مايحكم القاضي وبكرة موعد الجلسه الساعه 10 صباحا بكره السبت الا هل بلغت اللهم فاشهد وطلعت وانا اصفق كفا على كف وعمي ابو صيته يقول انشالله بيصير خير  ورحت اعلم ابوي واهلي كلهم وكل صار يقول وشلون نسينا هالشي وان نسال عنه .

صباح يوم السبت الساعه 10 صباحا في المحكمة الكبرى دخلنا على القاضي وبدى يقول بسم الله وعلى بركة الله وفي يوم ..الموافق ..المهم ناداني باسمي وقال يا ابني ياعبدالعزيز   قلت له نعم ياشيخنا قال هل انت متزوج من المدعوة صيته قلت له نعم قال لقد رفع السيد ابراهيم آل طخيطخ وابنه السيد مدرع طلب بتطليقكما لانهما يدعيان بانها ذات اصول قبيليه وانت ياولدي خضيري  ,هل انت فعلا خضيري قلت له نعم كما عرفت هذا من والدي وعماني قال وهي قبيليه اذن قلت ايه قال هل تعلم بانه يجوز للسيد ابراهيم ال طخيطخ طلب تطليقكما من بعضكما بامر من المحكمة ..قلت ليه ياحضرة القاضي انا خضيري الله يسلمك مو بوذي لا سمح الله ولا اسمي عبدالعزيز  بن نينتنياهو ولا ارائيل شارون اخوي من الرضاعه ..يعني مسلم واصلي الخمس واشهد بالله واصوم  وازكي واحج ولاني سربوت ولاراعي تتن ولاخمور ولاحبوب  قال لي ياولدي ولكنكما لا تلائمان بعضكما البعض قلت له ياشيخ وشلون مانلائم بعضنا امس فالينها في الفراش فله قصدي انا طالب جماعي وولد ناس ومتعلم وطالب طب وهي طالبة جامعيه وتتكلم 3 لغات ومثقفة مو هذا الجعري مدرع اللي مامعه شهادة رابع ابتدائي ومدري من وين جاي لنا ..قال لي القاضي ياولدي انا اعني في الاصول قلت له بلال بن رباح ماكان عبد وهو احد المبشرين بالجنه قال يابني لاتشبه نفسك بصحابي قلت اجل من قدوتي بيغن ولا كلينتون  قال لي ياولدي ولكن السيد ابراهيم وابنه رافضان ان ترتبط قريبتهم بك قلت له ياحضرة القاضي اذا عمي ابو صيته اساس مايعرفهم ولاشفناهم يوم العرس وش هالقرابه قال لي القاضي ياولدي لاتجادل ولاتكثر من الجدال قلت له يعني وش الحل الان قال لي القاضي ان تطلقها لكي لا تحدث فتنة بين افراد القبيله والاقارب قلت الله يسلمك الفتنه اني اتزوج واحده وثاني يوم بامر من واحد مادري من وين طلع باننا  نتطلق ,, اولا معرفتي بها قبل الزواج والخساير اللي خسرتها في الزواج وثانيا انا امس (ياربييه ماعرفت وش اقول اعرف الكلمة بالعاميه بس لو قلتها للقاضي بيشوتني ) انا انا ..واسمع صوت من ورى يقول امس جامعتها واقول للقاضي انا امس جمعتها قال لي القاضي وهل هي صلاة يابني لكي تجمعها قال لي ذاك الصوت نفسه جامعتها بالالف التفت عليه قلت طبعا بالالف اجل بايش برجلي... ياحضرة القاضي لقد جامعتها امس يعني البنت لم تعد بنتا كما كانت بنتا  قال ليي القاضي اما عن المهر فمن حقك ان تطلب تعويضا ويطمر الجعري وابوة وقالوا ياحضر القاضي مستعدين نعطيه كل راس شهر عشر روس غنم لين نوفيهم ستين راس قال القاضي كلا كلا على الاقل 80 راس قلت ياحضرة الشيخ وش ثمانين الله يسلمك انا مابي الا زوجتي ويطمر الجعري (الجعري حشره صغيره شبهت بها مدرع ) وابوة هو على كيفك يالخضيري ياللي مالك اصل هو قال مالك اصل ولا ماقال وافصخ عليه العقال ولو الله ثم تدخلوا اخواني وعيال عمي ولاجلدته ...قلت للقاضي يعني ممكن سؤال قال تفضل يا ولدي قلت يعني الفرق اللي تقول عنه من اركان الزواج .. قال لي القاضي بالطبع لا ياولدي فاركان الزواج ان المسلم يقترن بمسلمة او كتابيه والمسلمة بمسلم فقط ..قلت له حلو طيب يعني المأذون اللي ملك بيننا ما ارتكب خطا شرعي صح قال نعم يابني هذا صحيح قلت له حلو وصلنا  طيب كيف الان انت تبي تفسخ زواجنا اذا كان زواجنا صحيح قال لي يا ولدي لست انا اللذي اريد فسخ العقد انما هو قريبها السيد ابراهيم وابنه مدرع ولو لم يتقدما هما او أي شخص من افراد القبيله لما طلبت منك تطليق زوجتك .. قلت له حلو وصلنا خير رحم الله والدينا ووالديك الحين اذا جبت تلفزيون 220 وماعندك الا افياش 110 في حجرتك وش تسوي خلاص ماتشغل التلفزيون لا طبعا بتروح تجيب لك محول صح ولالا.. انا ما اطلب غير هذا عطوني حل يعني محوّل شي اهون من اني اطلق زوجتي اللي انا احبها واعشقها وعلشان ما اخسر فلوسي والبنت مايعتبرونها الناس مطلقه وانت عارف ياشيخ كيف مجتمعنا ينظر للمطلقات هاه وش رايك...قال ياولدي هداك الله نحن هنا في محكمة ولسنا في ورشة كهربائيه قلت له ياشيخنا الله يرحم والديك يعني يرضيك اننا نتطلق ومستقبل البنت يضيع ياخي انا طز فيني لاتحسب لي أي حساب بس فكروا في مستقبل البنت ورد علي القاضي يا بني لا يوجد من يعلم عن مستقبل الفتاة اكثر من ذويها ..قلت ياشيخنا موب ابوها هو ولي امرها اسالوه اذا هو موافق ولالا هل انا غاصبه ولا ماسك عليه ذله لاسمح الله مثل انه يلعب قمار في لندن طبعا لا هو وافق من نفسه بعد ما اقتنع فيني (حسيت وجه عمي قمّط يعني انكمش وكانه يلعنّي ويلعن الساعه اللي وافق فيها علي) قال لي القاضي يابني هل يرضيك ان افراد العائلة الواحده يدب بينهم الخلاف والفرقة بسبب زواجك من ابنتهم قلت ياشيخنا يعني اذا طلقتها  هم بيقبلونها وهي مطلقة ..وينتق القراد مدرع (القراد ايضا حشره تشبه الجعري ولكنها تشبه لمدرع اكثر) في وجهي يقول انا باخذها عندك مانع بس انت طلق..ومرة ثانيه اطمر عليه بس هالمره بالنعله قلت لو تموت ماتاخذها انت فاهم ويفكوني عيال عمي بيننا .ومادريت الا القاضي ينزر فيني ويقول يابني لقد امرنا بتطليقك من زوجك قلت احترم نفسك ياشيخ وش زوجك قال زوجك بالعربيه الفصحى أي زوجتك ..قلت له لاعطنا فرصة نحلها ودي ولا بمدرع وابوه يقولون مابه حل ودي الا الطلاق ..وبالفعل انهى القاضى الجلسة على هذا الامر...ورحت في جولات مكوكيه على الشيوخ والامراء ووقفت على باب الحرس يوم الثلاثاء اربع ساعات في الظهرية كل هذا اجمع في وسايط ولكن للاسف مافاد ونفذ حكم المحكمه بتطليقي من زوجتي واعادة المهر اللي قدمته لها لي  من جديد .....

وهانا ذا بعد ستة اشهر في احد بارات دبي في مهرجان دبي للتسوق والصرمحه  ..بينما صيته مازالت مقطنه في بيت ابوها لان ام المملوح مدرع ماترضى ان ولدها يدخل في اول زواج له على مطلقه فقررت انها تزوجة من لبنانيه ولا سوريه وبعدين تزوجه من صيته علشان الولد ماتنسد نفسه... بينما ابقى انا  على  حزني وحالتي مو لانني اكتشفت اني 110 بس لاني اكتشفت ان علمي وشهاداتي واخلاقي وسيرتي الحسنة ماتعني شي في هذا الزمان,ولاحبي للبنت ولامعرفتها فيني تفيد ..مو لشي ولا لعيب موجود فيني بس لاني في مجتمع تتاصل فيه.. جهالته وعاداته الجاهليه..انا ما اعترض على الفتوى اللي تبيح تطليق لهذه القضيه لانني مو رجل دين بس اعترض على شي واحد بس اذا الله قال في محكم كتابه (لافضل لعربي على اعجمي الا بالتقوى ) احنا نعارض كلام ربنا على أي اساس واتمنى اني ماكنت طولت عليكم   ........بلاك هورس

$nawaf$@nimbuzz.com
http://saif.waphall.com